لقاء كـ،ـ،ـارثي

لقاء كارثي
أميره أسامه
صاحبة البطل الواحد

. البارت التاسع و الستين .

…………………….

اتصل سلامه علي ايه علي الساعه ثلاثه.

سلامه….الووو

ايه….هاي سلومتي

سلامه…بأبتسامه الله كان لسه في بوز قد كده من شويه قبل ما تنزلي

ايه….بضحك لا ده عشان كنت لسه صاحيه بس

سلامه….انا قولت لسه مضايقه من امبارح قوليلي تامر لقي ورق شغلوا ولا لأ

ايه….اه لقاه و صالحني دخل صحاني من النوم الصبح و قالي انه لقاها خلاص و بعدين يعني قالي هيجي انهارده المحل علي الساعه خمسه سته كده و هيجيبلي سوشي و سويتش و عروسه و خد بالك انا يعني صالحته بس لو مجابش اي حاجه هرجع اقلب عليه خليك شاهد.

سلامه….بابتسامه هاديه بتبيعي مبادئك انتي يا طفسه

ايه….بضحك و الله هو اللي زعلني و يتحمل بقي بس يعني بيني و بينك انا صالحته الراجل يعني اعتذر هو اينعم دخل استظرف الصبح و صحاني و قعد يتريق علي نومتي بس يلا مقدرش ازعل منه انا قلبي طيب اعمل ايه.

ايه كانت بتتكلم و هو دماغه غصب عنه راحت لحته تانيه و حس انه غيران بجد عليها فكرة انه يدخل عليها الاوضه و هي نايمه و يصحيها كانت مزعجه جداً بالنسباله هو عارف تامر كويس و عارفه علاقته بيها و علاقتها بيه بس هما في النهايه مش اخوات و يجوزلها

ايه….ايييييه فينك انت

سلامه….ااا معاكي يا قلبي اا يلا المهم انكم اتصالحتو وهو لقي ورقه شغلوا هو جاي امتي صحيح

ايه….والله هو قال علي خمسه بس.هو وسلمي يا دوب واصلين عند حسان من شويه و بعدين مواعيد تامر في ذمه الله يعني مظنش يجي خمسه لسه علي ما يخلص و بعدين يروح يجيب السوشي و يجي قدامه شويه يعني بقولك ايه ما لو فاضي تعالي اقعد معانا شويه في المحل و نتغدا سوا

سلامه….مش عارف هشوف انا كده كده مش ورايا حجات كتير انهارده هشوف ممكن اجي

ايه….طيب يا قلبي تمام شوف كده نظامك ايه و لو قدرت تعالي

سلامه….طيب تمام يا حبيبي يلا روحي شوفي شغلك وانا هخلص واشوف هعمل ايه

ايه….اوك يا حبيبي يلا باي

سلامه….باي

قفل سلامه معاها و هو مقفول بجد كان بيتكلم في الاول عادي و بيطمن عليها بس حس انه اتخنق فجأه و غار عليها بجد و المشكله انه ميقدرش يتكلم في حاجه زي دي حاول يهدأ و يبعد الفكره دي عن راسه و يركز علي علاقه عسال بريهام اخته لانها نفس العلاقه تقريباً عسال كمان علاقته بريهام اخويه بحته بيهزر و بيضحك بيحضنها بيزعل معاها و بيصالحها بيتعامل كأنها اخته بجد و هو عمره ما غار علي ريهام من ميدو و مش بيشوفهم غير اخوات عقله كان رايح جاي شويه يقنع نفسه ان عسال غير طريقته و عقليته ممكن تكون مختلفه دخل عليهم وهو اربع سنين فا اتربي معاهم لكن ايه دخلت اكبر شويه بس يرجع ويقول لنفسه ان تامر محترم و بردوا بيتعامل مع ايه من نفس المنطق غير انها قدامه من زمان لو شايفها بشكل تاني كان ارتبط بيها خصوصا ان ايه كانت هتتجوز يعني دي تاني علاقه ليها

فضل يكلم نفسه كتير شويه عقله يرفض و شويه يقتنع بس مقدرش يسيطر علي غيرته ابداً و قرر يروح بنفسه يقعد معاهم و يثبت لعقله انه غلط و غيرته دي غير مبرره كان نفسه يتكلم مع اقرب شخص ليه اللي هو ميدو بس لاول مره يحس انه مش قادر يتكلم معاه خاف ميدو يفهمه غلط او يفكر انه بيلمح ليه انه يحط حدود بينه و بين ريهام فكان الموضوع بالنسبه ليه مجرد الكلام فيه مش سهل.

…………….

عند اهل نعيمه..

نجلاء….بحزن خلاص يا نعيمه بقينا اغراب عنك انا اخر حد يعرف ان بنتي تتحرق و يحصل فيها كده

نعيمه….يا حبيبة قلبي الموضوع مش كده والله كل الحكايه اني محباش اقلقك انتي عارفه كويس انك لو عرفتي مش هتسكتي اولاً كنا في حوار كبير بتاع ليله محبتش اقولك لانك هتقوليلي تعالي وانا مكنتش عايزه اسيب البيت عشان لو حصل اي تطور في حوار ليله ورجعت ثانياً انتي عارفه دماغي يا ماما مش هعرف اجي

عادل….ليه يا نعيمه خلاص بقيتي تعتبري ان البيت ده مش بيتك

نعيمه…..حتي انت يا دولا هتفهمني غاط انا قولت انت اللي هتساعدني شويه اكيد مش كده و الله بس غصب عني الوجع و الحرق كانوا مخليني مش طايقه نفسي ولا طايقه حد جنبي و لو كنت جيت ماما كانت هتنكد علي نادر و نسمه لو حد فيهم قربلي او حتي اتكلم جنبي مكنتش عايزه اخنقهم و انتوا عارفين ان نادين هاديه مش حاسه بيها خالص بتهتم بيا في هدوء و دي اكتر حاجه كنت محتاجاها و الله العظيم انا كنت بموت من الوجع حرفياً انا من كتر الحرق في عضمه في كفي كانت باينه فا كنت حاسه اني بطلع في الروح حتي النفس اللي جنبي مكنتش طيقاه.

نجلاء…..طيب علي الاقل كنتي عرفتيني اجيلك اشوفك اطمن عليكي في الموبايل

نعيمه….يعني بذمتك لو كنتي عرفتي و قولتلك مش هاجي مكنتيش هتزعلي و لو كنتي سكتي مكنتيش هتفضلي قلقانه عليا طول الوقت انا قولت بس ارتاح يومين و الوجع يهدأ و هجيلك بنفسي لان حتي لو قولتلكم في الموبايل هتخافي و تقلقي و لحد ما تشوفيني و تطمني بنفسك هتكوني اتجننتي و نكدتي علي الكل و بصراحه بقي انتي عليكي بوز يا نوجا بيقلب الدنيا و انا مصدقت انتي و بابا بقالكم شويه احسن بكتير و محبتش انكد عليكم.

نادر…..طيب يا نوني كنتي عرفتيني انا و مكنتش هقول لاي حد يعني كل الناس دي تبقي جنبك و اخوكي لا و لا انتي شايفه ان هما بقوا اقرب ليكي

نعيمه….بطل هبل انت كمان ده انت الوحيد اللي حمدت ربنا انه مكانش معايا لان حصل مشكله كبيره في المستشفي بسببي و صلت للشرطه و الشباب متحملوش و بهدلوا الدنيا عشان بس الدكتور اتعصب عليا وانا خايفه اديلوا ايدي يغير عليها انت لو كنت معايا والله كانت خلصت بمصيبه

عادل…..طيب المهم انتي حاسه بأي حاجه الوقت ايدك عامله ايه

نعيمه…..انا كنت فين و بقيت فين الحمد لله هي لسه مخفتش طبعاً و منظرها بشع بس الوجع خف كتير هي الوقت بس شاده عليا و بتوجعني لو فردتها او حركتها لكن وجع الحرق بتاع اول يوم و تاني يوم غيار لا خف كتير

نجلاء…..مش مهم الشكل ده يتعالج بعدين المهم انها تتعالج صح لان الحروق لو متعالجتش صح لاقدر الله بتعمل مشاكل كبيره

عادل….بقولك ايه ما تسمعي كلامي و خلينا نروح مكان مختص بالحروق اكتر و يطمنا علي ايدك

نعيمه….والله مش مستاهله خلاص انا احسن كتير و الحمد لله هي بتتحسن متقلقش

نسمه….طب اعملي حسابك بقي اني هاجي معاكي

نعيمه…..تعالي طبعاً في اب وقت بس والله مش مستاهله لو جايه مخصوص عشان ايدي نادين معايا وانا مش محتاجه اي حاجه هي اصلا بتعمل كل حاجه و مهتمه بيا

نسمه…..انا اصلا كنت بفكر اجيلك اسألي ماما قبل ما اعرف منك الوقت كنت بقولها هروح اقعد معاكي يومين كده عشان ليله مش معاكي يعني مكنتش اعرف والله ان نادين عندك

نجلاء…..لا ما هو اسمعي بقي لو عيزاني اهدأ و ارتاح خدي اختك معاكي و اهي هي و نادين يبقوا جنبك حتي عشان لو نادين عندها مشاوير ولا شغل بردوا تشوف دنبتها
كده كده نسمه كانت عايزه تجيلك

نسمه….انا فاضيه اليومين دول والله و اصلاً زهقانه خليني اجي معاكي و اقعد انا وانتي و نادين

نعيمه…..طيب زي ما تحبي بس هقولهالك تاني لو وراكي اي حاجه و جايه معايا عشان ايدي خليكي انا زي الفل وجايه اهو سايقه لحد هنا و الدنيا تمام.

نسمه….لا والله اكيد طبعاً جايه عشان مسبكيش لوحدك بس كمان انا يا ستي زهقانه و عايزه اجي اقعد معاكي يومين

نعيمه….طيب يا ستي تنور قوليلي صحيح هي البت تقي متعرفش اي حاجه عن موضوع ليله ولا عرفت

نسمه….فكرتيني صحيح انا لقتها امبارح بليل بتكلمني انا اصلا مكلمتهاش من يوم الفرح و مكنتش اعرف انها متعرفش و حمدت ربنا اني متسحبتش من لساني و سألتها انا المهم رغت معايا شويه و بعدين قالتلي متعرفيش حاجه عن ليله انا بكلمها و مو بايلها مقفول فا قولتلها لا والله معرفش حصل ايه انا بتكلم علي اساس حصل بينها و بين عشري ايه بس عرفت انها عايزه تعرف اتخانقوا ولا لا بعد ما خرج يتكلم معاها و عرفت انها متعرفش اي حاجه لقتها بتقولي يارب يكوموا هديوا و اتصالحوا و قدر عشري يقنعها و يتكلم معاها و قالتلي انا فكرت اروحلها التجمع بس عندي شغل فا قولت يوم الاجازه اروح اشوفها عملت ايه و كده

نعيمه….طيب ما يمكن عرفت من وليد

نسمه….لا انا سألتها ابوكي مقالكيش اي حاجه قالتلي بابا قال انهم اتكلموا شويه و بعدين ليله روحت و طلب منها تسيبها تهدأ يومين كده مع نفسخا و بلاش حد يضغط عليها عشان تقدر تفكر و تاخد قرار و تهدأ مع نفسها فا فهمت ان تقي عارفه ان عشري خدها يتكلم معاها و بعدين رجعت

نعيمه…..بس غريبه ان وليد مقالش لحد الوقت انا اللي خلاني سألتك اني توقعت ان تقي لما تعرف علي الاقل تتصل تسأل خصوصا ان موبايل ليله معايا و انا قفلاه و انا الوحيده اللي معاها في البيت فا طبيعي تكلمني تسألني عنها زي ما اخوات ليله بيكلموني كل شويه

نسمه….لا معرفتش حاجه و بصراحه لما عرفت ان ابوها مقالش مرضتش اقولها اي حاجه عشان ميحصلش بينهم مشكله انتي عارفه علاقه تقي بليله عامله ازاي

نعيمه….كويس انك مقولتيش اميمه بتقولي ان حمزه من وقت ما عرف و هو مش بيتكلم مع اي حد فيهم خالص ابوه حاول يتكلم معاه بس هو زعلان بتقولي يروح دروسه و مدرسته و يرجع يقفل علي نفسه و غالباً كده متكلمش مع تقي او فاكر انها عارفه فا قالب علي الكل

نجلاء…..بس حتي لو عرفوا هيعملوا ايه حمزه وتقي لسه صغيرين و بعدين اللي حصل حصل هي اتجوزت هيعملوا ايه يعني

نعيمه….لا هو المشكله ان علاقه ليله بيهم قويه جداً و بيعتبروها اختهم الكبيره و بيحبوها اوي بيغيروا عليها وعلي زعلها ده حمزه يوم الفرح مكانش عارف اي حاجه و اميمه بتقولي مكانش طايق عشري و شايف انه مش من حقه يضايق لان هو اللي زعلها و تقي طبعاً نسخة ليله لو عرفت المشكله انها هتزعل من ابوها بجد هي مش هتستوعب الموضوع غير لو ليله هديت و بقت كويسه وقتها خلاص مش هتضايق لو ليله موافقه فاهمه

نجلاء…..خلاص انتي امسكي لسانك با نسمه و اعملي نفسك متعرفيش اي حاجه عشان البت متزعلش مع ابوها بسببك

نسمه….انا مش هتكلم مليش دعوه

عادل….طيب انتي متعرفيش من فضل او من عشري هي عامله ايه و حالتها النفسيه بقت ازاي و تقبلت الموضوع ولا لا

نعيمه….والله يا بابا اللي اعرفوا ان هي افضل من الاول ايمي كلمتها كذا مره و بتقول انها احسن و محتاجه بس وقت و فضل كمان بيقولي انها افضل كتير بس ليله اللب اعرفها مش بسهوله كده ترضي بالامر الواقع يعني خايفه تكون بتثبتهم و في نفس الوقت عندي احساس كبير ان هي فعلاً بدأت تهدأ خصوصا ان عشري تعب وعمل عمليه الزايده امبارح الصبح

نجلاء……ده بجد

نعيمه….اه والله و هي بتهتم بيه و فضل قالي انها خايفه عليه بجد و باين عليها اوي يعني احتمال كبير تكون بدأت تهدأ تفكر بعقل فا خير احنا مستنين نشوف هيحصل ايه

عادل…..ليله بتحبه و الراجل بيحبها.هي زي ما قولتي محتاجه وقت تستوعب و تهدأ و الامور ترجع زي ما كانت و ان شاء الله خير

نادر…..فعلا والله هو بيحبها اوي و بصراحه الراجل محترم اوي هو شيطان وسوء تفاهم حصل بينهم

نجلاء….ربنا يهدي الحال بينهم

عادل…… ايه يا نوجا مش ناويه تأكلينا ولا ايه ؟

نجلاء…..لا حالاً هقوم اجهز اهو تعالي معايا يا نسمه

نسمه….لا نسمه هتقوم تجهز نفسها الاول و بعدين تيجي تساعدك

نجلاء….اه يا جزمه ياللي علي طول بتهربي.

نعيمه….خليها يا نوجا تقوم اه دي يومها بسنه و انا عايزه شويه كده و امشي

نجلاء….تمشي ايه لسه بدري الساعه اربعه

نعيمه….ماهو انا علاجي في البيت والله و نسيت خالص اجيبه هنتغدا واقعد شويه و هنمشي انا وهي و بعدين انتي عرفتي خلاص ابقي اتصلي يا ستي اطمني عليا براحتك

نجلاء…..طيب انا هقوم اجهز الاكل