لقاء كارثي

ريهام…..انا شوفت اتصال حضرتك بعد ما ايمي كانت ردت عليك

عصام…ما انا اضطريت اتصل باستاذه ايمي لما مردتوش المهم هدخل في الموضوع عشان بس مطولش عليكم خبط الباب و دخل شاب من اللي شغالين بالقهوه حطها وخرج

ليله….كمل يا مستر عصام سامعينك

عصام…..امبارح اليوم كان عادي خالص خالصنا شغلنا وقفلنا و كل واحد فينا روح و انهارده كمان اليوم كان ماشي تمام لحد الساعه خمسه تقريباً شويه و لاقيت في زبونه جاتو قالت ان في اسوره دهب و فيها فصوص الماظ وقعت منها هنا في المكان امبارح سالناها طيب كنتي قاعده فين و كان امته بالظبط و كده قالتلنا كنت قاعده في المكان جوه تربيزه 11 و قالت انها مشيت قبل معاد القفل بحوالي ربع ساعه و ركبت و روحت علي طول

ليله….وهي مخدتش بالها غير انهارده الساعه خمسه

عصام…..هو ده اللي قالتوا اكتشفت ان الاسوره مش موجوده و قلبت الدنيا عليها و قلبت العربيه و لما قكرت بهدوء قالت انها مراحتش اي مكان غير المطعم و طلبت تتأكد من الكاميرات يعني تشوف امته اخر مره كانت في ايدها هل وقعت منها ولا لا هل الكاميرا جيباها خرجت بيها يعني تتأكد وقعت في المكان ولا بره

ايمي….طيب حلو و عملت ايه

عصام…..المشكله يا استاذه ايمي ان ال dvr بتاع الكاميات في مشكله من كام يوم و مفيش اي تسجيلات عليه محتاج صيانه طبعا الست لما عرفت ان الكاميرات مش شغاله بدات تتعصب و تزعق و فكرت اننا بنقول كده و الاسوره حقيقي وقعت منها هنا واحنا مش حابين نديهالها

ايمي….وانت ازاي متكلمنيش يا عصام يعني المشكله دي من الساعه خمسه و فاكر تتصل بيا الساعه تسعه

عصام….هي الست جات علي خمسه ونص كده سته الا قعدت اتكلمت معايا شويه و بعدين بدأنا نشوف الكاميرات خدنا وقت واحنا بنحاول في الكاميرات الداخليه معرفناش نوصل لاي حل بعد كده حصلت المشكله حاولت اتحكم في الموقف و طلبت منها تهدأ و هنلاقي حل سيبتها قاعده و خليت الشباب يقلبوا الدنيا عليها في كل ركن و الباسكت وكل حاجه مسيبناش مكان بعد كده لاقينا في تسجيل للكاميرات الخارجيه بس فا قولت نشوف علي الاقل نعرف هي طلعت بيهاولا لا

و فعلا لاقينا تسجيل ليها وهي طالعه من المكان الاسوره كانت في ايدها حتي هي خرجتو وقفت بره شويه كان معاها اتنين صحابها وقفوا عند العربيه و بعد كده راحت لصاحبتها في العربيه ببتكلموا بتضحك فتحت الباب بتاع عربية صاحبتها قعدت حوالي 30 ثانيه كل ده الاسوره كانت في ايدها و بعدين نزلت الاسوره مكانتش موجوده