لقاء كارثي

عشري…هفهمك قولي

ليله….كان في حاله غريبه اوي قبل الحادثه حاجه بجد تقبض القلب كنت حاسه للحظه ان الاكسچين اتسحب من الجو فجأه و من غير سبب احنا اصلا كنا بنكلم فضل علي الموبايل وهو مع سليم و بنضحك وبنهزر كنت فرحانه اوي انهم اتكلموا و كنت فرحانه عشان شوفت فرحتها ان فضل رايح يسلم عليها في المطار ارتحت مكنتش عيزاها تسافر وهي زعلانه منه مكانش في حاجه وحشه بالعكس كل حاجه كانت حلوه بس فجاه حسيت بالاحساس اللي بقولك عليه صوت الكلاكس بتاع العربيه النقل الكبيره مش راضي يطلع من ودني كانه علق فجأه نزلت دموعها عارف لما يبقي في اسعاف عايزه تعدي و مش بتبطل صوت السرينه هو كان دايس عالكلاكس مش بيقف

في التوقيت ده كل حاجه والله العظيم يا عشري وقفت بجد بقيت سامعه صوت نعيمه وفضل و هما بيهزروا و يضحكوا و في نفس الوقت صوت الكلاكس عمال يقرب لمحت العربيه في المرايا جايه طايره عالكوبري و العربيات بتوسعلها بدأت احس ان هي هتخبطنا هتخبطنا حاولت اجي علي جنب بسرعه بس مقدرتش ارمي يمين اكتر لان كان في عربيات ورايا و فجاه العربيه خبطتنا خبطه جامده

انا هنا عقلي وقف لما لاقيت اننا عايشين مش فاكره ازاي قدرت اتحكم في الدركسيون او ارجع اسيطر عالعربيه بسرعه مش فاكره بجد بس كل اللي فكراه صوت صرخه نعيمه لما اتخبطنا وبتقولي حاسبي يا ليله بصتلها بصدمه اننا بخير و ملحقتش يا عشري احمد ربنا انتا متقلبناش لاقيت عربيتهم قدامنا طااايره
حطت ايدها علي وشها و فضلت تعيط

عشري…..بحزن بس يا قلبي بس

ليله…..بدموع معرفتش اسيطر علي نعيمه كانت بتموت بجد جنبي شايفه اهلها قدامها بيطيروا من عالكوبري لحظات بسيطه كانت عامله زي كارثه بجد الكل واقف قدامها و مصدوم الكل نزل من عربيته حاطت ايده علي راسه محدش مستوعب المنظر العربيه نفسها اتقبلت فوق الكوبري و سحبت معاها كام عربيه فجاه حسيت ان القيامه بتقوم مستحيل ده يكون بجد ااكيد حلم او تخريف

انا من الصدمه مكنتش قادره انطق مستنيه زي نعيمه بالظبط يطلع كابوس بس جزء فيها كان واعي كنت حاسه ان نعيمه من كتر الانهيار والعيستريا اللي كانت فيها هترمي نفسها من فوق من نفس المكان اللي وقعوا منه والله العظيم يا عشري نعيمه فقدت وعيها هي كانت متخيله ان هي تنزلهم اسرع عشان تلحقهم بقيت مسكاها انا والناس بنحاول نمنعها و خدتها وجريت عالعربيه المسافه مكانتش بعيده عشان ننزل ونرجعلهم بس والله يا عشري الطريق مكانش بيخلص و حياه ربنا زي الافلام بالظبط لحد ما قدرنا نوصل من الزحمه كان الاسعاف وصلوا و خدوهم العربيه كانت متدمره اول حد كنت واثقه انه مستحيل يطلع منها عايش عادل و السواق كملت بدموع منظر العربيه من قدام كان متدمر يا عشري