لقاء كارثي

سلامه…انتي عبيطه يابت بتشكريني علي حاجه هي واجب عليا

ايه….انا بشكرك انك مقصرتش او حتي حاولت تظهر انك مضايق يعني احنا مفاتش علي جوازنا كتير و دخلنا في حجات اكبر مننا

سلامه…ولا هبين يا ايه لان من جوايا مش مضايق واللي بيبقي جوه اي بني ادم غصب عنه بيظهر حتي لو حاول يخفيه انا حقيقي مضايق عشان نعيمه مضايق عشان عم عادل ونوجا و عشان اخواتها ايه محدش فينا عارف بكره مخبي ليه ايه يعني اللي حصل لنعيمه انهارده ممكن يحصل ليا بكره

ايه…بعد الشر

سلامه….الموت مش شر يا ايه و الاقدار لو مكتوبه منقدرش نهرب منها و اي حد فينا مهما كان يبان قوي بيحتاج ناس جنبه تسنده و توقفه علي رجله متسيبهوش في الابتلاء لوحده اختبارات ربنا مهما كان ليها حكمه يا ايه بس احنا بشر و الاختبارات دي بتبقي قويه علينا

منقدرش نكمل بوجع او مصيبه من غير طبطبه او كلمه تهون منقدرش نمشي في الدنيا شايلين جبال من الوجع والهم بطولنا وعلي فكره ده مش بس للست الراجل كمان اوقات بيتحط في اختبارات ميقدرش عليها لوحده الصحاب والاهل دول رزق كبي رمن ربنا يا ايه يمكن ربنا خلقنا و وظف كل واحد في مكانه صاحب اخ ام اب خال عم زوجه اولاد مش عشان بس دي دوره حياه ولازم تستمر لكن عشان كمان في حجات هنقابلها مش هنقدر عليها لوحدنا

اوعي تصدقي اي حد مهما كان قوي يقولك انا قد الدنيا لا يا ايه احنا اضعف خلق الله و مفيش فينا حد قد الدنيا واختباراتها و ابتلاءتها كلنا بنضعف و بنتوجع وبنقع و بنستسلم كمان بس وجودنا جنب بعض هي دي الرحمه اللي ربنا بيبعتها لينا في وقت احنا فيه مش قادرين علي اختباره لينا بالظبط زي المرض و الدواء ربنا بيخلينا نتعب بس كمان مدينا الدواء احنا في حياه بعض كده دواء يعني وجودب جنب نعيمه او عدم تقصيري علي كلامك مش بس عشان ابه تشوفني راجل جدع و زوج وقف جنب صاحبه مراته لا خالص جايز انا جزء من وقفتي عشانك لان ده واجبي تجاهك اني اشاركك في اي حاجه تخص اهلك صحابك شغلك وقت ما تحتاجيني تلاقيني اللي انتي مش هتقدري عليه انا هكون بدالك فيه و هعملوا بس جزء تاني اكبر كان واقف مع نعيمه لانها اختي و في موقف متتحسدش عليه هي في مصيبه وكارثه حقيقيه لو احنا موقفناش معاها و قسمنا معاها الوجع منستحقش نكون في حياتها خصوصا ان ابوها الله يرحمه و اخوها لا حول ولا قوه يعني ملهاش غيرنا في الوقت ده احنا اخواتها ورجالتها و نشيل عنها فا اركني بقي اني عريس جديد واني ماحقتش افرح و لا لحقنا نقعد في بيتنا كل ده بيتعوض يا ايه و الايام بينا هتكون كتير و هنرجع احسن من الاول كلنا لكن اللي مستحيل يتعوض هو وقفه من القلب مع شخص كان محتاج وقفتنا دي فهمتي يا ايه فا لو هتعملي حسابي في اي حاجه عشان تبقي ست بتقوم بكل طلبات جوزها علي اكمل وجه انا اللي بقولك في دي بالذات متعمليش حسابي لو عايزه تفضلي معاها خليكي يا قلبي و انا هبقي معاكي كمان