لقاء كارثي

سليم….فهمتك طيب و نعيمه

نسمه….اااا نعيمه بتسمع اكتر ما بتفهم يعني لو مثلا مثلا حصل بيني و بين نادر او بيني و بين ماما اي مشكله و روحت اتكلم معاها تفضل تسمعني و في الاخر تقولي انا هبقي اكلمهم انا مش ببقي بحكيلها عشان تروح تقولهم حاجه او تتكلم معاهم انا بحيكلها عشان الموقف ضايقني مثلاً و اوقات كمان مش بتسمع اوي بصراحه هي ملهاش خلق اصلا يعني تقدر تقول كده كان بيحصل مشاكل كتير و شد في البيت و قولتلك قبل كده ده كان سبب كبير انها تستقل مع ليله فا بعذرها بصراحه يعني بقول انها تعبت من المشاكل ومش بتحب تسمع حاجه فيها نكد فا مبقتش كمان احكيلها خالص اي حاجه

سليم….بابتسامه فهمتك طيب دورك بقي انا سالت كام سؤال

نسمه….لما بتكون مضايق من شخص بتحب انه يتكلم معاك و تخلصوا المشكله ولا بتحب تاخد وقت لحد ما تهدي

سليم…..علي حسب مين الشخص و علي الموقف

نسمه….ازاي

سليم…..يعني مثلا موقف حصل من ابويا امي اخواتي الكبار اكيد بنتكلم و حتي لو مش حابب اتكلم مقدرش اقولهم سيبوني لما اهدا اكيد

بس ممكن مع صحابي ااا عدي يحصل اي تاتش بينا لو بسيط بردوا بنخلصوا في وقته لكن لو حاجه ضايقتني اوي لا بحب اخد وقتي عشان ممكن وانا متعصب المشكله تكبر

نسمه….طيب حصل بينك انت وعدي قبل كده مشكله كبيره

سليم…..اااا لا خالص عدي ده صاحبي و اخويا الصغير و اقرب حد ليا بنتخانق بنشد بيحصل بينا مشاكل بس اللي هي عاديه بين اي اخوات لكن ولا مره الحمد لله حصل بيني وبينه مشكله كبيره

نسمه…..الحمد لله دورك

سليم…..ماشي قوليلي بتحبي ايه اكتر الشخص يكون شبههك في طباعك و شخصيتك و كل حاجه ولا يكون مختلف عنك

نسمه….بابتسامه هو سؤال حلو بس كمان صعب الاجابه عليه

سليم…..بابتسامه ليه صعب

نسمه…..لان الرد عليه في تناقض شويه ممكن تفكر اني عندي انفصام

سليم….بصحكه جميله لا جاوبي الاجابه اللي جواكي و انا هفهمك

نسمه…..هو اكيد كل واحد فينا بيحب انه يتقابل بناس شبهه تريحوا تفهم طباعه شخصيتهم تكون واحده فيهم من بعض اسلوبهم واحد تفكيرهم واحد ردود افعالهم زي بعض بس ده صعب اوي احنا جايز نلاقي توأمنا في الشكل بسهوله لكن في الطباع والشخصيه صعب يعني ممكن نلاقي حد شبههنا في حاجه اتنين لكن اكيد هنلاقي فرق بينا في حجات كتير