لقاء كا….رثي

نادين…..بنبره عاليه لا مش سبب تاااافهه و متقللش من سبب كان بالنسبالي كبير..

عسال….طيب اولا توطي صوتك عشان انا بتكلم بهدوء رغم اني مش طايق نفسي وده عشان متزعليش مني ثانياً انا مش بقلل من زعلك انا بقلل من السبب اللي زعلتي بسببه حقك تزعلي لو بكنسل لو شايف الموبايل و مشغول و مش برد لو قولتلك سبب مش مقنع بس انا معملتش كل ده و كان عندي سبب شرحتهولك غلطتي الوحيده اني نسيت الموبايل ودي بتحصل عادي ممكن تتسحلي مع اي حد او تركزي في حاجه بتعمليها فا يسقط منك حاجه و ده اللي حصل معايا كلامي مع محمود خلاني مركزتش اني سايب الموبايل قفلت العربيه و دخلت معاه بس هي دي كل الحكايه و بعدين انا عمري ما عملتها معاكي دي اول مره تتعمل و اعتذرت يبقي ليه نكبر الموضوع

نادين…..انت اللي مصغره يا ميدو انا بجد اتوترت من المسدچ و مبقتش عارفه اعمل ايه او اوصلك ازاي و مكبره الموضوع عشان والله والله انا لو عملت فيك كده ما كنت هتسكت يا ميدو

عسال…..عشان ده الطبيعي انا غيرك انا عندي الاسباب اللي تخليني طول الوقت خايف وقلقان عليكي عشان قولتلك من اول ما عرفتك اكتر حاجه بتعصبني و بتخليني زي المجنون اني اتصل و مترديش او تكنسلي و معرفش عنك حاجه وقت طويل عشان انتي قاعده لوحدك عشان حصل معاكي موقف كان ممكن يقلب بكارثه اسباب كتير تخليني اتجنن لما مبقاش عارف اوصلك و المشكله انك رغم كل ده عملتيها فيا كذا مره و لما اعتذرتي سكت وقولت خلاص عديها المهم انها بخير لكن انا اول مره اعملها و اعتذرت و بعد كل ده مش قابله اعتذاري الساعه في ايدك كام يا نادين؟

بصتلوا و سكنت

عسال…..بنبره عصبيه ردي عليا

نادين….11 الا ربع

عسال…..بتصل بيكي من الساعه 12 الضهر تقريباً او واحده وانتي مبترديش و بتكنسلي و حالفه ما تردي عليا يعني داخل علي 12 ساعه مش عارف عنك حاجه بعتلك اكتر من مسدچ عشان تردي او عشان اجيلك و انتي بتشوفي و ولا هنا لا عارف اركز في شغلي و لا عارف اخلص مشاويري و لا عارف اطنش و اقول خلاص اسيبها الوقت دماغي معاكي مش عارف انتي فين و لا مدياني فرصه اراضيكي جيت علي نفسي لما لاقيت اني مش عارف اتصرف و لا هقدر اركز غير لو اطمنت عليكي و اتصلت علي ليله مع انك عارفه كويس اني مبحبش تكبير الموضوع و اني ادخل بينا طرف تالت و كلمتها عشان تقنع سعادتك تتكرمي و تردي عليا بردوا مرضتيش و ركبتي دماغك.