لقاء كارثي

نسمه كانت حالتها نفس حالته تقريبا لكن اخف نفس جهاز التنفس و الاجهزه الكتير اللي متوصله بيها و الكدمات و كتفها اللي متثبت بسبب الكسر.

منظرهم اصلا و الانبوبه دي خارجه و بوئهم مفتوح كان صعب و مرعب يظهر مدي سوء حالتهم

فضل بص لليله بصدمه من المنظر ليله كانت مصدومه و كل اللي جه في بالها دعوه خارجه من قلبها من غير ما تنطق انهم يقوموا بالسلامه و يريح قلب نعيمه..

سليم كان واخد نفس الصدمه سند راسه علي الزجاج و هي عينه كلها دموع و منطقش

نعيمه……بدموع فيكم ايه يا حبايبي والنبي حصلكم ايه نادر قوم عشان خاطر اختك قوم متسبنيش واقفه لوحدي من غيرك عشان خاطري والله ما هقدر قوموا انتوا كنتوا فرحانين اوي الصبح يا حبايبي

عشان خاطري متعملوش فيا كده كفايه عليا ماما وبابا قوم يا حبيبي والنبي طيب مين هيشيل امك وابوك يا نادر بالله عليك قوم و ما توجع قلبي
يارب كده كتير اوي والله عليا طيب هما سابونا ومشيوا اوعوا انتوا كمان تسيبوني اول مره احس اني محتجالك اوي كده يا نادر والله

اول مره يا حبيبي احس اني مش عارفه اتصرف لوحدي ضهري اتكسر يا نادر قوم عشاني والنبي طيب لو مش هتقوم انت ونسمه اوعدوني تبقوا بخير اوعدوني محدش فيكم يسيبني ويكمل علي اللي باقي مني

هو اصلا مش باقي مني حاجه بس لو قومتوا والله العظيم هبقي احسن شويه

غصب عني يا حبايبي والله مش قادره اعمل ده من غيركم ولا احرمكم انكم تشوفوهم لاخر مره بس لازم ده يحصل متزعلوش مني والله مش بأيدي انا نفسي تبقوا جنبي اصلا انا مش عقدر اقف لوحدي بس مينفعش ابهدلهم ولا اسيبهم الثلاجه برد عليهم اوي والله غصب عني

متزعلوش مني و سامحوني انا بس جايه اقولكم انهم هيمشوا خلاص

سكتت ثواني وهي منهاره ورجعت بصتلهم وكملن

ماشيين و اكيد كان نفسهم تبقوا جنبهم عشان تطمنوهم بس مفيش وقت يا حبايبي حقكم عليا و عشان خاطري قوموا نادر خلي بالك من اختك و هي هتخلي بالها منك انا والله مش هتاخر عليكم بس وحياة غلاوتي عندكم ما حد فيكم انتوا كمان يغفلني لحد ما ارجع والله هموت فيها

شدها فضل لحضنه وفضلت تعيط

فضل….بس بس يا قلبي كفايه عشان خاطري والله العظيم هيبقوا بخير وكويسين

نعيمه…..كويسين ايه بس دول مفيهمش حاجه سليمه يا فضل هيروحوا مني والله

ليله……نعيمه متقوليش كده وادعيلهم عشان خاطري فات كذا ساعه من وقت ما خرجوا من العمليات والحمد لله مفيش مضاعفات او اي حاجه خطر والله العظيم هيقوموا ويبقوا زي الفل متخافيش عليهم