لقاء كارثي

ليله….طيب اديهاني كده

مها….استني خليكي معايا

راحت مها علي اوضتها

مها…..ديچا امسكي ردي علي ليله

خديچه…..بدموع مش عايزه اتكلم

مها……بنبره عاليه شويه امسكي بقولك ليله علي الموبايل

ليله….براحه عليها يا مها خلاص سيبيها براحتها اما تهدأ هكلمها

مها….لا امسكي اهي معاكي

خديچه….بدموع الووو

ليله…..قلبي مش عيزه تردي علي لولي

خديچه….بدموع مش عايزه اتكلم خالص مع حد

ليله….طيب القمر بيعيط ليه كده

خديچه….عشان انا زعلانه كل حاجه تاخدي معاكي تقي و انا مش بنزل معاكي خالص كلكم اصلا بتحبوا تقي اكتر واحده وعلي طول هي الكبيره

ليله…..مين قال كده بس انتي مش عارفه انا بحبك قد ايه يا ديچا ده انتي قلبي من جوه انا والله العظيم لو اعرف انك عايزه تيجي كنت خليت تقي جابتك معاها انتي و كنزي انا لسه عارفه الوقت حالا منها انك زعلانه عشان كده كلمتك

خديچه…..ايوه بس كل مره تقي بتيجي معاكم و انا ولا مره جيت ديما ماما بتاخدني انا مع كنزي و انا مش صغيره عشان اروح اماكن بتاعت اطفال و كل مره تقي مش بترضي تاخدني و لو رضيت ماما بترفض و تقول عندك مذاكره عندك دروس مش هسيبك تروحي لوحدك انتي واختك مع تقي وانا زهقت يا ليله

ليله….قلب ليله انتي طيب بصي اول حاجه تبطلي عياط عشان هزعل منك تاني حاجه انا مش بحب تقي اكتر منك ولا حاجه انتي عارفه ان كلكم عندي واحد كل الحكايه اني والله ما كنت اعرف و انتي عارفه كويس اني لو عارفه انك عايزه حاجه هعملهالك حتي لو مها و وليد مش موافقين و مقدرش ابدا علي زعلك

فضلت خديچه تعيط بصوت و كانت منهاره من العياط

ليله….بزعل ديچا يا عمري بطلي عياط وحياة لولي بصي ايه رايك نتفق اتفاق؟

سكتت ومردتش كانت عماله تعيط

ليله…..ردي عليا يلا

خديچه….طيب

ليله….بصي يا احلي بنوته في الدنيا ايه رايك بكره اجي اخدك انتي و كوكو و مامي و نروح مع بعض احنا الاربعه نجيب الفساتين و كل حاجه تحتاجيها و نتغدي مع بعض بعد كده كمان و نقضي وقت حلو انا بقالي كتير مخرجتش معاكم موافقه

خديچه….بدموع موافقه بس بكره مش هتيجي و هتبقي مشغوله

ليله…..انتي تعرفي ان ليله بتوعدك بحاجه و مش بتعملها

خديچه…..لا

ليله…..طيب ادام وعدتك هنفذ ومش هناخد تقي الجزمه دي معانا احنا الاربعه بس موافقه