لقاء كار.ثي

سليم…..خلاص تروحي تنامي كام ساعه كده و بعدين اصحي ذاكري

نسمه….ما انا هعمل كده

سليم….طيب يلا بينا

نسمه…..يلا

……………….

اتفقت ايه مع سلمي انها مش هتنزل الشغل انهارده و هتفضل قاعده بهنا

نزلت سلمي بدري عشان كان عندها عمليه متأجله و بعدها هيبقي عندها حالات عاديه و اطمنت ان ايه هتفضل مع هنا.

خرج احمد من الاوضه بتاعته بعد ما صلي لقي ايه سرحانه و حاطه الموبايل علي دقنها .

احمد…..اللهم لك الحمد والشكر ااااه ايه يا يويو مالك سرحانه في ايه

ايه…ولا حاجه يا حبيبي

احمد….امال مالك شكلك مش علي بعضك ليه كأن في حاجه مضيقاكي

ايه….لا خالص والله بس جالي ثلاث اوردرات شغل من ضمنهم كلب صاحبه هيدفع فيه كتير اوي

احمد ….كتير ازاي يعني؟

ايه…..100 دولار

احمد…..باستغراب 100 دولار يعني داخل علي خمستلاف جنيه عشان تحلقي للكلب و تحميه ده يروح يشتري واحد احسن مش غريبه ان حد يدفع الرقم ده في تنضيف كلب

ايه….هو اه كتير و غريبه خصوصا ان مش ده المبلغ اللي بيتدفع في العادي و هو اللي عرض بس اولاً الكلب كبير ثانياً بعت صورته الكلب متبهدل خالص

احمد…..حتي لو متبهدل ايه اللي يخلي صاحبه يدفع في تنضيفه مبلغ زي ده يعني اقصد هو عادي ان لو الكلب متبهدل بتدفع مبلغ زي كده

ايه……مش بتحصل كتير و ممكن الاجانب اللي سعرهم بيكون غالي يعني حضرتك عارف في زبون بيجيلي ديماً الالماني اللي عايش هو ومراته هنا عندهم كلبين چيرمن توأم بصراحه بيحاسبني بالدولار و تقريباً بيديني اوقات علي الاتنين 150 او 100 بس هما مش متبهدلين كده كمان فا ممكن و بعدين صاحب الكلب ده باعت علي رسايل الصفحه ان الكلب ده مسافر و مش بتاعه يعني هيرجع لصحابه و ضروري ينضفه قبل السفر الكلب متبهدل بهدله فظيعه و غالباً هو كان مهمل فيه طول الفتره اللي كانت معاه عشان كده عايز يرجعه زي ما كان قبل ما يرجع لصحابه

احمد….لو كده ماشي بس انا مش فاهم انتي محتاره ليه يعني شايفه انه متبهدل اوي و مش هتقدري

ايه….لا مش كده بس حضرتك عارف اني قولت لسلمي مش هنزل عشان تطمن و نزلت وهي عارفه اني مش هفتح و هفضل مع هنا و سبحان الله اليوم اللي اقول مش هنزل فيه بجيني ثلاث كلاب بمبلغ كويس اوي

احمد…..بابتسامه هاديه طيب و تضيعي رزقك ليه اتكلي علي الله محدش يقول للرزق لا يا بنتي