ابن ليل

دعاء…..مش يمكن هي كانت وحشه وانتي اللي مخدتيش بالك

دره….مستحيل صدقيني يا دعاء من يوم اللي حصل وانا بحاول افتكر موقف او حاجه تخليني اشك انهم كانوا علي علاقه ببعض مفيش بحاول افتكر موقف خلاني اخاف من دينا او اشك فيها مفيش حتي التلات سنين اللي كانوا متجوزين فيها محدش فيهم غلط محدش فيهم عمل حاجه تلفت الانتباه عارفه يا دعاء انا كنت اتمني يغلطوا واتمني يحصل مواقف تخليني اشك عشان لما اكتشف متصدمش بالشكل ده

كان نفسي اقول زي اي ست بتتخان من جوزها وصاحبتها انها كانت حاسه بس حتي الاحساس ده مكانش موجود هما لعبوها صح يا دعاء ومش قادره اعرف لحد الوقت ليه عملوا كده ليييه هما هدفهم مكانش بس الجواز كان هدفهم  كل حاجه بملكها انا وبناتي يا دعاء🥺

دعاء….بحزن بس انا نفسي اعرف ازاي سيبتي كل حاجه ونزلتي ازاي مرفعتيش عليهم قضيه يعني انا مفهمش اوي في القانون والحجات دي بس يعني هو عشان الحاجه اتاخدت بتوكيل يبقي ملكيش حق ترفعي عليها قضيه اقصد يعني زي هنا في مصر القانون لا يحمي المغفلين.

دره….بالعكس القانون في امريكا غير اه كل حاجه خدها بورق سليم بس المفروض انهم بيبلغوني قبل ما يتصرفوا وبردوا دي كمان مش عارفه يوسف لعب فيها ازاي انا في رساله قدرت اجيبها بعد ما حذفها ودي كانت من البنك بس كمان هنا بيبعتوا موظفين لحد البيت او في مقر عملك يسألوكي بس انا مشوفتش حد جالي يوسف كان واصل وليه معارف في كل مكان هناك ودينا كمان بسبب بباها ومامتها كان ليهم معارف كتير ويمكن في حد ساعدهم بس كل ده كان ممكن يتحل لو كنت رفعت قضيه وطعنت بالتزوير والسرقه وحجات كتير

دعاء…وليه معملتيش كده هتقوليلي عشان هو ابو ولادي طيب ما انتي كمان كنتي ام ولاده وعشره عمره انتي وبناتك هونتوا عليه يا دره ومش بس كده انتي جايه من هناك وهو يا دوب حاجزلكم تذاكر الطياره وسايب في حسابك كام قرش وكأنه بيتصدق عليكي بيهم ونسي ان دي في الاساس فلوسك ليه يا دره سكتي ليه

دره….بوجع يمكن عشان السبب اللي قولتيه يا دعاء اللي عشته مع يوسف مكانش وحش مفيش ذكريات وحشه تخليني اعمل فيه كده بالعكس هو في الغربه كان ليا زوج واب واخ و عيله ودينا كمان كلن ليها افضال كتير عليا

مقدرتش اوجع بناتي يا دعاء لانهم كانوا متعلقين بيوسف جدا كان صاحبهم واخوهم كان بيدلعهم ومخليهم احسن حد في الدنيا قولت كفايه عليهم انهم يتصدموا في ابوهم ويعرفوا اللي عمله مش كمان هنقف قصاد بعض