لقاء كارثي

ايمي….بس هو كده حمل يا دكتور صح

الدكتوره…..بقولك حمل واضح و صريح الشرطتين واضحين جداً

ايمي….الحمد لله الحمد لله

الدكتوره….ان شاء الله نعمل التيست بتاع الحمل و انا هستناكي تيجي عشان نطمن اكتر و هطلب منك شويه تحاليل و هقولك علي شويه تعليمات قد كده لازم تلتزمي بيها

ايمي….بدموع و ضحكة طالعه من قلبها باينه علي ملامحها انا هعمل اي حاجه تقولي عليها المهم الحمل يكون كويس و يكمل

الدكتوره….هيكمل بأذن الله لو التزمنا بكل التعليمات صح

ايمي….ان شاء الله انا بجد اسفه اني اتصلت الوقت بس دي اول مره احمل و اول مره اصلا اعمل اختبار مكنتش فاهمه و لا عارفه حاجه و اتصلت بيكي تطمنيني

الدكتوره….اتصلي بيا اي وقت و متتاسفيش متتخيليش انا مبسوطه قد ايه ده احلي خبر سمعته من فتره انا كنت شايله همك يا ايمي و كنت عارفه ان موضوع تجميد البويضات ده تاعبك نفسياً بس متتخيليش فرحانه عشانك قد ايه

ايمي….ربنا يخليكي ليا انا مبسوطه اوي و ان شاء الله ممكن بعد بكره اكون عندك لاني في الجونه الوقت
وهرجع بكره

الدكتوره….خلاص انا هستناكي المعم خدي بالك من نفسك و مش عابزين بقي مجهود يعني بعد العلقه بتاعت السفر دي هنرجع و نرتاح راحه تامه

ايمي….بضحك اعتبري ان بكره اخر مره في المجهود

الدكتوره…..ان شاء الله الف مبروك يا ايمي و عقبال يارب ما نعدي التسع شهور و اشوفك احلي مامي في الدنيا

ايمي….بدموع ابتسمت يارب اللهم امين ميرسي يا دكتور هبه بجد اشوفك بعد يومين

الدكتوره…..مستنياكي ان شاء الله

ايمي….باي باي

الدكتوره….مع السلامه

قفلت ايمي معاها و بصت للاختبار مسكتوا و حطته بين كفوفها و هي بتعيط و تضحك و ضمته علي صدرها اوي

ايمي….ااااااه يا اما انت كريم يارب الحمد لله الحمد لله

خرجت بره و هي مش مصدقه ولا مستوعبه و خايفه تكون بتحلم حطت ايدها علي بطنها و هي بتعيط

ايمي….قلب مامي ياتري انتي بنوته و لا ولد لو بنوته انا هبقي مبسوطه اوي و لو ولد بردوا هبقي مبسوطه اوي كملت بدموع انا استنيت كتير اوي عشان اللحظه دي انا بحبك من قبل ما اشوفك و بتمني اللحظه اللي احضـ,ـنك فيها بجد لو انتي بنوته انتي و مامي هتبقوا صحاب اوي و لو ولد بردوا هنبقي صحاب عارفين كمان ان بابي هيفرح اوي بالخبر ده اااااه ياااارب