لقاء كارثي

حسان……بكره ازاي انتوا خارجين؟

شادي….لا لسه مكتبش الدكتور خروج

حسان…..طيب هجيبها ازاي اصلاً هنا لو عرفت انها ولدت هتشبط فيها و مش هترضي ترجع مع سلمي هتقعد ازاي في المستشفي

شادي….والله يا حسان انا عمال اقنعها بس هي مصممه و كل اللي طالع عليها هنا بتعيط هنا بتنادي عليا و عيزاها بكره

حسان….طيب معلش لو هي تقدر تكلمني اديهاني

شادي…..اهي خد معاك كلمب حسان

علا….ايوه يا حسان

حسان….ايه علا اخبارك ايه؟

علا….الحمد لله

حسان….الحمد لله في ايه بقي مالك؟ هنا زي الفل و كويسه

علا……ماشي بس انا عيزاها بكره يا حسان من فضلك و حياة هنا عندك جيبهالي

حسان…..طيب اجيبهالك المستشفي ازاي و انتي اللي قولتي مش عيزاها و غلط عليها افرضي جات و شبطت فيكي و صمتت تفضل معاكي هيبقي ايه الوضع

علا……لا انا هقولها تمشي معاكم تاني بس اشوفها و اطمن عليها بنفسي

حسان….يعني انتي مش مصدقه اي حد فينا طيب هي لو فيها حاجه انا هكلمك كده

علا…انا عايزه بنتي يا حسان هنا مستحيل تقعد كل الوقت ده من غير ما حتي تتصل عليا و شوفت كابوس بتعيط فيه جامد انا عايزه اطمن عليها بنفسي

حسان….حاضر يا ستي انا بكره هجيبهالك و يارب بس تري تقنعيها تسيبك و تمشي بعد ما تعرف انك ولدتي

علا……انا هقولها متخافش بس اوعي تضحك عليا يا حسان

حسان…..لا والله بكره بأذن الله هجيبهالك

علا…..اوك شادي معاك

شادي…..ايه يا حسان

حسان….خلاص بكره بأمر الله هجيبها واجي

شادي…..ماشي خلاص هنستناك

حسان….ماشي يا حبيبي مش عايز اي حاجه

شادي……لا سلامتك يا صاحبي

قفل حسان معاه واتصل علي سلمي حكالها اللي حصل.

سلمي….طيب يا حبيبي تمام خليها تشوفها عشان تطمن بنفسها هي اكيد وحشتها بردوا

حسان…..طيب قوليلي انتي نازله علي الساعه كام كده عشان لو نازله بدري اجي اخدها و لو هتنزلي علي ثلاثه اربعه كده اجي في الوقت ده احسن

سلمي…..بص هو ادام هنا هتروح فا خليني انا كمان اروح معاها لاني مكنتش عارفه اروح ازورها و هي معايا و بنسبه 80 في الميه بكره مش هروح العياده

حسان…..اجازه

سلمي….هو مش اجازه بس انا كان عندي بكره عمليه كانت هتطول شويه بس المفروض في تركيبه معينه توصلي من المعمل انهارده موصلتش طبعا و اتأخروا عليا فا لو لحد الساعه عشره الصبح متصلوش عليا و قالوا انها جاهزه هضطر اخليها بعد بكره فا مش هيبقي في شغل انا كنت مأجله كل المواعيد عشان العمليه دي