لقاء كارثي

نغم…..تامر انت كده اللي بتضايقني بجد و بتخليني مش قادره ابص في عينك

تامر….ليه مش قادره كاسر عينك انتي عبيطه يا نغم بجد اصلا عيب تحطي ايدك في شنطتك وانا واقف معاكي

نغم….ده حقك يا تامر و دي حاجه تخصني في بيتي يعني كده كده لازم انا اللي ادفعها هو انت لما بتجيبلي حاجه من نفسك زي ما بتجيب لايه او سلمي بقولك لا هحاسبك مش باخدها عادي منك بس الوقت الوضع مختلف

تامر…..نغم انا مبحبش اتكلم كتير حطي فلوسك في الشنطه و اقفلي الحوار ده عشان الموضوع بسيط اوي

نغم….تمام يا تامر بس علي فكره انا عمري ما هطلب منك اي حاجه تاني حتي لو مش عارفه اتصرف لوحدي

تامر….تمام هنشوف جربي كده و وقتها متزعليش من رد فعلي

نغم…..هتشوف و مش هتعمل اي رد فعل لان انت اللي هتبقي السبب

تامر…..نغم هو انتي لسه مش معتبره ان انا او اقصد كلنا بقينا قريبين منك

نغم….لا طبعا انتوا اقرب حد ليا اصلا انا مبقاش ليا غيركم بس انا عايزه اتعامل براحتي معاك و معاكم كلكم من غير ما احس اني محرجه تامر انا عمري ما حاولت اطلب من حد حاجه و بجد الموضوع بيبقي تقيل عليا اوي و محرج انا مش عايزه احس الاحساس ده معاكم عايزه اكون براحتي و علي طبيعتي عايزه لما احتاج حاجه اجيبها عادي و انا اللي احاسب عليها مش اتحرج عشان واثقه انكم مش هتخلوني ادفع وبعدين يا تامر انا عايزه تحس اني بقيت شخص طبيعي وقفت علي رجلي اشتغلت معايا فلوس بخلص فلوسي علي اي حاجه محتجاها و بشتغل اكتر عشان اجيب فلوس تاني لان ده الطبيعي

تامر ….تمام بس تقدري تشوفي الموضوع بشكل تاني اعتبريه يا ستي هديه مني للبيت الجديد و بعدين انتي مش اول فلوس خدتيها من شغلك صممتي تجيبي هدايا و حجات و انا سيبتك و خدت الفلوس منك صح

بصتلوا نغن و سكتت

تامر….يبقي الموضوع بسيط اهو لكن دي حاجه مختلفه انا حابب انك تعتبري الفلوس دي هديه مني للبيت بس كده تمام و اوعدك يا ستي اي حاجه تاني تطلبيها هحاسبك عليها تمام

نغم…..ماشي بس وقتها هترجع تقول دي عشان اي حاجه تاني

تامر….لا مش هقول من هنا ورايح هحاسبك مبسوطه كده

نغم…..بابتسامه ضيق بسيطه تمام يا تامر

تامر….ها يلا بينا بقي و لا لسه قدامك حاجه

نغم….لا انا تعبت اصلا و خلصت حجات كتير بس انا هاجي معاك و هستني البنات يكونوا رجعوا هسلم عليهم و علي عمو احمد و هرجع تاني