لقاء كا.رثي

قعدت نعيمه علي الكنبه و راحت نادين قعدت قدامها و دخلت ليله علي المطبخ حطت مايه في كوبايه و وقفت تشرب و بعدين شغلت مكنه القهوه عملت فنجان و راحت قعدت علي كرسي البار ولعت سيجاره و فضلت ساكته.

هما كمان فضلوا ساكتين كل واحده فيهم عماله تقلب في الموبايل شويه و سابت نادين الموبايل بصت علي ليله و رجعت بصت لنادين و شاورتلها بهدوء هزت نعيمه راسها فا شاورتلها علي ليله.

نعيمه….ايه يا لولي قاعده بعيد ليه

ليله…..بصت بهدوء مفيش بشرب سيجاره

نعيمه…..طيب ما تروحي تغيري و انا هعمل عشاء و ناكل و لا ايه رأيك اطلب اكل.

قامت ليله بهدوء و في ايدها القهوه

ليله…..لا يا نعيمه انا شبعانه الحمد لله من وقت ماكلت انا و نادين لو عايزين انتوا اطلبوا انا هروح اخد شاور و هنام

نادين…..طيب لولي بليز خليكي معانا شويه متناميش و انتي مضايقه كده

ليله…..بابتسامه انا مش مضايقه يا قلبي انا بس بجد محتاجه اخد شاور و عايزه انام عشان بكره عندي كام مشوار

نعيمه….طيب هحضر حاجه خفيفه عشان خاطري

ليله…..والله ما قادره كلي انتي و نودي

نادين…..ليله بتعمل كده يا نوني عشان تهرب مني و متاخدنيش انام في حضنها

ليله….بابتسامه هاديه لا يا ستي هاخدك في حضني روحي بس غيري و خدي شاور هدومك في الاوضه التانيه وكلي و ظبطي نفسك و تعالي

نادين….بابتسامه ماشي

نعيمه…..لولي

ليله….نعم

نعيمه…..متزعليش وحياتي

ليله….بابتسامه مش زعلانه يا قلبي قومي بس خدي شاور عشان بقيتي معفنه

ضحكت نعيمه و نادين و بعدين سابتهم ليله و دخلت ..

قعدت علي حرف السرير و في ايدها باقي القهوه و اتصلت علي عشري

اول ما فتح الخط كانت سامعه صوت هواء جامد

ليله…..الوووو

عشري…..ايوه

ليله…..انا روحت يا عشري

عشري…..تمام

ليله……انت فين

عشري…..ليله انا هقفل عشان مش عارف اتكلم الوقت

ليله…..طيب قولي انت فين و حاضر هقفل طمني عليك يا عشري و لا مينفعش

عشري…..لا مينفعش جربي المعامله لما تكون بالمثل بيبقي شكلها ازاي

ليله……طيب انا اسفه يا سيدي هتفضل دي طريقتك يعني

عشري……يلا يا ليله اقفلي

ليله…..طيب قولي هتروح امته

عشري…..لما ابقي اروح هبقي اقولك سلام

قفل التليفون غمضت ليله عينها و فضلت تلف رقبتها شمال و يمين و بعدين قامت بهدوء دخلت علي الحمام.