لقاء كارثي

بدأ الشباب و كل الموجود يركنوا عربياتهم و ينزلوا يجروا عشان يلحقوا

عشري مسك ايد ليله و بقي يمد بيها عشان يلحقهم وهي مش قادره كأن رجليها خلاص مش شيلاها و الوجع بينشر في بطنها وضهرها و في جواها حاجه بتتعصر

ايمي كمان مكانتش قادره عندها تقلصات فظيعه و خبط جامد و وجع رهيب رشيد كان ماسكها وماشي بيها براحه وكل شويه تقف تمسك بطنها كأن عندها طلق ثواني و يمشي وترجع تكمل و هو خايف عليها و في نفس الوقت عارف ان هي مش في حاله كويسه لو قالها اقعدي او ارتاحي او متجيش مش هتسكت فكان ساكت عمال بس يقف معاها ويمسكها ويسندها..

لحد ما وصلوا عند العربه كانوا فاكرين انهم سبقوهم بس نعيمه كانت منهاره و مش راضيه تنزل ولا تنزلهم و عماله تتحايل عليهم يستنوا شويه.

فضل….يا حبيبة قلبي يلا

وليد…نعيمه حرام يا ماما متعذيبهمش

حماده…يا بنتي انزلي وخلي الرجاله ياخدوهم

نعيمه…بدموع هيهون عليك بابا يا حماده والنبي سيبوهم شويه حرام عليكم مستخسرين فيا شويه دول هيمشوا العمر كله

حماده…. والله ما حد فيهم هيمون يا بنتي بس اكرام الميت دفنه حرام يا نعيمه لو بتحبيهم اكرميهم يا بنتي

احمد…..نعيمه نعيمه تعالي انزلي

نعيمه….بدموع والنبي يا حمودي سيبوني شويه

احمد….يا نعيمه مش هينفع يا بنتي يلا يا ماما يلا استهدي بالله متعذبيهمش

حسان…..يلا يلا يا نعيمه فضل يلا نزل عشان ناخد منك

فضل…مش عارف يا حسان لازم تنزل وانت شايف

ليله…..نعيمه تعالي والنبي طيب بصي هندخل جوه بس و هنفضل معاهم شويه

نعيمه…..بدموع هياخدوهم مني يا ليله لو نزلوا

ليله…بحزن محدش هياخدهم يا قلبي انزلي بس وخلينا ندخلهم يلا يا قلبي

عشري الكبير…انزلي يا بتي هاتي يدك تعالي تعالي معاي نسبقهم بالداخل

نزلت نعيمه وخدها عشري الكبير و هو حاطت ايده علي كتفها و ليله ماسكه في ايدها من الناحيه التانيه و دخلوها وراح وراهم البنات بمجرد ما ليله حطت رجلها علي درج المدفن و لمحت مدفن ابوها ومدفن امها مفتوحين حست ان هي داخت وقلبها اتخطف و بدل ما كانت بتسند نعيمه هي اللي مسكتها فيها بسرعه

بصتلها نعيمه بسرعه و عرفت ان ليله اتاخدت لما شافت المنظر مسكتها جامد وبصتلها وهي بتعيط

بصت ليله علي المدفن وهو مفتوح كانت مبرقه مصدومه مخضوضه روحها بتتسحب منها و بكل تلقائيه حطت ايدها علي رقبتها حست ان في حجر واقف في حلقها