لقاء كارثي

ريهام….انا كل ما اكلم زوزو انا او ماما تعيط بجد مضايقه عشانها اوي اول مره اشوفها كده

محمود….هي طول ما هي قدام ابويا ساكته وعامله فيها جامده تبقي لوحدها تقعد تعيط و ماسكه الموبايل تتفرج علي صور نوجا في اخر كام مناسبه معاها و تعيط كمل بتنهيده والله ما عارف اعملهم ايه

ريهام….هي كل حاجه بتاخد وقتها بس تطمن ان شاء الله خير و انا واثقه ان لما نسمه ونادر يقوموا بالسلامه هيحسنوا نفسيه الكل

محمود….نفسيه ايه بس انا مش خايف غير اما يفوقوا ويعرفوا معرفش نادر هيعمل ايه و نسمه كمان ده الحزن هيبقي اكبر

ريهام….حتي لو بس فكره انهم قاموا بالسلامه و نعيمه خدت نفسها شويه هتريح الكل يا محمود

محمود….يارب يقوموا بالف خير و ميبقاش فيهم حاجه توجعنا اكتر من كده

ريهام….متقلقش ربنا كريم خير والله

محمود…يارب يا ريهام

ريهام….انت بتروح تبص علي محمود

محمود….طبعا انا كل يوم انا وتامر عنده و حتي بقابل اخوات عشري اوقات واخوات فضل عشان احنا بنروح بليل

ريهام…يطب بتدخلوا ازاي

محمود….عادي في طرق كتير يعني الناس اصلا عرفونا هناك و عارفين اننا مش بنطول بنتطمن بس عليهم و بنمشي

ريهام….طيب بتسالوا عليهم الدكاتره يعني فعلا الكلام اللي بيقولوا لنعيمه بجد ولا بيريحوها وخلاص

محمود….نفس الكلام بيطمنونا و يارب يكونوا مبيكدبوش انا من امبارح مرعوب علي نادر بسبب قلبه اللي وقف مرتين ده

ريهام…..انا كمان خوفت بجد لما عرفت بس والله حاسه ان كل ده هيعدي

محمود…يارب يا ريهام نخلص بق يمن الكابوس ده امبارح ابويا قال جمله كنت حاسسها غريبه بس لما ركزت فيها حسيت انه معاه حق

ريهام…..قال ايه

محمود…سمعته وهو بيدعي مع نفسه عمال يقول يارب احنا تعبنا مش عارفين نحزن علي اللي مات و لا نخاف علي اللي متصاب يارب خلينا نطمن و ندي الحزن حقه ابويا حاسس انه مش عارف يحزن علي عم عادل ونوجا لانه قلقان علي نادر ونسمة و دي حقيقه حتي لاحظتها في نعيمه هي مش عارفه تدي الحزن حقه لانها مرعوبه علي اخواتها

ريهام…..كلنا يا محمود بس يمكن دي من رحمه ربنا علينا لان وجع الفقد ده وحش اوي و الحزن بتاعه بجد صعب جايز ربنا خلانا نتلهي في خوفنا وقلقنا علي نسمه ونادر و حتي علي البنات وتعبهم عشان يهون شويه وجع الفراق و الكارثه اللي حصلت دي صدقني ربنا حتي لما بيوجعنا بيكون رحيم بينا