لقاء كار,ثي

عند ليله مكانتش دريانه باللي بيحصل و لا عارفه اي حاجه و لما متصلتش كلهم محبوش يقلقوها عارفين انها فاضله و محتاجه ترتاح
و كمان كانوا لسه مشغولين و مخلصوش..

علي الساعه واحده و نص بالظبط رن موبايلها فتحت ليله عينها بهدوء لمحت اسم تقي ردت بصوت نايم

ليله….بصوت نايم الووو ايوه يا تقي

تقي….بصوت مرعوب ايوه يا ليله عمتوا قمر اتصلت عليكي ؟

قامت ليله من علي السرير اتنفضت

ليله…..في ايه يا تقي قمر مالها

تقي……عمتو اتصلت علي بابا من شويه و هي بتصرخ و بتعيط و بتقول ان عمر مش لقياه

ليله….اييييييه يعني ايه مش لقياه

تقي….معرفش انا مفهمتش قالت لبابا انها نزلت بيه هو و علي وراحوا المول اللي جنبهم و من اول ما دخلوا ثواني و ملقتش عمر و اتصلت علي عمو سامح يلحقها و كلمت بابا يجيلها هو كمان و عمتو اميمه كمان راحتلها انا بلبس ونازله بابا سبقني

ليله….طب اقفلي اقفلي

وقفت ليله تبص في الاوضه و تجري شمال و يمين مش عارفه هي عايزه ايه عقلها وقف ثواني عن التفكير

و بعدين بسرعه زي ما هي لبست بسرعه جزمتها و خدت الشنطه حطتها علي وسطها لبست كاب و و خرجت طيران من الاوضه

نعيمه خرجت من اوضتها هي كمان بس باين عليها النوم لسه

نعيمه…. ليله في ايه بتجري ليه

ليله….وهي بتفتح الباب عمر ابن قمر مش لاقينوا

نعيمه…..بخضه ايييييييبه طيب استني اجي معاكي

قفلت ليله و نزلت جري علي السلالم مستنتش الاسانسير

نعيمه…..ليله طيب اجيلك فين

مردتش و طارت علي تحت و جريت علي العربيه فتحت و دورت و بسرعه كانت طايره قلبها كان بيدق بطريقه متتوصفش ولاد اختها عندها بالدنيا و مافيها و الصغيرين بالذات واخدين حته من روحها بسبب تعلقهم بيها و فكره ان حد فيهم يتوه او يتخطف او يحصلوا حاجه كانت مرعبه و كل اللي كان في بالها تبقي مصيبه لو مريم اللي وراها وقتها هتقلب الدنيا عليها و هتقتلها بنفسها..

كانت ماشيه علي سرعه فظيعه و عماله تروح وتيجي بين العربيات و تتعصب علي الكلاكس متصلتش باي حد لا عشري ولا صحابها ولا حد يلحقها مكانش فيها عقل كانت بتموت حرفيا و عماله تجلد في نفسها انها مقالتش لاي حد من اخواتها علي اللي بيحصل و لا حذرتهم من مريم كانت مأجله انها تقولهم لحد ما تعمل محضر و تشوفهم بنفسها عشان ميقلقوش