ابن ليل

دارين….وايه اللي مخليكم مش مقتنعين مش طول عمرنا نفسنا نسافر مصر ونزورها

ديما….اديكي قولتي يا دارين نفسنا نسافر مصر ونزورها مش نستقر فيها

دارين…..وايه المشكله لو استقرينا فيها

دانه…..انتي بجد شايفه انها مش مشكله يا دارين متخيله نسيب بيتنا واصحابنا و دراستنا وكل حاجه وفجأه نروح مكان منعرفش عنه حاجه وملناش فيه حد

دارين…..لو علي اننا منعرفش فيه حاجه اكيد شويه شويه هنعرف ولو علي ملناش حد لا لينا اهل مامي

ديما…..اهل مامي ؟ هما فين اهل مامي طول السنين دي احنا منعرفش عنهم حاجه غير شويه صور قريبه مامي دي اللي اسمها دعاء هي اللي بتبعتهم لمامي.

دارين…..اسمها طنط دعاء مش اللي اسمها دعاء😒 وبعدين ادينا هنتعرف عليهم

دانه….طيب وليه طول السنين دي مش بيكلمونا ولا بيكلموا مامي انتي عارفه انهم مقاطعين مامي من زمان من وقت ما اتجوزت بابي في حد في الدنيا يقاطع بنته

دارين….بعقل اكيد ليهم اسبابهم وانا واثقه ان في سبب كبير وقوي خلاهم يعملوا كده وإلا مامي مكانتش طول السنين دي فضلت تحاول تكلمهم

ديما….والله بقي انا مش معاكي في الكلام ده مهما كان السبب مفيش حاجه تخليهم يبعدوا عن بنتهم الوحيده وحتي لو كان السبب قوي زي ما قولتي معقول قوي لدرجه انهم يفضلوا عشرين سنه علي نفس موقفهم

دارين….الله اعلم ايه اللي حصل انتوا عارفين ان مامي مش بتحكي حاجه بس انا واثقه بما اننا راجعين وهيحصل بينهم مواجهه اكيد هنعرف السبب

دانه….اهو انا بقي مش قلقانه غير من المواجهه دي 😏

دارين….ليه ؟

دانه….خليكي ذكيه يعني هما مقاطعينها بقالهم عشرين سنه ولما بتحاول تكلمهم محدش فيهم بيرضي  وكمان بقالها حوالي اسبوع من وقت ما قررت اننا نرجع مصر وهي بتتفق مع طنط دعاء انها هتنزل وهما ميعرفوش تفتكري لما يبصوا يلاقوها قدامهم هيتقبلوها بالبساطه دي

ديما….ومش بس كده مامي اصلا باين عليها التوتر جداً وانا واثقه ان هي كمان خايفه من المواجهه دي بس هي اللي مش حابه تظهر ده

دارين…..يبقي منزودش احنا عليها التوتر بكلامنا ولا ايه.

دانه…..هو احنا قولنا حاجه بس كمان مينفعش في يوم وليليه حياتنا تتغير

دارين….انتو ليه سابقين الاحداث مش يمكن تتبسطوا ويمكن نحب مصر

ديما…..بصي هو انا بصراحه متحمسه جداً ومبسوطه بس في نفس الوقت خايفه معرفش اتعود وخايفه لو حبيت ارجع مامي تزعل او تعترض