لقاء كار.ثي

تقي…..طيب و تفتكر هي بجد ممكن تعمل حاجه لاي حد

عدي…..والله يا تقي لو مريم اللي انا اعرفها طول عمري فا لا ممكن اعتبروا مجرد تهديد بس مريم اللي وقعت نفسها في مصيبه زي دي و كانت ناويه تضحك علي اخويا اه ممكن لان دي مش مريم اللي اعرفها خالص دي كانت قطه مغمضه زي ما بيقولوا مش عارف بقي ده كان وش برئ و مجرد قناع لبلاوي بتعملها و لا هي اتغيرت من بعد البلاوي اللي وقعت نفسها فيها واتجننت بس في العموم الشخصيه اللي بنتعامل معاها حالياً هي شخصيه مؤذيه و لازم ناخد بالنا

تقي….امممم ويا تري بقي انت جيت انهارده عشان تبقي معايا زي ما قولت و لا خايف اكون من ضمن المههدين

عدي…..بإبتسامه والله مش هكدب عليكي انا في كل الاحوال لما سألتك عن مواعيد امتحاناتك مكنتش لسه اعرف اي حاجه و كنت ناوي افاجئك و اجيلك في اي وقت اقدر اجي فيه خاصتاً اخر يوم هتخلصي متأخر لاني عارف انك بتخافي من الطريق ده بس بعد ما عرفت اه قلقان بصراحه لان كلام مريم و تهديدها كان واضح عايزه توجع ليله و عشري في اقرب حد ليهم و مين اقرب حد ليهم اهلهم و صحابهم و بما انها مراقبه الكل فا اكيد هي مركزه مع الكل المهم يعني انا مش عايزك تتوتري او تقلقي انا بس عرفتك عشان تاخدي بالك متتكلميش مع اي حد متعرفيهوش نهائي متروحيش مع اي حد في اي مكان حتي لو كان قدام الجامعه متتحركيش من قدام الباب غير لما تلاقيني قدامك

تقي….بابتسامه انا فاكره كل التعليمات دي ماما كانت بتقولهالي وانا صغيره

عدي…..بتتريقي

تقي….بضحك لا مش كده بس اكيد انا مش صغيره يعني عشان امشي مع حد معرفهوش

عدي….مقولتش انك صغيره بس لو شوفتي بنت او شاب من سنك بيطلبوا منك مساعده في اي حاجه تقدري عليها ممكن تعملي ده بسلامه نيه و مش بعيد مثلا مريم تدي اي شاب مبلغ يفرح بيه عشان بناديلك او يطلب منك اي حاجه انا عارف ان اللي بقولوه بالنسبالك اهبل و بصراحه بالنسبالي انا كمان بس خلينا نتوقع الهبل كمان مش هنخسر حاجه عموما من هنا لحد ما تخلصي امتحاناتك هتلاقيني الصبح و اخر النهار و لو لاسوء الظروف مقدرتش هتروحي مع تمارا و ادهم المهم مابقيش لوحدك

تقي…حتي لو هيتاخروا و مش هيمشوا علي طول

عدي…اه معنديش اوبشن للرفض بصراحه بس عموما انا معاكي هجيلك باذن الله متقلقيش انا بقولك بس لو مقدرتش ده اللي هيحصل