لقاء كارثي

ايمي….انا في نص الخامس يعني قربت عالسادس

نجود…علي خير يارب ريحي يا ايمي علي قد ما تقدري يا قلبي عشان متولديش قبل معادك

ايمي….احنا اصلا متوقعين اولد في السابع الدكتوره كانت قيلالي اغلب التوائم مش بيكملوا للتاسع

نجود….مش كلهم في ناس بتكمل بس علي حسب راحتك انتي اصل كتر الحركه بتخلي البيبي ياخد وضعه الطبيعي في الحوض و الرحم بيكون جاهز لنزوله فا انتي علي قد ما تقدري ريحي

ايمي….بحاول والله يا جوجو بس هي الفتره اللي فاتت مكانش فيها راحه اصلا من افراح البنات و تجهيزهم والوقت الظروف اللي احنا فيها يعني في حجات غصب عنك بتتحطي فيها و متقدريش تتأخري عنها ربنا يكملها بالستر بقي

نجود…ان شاء الله خير يارب و يجعل ايامكم كلها افراح

ايمي….اللهم امين يارب

بصت نجود لنعيمه كانت ساكته و باصه للارض و ملامحها حزينه اوي

نجود…..ايه يا قلبي عامله ايه الوقت ؟

نعيمه….بهدوء رفعت راسها وبصتلها وهي عينها كلها دموع عايشه

نجود….يارب العمر الطويل ليكي شدي حيلك يا قلبي و اجمدي كده

نعيمه…..مبقاش فيا حيل خلاص

نجود….معلش حاسه بيكي والله بس لسه الوجع صاحي يا نعيمه و في اوله بس هتعدي صدقيني

نعيمه….و هيفضل صاحي دول امي وابويا يا جوجو

نجود…طبعا و تحزني عليهم العمر كله كمان بس لازم تقوي نفسك يا قلبي عشان الحياه بتستمر ولازم تستمر طول مافيكي نفس انتي و اخواتك لازم تعافروا مع الدنيا لان ده حالها يا حبيبتي احنا كلنا زي ما بيقولوا ميتين بيودعوا ميتين كام حد غالي علينا فارق و اتوجعنا تفتكري الحياه وقفت او استنت حزننا يهدأ شويه والله ولا الهواء بتمشي و بتكمل واحنا بنسايرها

نعيمه…..بصوت مهزوز و ونبره وجع طالعه من قلبها بس انا حياتي وقفت خلاص

نجود….لا يا نعيمه موقفتش يا قلبي كلنا بنمر بنفس الاحساس بس والله مع الوقت الوجع بيهدأ اكيد الم الفراق مش بيتنسي لان اللي راح بيبقي غالي بس ربنا بينزل علي قلبك صبر بالتدريج لحد ما تهدي و تتقبلي الفراق

نعيمه….بدموع مش هقدر حاسه ان مفيش حاجه هتهدا الوجع اللي جوايا صعب بجد صعب اوي في حاجه واقفه علي قلبي تقيله اوي اوي

نجود….هتخف مع الوقت والله العظيم ربنا رحمته كبيره يا نعيمه و زي ما حطك في الاختبار ده و اداكي الوجع ده قادر يشيلوا منك و يخففه بس لازم تساعدي نفسك يا ماما