لقاء كارثي

و الحقيقه ان انتشار الخبر زود الاتصالات جدا علي الجميع الناس كانوا فاكرين ان اللي مات اهل نادين فكان بيوصلها اتصالات كتير

و طبعا الكل نزل الخبر و ساب الموبايل و محدش خد باله ان الخبر بينتشر و مصر بتشاركهم الحزن

و لما بدأ كام حد يلاحظ مكانش حد فيهم عارف بسبب بوست مين الخبر انتشر لان من يوم ما مصطفي بقي ترند هما كمان بقوا ترند صفحهم واكونتاتهم كانت بتزيد اللي عارفهم بيعمل منشن اللي مش عارفهم المطعم والكافيهات و كل معارفهم

فا العين كانت عليهم كلهم و الخبر انتشر اسرع من ترند الفرح و الحقيقه ان مصطفي كأن فرحة غيره و حزن غيره كانوا رزق ليه واسع من غير ما يحس اللي كان عنده فضول وقت ترند الفرح و بيدخل صفحته بقي اضعاف بعد انتشار الخبر لان بقي في تعاطف و فضول يعرفوا ازاي وليه و امته

و الاهم من كل ده ان تصوير الناس وقت وقوع الحادث و نشرهم لمنظر العربيه و كسر حواجز الكوبري انتشرت و بقي خبر في الصحافه عن حادثه اليمه بالتزامن مع نشرهم هما للخبر بقت الناس عندها صدمه ان دول اصحاب الفرح اللي كان ترند فا الحزن كان صعب ومرعب علي الجميع..

وبقوا ينزلوا الاخبار عليها صوره نادين و ميدو علي الفلاي بورد جنب صوره الحادثه فكان الموضوع صعب..

لكن محدش فيهم اهتم بأي ترند و لا كان فيهم دماغ اصلا و اللي كان مخلي مصطفي مرتاح شويه ان هو ميتفهمش غلط لتاني مره ان صور الحادثه انتشرت قبل ما هو يشير البوست من اخواته هو شير زي ما الكل شير مكتبش حتي حاجه تبين ان اللي ماتوا دول كانوا من يومين بيفرحوا …

…………….

اتجمع الكل من تاني في المستشفي
كل واحد فيهم كان حابب يساعد نعيمه و مش مجرد اثبات حضور لا هما بجد كانوا بيساعدوا ومهتمين من قلبهم صعبانه عليهم و زعلانين علي نجلاء و عادل و قلقانين معاها علي نسمه ونادر..

ميدو و مصطفي راحوا جابوا بسرعه الأكفان و رجعوا تاني و خلاص بقوا جاهزين للغسل و لكن قبل ما يتم الغسل نعيمه مكانش في كلمه علي لسانها غير اشوف اخواتي اطمن عليهم لازم اشوفهم قبل الغسل

و فعلا اتكلموا مع الدكتور و خدها فضل و ليله و سليم كمان راح معاهم

راحوا علي الرعايه و كان ممنوع يدخلوا جوه غرف الرعايه لان حالتهم كانت حرجه ولسه معدوش ساعات الخطر فا وقفوا من بره يبصوا عليهم و منظهر كان اصعب بكتير مما تخيلت نعيمه و بقت منهاره اكتر نادر كان نايم خارج من بوئه انبوب تنفس متوصل بجهاز عمال بيصدر صوت بانتظام ملفوف علي راسه شاش رجله فيها جبس جسمه متوصل باسلاك كتير وحواليه اجهزه قلب و ضغط و محاليل متعلقه غير الكدمات و التورم اللي كان باين علي ملامحه