لقاء كارثي

عشري……بضحك لا اكيد كنت بلعب وخربت الدنيا لعب كمان انا مكنتش بطلع من الشارع

ليله…..بضحك كده يعني كنت طفل برئ طيب قولي في لعبه كانت معلقه معاك غير لعب الشارع

عشري…..مش فاهم قصدك كوره او مسدس والجو ده انا بحب المسدسات طول عمري و الكوره برضوا

ليله….لا اقصد الڤديو جيم يعني لعبه علي الكمبيوتر او الاتاري زمان كان عندكم اتاري صحيح

عشري…. بابتسامه طبعاً

ليله….انا كان في لعبه معلقه معايا زمان و كانت مكسره الدنيا المزرعه السعيده عارفها

عشري….بضحك اه عارفها بس ملعبتهاش

ليله…..بضحك انا كنت بحبها اوي و كنت بتهزهق بسببها تهزيق من امي وقتها كنت في ثانوي و كانت كل ما تدخل عليا تلاقيني بلعبها تفضل تصوت اقولها استني هلم المحصول واقفل والله

عشري…..بضحك انتي كنتي هبله يا ليله

ليله….بضحك والله كنت بحبها اوي علي فكره امي كمان كانت بتلعبها

عشري……بضحك بجد

ليله….بضحك والله العظيم بص هحكيلك ماما الله يرحمها مكانش ليها في الكمبيوتر والتكنولوچيا وكل القصه دي مكانتش بتعرف تتعامل مع اي حاجه فا في مره قالتلي انا نفسي اعرف ايه اللعبه اللي انتي بتلعبيها دي و محصول ايه اللي بتقومي من النوم ظابطه المنبه عشان تلميه

ضحك عشري من قلبه

عشري…..انتي كنتي بتعملي كده بجد

ليله….بابتسامه اه و رحمه امي كنت بظبط المنبه واصحي افتح الكمبيوتر و الم المحصول و ازرع جديد وانام خد بالك مش بهزر اللعبه دي في الوقت ده كانت مكسره الدنيا زي بابچي الوقت كده و انا كنت عامله مزرعه بقي تجنن فا كانت اللعبه مجنناني

عشري….بضحك متخلفه

ليله….بضحك نفخت الدخان اه والله في عندي جزء كده تعبان المهم قولتلها والله دي لعبه جميله و فهمتها كده شويه كانت بصالي بقرف و قالتلي و بتاخدي ايه بقي هتكسبي فلوس يعني قولتلها لا هي بس مسليه تعالي جربي كده بنفسك والله هتعجبك شتمتني وقالتلي بلا لعب عيال فضلت اتحايل عليها و ده مش عشان انا عايزه اسليها انا كنت عيزاها تحبها عشان مترخمش عليا

المهم قعدت وفهمتها تعمل ايه كانت اول مره تمسك ماوس و القصه دي بس فهمت امي يا عشري صحيح مكانش ليها في اي حاجه بس كانت ذكيه اوي ولماحه و بتلقط بسرعه المهم فهمت و اتعلمت قعدت انا وهي حوالي ساعتين اول ساعه كنت بعلمها ازاي تثبت الماوس و ازاي تلم المحصول تاني ساعه كانت اللعبه كيفتها بقيت كل ما احط ايدي علي ايدها عشان اخد الماوس تزوقني و كانت مبسوطه اوي و كل شويه تبصلي تقولي تصدقي حلوه