لقاء كارثي

سلمي….هتروح لتوما في المكان بتاعه تعمل حمام مغربي و مساچ و سونا يعني هتظبط نفسها بس من بدري يعني كده مش هنحتاج عشري كمان بس برضوا نعرفوا عشان لو كده يبقب معانا عالخط لاني مش متأكده اوي هي هتروح قبل الفرح بيومين ولا تلاته

ايه….طيب ايه اكلم عشري اتفق معاه الاول

سلمي…..اه و بعدها اتفقي مع البنت

ايه…..اوك تعالي بس يلا اقفي معايا نجيب اللبس

سلمي….يلا.

………………

سلامه…..بص يا تامر انت لو مش هتعرف الوقت نأجل انا عارف انك مشغول في الشقق كلها فا ممكن نستني بعد فرح ليله وعشري لان ايه مش هتنزل المحل الوقت لان الوقت ضيق و هي مع ليله و بيظبطوا نفسهم فاهم

تامر…..انا قولت بس علي الاقل اجيب حد يركب كل الزجاج اللي اتكسر ده و اجيب حد ينضف المكان ويرمي كل اللي باظ فاهم

سلامه…..فاهمك اه بس انا اقصد عشان متضغطش نفسك استني و زي ما قولتلك ايه قالتلي مش هتنزل الوقت حتي لو كان المحل مفيهوش حاجه

تامر….يعني استني

سلامه….اه استني بعد الفرح علي طول نظبط الدنيا هو كده كده ان شاء الله مش هياخد اكتر من يومين ثلاثه

تامر….طيب علي خير

سلامه….بقولك صحيح ما تنزل معانا انا و الشباب انهارده هنروح نشوف البدل

تامر…..انا نازل انا و حودا و نادر

سلامه….طيب ما تيجو معانا

تامر….هتنزلوا علي امته

سلامه…..والله مش عارف بس ممكن سبعه ثمانيه

تامر…..طيب هتصل كده علي حودا و هشوف هيعمل ايه

سلامه….ماشي شوفوا كده و ابقي كلمني

تامر….تمام يا سلامه

سلامه…..يلا سلام يا صاحبي

تامر……سلام.

…………………

وصلت ليله عند اميمه سلمت عليها و خدت قمر في حضنها

ليله….عامله ايه يا قمر

قمر….الحمد لله يا ليله كنت هموت والله امبارح

ليله…..بعد الشر عليكي

اميمه……طمنينا انتي عليكي يا ليله البت دي خلاص بجد اتحبست

ليله…..هتتحبس ان شاء الله هي في المستشفي بس الوقت

اميمه…..طيب دي ممكن تهرب

ليله….لا متقلقيش عليها حراسه و في المستشفي عارفين انها حاله خاصه وعشري وابوه و اخواته متابعين متقلقيش

اميمه …اهلها بقي عرفوا

ليله….اه بس مشوفتهمش لما مشيت مكانوش جم او يمكن راحوا علي المستشفي عشري بيقولي ان ابوها ساكت مش بينطق

اميمه…..هو ليه عين ينطق بعد البلاوي اللي بنته عملتها