لقاء كارثي

بس هرجع واقول مكنتش اعرف اه حاسس بالذنب و ايمي والبنات زيي عشان كده لازم تعذري زعل ايمي منك هي كمان مضايقه انها محستش بيكي هي والبنات

انا بس كان لازم اعرف يا ليله بس بعد اللي قولتيه و كل التفاصيل دي انا فاهمك و مقدر موقفك و مش زعلان لاني عارف انك فعلا فكرتي بالطريقه دي و الوضع نفسه كان تقيل عليكي و فكره انك تخسري حد منهم او توجعيه او متقدريش حتي تقفي معاه كانت صعبه عشان كده انا مش زعلان منك يكفي انك قدامي الوقت و بخير الكام ساعه اللي كنتي فيهم في العمليه و بعدها بتفوقي كانوا عمر بالنسبالي يا ليله و انك تخرجي سليمه و بخير و ربنا وقف معاكي و طلعتي منها من غير اذي دي عندي بالدنيا اوعي تفكري اني زعلان عاللي في بطنك انتي اللي تهميني مش هو او هي انتي بنتي و حبيبتي و روحي و عمري كله

ليله…بدموع انا اسفه

عشري…..بحب باس كفها متتأسفيش علي قدر كتبه علينا ربنا الحمد لله علي كل اللي يجيبه ملناس نصيب فيه يا لولي بس انا عارف ان ربنا هيعوضك عوض كبير اوي عشان انتي عندك قلب كبير و بيحب بجد كل اللي حواليه بس اوعديني يا ليله متكرريش تاني اللي حصل

مش بس في حمل او اجهاض في صحتك عموما في نفسيتك حبي كل اللي حواليكي يا ليله و خافي عليهم بطريقتك بس كمان خافي علي نفسك مش عشانك يا ستي عشان لو حصلك حاجه اللي خوفتي عليهم دول هيتأذوا لو جرالك حاجه وانا اولهم كمان مش عايزك تزعلي من ايمي اكيد انا مش هقولك هي بتحبك قد ايه انتي اكيد عارفه بس ايمي و البنات كانوا هيتجننوا عليكي انتي لو مش فارقه معاهم مكانتش نعيمه اللي عندها مصيبه نسيتها شويه و ركزت معاكي

ايمي اتوهمت لما شافتك بتنزفي و انا باخدك من العربيه و بجري بيكي الدم كان مغرق المكان و شوفت نظره في عين ايمي مش هنساها بصت عالدم وبصت عليكي و عينها بتتكلم حست انها بتفقدك كانت منهاره ازاي كانت قاعده جنبك و مش حاسه بيكي و دي وجعتها

كمان انا بمكن مضايق من رحاب و محدش فينا بصراحه سكت بس بعد ما هديت عارف ان رحاب لا كانت هتاخد معاكي لا حق ولا باطل بس وقت اللي حصل انا واثق مليون في الميه ان ايمي و البنات ربطوا سكوت رحاب بطريقه تانيه

اكيد انتي عارفه اللي كان حاصل بينا و بين نعيمه جايز يكونوا شافوا فيها شر جايز يكونوا فكروا انعدها قصدت تعمل ده عشان توجع نعيمه اكتر لو جرالك حاجه بعني انتقام زي حوار مريم كده