لقاء كارثي

خلصت صلاه و فضلت قاعده علي الارض تقرا في المصحف دموعها مش بتقف و حاسه انها مش شايفه الكلام قرات شويه وبعدين صدقت مش عارفه تقرا خالص

نادين…اهدي يا قلبي وحياتي عندك هما في مكان حلو اوي و نسمه ونادر هيبقوا بخير و هيرجعوا وسطنا

نعيمه…يارب يا نادين يارب

نادين…يلا يا قلبي تعالي بره شويه متفضليش في الاوضه

نعيمه…عايزه البس بس عشان لما فضل يجي اكون جاهزه

نادين…طيب يلا تعالي انا هساعدك وهاجي معاكي انا وميدو نطمن عليهم و بعدين نشوف هنعمل ايه
ماشي

هزت نعيمه راسها بهدوء وقامت معاها..

…………….

دخل عشري الاوضه خبط علي باب التويلت

عشري….ليله

ليله….ايوه

عشري….انتي تمام ؟

ليله…تمام متقلقش

عشري…طيب محتاجه حاجه ؟

ليله….لا شكراً

قعد علي السرير و ولع سيجاره و استني شويه لقاها بتفتح الباب و خارجه قام و قرب منها مسكها

عشري…تعالي

ليله…..حبيبي انا بخير والله متقلقش

عشري…..شكلك كان تعبان الوقت

ليله….لا وجع بسيط بيروح وبيجي ده طبيعي اكيد بس اتخضيت لما سمعت صوت نعيمه تاني نفس صوتها في الخادثه ونفس صوتها في المستشفي هزت راسها برفض و ملامح حزن فظيعه و قعدها عشري عالسرير

عشري…..معلش غصب عنها الموضوع لسه في الاول و كمان مش سهل ربنا يكون في عونها

ليله….عارفه و يمكن مش هيبقي سهل جايز الوقت يخليها تهدا بس الوجع هيفضل موجود

عشري….امها وابوها يا ليله واكيد مش هتنساهم انا اقصد الحاله اللي هي فيها اكيد مع الوقت هتخف كتير
وانتوا جنبها ده هيساعدها اكتر كمان

ليله….اتمني و جودنا جنبها يبقي ليه تأثير مع اني اشك

عشري…بالعكس هي لو مش معاكم الموضوع هيبقي اصعب عليها الوحده مش بتداوي الوجع يا ليله اكيد في وجع معين لا وحده بتداويه ولا حتي جمع بيداويه بس الاكيد انه بيقلل كتير و بيلهي و انا عارف ان كل واحده فيكم مش هتقصر معاها و هتعمل كل اللي يطلع في ايدها عشانها صح ولا انا غلطان

ليله…بنظره حزن بصتلوا لا طبعا ولا واحده فينا هتقصر معاها اديك شايف البنات هيموتوا عشانها و متقصرين باللي حصل زيها و يمكن اللي واجعني اننا بجد فارق معانا موت نجلاء و عادل و مش قادرين نساعدها بالشكل المطلوب لان موتهم وجعنا هما مكانوش بالنسبه لينا اهل صاحبتنا يا عشري انت اكيد عارف كويس طبيعه علاقتنا ببعض و طبيعه علاقه اهالينا ببعض فا فكره ان في يوم وليله نصحي نلاقي اتنين منهم مبقوش موجودين و اتنين منهم في الرعايه و جعانا بجد