لقاء كارثي

سليم…..ابوه بس انتي كده مش مووديه انتي كده حساسه

نسمه….وفي فرق

سليم…اه الشخص الحساس بيتأثر بأي كلمه تتقال قدامه يعني لو مضايق اوي و حد قالوا كلمه بسيطه تهديه ممكن يتغير مزاجه في لحظه و العكس صحيح بس الشخص المتقلب المزاج بيقلب في لحظه حتي لو من غير سبب يعني تبقي بتكلميه و فجاه يقفل و ميبقاش عايز يتكلم يتعصب ياخد جنب يعتزل الناس فتره مزاجه يرجع كويس فا يرجع تاني يتعامل هو في كل الاحوال بيكون غصب عنه هو شخصيته كده بس انا مش بعرف اتعامل تحت رحمة مزاج اي حد فهمتي

نسمه….فهمت لا انا مش كده انا زي ما قولتلك بتأثر بسرعه بالحلو او الوحش

سليم….يبقي انتي كده حساسه مش مزاجيه بس خدي بالك الشخص الحساس اكتر حد بيتعب

نسمه…..اه جداً خصوصا لو مبسوطه و حد ضايقني بحاجه ممكن تبان بسيطه لحد غيري

سليم…..هو انك تبقي حساسه دي مش حاجه وحشه دي حاجه تبين ان قلبك جميل بس كمان مينفعش اي حد يأثر علينا او يضايقنا بسهوله لازم يكون عندك كنترول علي مشاعرك مش اي حد ياثر فيكي و ينكد عليكي خصوصا لو السبب عبيط

نسمه….معاد حق هحاول طيب دورك

سليم…..امم بتحبي تكوني مفهومه و لا مسموعه؟

نسمه…..طيب ممكن توضح اكتر

سلبم….يعني بتحبي ان الشخص اللي بتتعاملي معاه يكون بيفهمك اكتر و لا بيسمعك

نسمه…..هو الاتنين بس لو هختار واحده اكيد اللي يفهمني لان في في حياتي ناس كتير ممكن تسمعني بس اغلبهم بيسمعوني عشان ااااا مش عارفه افهمهالك ازاي

سليم….قولي وانا هفهمك

نسمه…..اااا يعني عارف انت لما بيكون في حد بيحبك و عايز بس يعمل اللي عليه و يسمعك مش اكتر يعني هو بيحبك و فاكر انك لما تتكلم و هو يسمعك يبقي كده ريحك تفضل تحكي اللي جواك و هو بيهز راسه و سامعك من الاخر بيديك مساحتك في الكلام و بس

سليم….اه اللي هي بتخلص بمعلش في الاخر او عايز يحسسك انه سمعك للاخر و عمل اللي عليه

نسمه….بالظبببببط يعني تحكي اللي جواك و هو ساكت بيسمع بس يمكن احياناً بنحب اللي قدامنا يسمعنا و يدينا فرصه نطلع كل اللي جوانا معاه بس كمان بتلاقي نفسك في الاخر قولت كل اللي جواك و محستش انك مرتاح هو اه كويس ان في حد في حياتنا ممكن يدينا مساحه من وقته لان في ناس حتي السمع مش بتسمع بس اغلب الوقت لما بتفضفض و بتطلع اللي جواك بتبقي علي الاقل حابب تحس ان اللي سمعك فاهمك و حاسس بيك