لقاء كارثي
لقاء كارثي
حنان….. يا حبيبي حس بيها سبحان الله
سلامه…. بابتسامه اه والله العظيم حس بيها انا لما صحيت علي صوته حسيت ان دراعي مولع لقيتها سخنه وهو مش ساكت فتحت طار عليها عرفت انه كان حاسس بيها والله
حنان….سبحان الله عامل زي ارثر بيحس بينا كلنا كده
سلامه….ايوه ارثر كده اتنهد بهدوء و بصلها ومسك كفها باسه حقك عليا يا امي ملحقتيش تنامي و ترتاحي بس مكنتش عارف اعمل ايه والله خوفت انزل ادور علي دكتور واسيبها لوحدها
حنان…..اخس عليك يا ميدو دي بنتي و امانه معقول انام وارتاح و مجيش اشوفها واطمن عليها
سلامه…ربنا يخليكي لينا يارب
حنان….ويخليكم ليا يا حبيبي ومشوفش فيكم حاجه وحشه أبدا و اوعي في اي وقت يحصل اي حاجه و تفكر فيا او في تعبي انت تتصل اي وقت و تكلمني ده البيت مش بعيد ولو بعيد هاجي لمين اغلي منكم
سلامه….ربنا يديكي الصحه يا ست الكل
حنان…..اسمع بقي اخوك الوقت يجي هتاخد منه العلاج و هيمشي هو وريهام و انت اطلع نام جنب مراتك وانا هخرج بره اجهزلها اكل عشان لما تصحي تاكل و بعدين همشي وهرجعلها تاني قبل الساعه اتنين عشان اديها الحقنه و تاخد باقي العلاج
سلامه…تمشي فين يا ست الكل انتي مش شايفه ريهام دي سافرت هتفضلوا معايا
حنان…..هتمشي هي واخوها تروح تنام في البيت و انت نام وارتاح
سلامه….وهو ده مش بيتها محدش فيكم هيمشي وبعدين انتي نومك اخف مني لو نمت وسرحت في النوم اخاف محسش بيها انا منمتش بقالي يومين وده التالت اهو بصي بقي انا هدخل ريهام الاوضه التانيه و مصطفي لما يطلع ينام في اوضه و انتي تروحي تنامي مع ريهام و كل شويه كده ادخلي شوفيها لو صحيت صحيت مصحتش ابقي اطمني عليها عشان لو حرارتها رجعت تاني نتصرف
حنان…..طيب هروح اخواتك وهفضل انا بره و كل شويه هطمن عليها
سلامه…..وتروحيهم ليه يا امي والله ما حد هيروح و بعدين ايه هقعد بره دي ادخلي ارتاحي و نامي انتي منمتيش
حنان……هعملها شويه شوربه و هسلقلها فرخه عشان لما تصحي تاكل
سلامه….يا امي الساعه سته ونص ولا داخله علي سابعه اهي وايه عمرها ما هتصحي الوقت هي ملحقتش تنام اصلا و بعدين هي لما بتصحي مستحيل تاكل كده يعني نامي وارتاحي ولما تصحي ابقي اعملي اللي تعمليه
حنان….طيب اللي تشوفوا
سلامه….انا هصحي ريهام تدخل جوه و انتي كمان روحي ارتاحي يلا انا هكملها كمادات و شويه كده لو نمت وانتي قلقتي تعالي شوفيها و ادخلي علي طول
