لقاء كارثي

وباقي المصايب انتي عارفه كويس بردوا لو مكنتش قولت كانت هتكمل ازاي فا انا يا نادين وقت ما احتاجتكم في حاجه اكبر مني جريت عليكم لاني عارفه كويس اني لما هعمل كده هلاقي بنات جدعه بتساعد بتفكر بتنصح بتهون بتشيل معايا باختصار انا بحتاجكم في التقيل و انتوا كنتوا قدها يعني فكره بقي ان نادين ضعيفه ملهاش في المشاكل او ايه صغيره مش هتعرف تتصرف او سلمي مش هتعرف تتعامل او تسد لا طبعاً غلطانه انا صحابي جدعان و مش بصاحب اي حد انا مقدره زعلك مني و عارفه انه عتاب محبه و خوف و مش زعلانه اكيد منك انا زعلانه اني زعلتك بس كان غصب عني

نادين….بنبره اهدي بس حتي الموقف ده يا ليله كان كبير و اكبر منك

ليله…..صح حصل و يمكن كان اكبر بكتير من تهديد مريم ليا بس كمان تهديد مريم ليا كان في شويه تفكير اقول و اقلقهم بس يخلوا بالهم و لا اخبي و ارجع اندم لو حد فيكم حصلوا حاجه انما موقف عمر مفكرتش لان عقلي وقف يا نادين انتوا عارفين كويس ولاد اخواتي عندي ايه وفكره ان حد فيهم يجرالوا حاجه دي بالنسبالي كبيره

فاتخيلي بقي ان عمر يتخطف بسبب واحده عايزه تأذيني انا يعني خطفه و الموقف اللي قمر اتحطت فيه و اللي عمر كمان عاش فيه كان بسببي انا فا لازم تديني عذر يا نادين لان والله العظيم كان غصب عني انا من يوم تهديد مريم و انا يومياً بشوف الاسوء و جات علي انهارده و طاقتي خلصت فا غصب عني و لو زعلتي مني انا اسفه حقك عليا

ايمي…..هي مش زعلانه منك انتي عارفه نادين بتحبك ازاي هي بس صعبان عليها انها مكانتش جنبك في كل القرف ده

عسال بهدوء حط ايده علي ضهر نادين و شاورلها براسه علي ليله

قربت نادين بهدوء من ليله و راحت تقعد جنبها

ايمي….. بابتسامه بعدت شويه تعالي
يا ست العصبيه اقعدي

ابتسمت ليله بحب لنادين وضمتها

نادين….بهدوء متزعليش مني مش قصدي ازعلك والله انا بس مضايقه مش اكتر

ليله…..عارفه يا عمري و مش زعلانه المهم انتي متبقيش زعلانه

نعيمه….طب علي فكره بقي انا ليا حق عرب ست نادين هانم كانت بتزعقلي

رشيد….بضحك ياستي اسكتي بقي مزعقتش

نادين….لا زعقت و مش طيقاكي

نعيمه…..شايف قلة الادب

عشري……بابتسامه خلاص يا نوني امسحيها فيا انا المهم اننا خلصنا

ايمي…..بضحك ادفع نص عمري و اشوف منظر عشري لما شاف ليله ضاربه مريم والراجل اللي كان معاها