لقاء كارثي

نعيمه….مش هقددددر مش هقدر يا ناااس طيب اقولهم ايه اقولهم ابوكم وامكم ماتوا طيب لو قولتلهم كده وهما فايقين من الموت هيبقوا عادي هموتهم بايدي يا عشري والاه العظيم دي مش اختبار عادي و انا مش قده و فوق طاقتي والله يارب فوق طاقتي

حنان…يابنتي بنا مش بيدي حد فوق طاقته لو عارف انك مش هتقدري مش هيديكي الاختبار ده

عشري…..هتقدري يا نعيمه و اخوانك ربنا هينزل في قلبهم صبر و احنا معاكي و هنعرفهم بهدوء معاكي و مش هنعرفهم الا لو الدكتور قال حالتهم تسمح بس انتي لازم تكوني اقوي من كده لان حالتك النفسيه هتنعكس عليهم هما

نعيمه…..قلبي مكسور و موجوع اوي والله الحادثه بتمشي من عيني

ليله…بدموع كل حاجه هتبقي كويسه يا نعيمه و كل حاجه هتعدي زي ما كتير عدي

نعيمه…..المرادي مش زي كل مره يا ليله المرادي الوجع كبير اوي و المصيبه اكبر مش هتعدي يا ليله طب كانوا خدوني معاهم

سلمي…بعد الشر عليكي و بعدين ربنا يخليكي لاخواتك يا قلبي هما محتاجينك اكتر من اي وقت

نعيمه…. اعمل ايه لوحدي من غيرهم يا سلمي انا مش هقدر اعمل اللي كانوا بيعملوه هما مش هقدر اعوض اخواتي مش هقدر اصبرهم او اريحهم انا بموت من غير حاجه هعمل ايه معاهم هما

عشري…لا هتقدري يا نعيمه و انتي اللي هتكوني سبب في قوتهم و صبرهم و رضاهم بقضاء الله وقدره انتي الوقت مش قادره لانهم لسه محدش فيهم فاق لكن لما ربنا يكرمهم و يفوقوا غصب عنك هتقدري تيجي علي نفسك عشان متشوفيش الحزن والوجع في عينهم هتاخدوا بعض في حضنكم و هتهونوا علي بعض

نعيمه…محدش فيهم هيسامحني يا عشري بسببي انا اتحرموا من امهم وابوهم

عشري….متقوليش كده انتي كنتي عايزه توديهم بيت ربنا معملتيش حاجه غلط يا نعيمه اوعي تغكري بالشكل ده

حنان….يا بنتي بلاش تفضلي تلومي في نفسك انتي نيتك كانت خير و بعدين زي ما عشري بيقول كانوا رايحين بنيه صافيه يزوروا بيت الله هو في موته احسن من كده يا نعيمه رايحين لربنا بقلوب صافيه زي ما اتولدوا و مش شرط يا قلبي يتكتبلهم الثواب بالوصول النيه لوحدها تكفي يعني المفروض تفرحي انك عملتي كده

نادين…نوني بيكي او من غيرك يا قلبي ده قضاء ربنا و عمرهم يعني حتي لو مكنتيش قولتي هسافر كان ده اللي هيحصل عمرهم خلص

ايمي…ارضي يا نعيمه و اهدي و احمدي ربنا و ادعيلهم ربنا يتقبل نيتهم دي انتي معملتيش حاجه غلط يا قلبي انتي كنتي عايزه تفرحيهم و تفرحي معاهم كنتي عايزه تبداي معاهم طريق حلو يمكن مكملش بس الاكيد انه اتكتب ثوابه ليهم