لقاء كارثي

سليم…..ده اكيد ايه فايده اني احكي و اتسمع من غير ما اكون مفهوم ما انا ممكن اقعد مع نفسي في مكان فاضي و اتكلم بصوت مسموع و اخرج كل اللي جوايا بس بتبقي حلوه اوي لما اللي قدامي ممكن يفهمني و يفهم اللي جوايا حتي لو منطقتش

نسمه….صح عشان كده انا بحب اكون مفهومه اكتر لاني من الناس اللي مش بعرف اعبر عن اللي جوايا و دي مشكله كبيره اوي لان اوقات بحس ان اللي قدامي حتي لو قريب مني ممكن يقلل من اللي بقولوا وده مش عيب فيه قد ماهو عيب فيا لاني ولا مره عرفت اشرح اللي جوايا او اللي حاسه بيه يعني كلامي و شرحي للي جوايا حتي لو اللي قدامي هيسمعوا مش هيبقي مفهوم بالنسباله

سليم…..طيب مين اكتر حد ممكن يسمعك و مين اكتر حد ممكن يفهمك

نسمه…..اااا بص هو اللي بيسمعوني كتير بس اللي بيفهموني مش كتير

سليم…..زي مين مثلا

نسمه…..يعني مثلا اللي ممكن يفهمني نادر اخويا تقي و ممكن ليله مع ان انا وليله مش ديماً بنتكلم او مش ديماً بشوفها بس هي من الناس اللي عندها قدره رهيبه في فهم الناس من عيونها يعني انا بحبها اوي بس مش بيحصل بينا كلام بس اوقات لو روحت لنعيمه و هي كانت موجوده و صادفت اني اكون مضايقه بس بضحك عادي تبصلي و تقولي مالك فيكي ايه فادي حاجه حلوه اوي تقي طبعا انا وهي قريبين من بعض ممكن اتكلم معاها ممكن هي تحس من صوتي لو كلمتني اني مضايقه و نادر اخويا نفس الموضوع بيحس بيا اوي بيفهمني جداً سواء من عيني او من صوتي بس

سليم…..حلو طيب نعيمه بابا ماما

نسمه….اااا بابا و ماما يعني ممكن يسمعوني اوقات بيحسوا اني مش كويسه بس انا اغلب الوقت لما بحس اني فيا حاجه بهرب منهم بصراحه لان في حجات مقدرش اتكلم معاهم فيها

سليم….انتوا مش صحاب يعني علاقتكم مش قويه

نسمه…لا بالعكس علاقتي بيهم حلوه جداً بس اي حد في سني يا سليم بيحتاج لحد من سنه يفهموا اكتر فاهم اقصد ايه يعني الصعب بالنسبه لجيلنا هما ممكن يشوفوا انه ايه الهبل ده يعني حتي لو مشكله مثلا بيني و بين حد من صحابي اتفهمت غلط في موقف حد ضايقني بكلمه بالنسبالهم وايه يعني عادي اللي يضايقك ابعدي عنه اللي يفهمك غلط لو بيحبك مش هيفهمك غلط ده اخرهم معايا بس لو حد من سني ممكن يفهم اللي جوايا اكتر و انا اكيد هحكي معاه اكتر