لقاء كار,ثي

ايه….بابتسامه يا سلامه افهم والله مش زعلانه عشان المحل عادي يعني

سلامه….ولو زعلانه يا ايه مش عيب ده شغلك يا ماما و مجهودك و لو مزعلتيش متبقيش بتحبي شغلك انا عارف انه مش فارق معاكي زي ما قولتي لعشري بس كمان حقك تزعلي و تضايقي و انا يا ستي بقولك اهو نعدي بكره عشان موضوع النيابه و كمان الافتتاح بتاع مصطفي و بعد بكره بامر الله هرجع كل حاجه زي ما كانت

ايه…..وانا مش هخليك تعمل كده طبعا انت ملكش دعوه بموضوع المحل

سلامه….هو ايه الي مليش دعوه انتي عبيطه يا بت

ايه…لا مش عبيطه بس لو انت بتعمل كده عشان عشري صاحبك و مش عايزه يحس انه ليه ذنب فا عشري صاحبي واخوي الكبير و هو ملهوش اي ذنب و انت مش مطالب تشيل حاجه مش بتاعتك و الموضوع مش فلوس انت عارف كويس اني مش محتاجه و اقدر ارجعوا زي ما كان واحسن كمان

سلامه….بابتسامه فتح حزام الكرسي و ايه كمان

ايه….هو ايه اللي وايه كمان خلاص ليله كان معاها حق اللي خرب يصلح مش عشان محتاجين فلوسهم بس ده حقنا انت مالك بقي

سلامه…طيب بصي اولا انا مش بقولك كده عاشن انتي محتاجه لان بيا من غيري انتي سيده اعمال قد الدنيا يا حلاقه قلبي و مش محتاجه حاجه

ايه…..بضحك احترم نفسك حلاقه في عينك

سلامه…بضحك تاني حاجه انا لا برفع حرج عن اخويا و لا برفع حرج عن اي حد انا عارف كويس ان عشري ملهوش ذنب مع اني واثق ومتاكد ان عشري مش هيسكت لحد ما يقنعني او يقنعك انه يعمل المحل عشان كده انا عايز ابدأ بعد بكره عشان ميتدخلش خالص في الموضوع

ايه….وانا اكيد مش هوافق وانت اياك توافق

سلامه….اكيد طبعا انا بس بفهمك ثالثا بقي وده الاهم ياللي معندكيش دم مين ده اللي ملوش دعوه و مش مطالب و الجو ده انتي كلها فتره صغيره و تبقي مراتي و مش محتاجه انك تكوني مراتي عشان تبقي مسؤوله مني و زعلك كمان بتاعي انا

ايه….وانا مش زعلتنه والله يا سلامه انا بقولك بس ان الموقف كله خوفني و حسيت بتوتر وشدة اعصاب و كنت مرعوبه عليك

سلامه….عارف والله كمل بابتسامه بس اقولك علي حاجه اكتر حاجه مفرحاني ان الباب بتاع البروڤا متكسرش

ايه…..بضحك ده اللي فرق معاك ده المحل كله اتدغدغ

سلامه….مش مهم المهم ان الباب بتاعي محصلوش حاجه

ايه….لا اطمن انت اصلا مخلتهمش يدخلوا جوه