لقاء كارثي

رشيد….اوك يا قلبي يلا باي

ايمي….باي

نعيمه…..بضحك و بيقولوا علينا احنا فضوليين

ايمي….ماهو الموضوع غريب بردوا بالنسباله و قلق علي فكره

نعيمه…..تعرفي اني خايفه من فضل

ايمي….اشمعني

نعيمه…..مش عارفه حاسه انه هيخاف يخبي علي عشري لان لو عشري عرف هيطين عيشته

ايمي….لا بالعكس فضل عشان شاف حالته اول مره بيتهيألي انه هيبقي حريص انه ميعرفش

نعيمه….ممكن بردوا علي فكره انا اول مره اشوف ليله قلقانه كده طول عمري بشوف ليله دي دايسه برجلها في اي حاجه و بتقف زي القطر قدام اي حد

ايمي….انتي سمعتي بنفسك الغل اللي طالع من البت عامل ازاي و اكيد ليله شافت ملامحها ليله لو مش واثقه ان مريم ممكن تأذي يا نعيمه مش هتخاف منها بس هي خايفه علي عشري و خايفه علينا و ليله لو حصل لاي حد فينا حاجه هتفضل محمله نفسها الذنب طول العمر ليله كانت ممكن تخبي يا نعيمه و متشغلناش بحاجه زي دي بس كمان هي مش عايزه تدي مريم الامان ماهو طبيعي مش هتقدر تكون حارس لينا كلنا و عايزه اقولك كمان علي حاجه ليله عندها عقده بسبب صاحبتها اللي ماتت دي شوفي كام سنه فاتوا عمر بحاله و كانت طفله و الكل حملها ذنب موتها واللي حصل فيها عشان خبت علي صاحبتها انها مع ولد زميلهم و هي نفسها من جواها حاسه ان هي السبب لحد يومنا ده بتلوم نفسها و شايفه انها لو كانت قالت كانت صحبتها فضلت عايشه عشان كده هي قالت خايفه يحصل لحد فينا حاجه و المرادي ليله مش هتعرف تخرج من الحاله دي ابداً لو عملنا ايه

نعيمه……ده حقيقي لما بتيجي سيرة صاحبتها دي بتزعل اوي و بحس انها اتغيرت و ملامحها بتحسسني بتانيب الضمير فعلاً

ايمي…و كمان ليله فرحها قرب و اي عروسه في الدنيا بتبقب اصلا متوترن و مش علي بعضها و مشاعرها متلغبطه و الحيوانه دي جاتلها في وقت هي قصداه كويس عشان تدخلها في الحاله دي

نعيمه…..طيب صح يا ايمي مش يمكن تكون قاصده تعمل ده عشان تخوفها و تقلقها و تبوظ فرحتها اصل بصراحه يا ايمي انا مش مقتنعه خالص ان البت دي تعمل حاجه انا شوفتها يوم ما طلعت لليله كنت وقتها انا نازله اقابل فضل البت متديهاش ابداً اكبر من حجمها و لا تشكي ان يطلع منها الغل و الحقد ده كله دي كف واحد من ليله و الله العظيم ترقدها فيها

ايمي…..مش بالشكل صدقيني يا نعيمه ده اكتر حد ممكن تقولي عليه ميطلعش منه كده بيطلع منه اوسخ حاجه في الدنيا الموضوع مش بالجسم ولا العضلات و لا ببراءه الملامح الموضوع في الدماغ اصلا مريم دي كان لازم يتخاف منها و نتوقع منها اوسخ من كده من وقت ما عرفنا التمثليه اللي عملتها علي عشري انتي متخيله انها في الاول خالص بكل بجاحه تبقي قاعده معاه بعد تاني مره تخرج معاه من خطوبتهم و تقولوا انها مش بنت يعني حتي لو انا واثقه في الشخص اللي قدامي و شايفه انه راجل و هيستر عليا و مش بعيد يساعدني و يقف معايا ازاي تبقي بالبجاحه دي و تقولوا انها مش بنت