لقاء كارثي

لقاء كارثي
أميره أسامه
صاحبة البطل الواحد

~° البارت السابع و العشرين°~
……………

بدأت ليله تحكي بنبرة كلها هدوء تحاول بيها انها تمتص غضبه و تستعطف مشاعره تجاهها و تخليه يسمعها من غير ما يتعصب.

ليله….الموضوع من الاول عشان الكل يعرف حصل انهارده يعني مش عيزاكم يا بنات تزعلوا و تفكروا اني خبيت عليكم

عشري….بس انتي حقيقي خبيتي مش عليهم بس عليا انا كمان

ليله….طيب ممكن تسمعني و اخلص كلامي

عشري….بنظره غضب اتفضلي

ليله….نادين كلمتني الساعه اتنين انا كنت وقتها نايمه اول ما سمعت صوتها كانت منهاره بشكل مش طبيعي و كل اللي بتقولوا ليله تعالي انا في مصيبه

بص عسال لنادين بلوم كبيرررررررر ونظرة خذلان انها مستنجدتش بيه وجعتها

ليله…..طبعاً قومت زي المجنونه من علي السرير و بحاول أفهم في ايه طبعاً مقالتش اي حاجه غير لما تيجي هتعرفي في أقل من خمس دقايق كنت غيرت هدومي و نزلت جري علي تحت كلمت عشري و انا بركب العربيه عشان اعرفوا اني نازله

عشري…..و سمعت صوتك بتنهجي وكأنك بتجري لما سألتك مالك قولتي مفيش

ليله…..لا في الاول قولتلك مفيش بس قولتلك

عشري….لما ضغطت عليكي يا ليله قولتي يعني لو مكنتش فضلت أسال كنت هتقولي انك رايحه الشغل عادي و تكدبي

ليله…..بنبره عاليه نسبيه لكن ثابته انا مش بكدب يا عشري

عشري…..بابتسامه غضب مكبوت تمام طيب تسمي ايه اللي حصل

ليله…..لما سألتني في الاول مكنتش عارفه اقولك ايه لان انا معرفش محبتش اقلقك وبعدين لازم تراعي اني كنت متوتره من صوت نادين فا طبيعي ابقي متلغبطه بس لما انت رجعت سألت تاني قولتلي اللي حصل بالظبط ان نادين كلمتني وهي بتعيط و منهاره و بتقولي تعالي انا في مصيبه قولتلي هجيلك فوراً قولتلك لا استني افهم منها الاول و رجعت سألتني ميدو عرف قولتلك معرفش نادين مقالتليش اي حاجه ولا جابت سيرته و طلبت منك وقتها متقولش اي حاجه ليه

عسال….بنبره هاديه ليه يا ليله ؟ ليه طلبتي اني معرفش؟

ليله…..لاني مخدتش منها الاذن يا ميدو في الاول قولت يمكن في حاجه حاصله مش حابه غيري انا اللي اعرفها لانها مكلمتش حد غيري تاني حاجه جه في بالي ان انت اللي مزعلها او انت اللي عملت معاها موقف وصلها للحاله دي

عسال….بابتسامه عدم استيعاب انا يا ليله؟! يعني من كل عقلك فاكره اني ممكن مش هقولك اوصل لنادين للحاله دي لا هقولك انتي مصدقه اني ممكن اخلي نادين تنزل دمعه واحده او تنام و هي زعلانه

ليله….لا مصدقش طبعاً يا ميدو بس انا بحكيلك اللي كان بيدور في دماغي وقتها و بعدين فكروا في موقفي شويه قبل ما أي حد يلومني صدقوني انهيار نادين و انا لسه صاحيه من النوم شل تفكيري المسافه بيني و بينها دقايق بسيطه بالعربيه بس علي ما وصلتلها كنت حاسه اني بقالي ساعات سايقه

عشري…..تمام كملي

ليله…..بس طلبت من متعرفهوش لحد ما افهم منها الحكايه و كمان اعرف هي حابه تقول لميدو ولا لا

اول ما روحت لنادين حكيتلي اللي حصل ان هادي اتصل بيها ووو

قاطعتها نادين..

نادين….ليله خليني الاول اتكلم انا في الجزء اللي يخصني لان يهمني ان ميدو يعرف انا ليه كدبت عليه

عسال….بهدوء و انا عايز اعرف نادين لما كنا مع بعض و جالك الاتصال من رقم غريب و انا بطلع الموبايل من الشنطه قولتيلي مين قولتلك معرفش رقم غريب رديتي عليا قولتي يبقي اكيد شغل خدتي الموبايل و بعدتي غيبتي حوالي اربع خمس دقايق و لما رجعتي قولتي ده رقم غلط.. سكت ثواني وبصلها بهدوء بصي القاعده دي و الحوار ده انا مش حابه خالص بصراحه معنديش استعداد ابداً اخليكي في محل استجواب فا بيتهأيلي افضل اننا نبقي نتكلم مع بعض بعدين علي الاقل تكوني أفضل

عشري…..لا استني انت بس هي تتكلم محدش فينا بيستجوب التاني هنا بس لازم نفهم اللي حصل عايز اعرف السبب اللي خلي ليله تكدب و السبب اللي كمان كدبت عشانه

نادين….بتوتر من عشري انا هقول علي فكره

عسال….عشري خليها بعدين وأهدي شويه عشان خد بالك يعني انت موترهم انا عارف انه غصب عنك و عارف انت عامل ازاي بس معلش استني

عشري…..بنبره غضب واضحه لكن صوت واطي مش هستني و هعرف و بيتهيألي توترهم الوقت ارحم بكتير من لحظة توترهم و الحيوان ده معاهم وخدي بالك انتي و هي اياً كان السبب اللي محبتوش تقولوا عشانه فا هيبقي مبرر مش مقبول عشان انتي لولا ان ليله عرفت كان زمانك يا مقتوله يا حاصل فيكي حاجه تانيه و بيتهيألي انتي فهماني

بصت نادين بتوتر في الارض

عشري…..وانتي لو مكنتيش قد الموقف يا كنتي حصلتيها يا كان حصل مصيبه اكبر كنتي هترجعي تندمي عليها زي ما ندمتي زمان علي صاحبتك

بصتلوا ليله بنظره حزن و سكتت كلامه وجعها بس هي عارفه انه صح

رشيد…..عشري مش وقته الكلام ده

عشري…..وليه مش وقته يا رشيد بتكلم غلط افرض نادين كانت خبت علي الكل وحتي ليله معرفتش كان وضعها هيكون ايه لما يدخل عليها رااااااجل يكسر فيها و يحدفها علي تربيزه زجاج تفتكر لو ليله مكانتش موجوده كان هيسيب نادين ويجري و يخاف ولا هيقتلها ويخلص عليها عشان يضمن انها متقولش مين اللي عمل فيها كده ولا كان هيعمل ايه تاني يا رشيدددد

عسال……وهو بيحاول يتماسك اعصابه من المشهد اللي تخيلوا من كلتم عشري يا عشرررري اهدأ

ليله……عشري انا مكدبتش دي كانت رغبة نادين و هي اللي طلبت مني مقولش

عشري….و انتي عيله صغيره و برياله عشان تمشي وراها صح

ليله….لا يا عشري انا احترمت رغبتها يعني لو عندي سر حابه اتكلم فيه مع واحده من البنات وطلبت منها متقولش لمخلوق بما فيهم انت تفتكر اللي هقولها دي هتيجي تقول للكل انا نفسي مهما كنت قريبه منك يا عشري تفتكر ان لو عندك سر مش حابب اني اعرفوا وأمنت صحابك عليه هيجوا يقولولي

بص عشري للشباب و سكت

ليله….ايه سكت ليه ؟

عشري…عشان ده مش سر يا ليله نادين كان ممكن يجرالها حاجه الحيوان ده لو مكنتيش عرفتي تسيطري عليه كان زمانك واقعه جنبها

نادين…..عشري خليني طيب اكمل و انت هتفهم انا ليه طلبت كده من ليله اولاً هادي ده انا كنت مرتبطه بيه بس سيبته و عملت علي رقمه بلوك و لو تفتكروا لما كنا في دهب قولتلكم اني سيبت السخص اللي مرتبطه بيه عشان خيرني بالسفر مع صحابي و بينه

ميدو….مش فاهم يعني انتي كنتي علي علاقه بيه لحد قبل ما تسافري علي طول

ليله…..لا لحظه يا ميدو عشان متفهمش نادين غلط نادين تقدر تعتبر انها مكانتش علي علاقه بالشخص ده اصلا مكانس في بينهم حب كتير انا والبنات حاولنا نبعدها عنه لاننا كنا شايفين انه مش مناسب ليها بس هي كانت شايفه انه لا ناس كتير فيها عيوب وعادي انها ترضي بعيوب هادي وخلاص عشان يكون في حياته اي حد عشان تحس ان ليها راجل و سند و ضهر و بقولهالك في وشها ده كان هدف نادين انها تعوض الامان اللي مفتقداه في حياتها طبعاً مش عيب بس اختيارها و تجاهلها لعيوبه هو اللي كان غلط بس نادين انا بقولهالك لا كانت بتحبه و لا كان في بينهم علاقه.

ايمي…..ده حقيقي يا عسال الشخص ده كان بيظهر و يختفي و قت ما يحب يسأل وقت ما يحب كان عارف ان نادين طيبه و بتسامح كان شخص توكسيك و نرجسي كان بيستغلها كان في صفات صعبه اخر فتره مع بعض تقدر تقول ان نادين كانت واثقه من جواها رغم المقاوحه اللي كانت بتقاوحها فينا ان هادي مش هينفعها اخر شهر و نص شهرين هادي مكانش فارق معاها اصلا

ليله….يعني باختصار نادين كانت سايبه هادي بس كانت مستنيه حاجه كبيره تحصل بينهم عشان تعترف بده ولما خيرها بينا وبينه هي اختارتنا و مستنتش تعرف منه حتي هيوافق علي اختيارها ده ولا لا و عملت بلوك لرقمه.

نادين…..بهدوء بيتهيألي انت كده فهمت كويس اني مكنتش مرتبطه بهادي و في نفس الوقت بوافق علي ارتباطي بيك

عسال…..حبيبي هو انتي متخيله اني سألت سؤال زي ده عشان شاكك فيكي

نادين….حتي لو شاكك حقك بس حقي كمان اوضح عشان تطمن

عسال…..وانا في النقطه دي بالذات مش محتاج توضيح

نادين…..تمام المهم يعني سافرنا عادي و محاولش يوصلي بأي طريقه و قولت خلاص هو اكيد فهم و اكيد معجبوش اختياري ليه في المقارنه اللي حط نفسه فيها بينه و بين البنات امبارح كانت اول مره يتصل

انا لما قولتلك ده رقم شغل مكنتس اعرف ان هو لان بجد بيجيلي ارقام شغل كتير من ناس حابه تأجر من ناس حابه تعرض شققها من بنات حابه تطلب اوردر بس لما رديت و عرفت ان هو كان طبيعي اتوتر جداً خصوصا انك كنت معايا معرفتش اقولك ايه هو كلمني و طلب يشوفني رفضت وقولتلوا الموضوع خلص حاول معايا لا مخلصش لازم نتكلم لازم نتفاهم و فيما معناه يعني انه حابب يرجع ورغم انه زعلان مني بس عايز يرجع رفضت خالص و قولتلوا متتصلش تاني وقفلت معاه وعملت بلوك للرقم ده كمان

طبعاً كنت متوتره و مش عارفه اقولك ايه و ده كان باين عليا و انت سألت كتير بس قولت بلاش افتح معاك موضوع زي ده انا هلاص حليت الموضوع و كنت متخيله اني بجد حليته و نهيت الحوار ده خالص

صحيت انهارده الصبح علي رقم غريب تاني رديت و اول ما رديت سمعت صوته معرفش ليه سجلت ليه مكالمته كانت اغرب المرادي كلها تهديد وووو يعني حاولت اقفل معاه اتعصبت جداً عليه اتكلمت معاه بطريقه حاده جداً قالي انتي في فحياتك حد قولتله ميخصكش قالي يبقي فيه قولتله اه و المكالمه معايا علي فكره و فيها السبب اللي خلاني مقولش

عشري…..سبب ايه بقي

نادين…..بهدوء خدت نفس رفعت عينها وهي كلها دموع لما وصلت امبارح انا وميدو طلعت وهو مشي و لما هادي كلمني الصبح و حصل الحوار ده وقولتله اه في حد في حياتي هادي قالي يبقي اللي شوفته كان صح وقالي انه امبارح بعد ما قفلت معاه جه هنا تحت البيت و لمحني و انا راجعه انا وميدو و لما طلعت راح وراه قالي هتقابليني الساعه 8 وهتنزلي غصب عنك عشان لو ده محصلش اللي انتي فرحانه بيه ده و فضلتيه عليا هيتأذي و قالي مش هو بردوه ساكن في مدينة نصر عباس العقاد و قالي العنوان كله انا وقتها اتصدمت قفل الخط و هو بيقولي 8 تكوني عندي عشان 8 ودقيقه هيوصلك خبره

عشري…..بغضب خبر مين ده كله علي بعضه قلم انتي صدقتيه

نادين…بدموع انا خوفت علي ميدو يا عشري لما ليله جات و حكيتلها و سمعتها اللي حاصل وقولتلها اني مضطره اروح اشوفه عايز ايه رفضت و قالتلي لا انا اللي هروح ليه

عشري…..بنظره غضب كمان عابزه تروحي تقابليه لوحدك

ليله….طيب ما تسمع باقي اللي حصل و بعدين اتكلم ولا انت عايز تتعصب وبس

عشري…..انتي كمان زعلاااااانه يعني فوق ما غلطانه بتتكلمي

ليله…..بتنهيده وتحكم في النفس طيب اسمع الاول

نادين…..هي قالتلي متعمليش بلوك علي الرقم ده عشان يعرف انك هتروحي و هليه يتفاجئ بيا بعدها قالتلي هو احنا شاغلين نفسنا ليه هو بيهددك عشان تنزلي و مش هيقدر يعنل حاجه هو بس عابزك تخافي و خدت الموبايل عملت بلوك و قالتلي اي رقم غريب يتصل مترديش و مش هنروح لا انا ولا انتي

قولتلها طيب افرضي عمل حاجه في ميدو قالتلي مستحيل ده جبان لو روحنا قابلناه هيحس انه انتصر علينا و خوفنا و مش هتبقي اخر مره يهددني ولو منزلناش هيفهم انه مش فارق معاكي حتي تهديده و مش هيكررها تاني بس و عملت كده فعلاً و وقتها انا طلبت منها متجيبش سيره قدام ميدو قالتلي بس انا قولت لعشري و انا جيالك و قالتلي اللي حصل بينكم قولتلها قولي اي حاجه قولي مثلا اني عندي مشكله مع ماما او بابا قالتلي مش هقدر اكدب و لما انت اتصلت قالتلي مش هعرف ردي انتي عليه عشان هيبان عليا و انا مش هينفع اكدب علي عشري

بصتلوا ليله بلوم وسكتت

نادين….بس ورديت عليك و بعد كده انت كلمت ليله

عشري….طيب وانتي ليه طلبتي منها كده اصلا

عسال….يمكن ده السؤال الوحيد اللي بوافق عشري فيه و بجد عايز اعرفوا ليه خبيتي عليا و ليه محبتيش اني اعرف

نادين…..عشان مكنتش عايزه ادخلك في مشاكل مش بتاعتك عشان انت مش شبه هادي

عسال…..هي مشاكلك لو انا مس فبها يبقي لازمتي ايه في حياتك يا نادين

نادين….الا مشكله زي دي يا ميدو انا خوفت و قولت كده لليله كانت رافضه انها تكدب علي عشري قولتلها ميدو ملهوش في جو المشاكل و الحوارات دي مش عيزاه يدخل في مشكله مش بتاعته مش عيزاه يتأذي بسببي و لا عيزاه يزهق من الحوار ده و يحس ان الجو ده مش بتاعه فا يزعل مني

عسال….بنظره هاديه وجميله و انتي شايفه بجد اني ممكن ازهق و اتخنق و اضايق والكلام ده

ليله…..ميدو نادين كانت مرعوبه عليك وفي نفس الوقت محبتش تعرفك و قالتلي مش حابه ان ميدو يحس انه دخل في حوار مش بتاعه و خصوصاً ان ده مش جوك يعني مشاكل و تهديدات و حوارت انت في غني عنها يمكن انا مكنتش معاها و كنت شايفه ان لازم حد يعرف بس كمان احترمت رغبتها

عشري…..طيب وليه معرفتنيش انا

ليله…..طيب هسألك سؤال وترد بصراحه لو انا كنت قولتك يا عشري اللي حاصل و طلبت منك عسال ميعرفش كنت هتوافق لو شايف انك كنت هتوافق يبقي انا بعتذر ليك قدام الكل و بقولك اني لسه مقدرتش افهمك كويس بس عشان انا عرفاك و فهماك كويس يا عشري انت كنت هتقول لعسال لانك مكنتش هتقدر تحط عينك في عينه لما يعرف بعد كده و يجي يلومك انك خبيت عنه موقف حبيته كانت فيه ووقتها انت عارف انه كان هيبقي معاه حق و بدل الادورا يا عشري انا لو في نفس موقف ناديه و طلبت من عسال نفس الطلب و انت عرفت انه كان عارف و مقالكش مش بعيد كنت خسرته مش بس زعلت منه.

فضل…..صححححح ليله معاها حق نادين طلبت منها طلب و هي كان لازم تحترم طلبها حتي لو كان السبب تافه و لو انت كنت عرفت من لياه يا عشري كنت هتقول لعسال مكنتش هتخبي عليه

عشري…..حتي لو ماهو حقه لو نادين مشافتش ان عسال واقف جنبها في موقف صعب زي ده هتشوفوا امته هو احنا ايه لازمتنا في حياتهم لو مش هنقدر نحميهم

ليله…..و مين قال ان نادين مكانتش عارفه ان عسال يقدر يحميها هي بس خافت عليه و خافت تخسره

عسال….تخسرني طب ازاي وليه

نادين….قولتلك خوفت موقف زي ده تحس انه مش بتاعك ولا شبهك و تبدأ تتخنق

عسال….بابتسامه هز راسه شمال و بمين بنفاذ صبر يا نادين يا نادين انا مش حابب اضغط عليكي بس انتي غلطتي خوفك عليا مكانش ليه داعي تهديده ليكي بيا خلاكي كنتي ممكن في لحظه يجرالك حاجه

عشري….باااااس اديك فهمت انا بتكلم في ايه من بدري خوفك مكانش ليه لزوم و غلطتي لما خبيتي علي عسال و اسف يعني كنتي غبيييييه

بصتلوا نادين بتوتر من صوته العالي

عشري…..وصاحبتك كانت اغبي منك
عشان معملتش حساب ان مهما كانت قوتها قدام اي راجل قوتها دي ملهاش لازمه بس هي بقي واخده علي جو فرد العضلات

ليله…..بنبرة عاليه وهي رافع حاجبه ليه و انا مكنتش قدها يا عشري مشفتهوش وهو خارج من المكتب سايح في دمه مشوفتنيش وانا قدامك اهو من وقت اللي حصل بنفس لبسي و مفيش فيا خدش رفعت حاجبها اكتر بتحدي و ثقه شعري اللي قدامك ده في شعرايه مني مش في مكانها

عشري…..بنظره غضب و اعجاب في نفس الوقت شوفت بس كمان كان ممكن في لحظه ثقه منك يا جامده كنتي روحتي فيها عشان اوقات ثقتنا في نفسنا مش بتبقي قد امكانياتنا و بعدين لما تاخدي حقك بأيدك انا لازمتي في حياتك ايه

ليله…..ولو انت مش موجود يا عشري افضل مستنيه عشان تيجي تاخدلي حقي انا كده يا عشري و بيتهيألي صعب اتغير

عشري….لا تتغيري يا ليله تتغيري تبطلي تفكري انك لوحدك و جامده وقويه و عارفه تجيبي حقك وحق صحابك انا عارف انك تقدري بس انا بقيت في حياتك يعني كان لازم اكون موجود ليله انا لو كنت لاقيت فيكي خدش واحد مكنتش هسامحك عشان خبيتي عليا

ليله…..وده محصلش و متقلقش عليا انا بعرف اجيب حقي وحق صحابي كويس اوي

عشري….يعني انا مليش لازمه فب حياتك

ليله…..هو انت ليه عايز تعمل مشكله ليه عايز تخليني غلطانه وكداله و خبيت

عشري…..هو انتي معملتيش كل ده

ليله….لا يا عشري انا خلصت الحوار مع نادين و نزلت اعمل مشاويري وقولت هرجعلها اقعد معاها لان هي كامت لسه خايفه و قولت اسليها واشوف الحيوان ده حاول بتصل بيها من اي رقم تاني ولا لا و رجعت فعلاً لما ركنت ولمحت عربيه هادي طرت علي فوق و فتحت بالمفتاح و للاسف انا تقريبا جيت في اخر لحظه وهو شايلها بيحدفها علي التربيزه مكنتش هقدر اقولوا معلش يا هادي اديني دقيقه اكلم عشري يجي يلحقني ولا اكلم عسال يجي يلحق نادين و لا استني معلش يا هادي ارقع صوتين لحد ما الناس تحس بيا انا ونادين و اقف متجريش لحد ما يجوا يمسكوك

بصتلوا بصه طويله و هي متعصبه انا نادين كلمتني وانا بكرب العربيه قالتلي انتي فين قولتلها انا دقايق واكون عندك قفلت معاها و جيت لاقيت كل ده حاصل مخدتش وقت و لو كنت سبقت بدقايق بس مكانش قدر يلمس منها شعرايه و لما لاقيت كل ده حاصل مكانش في قدامي ولا كنت شايفه اي وسيلة نجاة غير دراعي جريت عليه ضربته في وشه و مسكت الڤازه فتحت راسه ولما وقع ربطت ايده ورجله و بعدين اتصلت بالامن و هما بلغوا الشرطه كنت هتصل بيك امته ولا كنت هعرف منين اني لما انزل واسيبها هيحصل فيها كده

عشري…..كل اللي بتقوليه ده تمام بس اوعي تفكري انه داخل دماغي عشان من البدايه غلطتي لما سمعتي كلامها و خبيتي عشان لما سألتك مقولتيش سبب مقنع و انتي اللي عملتيه ده انا لو مكان عسال مكنتش عديته عشان خوفك سمح لعيل زباله زي ده يعمل فيكي كل ده

لمح عسال نظره خوف في عيون نادين من عشري

عسال….خلاص يا عشري الموضوع خلص والحمد لله ان ليله كانت موجوده

ليله…..لا وليه خليه يفضل متعصب و مش طايق نفسه

عشري……هو انتي كمان مضايقه اني متعصب و مش طايق نفسي يا بني ادمه افهمييييي

غمضت ليله عينها من صوته

عشري…..انا خايف عليكي انتي وهي نادين بصت تحت رجلها وفكرت انها لو خبت الموضوع هيخلص و انتي كنتي اغبي منها معملتيش حساب او فكرتي لحظه لو الموضوع طلع جد و كان منفذ تهديده و عمل اي مصيبه اننا كده كده هنعرف و بعدين انتي فهميني بس كده بهدوء

بصتلوا نادين بنظره خوف

عسال….عشري عشرررري كفايه

عشري…..لا لحظه انت بقي عشان برودك ده مدمر اعصابي

رشيد…طيب وحد الله بس انت كمان

عشري….استني بس يا رشيد بالله عليك انت كمان قرب من نادين بصتلوا بتوتر انتي خوفتي علي عسال و كنت هتروحي تقابليه و لياه قالتلك لا ده بيهدد وبيخوفك عشان تنزلي افرصي مثلا منزلتيش وطلع لا بيهدد ولا بيخوفك و كان ناوي بجد يعنل حاجه فيه مش كان المفروض علي الاقل يعرف عشان السبب ده و ياخد باله و لا دي مفكرتيش فيها
انتي متخيله بقي وقتها الموضوع ده مكانش هيتعرف لما ميدو يتأذي من شخص ميعرفهوش ولا مديلوا خوانه طيب متخيله حد فينا كان هيسامحك انتي وهي لو عسال اتأذي

نزلت دموع نادين من غير ولا كلمه

وقف عسال وبصلوا

عسال…..بص انا فاهمك و مقدر عصبيتك بس كفايه يا عشري انت شايف الاتنين عاملين ازاي خلللللصت

بص عشري علي نادين اللي كانت بتعيط و خايفه و بص علي ليله اللي واقفه بعيد عنه وباين عليها هي كمان الخوف.

رشيد…..عشري اقفل الحوار و مسمعش صوتك تاني و انت وهو محدش فيكم يفتح الموضوع و اللي فيكم هيلومهم تاني هيزعل مني اللي حصل حصل اياً كان ايه هو اللي انا فاهمه كويس ان لا نادين ولا ليله فكروا في اللي ممكن يحصل و كل واحده فيهم فكرت في الموقف في لحظته

حسان….بهدوء وبعدين انا مش فاهم انت متعصب ليه عمال لو لو لو ما خلاص مفيش لو اللي حصل حصل احنا في الوقت هما بخير و البني اده ده مقبوض عليه في ايه تاني

عشري….امممم لأ تمام مفيش اي حاجه انا راجل بحب المشاكل و انا اللي غلطان

رشيد…..محدش قال انت اللي غلطان بس أهدي شويه بلاش الحمقه دي علي طول كده دمك فاير

عشري….الموضوع لا حمقه ولا دم فاير كل الموضوع اني مش قادر اتخطي اللي حصل و مش عارف انتوا شايفينه ازاي يعني تكلمني و انا جاي انا وعسال عليهم و اعرف منك بالصدفه انهم في القسم وانا اخر من يعلم تخرج علينا نادين وهي. غرقانه في دمها يعني منظرها لوحده يخلي اي حد ميبقاش علي بعضه صرختها في المستشفي اللي مش راضيه تطلع من ودني منظر البيت و مجرد تخيلي بس وهو شايلها بيرميها وهي لوحدها معاه كل ده و انا راجل عصبي وراجل دمه فاير يعني اللي حاصل ده مضايقني انا بس ولا ايه مش فاهم انا لولا خوفت علي عسال لما مسك الواد طحنه كنت كسرت عضمه و مكانش فرق معايا اي حاجه

حسان…..يا عشري محدش قال انك غلطان و اكيد كل اللي بتقولوا ده احنا حسينا بيه بس يعني هنفصل نقفش علي بعض و نسيب الحيوان ده خلاص خلصت يا صاحبي

نادين…..بهدوء و نظره هاديه عشري

بصلها عشري وهو مش طايق نفسه

ابتسمت نادين ابتسامه هاديه

نادين….انا اسفه لو كنت السبب في كل ده و انت مسدش غلطان علي فكره و كمان انا مبسوطه جداً عشان اتأكدت ان ليا اخوات بجد وخوفك عليا انا وليله انا واثقه فيه

عشري…..بهدوء خرج نفس طويل متتأسفيش وبلاش عبط بس انتوا غلطتوا يا نادين انا بجد خوفت عليكم و منظرك بالنسبالي كان صعب و لما شوفت الحيوان ده و عرفت ان هو اللي عمل فيكي كده مكنتش همسك نفسي و خوفت علي ميدو يتهور اكتر و يتحجز لان هو مكانش متحمل اساساً

حسان….حصل خير الحمد لاه و الموضوع انتهي و بأمر الله هيتحاسب و مش هيطلع منها

ليله…..بهدوء اكيد مش هيطلع منها لقوا في جيبه مخدرات ده

نعيمه…..يلا في ستين داهيه

حسان….بهدوء حبيبي هتمشي و لا قاعده

سلمي…. انت عايز تمشي

حسان انا والله مش عايز اسيبكم بس هنا مستنياني من بدري الساعه بقت 11 و لسه منامتش و بصراحه انا قولت اروح اخدها بكره بس كمان مش عايز ازعلها من وقت ما رجعنا من السفر مقعدتش معايا غير يوم و مش كامل كمان

سلمي…..لا روح طبعاً متزعلهاش انا كمان همشي و بكره هاجي بدري ان شاء الله أطمن عليها

حسان….طيب و ايه ؟

سلمي….مش عارفه ايه ايه

قربت ايه منهم

أيه….نعم

سلمي….يلا خلينا نمشي و نيجي بكره بدري ايه رأيك؟

ايه… تمام يلا بينا

حسان…..قام وقف الف سلامه عليكي يا نودي

رشيد….ماشي ولا ايه؟

حسان…..هنا مستنياني من بدري عشان اخدها تبات معايا معلش يا نودي حقك عليا

نادين…..لا طبعاً روح يا حسان تعبتك معايا والله

حسان…..تعبك راحه الف سلامه عليكي ان شاء الله هطمن عليكي بكره

نادين…..بابتسامه ان شاء الله

سلمي….نودي هجيلك بكره بدري اوك

نادين….ماشي يا عمري

أيه….ليله انتي هتفضلي معاها

ليله….اه طبعاً مش هسيبها و نوني كمان معايا

ايمي….وانا كمان هفضل معاكم

ايه…..طيب كويس بكره هجيلك بدري

سلامه…..ميدو بقولك ايه امشي انا و لا أستناك

ميدو….خليك شويه كده كده هنسيبهم يرتاحوا

سلامه….طيب تمام

مشيوا الثلاثه بعد ما سلموا علي الكل و راح سلامه وقف في البلكونه يشرب سيجاره

رشيد….بهدوء اليوم باظ كنت مخطط مروحش غير وانا محدد كل حاجه مع زوزو و حماده

ايمي….بابتسامه معلش اكيد في سبب للتأخير ده

رشيد….بكره بأذن الله لو الدنيا كامت تمام هروح معاكي بليل

ايمي….ماشي يا قلبي

رشيد…..بقولك ايه انتي هتمشي

ايمي….اكيد لا مش هقدر اسيب نودي هو كده كده لياه و نوني هيفضلوا معاها بس خليني انا كمان

رشيد….طيب كويس بصي قوليلي بقي البنات بيحبوا ياكلوا ايه عشان اطلب و عرفيني العنوان هنا بالظبط عشام يجيب عليه

ايمي….متحملش هم انا هشوف معاهم كده و هطلب اكيد

رشيد….ماشي يا ستي وانا عايز اجيب انا الاكل بدل ما انزل اللف مع نفسي وفي الاخر اجيب حاجه مش بياكلوها بعني كده كده هجيب يلا قوليلي بقي عشان يجي الاكل بسرعه

ايمي…امممم ممكن بيتزا كلنا بناكلها بس متجيبش كتير احنا اربعه بس

رشيد…طيب تعالي اختاري معايا بقي الطعم اللي بتحبوا و عرفيني العنوان

ايمي….بابتسامه رفعت ايده ونزلت تحتها و هي سانده علي صدره و بتختار معاه

قربت ليله من عشري بهدوء و حطت قدامه فنجان قهوه تاني

ليله…..اتفضل

عشري…..شكراً

بصتلوا ليله بنظره بسيطه و بعدين بعدت عينها عنه و فجأه لقت ايده علي كتفها و بيشدها ليه.

ليله…..نعم خير

عشري….بابتسامه هاديه بحبك

ليله….وانا مش بحبك ابعد ايدك عني

عشري…..مش هبعد

ليله…..خير ان شاء الله من دقايق كان فاضل شويه و تقتلتني

عشري…..خوفت عليكي يا ليله و تخيلت للحظه لو مكنتيش قدرتي عليه كان عمل فيكي انتي كمان ايه

ليله….ما عشان مش واثق فيا

عشري…واثق فيكي طبعاً بس يا حبيبي مش ديماً ممكن تقدري علي اللي قدامك وعموماً يعني حقك عليا

ليله…..طيب انا مكدبتش

عشري…..بابتسامه ماشي يا ستي مكدبتيش

ليله…..متاخدنيش علي قد عقلي انا بجد مكدبتش ولا كنت قاصده

مسك كفها بحب باسه.

عشري…..بأبتسامه تسلم ايدك اللي روقت الكلب ده تربيتي

ليله…..بأبتسامه لا يا حبيبي مش تربيتك انا جيالك كده

عشري….ماشي بس بردوا تسلم ايدك لولا ان عرفت ان انتي اللي كنتي مصفيه دمه كده مكنتش هرتاح

ليله…..بضحكه جميله عيب عليك و قت اللزوم ببقي بلطجيه زيك يا بلطجي و خاف علي نفسك مني بقي يعني لو زعلتني في يوم ممكن افتح راسك

عشري…مقدرش ازعلك بس لو حابه تفتحي راسي انا كلي فداكي

ليله…..وحشتني يا بلطجي

عشري…..انتي اكتر يا قلب البلطجي

………..

عسال….يعني انتي لسه مش قادره تفهميني يا نادين معرفتيش طبعي ولا فهمتي شخصيتي

نادين….اكيد لا بس خوفت يا ميدو

عسال…..خوفتي من رد فعلي و مخوفتيش و انتي لوحدك من غيري

نادين…..خوفت وكنت مرعوبه يمكن في اللحظه دي اتمنيت اوي تكون معايا بجد كنت خايفه و في اللحظه دي بالذات ندمت اني خبيت عليك

عسال…..طيب ايه اللي خلاكي تحسي ان ممكن يكون ليا رد فعل في الموضوع ده

نادين….بالعكس انا محستش ان هيبقي ليك رد فعل معين بس انا خوفت تضايق او تحس اني بحطك في حاجه مش شبهك خوفت تزهق و تبعد

عسال….بابتسامه خوفتي ازهق طيب يعني خليني اخد الموضزع بإجابيه شويه و معني كلامك ده انك مش عيزاني ابعد صح

ابتسمت نادين و بعدت عينها عنه بتوتر

عسال….ردي

نادين….يعني انت مش عارف

عسال….عارف بس عايز اسمع

نادين….اكيد مش عيزاك تبعد

عسال….طيب تعود ولا حب؟

نادين….بابتسامه جميله ايه عارف ولا عايز تسمع بردوا

عسال…..بنظره حب مسك ايدها يمكن اكون عارف و اكون عايز اسمع

نادين…..وانا هرد عليك بس لو سألتك انت السؤال ده شايف من وجهة نظرك خوفي من انك تبعد تعود ولا حب هتختار ايه

عستل….يمكن هقولك الاتنين يعني جايز في البدايه تكوني بدأتيها بتعود و اكيد التعود بعد كده بيتحول لحب

نادين…..بابتسامه هادبه و نظره عميقه غلطان يا ميدو و جودك في حياتي مش عاده انت و جودك في حياتي عمل تغيير كامل في كياني كله.

عسال…..بنظره تجنن ده ايه الكلام الكبير ده

نادين…..مش كلام كببر ولا حاجه مو انا مش بحبك عشان اتعودت عليك انا بحبك عشان كل يوم بيعدي و انت معايا قلبي بيختارك من جديد

عسال…..بضحكه جميله لا استني انا كده قلقت هي الخبطه اثرت علي دماغك ولا ايه

نادين….بابتسامه لبه بتقول كده انت كنت شاكك في حبي ليك

عسال…..لا بس يعني اول مره تعبري عن اللي جواكي اول مره احس انك مس متوتره او متلغبطه و اول مره افضل باصص في عينك و متبعديش بسرعه عينك عني و تتكسفي

ضحكت نادين واتكسفت بجد و بعدت عينها

عسال…..بضحكه تجنن ايه ده حسدتك ولا ايه لا ارجعي كده تاني

نادين….اهو انت اللي بتوترني اهو

عسال…لا خلاص مش هوترك انا عايز اسمع كل اللي في قلبك

نادين….هقولك علي حاجه حسيت بيها انهارده اوي

عسال….قولي يا عمري

نادين…..يمكن انا اتحطيت في مواقف كتير مش احسن حاجه و يمكن ديماً حاسه ان لوحدي و مفيش حد ممكن يحميني انا عارفه ان البنات عمرهم ما قصروا و عارفه كويس جداً اني وقت ما هحتاجهم هلاقيهم بس ده كان احساس جوايا غصب عني انهارده انا حسيت نفس الاحساس بس كان مختلف المرادي كنت حاسه انه لا انا مش لوحدي اوي انت جنبي.بس للحظه لما افتكرت موضوع هادي و خوفت حسيت اني عايزه اسمع صوت ماما او بابا مكنتش هقولهم حاجه بس كنت بحاول اضحك علي عقلي واطمنه ان في حد جنبي لما معرفتش اكلمهم علي طول رجعت افكر فيك انت و حسيت قد ايه انا محتاجه ليك مع ان انت بالذات اللي مكانش ينفع اكلمك لاني مكنتش حباك تعرف و بمجرد ما سيبت الموبايل لاقيتك انت بتتكلم وقتها حسيت انك حاسس بيا اوي و مقدرتش امسك نفسي كنت هقولك لولا الباب خبط

عسال…..لما خبط الباب كان هو صح

نادين…..ايوه

عسال…يمكن انا حاسس بيكي من امبارح مش انهارده بس ملامحك و كل تصرفاتك بعد المكالمه خلتني اشك ان في حاجه مضيقاكي و مكنتش مصدق انك كويسه زي ما قولتي عشان كده لما سمعت صوتك فولت لعشري اني رايحلك بس في حاجه مهمه لازم تعرفيها انا بمكن عديت اللي حصل ده مع اني مضايق
بجد بس اوعديني يا نادين انها متتكررش و مهما كان الموقف اللي انتي فيه تحكي مفيش حاجه اسمها مكنتش عيزاك تعرف

نادين….انا خوفت يا ميدو و خوفت اكتر عليك

عسال….حتي لو خايفه كلميني و اعتبري نفسك بتكلمي نفسك و انا اكيد هتصرف

نادين….طيب هو انا ممكن أسألك سؤال ؟

عسال….اكيد يا حبيبي

نادين….هو انت شكيت فيا لما الرقم اتصل بيا امبارح وانا معاك

عسال….شكيت فيكي ازاي ؟

نادين….يعني انت قولت انك مصدقتش انه رقم غلط فا شكيت ان الرقم ده في يعني حاجه تخليك تشك فيا بكلم خد مثلاً

عسال…..اكيد لا يا عمري مجاش في بالي اصلا اني اشوفك بالطريقه دي انا صحيح شكيت بس شكيت ان الرقم ده وراه حاجه ضايقتك لا اكتر ولا اقل انتي ازاي تفكري كده

نادين….مجرد سؤال كنت حابه اطمن

عسال…..اطمني يا عمري بنوتي الجميله انا بثق فيها ثقه عمياء وواثق كمان انها مس هتكرر اللي حصل ده تاني ابداً صح

نادين…..بابتسامه صح

عسال….بصي بقي انا هقوم الوقت عشان ترتاحي انتي و البنات بس هكون عندك بدري عشان نشوف هنروح النيابه امته

نادين…..لا خليك انت يومك انهارده باظ وشغلك معرفتش تشوفوا انا هروح مع ليله

عسال…..مستحيل طبعاً هكون عندك بدري لحد مل تشوفي هنروح امته و بعدين في موضوع كده في دماغي هخلصوا كده انهارده مع نفسي و بكره هتكلم معاكي فيه

نادين….موضوع ايه؟

عسال…..بكره هنتكلم فيه

نادين….طيب قول اي حاجه صغيره

عسال…..بابتسامه بكرررره واسمعي الكلام

نادين….بتنهيده جميله حاضر

رن موبايل رشيد رد و قام بهدوء فتح الباب و راح علي الاسانسير

عشري….ايه ده المجنون ده مشي ولا ايه

ايمي…..بابتسامه لا لا جاي

عشري….انا فكرته مشي مع نفسه كده

ايمي…..لا متقلقش بس طلب اكل ونزل يستلمه

ليله…..اكل ايه هو بيهرج احنا كنا هنتصرف

عشري…..ايه المشكله يعني لسه عايزه تتصرفي و انتوا لوحدكم هو جاب خلاص

ليله….يا سيدي كنا هناكل اي حاجه ليه بس كده

عشري…..هو ايه اللي ليه بس كده يا هبله انتي ده رشيد اخوكم يعني

ايمي….اخوهم هما يا اخويا

عشري….بضحك بصي بتضمن حقها ازاي

ليله….بضحك مالك خوفتي كده ليه

ايمي…..بضحك معنديش اخوات انا غير محمود

خبط رشيد راحت بسرعه ايمي فتحتلوا دخل وهو شايل علي البيتزا

رشيد….يلا خديهم علي المطبخ

نادين…..تعبت نفسك ليه يا رشيد بجد البيت في كل حاجه

رشيد….يارب ديماً يا ستي بس مين فيكم هيقدر يعمل حاجه بعد التعب ده انتوا يادوب تغيروا و تاكلوا ولنتوا يا شباب يلا بينا

عسال…..اه يلا خليهم يرتاحوا عشان بكره النيابه

رشيد….انتوا هتعملوا ايه بكره يعني اجيلكم امته

عشري…..خليك انت في الشغل ولو احتجناك هقولك انا كده كده معاهم انا و عسال

رشيد….لا طبعاً هاجي علي الاقل اطمن علي نادين

عسال…..هتيجي تعمل ايه اقولك تعالي اخر النهار نكون خلصنا و ابقي خليك معانا علي التليفون لو هنرجعهم تعالي علي هنا و اطمن يا سيدي علي نادين

ليله…..اه ميدو معاه حق عشان محدش يعطل نفسه و خلينا نتقابل هنا كلنا و نقعد شويه مع بعض

رشيد….بضحك لا معلش بكره قاعده مع بعض لا خليها بعد بكره

عشري….اشمعني

رشيد…..بابتسامه تجنن عشان هروح عند ايمي في الببت و حالف ما همشي غير لما ابوها يحدد معاد لجوازنا

عشري….ايووووه اهو كده

ليله….بابتسامه واسعه ده بجد

نعيمه….انتي يا بت بتخبي علينا

ايمي…انا خبيت ولا اتنيلت هو اللي مصمم انا مالي

فضل…..قصدك ايه يا ست ايمي هو مصمم وانتي مش عايزه

رشيد….اه صحيح قصدك ايه

ايمي…..بضحك انت بتسمع كلامه وانت يا سي فضل السوسه اللي جنبك بهتت عليك و بقيت بوتجاز زيها

رشيد….من الاخر انا عايزه يسأل عني.براحته عشان بكون متطمن قبل ما نعمل اي خطوه وهو مش راضي

ليله….بضحك مستحيل طبعاً حماده لو حبك هو وزوزو مش هيعملوا كده

رشيد…..ما ده اللي حاصل فعلاً وانا بقي رايح اشوف اخرهم لو مش هيسألوا يبقي نخلص بقي و نحدد المعاد

عشري…..اتكل علي الله و روح حدد خلينا نفرح بيكم بقي

رشيد….خلاص عموما بكره هبقي معاكم علي التليفون احتاجتوني انا موجود محتاجتونيش يبقي لو تمام نتقابل بعد بكره ايه رأيكم؟

ليله…..بضحكه شريره موافقين طبعاً و بما اننا هنتجمع يبقي انا عزماكم علي اكله تجنن

عشري…..بابتسامه رفع حاجبه ده بعينك

رشيد….ايه ده اكله ايه؟

ليله….سمعت كده يعني انكم بتحبوا الفسيخ والرنجه

رشيد…..بضحك اوووف اه كلنا معادا الاتنين دول

فضل….لا انا باكل بس رنجه اكتر

سلامه…..انا معزوم طبعاً و هاجي اول واحد عشري اللي مستحيل يجي

ليله….هيجي و هياكل هو وعدني

عشري….بضحك وانا عيل

ليله….هشرب قهوه

عشري…..بضحك عمك ما شربتي

عسال…..بابتسامه متحاوليش مستحيل

نعيمه…..هو انتوا بتاكلوا عادي

فضل….كلنا بناكل معادا عشري هو بيحب الرنجه بس انا باكل شويه بس مش اوي يعني

نعيمه….خلاص يبقي تاكل يا عشري بس مش اوي

عشري….بضحك بس يا ماما

فضل…..عشري بيقرف منه بجد يعني صعب ياكل منه انا مليش في الفسيخ بس عادي ممكن اكل شويه لكن هو مستحيل يلمسه حتي

عسال….بضحك ادعوا بس يجي

ليله….بابتسامه جميله عشان خاطري انت وعدتني

عشري….بضحك لا متثبتنيش انا يا ستي رجعت في كلامي

ليله…..هتيجي وهتاكل

عشري….هاجي ماشي بس مش هاكل

ليله….هنشوف مين اللي هيمشي كلامه يا بلطجي

رشيد….بضحك ايوه افتحي راسه علي طول

ضحكوا كلهم

عسال….طيب يلا بقي نتفق بعدين و خلينا نمشي الوقت و روحوا كلوا قبل ما الاكل يبرد

عشري….اقفلوا علي نفسكم كويس و لو في اي حاجه كلمونا

ليله….متقلقش يا حبيبي

نادين….بهدوء خد بالك من نفسك عشان خاطري

عسال….خدي انتي بالك من نفسك تاكلي وتاخدي العلاج ماشي يا حبيبي

نادين….حاضر

عسال….اول ما اروح هكلمك و بكره الصبح هتلاقيني قدامك

نادين….اوك

عشري…..عسال انت جاي بكره امته صحيح

عسال….لسه بقول لنادين اول ما اصحي هاجي بامر الله يعني بدري هاجي اطمن عليها و نشوف بقي هنروح امته

عشري…..تمام و انا هبقي احصلك

عسال…طيب يلا تصبحوا علي خير

فضل….بهمس لما اوصل هكلمك

نعيمه…..ماشي سوق براحه

فضل…..بابتسامه ماشي يا حبيبي

سلموا عليهم و نزلوا و قفلت ليله وراهم الباب .

ايمي….ايه يا قلبي تاكلي بقي عشان تاخدي العلاج

نادين…..روحوا بس الاول خدوا شاور و غيروا هدومكم دي ليله يلا روحي طلعي ليكي انتي و البنات هدوم

ليله…..طيب مش تاكلوا الاول عشان الاكل ميبردش

نادين….مش هيبرد روحوا بس غيروا عشان تاكلوا براحتكم

نعيمه…..انا عايزه اخد شاور قبل ما اكل مش قادره

نادين….طيب يلا ادخلي خدي بچامه انتي و هما انا مش قادره اقوم

ليله….لا خليكي هنتعامل احنا

دخلوا البنات طلعوا غيارات ليهم خدوا شاور سريع و خرجوا علي بره كانت نادين سانده ايدها علي الكرسي و نايمه

دخلت ايمي علي المطبخ تجيب الاكل

ايمي….نودي نودي اصحي يلا عشان تاكلي

ليله….هاتي العلب دي و جيبي الاطباق يلا

نعيمه…..نودي نودي يلا قومي

نادين….بهدوء خلصتوا

نعيمه….اه يلا انتي نايمه علي نفسك كده ليه من امته بتنامي بدري

نادين…..تعبانه اوي و جسمي تاعبني

نعيمه….معلش عشان ريحتي شويه ربنا ينتقم منه الحيوان

ليله…..خلااااص خلاص ننسي بقي اللي حصل ويلا قومي كده اعدلي نفسك عشان تعرفي تاكلي

قربت منهم ايمي و هي معاها الاطباق

حطوا لنادين اول واحده

نادين….ايه كل اللي رشيد جايبه ده

ايمي….انا عارفه انا قولتله ميجيبش كل ده اصلا

ليله….هو مين اللي عرف الكل

ايمي…انا كان معايا رشيد و ايه هي اللي اتصلت بيا مخدتش بالي من الرساله كنت سايقه و كنا رايحين علي البيت عرفتوا وطلع ورايا جبنا ايه و مشينا بس هو اللي كلم عشري و اكيد عشري قال لعسال

نعيمه….وانا فضل كان معايا جالي في المول و قعدنا مع بعض و لمحت الرساله بالصدفه جرينا علي طول

ايمي….بس خدي بالك انا لميت الموضوع بهدوء عشان عشري و عسال بس انا لا طيقاكي ولا طيقاها عشان معرفتونيش من بدري

ليله….يا بنتي ما انا حكيتلكم اللي حصل اكيد يعني مكنتش هخبي عليكم بس قولت ارجعلها الاول و اعرفكم رجعت لاقيت اللي حصل ده

ايمي….وانتي يا ست نادين معرفتنيش ليه اشمعني ليله

نادين…..بهدوء عشان هي اقرب و هتيجي اسرع و بعدين انتي كان بقالك يومين مش مظبوطه و محبتش اضايقك اكتر

ليله….صحيح انتي مالك بقالك يومين مش علي بعضك ليه وحساكي مخنوقه

نعيمه…..قافشه هي و رشيد اكيد

ايمي….رشيد لا طبعاً مستحيل

نعيمه….امال

ايمي….انا بقالي يومين من يوم ما اتقابلنا و انا في حوار كده مخليني مش طايقه نفسي

ليله….حوار ايه ؟

ايمي…البينات و اجهزه الكنبيوتر اللي كان متسجل عليها كل حاجه تخص البويضات في المركز راحت وقت اللي حصل المصيبه بتاعت الجو دي و اتحرق جزء من المركز و كانوا طول الفتره دي بيحاولوا ينقذوا بيانات علي قد ما يقردوا بس عشان انا حظي اسود بياناتي ضاعت وسط بيانات كتير و اتحرقت و طبعاً البويضات المتجمده بيبكون ليها كود مكتوب عليها.و بيتطابق مع الاكواد اللي معايا في الفايل

نعيمه…..يعني بيبقي في فايل معاكي مكتوب فيه

ايمي….اه

نعيمه….طيب فين المشكله

ليله….صحيح فين المشكله ؟

ايمي….المشكله ان الفايل ده اختفي ملهوش اثر

ليله…..يعني ايه ملهوش اثر كنتي شيلاه فين؟

ايمي….في البيت عادي في دولابي

نادين….طيب اختفي ازاي اكيد انتي اللي مش عارفه تدوري

ايمي……انا قلبت البيت كله الف مره مبقاش في حاجه في مكانها سالت ماما و سألت امنيه عشان هما بيدخلوا الشقه و بينضفوها ساعات مشافوش حاجه

ليله….يعني زوزو عرفت؟

ايمي…لا قولتلها فايل ليه علاقه بالشغل.

ليله….طيب ما يمكن لاقته و مستنياكي تقولي انتي و تتحجج بكلمه فايل شغل دي ما انتي عارفه زوزو مش سهله يعني

ايمي….لا لا هي فعلاً متعرفش حاجه اصلا زوزو لو لقت حاجه زي دي مش هتستني انا اكتشف انها مش موجوده كانت زمانها فرجت عليا امة لا إله إلا الله عشان خبيت عليها

نادين…..ايوه وبعدين حصل ايه يعني لقتيها في الاخر و لا لا

ايمي….لا ملقتش حاجه للاسف

نعيمه…..طيب عرفيهم في المركز اكيد في حل يعني

ايمي….عرفتهم قالولي مفيش غير حل واحد ان كل اللي بياناتهم اتحرقت يجوا بالفايل اللي معاهم و يطابقوا الاكواد المكتوبه علي العلب بتاعتعم بالاكواد اللي في الفايلات و اللي هتفضل تبقب بتاعتك

نادين…..طيب ولو في اكتر من حد زيك مش معاه فايل

ايمي…..دي المشكله بقي ان في حد يحصل معاه زيي و ميبقاش معاه فايل او مضيعه و المشكله الاكبر كمان ان حتي لو اتبقي كود واحد انا اثق ازاي انه بتاعي علي فكره هي فكرة مرعبه بجد

ليله….بصراحه اه انا لو مكانك وكلهم معاهم الفايلات بتاعتهم هفضل اشك ومش هبقي مرتاحه هو موضوع مرعب

نعيمه…..طيب وليه مرعب ما هي طبيعي اللي هتفضل هتبقي بتاعتهت لان هي الوحيده اللي مضيعه الفايل

ايمي…..خايفه يا نعيمه اكتر حاجه هتريحني اني الاقي الفايل

نادين….طيب مش معاكي منه نسخه مش مصوره منه حاجه علي الموبايل

ايمي….خالص

نعيمه……طب وبعدين راح عليكي كل حاجه كده

ايمي….كل حاجه يا نعيمه التعب و المجهود و التفكير و الفلوس اللي اتدفعت و الفلوس اللي كانت بتدفع كل شعر للمركز عشان يفضلوا شايلين البويضات معاهم كل حاجه

ليله…..طيب ايمي انتي ليه حطيتهم في مركز انا كل ما اجي اسألك في الحوار ده انسي يعني ليه مشلتهمش في البيت

ايمي….اول مره خالص سحبت عينه عرفت من الدكتور اني ممكن احتفظ بيهم في البيت عادي و قالي الطريقه وهي طبعاً لازم تتحط في درجة حراره معينه تجميدها لازم يكون ليه طريقه معينه المهم يعني روحت بيهم و سيبتهم في باب الفريزر شويه و نسيتهم و اتجمدوا خالص لما سألت الدكتور قالي لا باظوا مينفعش يوصلوا لمرحلة التجميد دي فا قولت لا انا مش قد مسؤوليه الحوار ده و بصراجه خوفت زوزو تكتشفهم فا لما عرفت اني اقدر احتفظ بيهم في مكان مختص قولت ادفع فلوس كل شهر و اريح دماغي و دي شغلتهم يعني هيهتموا اكتر هيحفظوها بطريقه احسن لان دي بتتجمد عن طريق النيتروچين بتكون متجمده بس مش لدرجة الصلابه فا حوار كبير

ليله….امممم فهمت طيب هتعملي ايه؟

ايمي….ولا حاجه مفيش في ايدي حاجه

نعيمه…..هو رشيد عرف؟

ايمي….عرف لانه حس اني مش كويسه اتكلمنا و من الاخر رشيد مش فارق مهاه وقالي حتب لو اتجوزنا مكنتش هخليكي تلجأي لحاجه زي دي من البدايه الا لما نحاول مع بعض اكتر من مره

نعيمه….بصدمه ابتسمت رشيد قالك كده بجد

ايمي….بضحك اه والله

نادين…يعني ايه انا مش فاهمه؟

ايمي….بضحك خليكي انتي في العالم البرئ بتاعك احنا العالم بتاعنا مينفعكيش

نادين…..لحظه يعني هي حاجه عيب

نعيمه….مش عيب بس يعني يقصد يحاول هو قبل ما يلجأ للتلقيح

نادين….هز انا فاهمه ان في حاجه مش تمام بس ماشي

ليله….بأبتسامه بعيداً عن قلة ادبه بس هو معاه حق يا ايمي يعني في النهايه ده راجل و خدي بالك بتضايق الراجل اوي لو حس انه لجأ لاي حاجه طبيه

ايمي….ايوه بس في ناس بتبقي مضطره

ليله….ماهو انك تكوني مضطره وضع و ان انتي وهو تبقوا كويسين وضع تاني و بعدين ليه تجربي علي طول قبل ما تحاولي ايمي انتي زي الفل جوازك الاول مستمرش غير شهرين و ملحقتيش شهر منهم كان ضايع في الحوارات اللي حصلت بينكم و من بعدها متجوزتيش يعني لسه محاولتيش اصلا فا ليه تروحي تعملي تلقيح و تخليه هو كمان يتعرض لموقف زي ده قبل ما تحاولوا وبعدين الراجل قالها صريحه حتي لو مضاعتش كان هيحاول الاول و ده حقه

ايمي….انا فاهمه و عموماً انا حاسه ان رشيد صمم علي موضوع انه يروح يتكلم مع حماده عشان كده وبصراحه مش عيزاه يستعجل خايفه بكون اتعاطف معايا و عايز اننا نتجوز بسرعه عشان الموضوع ده

نعيمه….انتي عبيطه رشيد بيحبك اصلاً

ليله….لا يا ايمي رشيد بيحبك بجد و عايز يتجوزك و بعدين حتي لو بيعمل كده عشان يبسطك المفروض تتبسطي

ايمي….عارفه والله يا ليله اللي اقصده انه ميستعجلش و في نفس الوقت ميبقاش متعاطف مع الموضوع عشان انا لو حسيت بكده هضايق بجد

ليله…..يتعاطف ازاي يعني مش فاهمه ؟ هو ماشي يطلب الجواز من اي حد عنده ظرف طارئ مفيش راجل يا ايمي بيتجبر علي حاجه هو مش عايزها و رشيد لو مش بيحبك بجد لو هتموتي قدامه مش هيتجوزك

ايمي….عموماً اللي حصل حصل و الحمد لله علي كل حال بمكن انا كنت مضابقه و منهاره بس لما اتكلم معايا ارتحت بجد و خلاص الموضوع مش في بالي من الاخر سيباها علي ربنا

ليله…..و انا واثقه ان ربنا هيكرمك

نعيمه….والنبي هتبقي احلي عروسه واحلي مامي و بكره الاقيكي بتصوتي من ولادك

نادين….وتصوت ليه تجيبهم هي و تديهملي ملهاش دعوه انا هلعب بيهم

ايمي….عشان تتشغلي عن عسال و يقتلني انا وانتي

نادين…..بابتسامه لا ملكيش دعوه هيلعب معاهم هو كمان

نعيمه….كنلي اكلك يا نادين

نادين….لا انا شبعت خالص خلوني اخد الدولء بقي و عايزه مسكن تاني عشان جسمي واجعني

ليله….ما انتي خدتي المسكن من شويه

نادين…..مش قادره والله يا ليله و بعدين هو انا هنام ازاي

ليله…..عادي زي ما بتنامي انتي اصلا بتنامي علي بطنك

نادين….حاسه اني هصحي الصبح مش هعرف اتحرك

ايمي….طبيعي جسمك هيكسر اوي لما تنامي و ترتاحي بس لما تقومي و تتحركي هتبقي تمام

نعيمه….صحيح هي الخياطه كام غرزه

ليله….سبعه اربعه داخلي و ثلاثه خارجي بس جرح بسيط والله

نادين…..انا خايفه يعلم

ليله….لا ده تجميل و لو هيبقي ليه اثر هيبقي زي خربوش صغير متقلقيش

نعيمه…..طيب بقولكم ايه انتوا توا من وقتي كتير و هموت وانام

ليله….بضحك ده انتي انهارده بوظتي

ايمي….بضحك ايوه صح سهرانه تتحسد

نعيمه…..لا انا بسهر عادي بس بنام في وسط اليوم انهارده منمتش خالص

نادين…قومي طيب يلا شوفي اي اوضه تعجبك

نعيمه….انتوا هتسيبوها لوحدها

ليله….لا طبعاً هنام معاها بس بتسألي ليه بتطمني يعني عشان لو مش هنام هتنامي جنبها

نعيمه…..بابتسامه اكيد

ايمي….اااااه عشان هتموت جنبك و مش هتسحي بيها يابت انتي بتحطي راسك بتضربي الدنيا صرمه امشي يا نعيمه نامي يلا

نعيمه….بضحك ماشي انا مش هرد عليكم يا متنمرين تصبحوا علي خير

البنات….بضحك وانتي من اهله

ايمي….يلا قومي خديها وادخلوا انا هشيل الاكل ده واظبط الدنيا الاول

ليله….ماشي يا قلبي يلا يا نودي تعالي براحه.

دخلوا البنات و ايمي ظبطت الدنيا بعد حوالي تلت ساعه دخلت تبص عليهم قبل ما تنام لقت ليله بتتكلم في الموبايل و نادين نايمه وليله بتحرك ايدها التانيه علي ضهر نادين بهدوء

ليله…..بضحكه جميله خلاص تمام خلبنا نظبطها بكره مع بعض و زي ما قولتلك يبقي يعدي علي أيه و يعيشوا مع بعض و انا هعرف ايه

عسال…..ماشي يا ليله مش عايزه اؤ حاجه

ليله….تسلم يا ميدو تصبح علي خير

عسال….وانتي من اهل الخير

ليله…..بابتسامه تعالي واقفه ليه كده

ايمي…..نامت ؟!

ليله…..في سابع نومه

ايمي….مبدو كان بيكلمها ولا ايه

ليله….اه بيطمن عليها و قولتلوا نامت

ايمي…و ايه مالها في ايه

ليله….بهمس مفيش عايز يعملها مفجأه هبقي اعرفك احسن تصحي و تسمعنا

ايمي….بأبتيامه جميله ماشي انا خلصت كل حاجه اروح اكلم رشيد بقي قبل ما انام

ليله…..يلا روحي يا قلبي انا كمان هطمن علي عشري و بعدين انام

ايمي…..ماشي يلا تصبحي علي خير

ليله….وانتي بألف خير يا عمري

قربت ايمي باستها و باست نادين من خدها و خرجت و سابتهم.

………….

في منزل عسال

طلع ميدو بعد ما قفل مع ليله فتح بالمفتاح ودخل لقي سلامه خارج من غرفة والدته.

عسال…..ايه هما فين؟

سلامه….حنون بتتفرج علي المسلسل بتاعها و ريهام و مصطفي نايمين

عسال….ماما صاحيه يعني

سلامه….اه و كانت عايزه تفهم مني في ايه بس انا والله ما قادر ارغي هربت منها انا رايح اخد دش وهنام مش قادر

عسال….استني لما تاكل الاول

سلامه….انا هموت من الجوع بس مش قادر اعمل اي حاجه و حنون صعبت عليا تقوم قولتلها واكل يلا شوفها واهرب بسرعه قبل ما تقعد تقررك للصبح

عسال ابتسم وهز راسه شمال ويمين و بعدين راح علي اوضه حنان

عسال….خبط و فتح الباب لما سمع صوتها وابتسم ابتسامه هاديه سلامه قالي انك لسه صاحيه عشان كده خبطت

حنان….تعالي يا نور عيني.

قرب منها باس راسها وقعد جنبها

عسال….عامله ايه

حنان….بخير طول ما انتوا بخير ايه هترزح تنام وتهرب مني زي الجزمه ده و لا هتطمني عليك

عسال….لا هطمنك طبعاً مش هيهون عليا تفضلي تفكري في ايه بس اديني كده ربع ساعه وهرجعلك ولا هتنامي

حنان….لا انت عارف اني مش بنام غير بعد الفجر و لسه قدامه شويه

عسال…..خلاص هروح اعمل للواد الرخم ده ساندوتشين كده و اغير و اجيلك

حنان…..لا حول ولا قوة إلا بالله ما انا سألته قال كلنا

عسال….معلش يا ست الكل مهانش عليه يقومك

حنان…طيب وسع هروح اعملكم عشا وانت روح غير

عسال…..اقعدي متقوميش انا هعمل اصلا مش هاكل ولا انا ولا هو حاجه تقيله خليكي مرتاحه

حنان….طب اعملهم انا

عسال….بابتسامه جميله.رفع حاجبه ما تسمعي الكلام بقي يا حنون متعصبنيش

حنان….بضحكه جميله لا وعلي ايه هسمع الكلام خلاص

خرج عسال راح طلع بيض من الثلاجه و طلع خس و جبنه و طلع التوست عمل بسرعه بيض اوملت حط في التوست خس و بعدين الاوملت و حط فوقهم الجبنه و بعدين حط التوست في جهاز التوستر و قفل عليه راح حط كوباية لبن و حطلوا كوبايه و عليها معلقه صغيره اوي كركم

خدهم علي الصنيه كان سلامه لافف وسطه بفوطه وخارج

عسال……أمسك يا عم المزعج

سلامه…ايه ده مصدقتنيش وقامت بردوا

عسال…..لا هي مصدقتكش عشان فتنت عليك بس انا اللي عملتلك مهانش عليا تنام من غير عشاء

سلامه….والله انا ما عارف من غيرك هعمل ايه بحبك ياض

عسال….وانا بحبك علي فكره ده لبن مش عصير

سلامه….بضحكه جميله ما عارف ريحة الكركم ظاهره طب ايه مش هتاكل

عسال….عملت ليا واحد.هرزح بس اخد.دش سريع و هغير واخرج اكله يلا انجز بقي عشان ميبردش

سلامه….ماشي يا اخويا

عسال….تصبح علي خير

سلامه….وانت من اهل الخير

راح عسال علي الباب وقبل ما يقفل وراه

سلامه…..ميدو

ميدو….هاااا

سلامه…..بحبك ياض

عسال….بضحكه شقيه لا بقولك ايه بحبك دي اتكررت مرتين في اقل من دقيقه اظبط و البس هدومك

سلامه….بضحك انت خايف مني ولا ايه

عسال….مبقاش في حاجه مضمونه يا اخويا.و بعدين انت هيست. عايز تنام لا تكون مفكرني مراتك و بعملك عشاء فوق ياض انا ميدو

سلامه….بضحك انا ميدو ااااه بس راجل اوي

عسال…..بضحك سلام يا واطي و علي فكره انا كمان بحبك

سلامه…بضحك معلش انا مرتبط

عسال….بضحك وهو بيقفل الباب واطي

ضحك سلامه و راح يكمل لبسه.

راح عسال علي الاوضه طلع غيار و خد دش سريع بعدين لبس البنطلون وحط التيشرت علي كتفه وراح علي المطبخ خد الساندوتش بتاعه وراح وهو بياكلوا علي حنان خبط وفتح بصلها.

عسال…..ايه صاحيه لسه ؟

حنان…..مستنياك يلا تعالي و النبي ايه اللي انت بتاكلوا ده مش كنت سخنتلكم الاكل

عسال…..لا ده كده حلو اوي من وقت ما جيت مروحتش الچيم ان وسلامه و كنا بنعك كتير في الاكل خلينا نحترم نفسنا شويه بقي قبل ما ننزل تاني

حنان….بالف هنا يا حبيبي طيب ايه يلا احكيلي

كل اخر حته من التوست و مسك منديل مسح ايده و طلع علي السرير

عسال….طيب وسعيلي كده و نيميني جنبك

حنان….انت هتنام ولا ايه لا قوم كده احكيلي

عسال….يا ستي هحكيييييلك بس حضنك واحشني

حنان….بابتسامه جميله طب تعالي بس هتحكي

عسال….هحكي والله اخد حضن بس

حنان….حضنين يا سيدي مش حضن واحد

ضمته بحب و ضمها هو بقوة كبيره و هو بيتنهد تنهيده طويله

بصتلوا حنان بضحكة ام بتفهم ولادها من نظره

حنان…..هو صحيح كل كام يوم كده تيجي تاخد حضن بس في اوقات كده بفهم ان حضنكه وراه حاجه زي الحضن ده كده.عايز ايه يا ميدو

ميدو…..بابتسامه ايه ده ايه ده من امته برشيكي بحضن يا حنون

حنان…..مقولتش بترشيني بس الحضن ده وراه كلام كبير اوي

قام عسال قعد وربع رجله قدامها

عسال….طب صلي علي النبي يا حنون

حنان….اللهم صلي علي النبي بس البس التيشرت ده الاول عشان متبردش

عسال….سيبك من التيشرت الوقت

حنان….لا مش هسيبني خدتوا منه عدلته و لبستهوله لما تتعب هتقول ياريتني سمعت الكلام

عسال….اهو شعري باظ عاجبك كده

حنان…..كده قمر و كده قمرين ويلا بلاش رغي و قولي في ايه.

ابتسم عسال و بدأ يحكيلها كل اللي حصل مع نادين بالحرف

حنان…..طيب وهي المهم كويسه

عسال…امممم يعني مش احسن حاجه بس هتبقي بخير ان شاء الله يعني بس الجروج بتاخد وقت اكيد غير الجرح اللي اتخيط

حنان…..الف سلامه عليها و ربنا ينتقم من الحيوان ده طيب قولي هي موقفها ايه من المحضر ده

عسال…..هي ملهاش علاقه المحضر فيه هو مش فيها هو كان عايز يعمل محضر في ليله صاحبتها عشان هي اللب عملت فيه كده و كان فاكر يعني انه بيضغط عليهم و يبقي محضر قصاد محضر او يتصالحوا بس ليله مرضيتش

حنان….والله جدعه شكلها بتحب نادين

عسال…..اوي هما كلهم علاقتهم ببعض جميله

حنان….هي ليله دي اللي عشري معجب بيها وبيحبها صح

عسال….بابتسامه حفظتي اهو يا حنون اه هي

حنان…..طيب قولي بقي انت عملت ايه مع الولد ده

عسال….بابتسامه انا ولا حاجه

حنان….علي امك يا ميدو ما انا حفظاك كويس

عسال…..بضحكة شقيه بوظت وشه بس حطي نفسك مكاني

حنان….لا ما اهو اسمعني كويس انا معاك في اي حاجه تعملها عشان نادين او البنت اللي في حياتك عموما بس مش لدرجه انك تأذي نفسك يا ميدو يعني بتضربه في القسم احمد ربنا ان الظابط محبسكش لا قدر الله و قتها انا كنت هموت

عسال….بعد الشر عليكي يا ست الكل بس غصب عني والله لما شوفت نادين خارجه من جوه فستانها الابيض كله احمر كأنها مدبوحه مشوفتش قدامي نظره التوهان و الحزن اللي كانت في عينها قتلتني يا امي متحملتش اشوفه عامل فبها كل ده و اسكت بس عدت علي خير الحمد لله

حنان…..انا مستغربه اهلها بجد ازاي محدش فيهم بيسأل

عسال….المشكله انها لما حست بالخوف جربت تتصل بيهم محدش رد و مامتها متصلتش بيها لحد وقتنا ده تعرف هي كانت عايزه ايه

حنان….طيب بقولك ايه ؟ ايه رأيك اروحلها و أسال عنها واهي فرصه نتعرف علي بعض و في نفس الوقت متحسش انها لوحدها

عسال…..بابتسامه بجد يا حنون

حنان…..طبعاً بجد انا عارفه ان الرغي اللي حصل ده و الحضن كنت عابز تطلب كده بس من غير ما تطلب دي الاصول

عسال….بابتسامه طيب بصي هو عشان ابقي صريح الحضن انهارده كان وراه حاجه مع انك كنتي وحشاني والله بس الحضن مكانش عشان تروحي تشوفيها خالص والله مجاش في بالي اصلا

حنان…..بأبتسامه امال عايز ايه يا سي ميدو؟

عسال…..هو انا مش عارف الواد ده هيحصل فيه ايه يعني اكيد هيتحبس ان مكانش عشان اللي حصل مت نادين يبقي عشان المخدرات اللي لقوها معاه و في تفس الوقت لو اتحبس ليه صحاب واهل بره ممكن يحاولوا ينتقموا من نادين او يضايقوها هو اكيد يعني محدش هيسمحلهم بس وارد ولا ايه

حنان….بابتسامه و هي بصاله بتركيز طبعاً وارد المهم يعني طلباتك

عسال….بابتسامه ماهو اكيد انا مش هفضل حاطت ايدي علي خدي ولت هفضل طول اليوم قلقان و في نفس الوقت مش حابب اني اروح ديماً عندها واتشاف كتير و حد.يتكلم عنها او يبصلها بصه مش حلوه ولا انا غلطان

حنان…..بضحك ما نختصر وتقول عايز ايه ؟ اصل اللف والدوران مش لايق عليك دي مهمة سلامه ومصطفي هما اللي بيفصلوا يلفوا ويدورا كده

عسال…..بضحك مانا اتعديت منهم تقريباً

حنان…..طب وبعدين هنحلها ازاي دي بقي يا سي ميدو نجيبها تقعد معانا شويه و تبقي تحت عنينا و انا واختك نخلي بالنا منها وانت مش هنا ولا تجيبها كده من الاخر و تقول اللي في نيتك

عسال….بضحك طب بصراحه انتي عارفه اللي في نيتي

حنان…..ده انت ابن عمري يا ميدو لو مقدرتش افهمك هفهم مين انت عايز تتجوز ياميدو

ابتسم عسال بهدوء و بصلها

عسال…..يعني هو مش بالظبط يعني مجرد اعرفكم علي بعض الاول ااا يعني نكتب الكتاب لحد ما نشوف هنعمل ايه بس تبقب مسؤوله مني رسمي يا حنون وبعدين انا طول ما هي بعيده هفضل خايف عليها ولا انتي ايه رأيك

حنان….بابتسامه لا ده واضح انك مش بس حبيتها دي جننتك علي الاخر

عسال….يعني ايه معترضه

حنان….لا طبعاً مش معترضه لو متمسك بحبك و عارف ان هي عيزاك من جواها بجد انا اول واحده هشجعكم بس هي هتوافق و انت مش شايف انك محتاج تستني تاني

عسال….لو عليا مش محتاج استني ولو عليها هتوافق بس حاليا مش عارف هتعمل ايه يعني انا عارف انها هتتوتر و تعترض و تحاول تعمل نفسها قويه واللي حصل مأثرش فيها و هتقولي زيك كده انت مستعجل و بصراحه انا مش مستعجل بس تقدري تقولي كده و خليها سر بينا انا بتلكك يعني اللي حصل ده جه في صالحي و لو مقدرتش الوقت استغلوا لصالحي مش هيبقي في جواز الوقت

حنان…بابتسامه يعني انت عايز ايه الوقت ؟

عسال….بابتسامه عايز الاول اعرفكم علي بعض عايز افتح الموضوع معاها و نتفق علي معاد عايز من بعد ما اكتب كتابي عليها ابقي قادر اشوفها في اي وقت تجيلكم هنا وهي مش حاسه بإحراج عايز حجات كتير لحد ما نحدد معاد الفرح

حنان….بإبتسامه ماشي يا سيدي يبقي خليني الاول اخد اول خطوه واشوفها بس بلاش تفاتحها في الموضوع غير لما اشوفها

عسال…اشمعني بقي هتعملي فيها حما يا حنون

حنان….مش حما بس كمان حقي اكون مرتاحه و متطمنه علي ابني ولا ايه

عسال….ماشي يا حنون اتفقنا بس بكره وبعده مش هينفع يعني بكره في نيابه هتاخد اقوالها وبعده هتروح تشوف الدكتور خليها بعد بعد بكره ايه رايك

حنان….ماشي يا سيدي اتفقنا بس علي الاقل خليني بكره اكلمها في الموبايل حتي علي الاقل نكسر عندها حتت الكسوف دي لما تشوفني

عسال….بضحكه جميله لا هي هتفضل تتكسف عموماً دي لحد الوقت بتتكسف و بتتوتر مني بس اتفقنا بكره هخليكي تكلميها ربنا يخليكي ليا و ما يحرمني منك ابداّ

حنان….ويسعدك يا ميدو انت واخواتك يا حبيبي يلا قوم بقي علي اوضتك

عسال….انتي بتطرديني يا حنون طب انا هنام هنا وفي حضنك ايه رايك بقي انتي وحشاني والمرادي مش عايز منك حاجه

حنان….يا سلام نام يا سيدي مش هقول لا طبعاً وتعالي يلا في حضني

ابتسم عسال و نام في حضنها

وللحديث بقيه…..