لقاء كارثي

بس لما شوفت الراجل اتخضيت و فرحت و بجد فرق معايا ان عدي كان مهتم بحكايته و مهتم انه يفرحني كبر في نظري اوي يا نسمه

نسمه….بابتسامه بصراحه انا كمان اتفاجئت انه عمل كده بس هو عدي بجد جميل وطيب اوي

تقي…اوي والله يا نسمه من كلام الراجل اصلا عنه واضح انه كان بقاله كام يوم واصل ليه و ساعده

نسمه…..ربنا يكتبهاله في ميزان حسناته يارب بصراحه هو و اخواته كلهم يجننوا

تقي….انتي عامله ايه مع سليم

نسمه….لا كويسين جدا الحمد لله

تقي…لسه بيرخم عليكي في موضوع النزول

نسمه…..بصراحه لا خالص سايبني براحتي و حاسه انه اتغير

تقي….هو سليم اللي طبيعي يا نسمه متغيرش ولا حاجه هو شاب عادي جدا زي اي شاب حابب انه يثبت رجولته شخصيته حابب يتحكم عنده جزء كبير من الغيره و ده طبيعي بس انتي اللي مش طبيعيه بصراحه علي طول موافقه علي اي حاجه حتي لو هو غلطان انتي اللي بتزعلي علي زعله مش بتزعلي عشان هو زودها

نسمه…..مش كده يا تقي بس سليم طيب اوي و بيحبني و انا مش بحب ازعلوا و مبحبش اعند واعمل مشكله علي الفاضي بريح دماغي

تقي…..محدش قالك زعليه او ني واعندي بس المفروض اللي مش عاجبك تعترضي عليه لو شايفه انه مزودها في حاجه وقفيه بصي يا نسمه فكره انك تريحي دماغك عشان متعمليش مشكله دي اسوأ حاجه في الدنيا لان بتخلي اللي قدامك يحس انه علي حق بيبقي حق مكتسب انك توافقي و متعترضيش و يوم ما تعترضي في مره وقتها الدنيا هتقوم مش هتقعد و وقتها هتخلقي مشكله كبيره لانه مش متعود منك علي الرفض مش متعود منك علي كلمه لا هو شايفك طول الوقت حاضر وطيب ونعم وبس وده مش صح انتي لازم تفرضي شخصيتك عليه زي ما هو بيفرض شخصيته عليكي لما كنت بتكلم انا وعدي في الاول علي موضوع جواز مع ليله و عشري و قالوا نستني بصراحه حسيت اننا نستني ده في مصلحتنا هو بيكتشف فيا حجات وانا كمان بكتشف فيه كتير بنوضح شخصيتنا لبعض هو راسم حدود لنفسه معايا و انا كمان راسمه حدود لنفسي معاه محدش فينا بقي يتخطي الحدود دي عدي كان بيتعفرت لما يسمع سيرة حدوته يمكن الحوار ده قل كتير بعد خطوبتنا هلاص ارتاح اني بحبه معاه بقيت ليه بس مش هنكر انه لسه لحد الوقت بيغير من سيرته شويه لما حدوته اختفي من فتره و كان نفسيا تعبان و عدي عرف اني مشغوله بقصته كان في الاول مضايق بس لما حكيتلوا و فهم من طريقتي اني مش هبطل اسأل عنه لانه اخويا اتعامل عادي بالعكس بقي هو كمان مهتم يسأل عنه كل ما يكلمني يطمن عليه بتفرق صدقيني يا نسمه في ناس وجودها في حياتك مهم وهو لازم يتقبل وجود الناس دي وعلاقتي بيهم و الحمد لله انا بنسبة 80 في الميه تخطيت حوار حدوته مع عدي