لقاء كـ.ـارثي

سلمي….بضحكه هاديه مستعجل اوي عشان تبقي جدو هنكبرك يا حمودي

احمد…..يا سلام علي قلبي زي العسل و بعدين هناخد زمننا و زمن غيرنا

سلمي….انت لسه شباب يا حمودي ده انا بفكر اجيبلك عروسه عشان تسليك لما نتجوز كلنا

احمد…بعد امك يا سلمي مقدرش

سلمي….كنت بتحبها

احمد…..اكيد و مش بس كده كان في بينا عشره و موده و رحمه اجيب منين عمر تاني عشان الاقي حد زيها و بعدين كل سن و مرحله ليها حلاوتها انا عيشت المراهقه و الشباب حبيت و اتجوزت وعملت عيله و انتي واخواتك كبرتوا و علي وش جواز خلاص و داخل علي احلي مرحله اني ابقي جد و ليا احفاد دي مرحله ليها طعم مختلف خالص انا الوقت طاير بهنا و هي مش حفيدتي مع اني و الله بحبها اوي كفايه كلمه جدو اللي بتقولهالي ما بالك بقي لما اشوف حته منك ولا من اختك و لا من اخوكي ليها طعم تاني خالص

سلمي….بابتسامه هسألك سؤال عمري ما سألتهولك قبل كده

احمد…..اسألي

سلمي…..انا عارفه انك بتحب ايه اوي و بتعتبرها بنتك و مش بس كده انا اوقات بحس انك بتعاملها بجد علي انها اخر العنقود بس بجد ولاد ايه هتحبهم زي ما حبيتها يعني هتعتبرهم احفادك

احمد…..ياااااه يا سلمي و ده سؤال بردوا انا مش بعتبر ايه بنتي انا بحس انها بنتي بجد لدرجه اني بنسي انها مش من صلبي هقولك علي حاجه يمكن اول مره في حياتي اقولها في مره يا سلمي بعد سنين من من وجودها وسطنا قبل ما امك تتوفي بكام شهر هي اللي عرفت الحكايه دي صحيت من نومي مفزوع و فضلت طول اليوم متنكد بسبب حلم عبيط حلمت ان انتي و اخواتك و امك معايا كنا خارجين و بتلعبوا في جنينه فيها ناس كتير و شوفت واحد بيبيع لعب اطفال و بلالين و لاقيتها جايه عليا بتقولي انا عايزن بلونه يا انكل احمد

يااااااه يا سلمي لو اقولك صحيت متنكد ازاي بسسب الكلمه دي و بسبب حلم ملهوش تفسير كنت ناسي انها مش بنتي و الله العظيم و حلم اللي فكرني حكيت لامك ساعتها قعدت تضحك عليا و تقولي ده حلم و بعدين ليه مضايق قولتلها مضايق لاني افتكرت و لان الكلمه كانت تقيله عليا اوي ..

ايه بتحبني من قلبها بجد و حبها ليا ده واصل لقلبي كلمه بابا الي بتقولها دي انا واثق انها مصدقها اوي مش مجرد كلمه بتقولها لواحد رباها و خلاص لا انا عارف ان ايه نفسها زيي بالظبط هي كمان بتنسي اني مش ابوها و خدي بالك انا بضايق اوي لما اقول كده يعني فكره اني اقول اني مش ابوها بتوجعني يا سلمي صدقيني يا بنتي الاب والام مش هما اللي بيخلفوا يا ما ناس خلفت ورمت و ناس ماتوا وسابوا عيالهم زي خالتك و جوز خالتك بس اللي ربي هو اللي هيحس بكلامي ده انا اللي عيشت معاها و شوفتها وهي بتكبر قدام عيني شوفتها و هي بتجري عليا وانا بفتح الباب و هي متعلقه في رقبتي و هي نايمه في حضني و انا بحكيلها حكايه و انا سهران جنبها وهي تعبانه و انا براقبها و اشوفها بتذاكر و لا عماله تلعب لا لا ايه بنتي يا سلمي و بعلم ربنا ان حبها في قلبي زي حبي ليكي انتي واخوكي يمكن اوقات بحس اني خايف عليها اكتر بدلعها اكتر بخاف علي زعلها اكتر مبطيقش حد يخليها تعيط مقدرش ارفضلها طلب و لما بتبقي عايزه حاجه و احاول اقنعها انه مينفعش بتقنعني هي بطريقتها و كلمتها بتمشي بس ببقي مبسوط وانا شايف في عينها نظره انتصار انها قدرت تضحك عليا بكلمتين زي ما بتعمل و متتخيليش انا ولاد ايه هبقي طاير بيهم ازاي هيبقوا احفادي زي ولادك و ولاد تامر ان شاء الله يعني حبي ليهم هيبقي علي قد غلاوة امهم في قلبي