لقاء كارثي

نعيمه…..اه عرفاه

ليله….نزلت اشتريت قهوه ورجعت قعدت في العربيه طول اليوم بقي وانا بلف وهي ورايا دماغي كانت شغاله عارفه ان مريم عايزه حاجه
مني ما هي مش بتلف ورايا فضول او ملل و بتضيع وقتها اكيد في سبب و لو مش عايزه عشري يبقي كده هي عيزاني انا فا قررت اني اجهز الموبايل بتاعي التاني و اسجلها لاني كنت واثقه انها هتيجي و هتحاول انها تتكلم معايا

نعيمه…..يعني كل ده امبارح طب انتي ليه مقولتليش

ليله…..مكنتش ناويه اقول اصلا يا نعيمه و ادي الموضوع اكبر من حجمه

ايه…..معني كده ان الموضوع طلع اكبر من حجمه ادام بتقولي

ليله…..انا متلغبطه و مش عارفه افكر يا ايه و بحكيلكم عشان اخد رأيكم اعمل ايه المهم يعني لمحتها في المرايا بتنزل و بتقرب مني فتحت الباب وركبت جنبي لا بصتلها ولا ادتها اهتمام كنت عايزه احسسها اني عارفه انها ورايا و اني مستنياها من الاخر و ده اللي حصل مكنتش مدياها الامان اوي فا حبيت اسجلها و كمان اقف في مكان في كاميرا

هي طبعاً ولا في دماغها غير اللي كانت عايزه تقولوا المكان اللي وقفت فيه كان قدامي بالظبط الكاميرات بتاعت المحلات اللي جنب بعض

وحصل بينا اللي هتسمعوا الوقت ده

مسكت ليله الموبايل و فتحت التسجيل و هما قربوا لقدام و بدأوا يسمعوا مده التسجيل كانت حوالي تلت ساعه فضلت ليله ساكته و راجعه بضهرها لوراء و بتراقب ردود افعالهم علي كل حاجه بيسمعوها

وبعد ما انتهي التسجيل بصتلهم ليله

نعيمه…..بغضب انتي ازاي كنتي بالهدوء ده معاها يا ليله ازاي مجبتيهاش من شعرها انا بجد مستغرباكي

ليله….مد الإيد اعتراف بالعجز يا نعيمه اعتراف إنك ما لقيتش رد يوجع أكتر من الضر,ب ولا حل أذكى من الغضب انا عملتها كتير قبل كده بس مع ناس كانت تستاهل انها تتربي عشان مشافتش تربيه

نعيمه….امال مريم دي ايه متربيه مثلا

ليله…..لا يا نعيمه مريضه و مؤذيه الانتقام مسيطر عليها اللي زي مريم دي لو مديتي ايدك عليها هتاخد الضر,به من هنا و تبصلك و تبتسم من هنا الضر,ب مش فارق معاها هي كل اللي فارق معاها ازاي تنتقم وبس و مد ايدك عليها هيبينلها انك ضعيفه و ده اخرك و صيدها ليكي سهل لان اخرك كان استفزاز و فعلك كان ضر,ب لكن البرود و الثبات الانفعالي مع اللي زي مريم دي هو الحل هو اللي يخليها تبقي واثقه انك ملكيش مالكه انا كل ما كنت ارد عليها احس بغضبها بيزيد مني لانها شايفه خصم اقوي منها