لقاء كارثي

نعيمه…عارفه يا توما انا حتي طلبت ده من الدكتور في البدايه بس وقتها مكانش ينفع

الدكتور….هو حاليا ينفع و استاذ توما حابب يشوف ليهم الافضل بس صدقوني لو هيتعمل عشانهم اكتر من اللي بيتعمل هنا هقولكم انا معاكم جدا

فضل….بص يا دكتور حضرتك عارف حالتهم اكتر مننا والانسب ليهم اكيد هيتعمل

الدكتور…..يبقي احنا متفقين خلونا نروح بقي نشيل الجهاز عن نسمه و نتطمن عليها

راحوا كلهم معاه و دخل فعلا الدكتور مع التمريض و شالوا عنها الاجهزه و فضل واقف جنبها شويه و ملامحه كان عليها رضا ان حالتها افضل

نعيمه كانت عماله تعيط هي و تقي بس مبسوطين و حاسين براحه كبيره خدت نعيمه نفس طوووويل لاول مره من ايام تحس بالراحه دي

عدي كان عمال يطبطب علي ضهر تقي و يطبطب علي سليم اللي كان واقف مبسوط وعمال يحمد ربنا هو كمان اخيرا حس ان نفسه بدأ يرجع طول الفتره اللي فاتت ساكت و كل اللي بيجي في باله اخر كلام دار بينه وبين نسمه وقت فرح نادين لما طلبت منه يبقي مبسوط حتي لو مش موجوده كان خايف عليها جدا

تقي كمان حست براحه بعد ما كانت عماله تعيط من الصبح و بقالها ايام بتحاول تصبر نفسها و تلهي نفسها بمحاضرات نسمه.

فضل كان عمال يمسح دموع نعيمه و يحاول يضحكها و يبسطها

توما…..بطلي عياط بقي ماهي كويسه اهي بذمتك وشي حلو ولا لا

نعيمه… اوي والله يا توما يا وش الخير الحمد لله عقبال نادر يارب

فضل…الحمد لله

توما…قريب متخافيش هيبقوا زي الفل والله انا وصيت الدكتور كتير متقلقيش و هيعمل اكتر من اللي يقدر عليه خير والله

نعيمه….ربنا يخليك يا توما مش عارفه اقولك ايه بجد

توما…ولا اي حاجه هما اخواتي وانتوا كلكم اخواتي و انا اللي خلاني اجي من غيرما اقول كنت خايف يكون بيثبتكم قولت اكيد هيقولي الحقيقه بس والله مش بيكدب عليكم و حالتهم فعلا في تحسن

نعيمه…الحمد لله يارب

فضل…..بابتسامه انا عارف من نعيمه والبنات انك جدع بس انت طلعت جدع بجد يا توما

توما…. بابتسامه الله يكرم اصلك انا اخوهم يا فضل و هما اخواتي و الجدعنه دي هما قدموها كتيرقبل مني انا معملتش اي حاجه ياريت كان في ايدي اكتر بكتير من كده انا مهما عملت مش هقدر ارد لو جزء واحد من جدعنتهم معايا و حبهم ليا

فضل… بابتسامه ربنا يجعلكم ديما سبب في خير لبعض يا توما وانت تستاهل كل خير