لقاء كارثي

سليم….مش حكاية جرئ يعني لو شوفت عفريت او حسيت بحاجه اكيد انا بني ادم هحس برهبه بس مش لدرجه اني اموت في جلدي يعني و لا الموضوع يأثر عليا دي بتبقي حاجه لحظيه في وقتها

نسمه…..انا كل ده و عمري ما شوفت حاجه بس بيتهيألي لو شوفت او حسيت بحاجه حقيقيه هعيش عمري كله مرعوبه

سليم….لا خالص الموضوع بسيط تشغلي قران و تصلي و بس انتي بتصلي

ابتسمت نسمه و بصت لبعيد

سليم…..بضحك ااااه شكلك مش بتصلي

نسمه….لا بص هو انا بصلي والله بس بقطع كتير اوي

سليم…..طب ليه بتقطعي

نسمه….مش لسبب والله بس يعني ممكن ادخل اتوضأ و اخرج اتلهي في اي حاجه و انسي اصلي ممكن ابقي طول اليوم في البيت و يفوتني صلاه ممكن الاقي نفسي بتفرج علي اي حاجه تشدني و مصليش يعني مش اسباب قويه و دي حاجه بتضايقني بس معرفش ليه بيحصل كده و اوقات تانيه التزم و مضيعش فرض خالص و اللي بيساعدني علي الالتزام بصراحه بابا طول الوقت يقولي صليتؤ يا نسمه يلا قومي كده يعني بس فر رمضان والله مش بفوت فرض و لما بخرج بعد رمضان بفضل ملتزمه فتره و بعدها شويه شويه بنسي اوقات بحس اني محتاجه حد يفضل يفكرني او يزن عليا عشان اقوم

سليم…..يا ستي انا ازن عليكي و اكسب فيكي ثواب بس بصي انا هسألك سؤال كده

نسمه……اسأل

سليم….لو فرضنا انك ارتبطتي و حبيبك ده قالك اول ما تصحي الصبح تكلميني و علي الساعه ثلاثه كدخ كلميني و بليل لازم تكلميني و تفضلي معايا شويه نرغي علي التليفون والا هزعل و هحس انك مش مهتمه بيا هتعملي ايه

نسمه…..هكلموا اكيد

سليم….طيب و لو فرضنا انك عملتي كده شويه و جاء عليكي ايام بقيتي تهملي شويه و خد منك موقف جامد و زعل لدرجه ان كان هيحصل بينكم انفصال و فكر انك مش بتحبيه هتعملي ايه

نسمه….لا اكيد ههتم و ارجع اكلموا ديماً

سليم…..طيب حبيبك ولا ربنا اللي محتاجك كل يوم كام دقيقه خمس مرات عشان تقربي منه معقول حبيبك هيبقي اغلي منه معقول تخافي علي زعله و متخافيش علي زعل ربنا

نسمه….بابتسامه لا طبعاً ااا بص انا فاهمه تقضد ايه بس والله يا سليم انا مش ببقي قاصده خالص اني اهمل الصلاه او اقطع بس في حاجه ديماً بتخليني حتي لو جاهزه للصلاه اتشغل

سليم….ده شيطانك يا ماما مش انتي و نفسك اللي محتاجه تقسي عليها شويه حبيبك لو مستني منك مكالمه يا نسمه و شيطانك و نفسك و سوسولك عليه و قالولك متتصليش او مترديش علي اتصاله و احتياجه ليكي قلبك مش هيطاوعك و غصب عنك هتردي و هتهتمي طيب ازاي قلبك بيطاوعك مترديش علي نداء ربنا ازاي قلبك يطاوعك تهمليه و متهتميش انا عايز اقولك حاجه حلوه اوي

والله يا نسمه احلي و اجمل و اصدق وقت اللي بتسرقيه من يومك و تجري فيه علي ربنا صلاتك هي الخلوه الحقيقيه اللي اي بني ادم فينا بيحتاجها قربك من ربنا سواء كنتي في حاله مش حلوه او في خاله حلوه جداً هي اللحظه اللي صعب تعوضيها قربك من ربنا هو الحقيقه الحلوه اللي في حياتك و حياتنا كلنا للاسف احنا ديماً بنعيش اكتىاب و ضغوطات و وجع و حزن و مشاعر كتير و محدش فينا فاهم ان علاج المشاعر دي في وقت صلاتك بس كام دقيقه و خشوع و دعوه من القلب و انتي بتسلمي كل حاجه بتتحل و لو متحلتش في وقتها يكفيكي الراحه اللي بتحسي بيها صدقيني ده رصيدك الحلو من الحياه

نسمه…..بابتسامه اااا معاك حق انا هلتزم والله و هصلي انت بتصلي من زمان يا سليم

سليم….بأبتسامه انا مسلم يا نسمه و صلاتي جزء من اسلامي مش مجرد كلمه مكتوبه في بطاقه الحمد لله بصلي من وانا عندي خمس سنين و عمري ما ضيعت فرض و مش انا بس انا واخواتي و حتي لاسوء الظروف لو فاتنا فرض لازم نعوضه في يومها و نصليه قضي امي هي اللي علمتنا و كانت ديماً واقفه علي راسنا و ابويا كمان طول الوقت يسأل صليت صليت و لو احنا في الكافيه اللي يبقي قدام ابويا ياخده من ايده و علي المسجد هتلاقي في بيوتنا كلنت يعني بيت ابويا و امي بيوت اخواتي اللي اتجوزوا ركن خاص و غرفه كده مقفوله للصلاه زي المسجد كده دي غرفه اساسيه اصلا في بيوتنا في الكافيهات بتاعتنا من جوه في مكان صغير كده معمول للصلاه لينا عشان لو في شغل كتير للعمال يعني حاجه اساسيه اروح البيت الاقي مكان للصلاه في الشغل مكان للصلاه في الشارع مساجد ربنا ماليه الدنيا يعني مفيش اي حجه فهماني

نسمه…..فهماك و بجد براڤو يعني بصراحه متوقعتش انك ممكن تكون ملتزم اوي كده

سليم….نفخ الدخان بهدوء بصي يا نسمه انا مش ملتزم زي ما انتي متخيله انا بني ادم طبيعي جداً شاب زي اي شاب عايش حياته بغلط اكيد ليا سقطات كتير بلبس براحتي بعمل حلاقات شعر عاديه زي اي شاب لا مربي دقني ولا بلبس جلاليب يمكن بلبسهم لان ده الزي الرسمي بتاع البدو مش بلبسوا يعني عشان انا ملتزم بلبس بنطلونات مقطعه عادي اي حاجه جديده بجربها اتعرفت علي بنات دخلت علاقات بس يعني من وجهه نظري حلو ان البني ادم مهما حصل يفضل محتفظ بجزء جواه يرجعوا عن اي حاجه غلط الصلاه هي الحاجه الوحيده يا نسمه اللي مهما حصل مينفعش نسيبها زي مصلا البني ادم يعمل غلطه و بعد ما يعملها يرجع يستغفر مينفعش نيجي نقولوا انت بتستغفر علي ايه ما كنت من الاول معملتش الغلط ده لا طبعاً مش صح احنا بشر و حلو اننا نحاول نصلح او نمفر عن غلطنا ده و نفضل فاكرين ربنا حتي لو باستغفار فهمتي يعني التزامك في الصلاه و محافظتك عليها مش شرط خالص انك تكوني ملتزمه التزام فظيع كل حاجه لما بتيجي بهدوء بتقدري تكملي فيها

يعني لو دخلتي بصدرك في الدين صلاه و صوم و عبادات و تقفلي مره واحده غصب عنك هترجعي الدين يسر مش عشر بس المهم اننا نحافظ علي الحته الحلوه اللي جوانا نحافظ علي علاقتنا بربنا و الباقي سهل

نسمه…..بابتسامه معاك حق انا بجد هلتزم والله و هعمل زي ما قولتلي

سليم….وانا ياستي ليكي عندي افكرك لحد ما تحسي ان الصلاه بقت جزء منك مش محتاجه حد يذكرك بيها اتفقنا

نسمه…..بسعاده اتفقنا

سليم….طيب صليتي العشاء

نسمه….بضحك انا مش صليت اي حاجه للاسف راحوا عليا مفيش غير العشاء بس

سليم….لا مفيش حاجه راحت يلا قومي الوقت صلي كل اللي فاتك و صلي العشاء و انزلب

نسمه…..اااا ماشي تمام

سليم….يلااا اتغلبي علي الشيطان اللي واقف بينك و بين ربنا و اوعي تخلي في اي حاجه في الدنيا تقف حاجز بينك و بينه

نسمه….بسعاده اتفقنا يلا هرجع بعد شويه

سليم….بابتسامه مستنيكي

قامت نسمه و فضل باصص عليها و مبتسم لحد ما اختفت جوه الڤيلا

……………..

ايه كانت قاعده مشبكه ايدها في كف سلامه و حطها كقها التاني علي كفه و سانده علي كتفه و هو بيشرب سيجاره.

كلهم كانوا قاعدين كل اتنين او تلاته ماسكين بعض و عمالين يتكلموا مصطفي قاعد يهزر مع ليله و رعشري و نعيمه وفضل و باقي الشباب حواليهم و من ضمنهم تامر اللي كان قاعد بيتكلم معاهم و كل ثانيه عينه تيجي علي ايه و يبعدها

المشاعر اللي كانت بينهم كانت عامله زي الحرب بس الفرق ان تامر غيران عليها و هو ميعرفش ان سلامه ملاحظ ده ولا حتي كان شاكك فيه لكن غيرة سلامه كانت تقتل هو خلاص واثق من حب تامر ليها و معترف بغيرته دي و المصيبه الاكبر انه بيجي علي نفسه بشكل بشع بيتعامل عادي جداً و بيحاول ميلفتش نظر ايه و في نفس الوقت بيحاول في كل تصرفاته يتعامل كا اخ لتامر عشان يلفت نظره بهدوء و من غير مشاكل و ده كان ضغط كبير عليه هو راجل و الراجل غيرته صعبه خصوصا لما يكون متأكد ان في راجل بيحب حبيبته وده مش اي راجل ده المفروض ابن خالتها اللي اتربت معاه و بتعتبره اخوها و الكارثه انها عايشه معاه و دي لوحدها ضغط محدش في الدنيا يقدر عليه ..

في وسط ماهو شارد و في حرب جوه عقله حس بصوت نفس أيه غريب.

سلامه…..بهدوء ايه انتي نمتي

ايه….رفعت وشها براحه و بصتلوا لا صاحيه ليه

سلامه…..صوت نفسك مالوا يا حبيبي

ايه…..الجيوب الانفيه بايظه خالص

سلامه…..باين علي مناخيرك اصلا و صوت نفسك طيب انتي قفلتي ليه مره واحده كده

ايه…..عشان الڤيلا جوه دفي اكتر من هنا فا كل شويه بخرج و بدخل و كمان عشان النار

سلامه…..طيب تدخلي جوه يا حبيبي

ايه…..لا لا خلينا

سلامه……طيب ما تاخدي الدواء بتاعك

ايه….انا خدته من شويه

ساب ايدها و كان جمبهم دفايه صغيره خدها و حطها علي ضهرها و قفلها عليها من قدام كل ده تحت نظرات تامر اللي كمان كان يبان هادي بس هو غصب عنه غيران

سلامه…..بصي غطي رقبتك كده بقي و لو حسيتي انك مش قادره ندخل جوه احسن

ايه……حاضر هات ايدك بقي

سلامه….بابتسامه شكلك عايزه تنامي

ايه…..بابتسامه جميله لا والله مش عندي نوم سلامه

سلامه……ايه يا حبيبي

ايه…..انا قلبي مقبوض

بصلها سلامه اوي

سلامه…..تاني في ايه حصل حاجه

ايه….لا لا مفيش بس اقصد عشان صوت الكلاب دي

سلامه….ايه حكايه صوت الكلاب اللي بتقولي عليها دي صحيح

ايه…..مش فاهمه انتوا ازاي مش سامعين والله في كلاب عماله تعوي

سلامه…..انا كنت سامع الصبح صوا كلاب بتهوهو فعلا و واضح ان في حوالينا ڤلل فيها كلاب بس انا مش سامع صوت خالص الوقت

ايه…..هي مش كلاب بتهوهو بقولك بتعوي وصوتها جامد

سلامه…..طيب يا ستي انتي ايه مشكلتك معاهم

ايه…..دي اكتر حاجه مش بحبها في الكلاب و قلبي بيتقبض من الصوت ده

سلامه…..بضحكه جميله ايه هتقولي حد هيكون والكلام الغريب ده

ايه…..لا مش كده يعني بس صوت الكلاب ده بعرف ان في مصيبه بعده فاكر السفريه الاولي

سلامه….اه فاكرها مالها

ايه…..واحنا جايين في الطريق ميلو كان عمال يهوهو كده جامد و بعدين بقي يعمل الصوت ده بيعوي بس شويه و بدأ الجو يتقلب و السماء كانت كلها طيور بتجري و حصل اللي حصل ده

سلامه….بضحك ايه قصدك حاسين بحاجه و الجو هيقلب تاني

ايه…..مش عارفه بس انا سامعه صوت كلاب كتير

سلامه…..بضحك وانتي بقيتي قريبه منهم لدرجه انك تسمعيهم واحنا منسمعش

ايه….بضحك انت بتتريق عليا صح طب والله كان في صوت جامد هو سكت بس كان في

سلامه…..المهم انهم سكتوا خلاص يعني مفيش حاجه ان شاء الله و بعدين يعني لو في المهم اننا مع بعض ولا ايه

ايه…..بضحك صح ممكن ايدك بقي

سلامه….بابتسامه ايدي بس

ايه……بابتسامه ينفع حضنك

سلامه…..بضحكه جميله خليها كتفي الوقت اخوكي قاعد

ايه…..بضحك ماشي

……………….

ريهام…..لا بس يعني العمر في قد ايه يا محمود عشان الواحد يضيعه بالشكل ده

محمود….بابتسامه طيب مش يمكن انتي بتقولي كده عشان مش اي مكاني

ريهام….بص يا محمود خلينا متفقين ان حقيقي انا مش في مكانك واكيد اكيد مش هحس بنفس شعورك و بعدين زيد عليهم اني عمري ما حبيت و لا كان ليا علاقه فا مشاعر الحب و العلاقات انا اخر حد يتكلم فيها بس اللي اقصدوا يا محمود ان ليه بجد ممكن حد زياده عن انه يتوجع بالمشاعر دي انه كمان يضيع كل السنين دي

يعني ماشي الحب من طرف واحد موجود و عارفه انه صعب و حقك تضايق و تزعل و تووجع و تعيش وقت حزين لكن انك تضرع عشر سنين يا محمود هي الحياه فيها كام عشر سنين اصلا

محمود…..بضحك ايوه بس دي حاجه مش بأيدي

ريهام…..مفيش حاجه اسمها مش بأيدك في حاجه يا محمود اسمها عقل و منطق و رضا و انت مستخدمتش عقلك فضلت مسلم قلبك و بس مفكرتش بالمنطق طيب هل لو فضلت تحبها هتبقي ليك لا بردوا و كمان مرضتش بالامر الواقع و المكتوب ليك

محمود…..بالعكس رضيت

ريهام…..لو رضيت يا محمود مكنتش ضيعت عشر سنين من عمرك المفروض الطبيعي ان اي حاجه حتي لو غير الحب سعينا فيها او اهتمينا بيها و راحت من ايدنا نفهم انها مش لينا و ان ربنا مش كاتبهالنا فا نرضي و نتخطي

محمود…مين قال اني متخطتش علي فكره اتخطيت و دخلت علاقات كتير بعد كده بس كلها فشلت بسبب ان مفيش نصيب

ريهام…..بابتسامه انت بتضحك علي نفسك يا محمود لو كنت تخطيت مكانتش العلاقه دي فضلت في بالك و لا اتكلمت فيها لو كنت اتخطيت مكنتش اضايقت من السؤال اللي اتسألت فيه وقت اللعبه و لا هربت من الاجابه اصلاً و اوعي تعلق فشل العلاقات دي علي ان مكانش في بينكم نصيب خليك صريح مع نفسك لو كنت قدرت تتخطي العلاقه دي كان جايز اوي علاقه منهم تنجح

محمود…..بضحكه جميله لعب في شعره بتوتر اااا ممكن

ريهام…..بضحك لا دي حقيقه انت عارف مشكلتك ايه يا محمود

محمود…..ايه بقي

ريهام……انك محاولتش تحب نفسك

محمود…..ازاي مش فاهم

ريهام…..يعني لو كنت اديت نفسك مساحه تحبها و تقرر انك متوجعهاش كان الوضع اختلف انت عايش مع الماضي و المشكله الاكبر يمكن كتير مننا بيعيش مع الماضي و ذكرياته بس مشكلتك هنا انك ملكش ذكريات ولا حتي ماضي انت حبيت حد محبكش ولا حس بمشاعرك اهتميت بشخص مخدش باله من اهتمامك ده و كمان انت واضح انك جاي علب نفسك من زمان لما قررت انك متعترفش بالمشاعر دي يمكن لو كنت اعترفت و اترفضت كان الموضوع اختلف

محمود…..مقدرتش لاسباب كتير اولهم انا قولت محبتش اعمل حواليها شوشره و انا كانت ملتزمه و بصراحه خوفت من الفرض لان انا بيني و بين نفسي كنت شايف انها بتتعامل مع الكل عادي يغني مكانتش مميزاني مثلا عشان اقول انها معجبه بيا او بتبادلني نفس الشعور والا كنت خدت الخطوه دي

ريهام…..فكره انك تخاف عليها من الشوشره دي حاجه حلوه بس فكرة انها ملتزمه انت شايف الالتزام ازاي اصلا متشدده وكده اولا لو متشدده او اهلها صعبين مكانتش هتعرف ولاد حتي لو مجرد زمايل او اصحاب ده اولاً ثانياً ماهي اتربتط بصاحبك يعني كان في بينهم علاقه

ثالثاً وده الاهم انت خوفت من الرفض مقابل انك تعيش في عذاب انا عندي اترفض و اتوجع شويه احسن ما اعيش علي امل مستحيل يتحقق مش بقولك انت محتاج تحب نفسك اكتر

محمود….طيب لو انتي مكاني هتعملي ايه يا ريهام

ريهام…..اولا انا مش مكانك عشان احكم او اشرح شعور عمري ما حسيت بيه بس لو هنتفرض اني هتحط مكانك هجاوبك اجابه اتمني متزعلش مني بسببها

محمود…..بضحكه جميله لا والله العظيم مش هزعل

ريهام…..انا لو مكانك يا محمود عمري في حياتي ما هفضل في مكان مش مرغوب فيا في المكان ده جايز احب اتعلق بس كمان لو اللي قدامي مش حاسس هحاول علي قد ما اقدر الفت نظره باكتر من طريقه متجرحنيش يعني مش هستسلم بسرعه لكن لو حبيت و اللي قدامي مش حاسس و لفت نظره و بردوا مش حاسس لا اسفه هنسحب و انا راضيه و ماشيه وانا عامله اللي عليا

لاني لو فضلت يا محمود هخسر نفسي هتوجع و قلبي هيتعب هشوف الدنيا سوده مش هاخد بالي من نعم كتير حواليا و انا عامي عيني عنها و الاهم اني هحفظ كرامتي متزعلش مني

محمود….بس انا كرامتي متهانتش

ريهام…..قمه الاهانه لكرامتنا يا محمود اننا نتمسك بمكان مش بتاعنا قمه الاهانه اني اعيش قصه حب بيني و بين نفسي اضحك علي قلبي و اتجاهل صوت عقلي و استمر في مشاعر مش هتوصلني غير انها تقلل مني حتي لو بيني و بين نفسي

اصل الحب يعني ايه يا محمود الحب اني اعيش مشاعر جميله نضيفه صادقه بس مع روح بتبادلني نفس المشاعر و الاحاسيس انت مش بتحب حيطه يا محمود اكيد مجتاج المشاعر اللي عندك دي تلاقي ليها مقابل يقويها يكبرها يضاعف الحب ده لكن انت بتحب حد مش بيحبك مش واخد باله منك بيحب غيرك

فا الطبيعي الحب ثابت و المشاعر مفيهاش تجديد عايش علي صوره رسمتها في خيالك و المصيبه انك عارف ان الصوره دي لايمكن تكون واقع يبقي ليه ازاي بجد قدرت تيجي علي نفسك عشر سنين ليه مين في الدنيا اصلا يستاهل ده

محمود…..اللي بيحب يا ريهام مش بيفكر بنفس طريقتك

ريهام….ومين قال ان ده حب يا محمود ده انت لو في علاقه حقيقه و البنت اللي بتحبها خاااانتك و سيبتها و بعدها فضلت تعبان و خدت نفس المده دي هقول اهون علي الاقل كنت عايش قصه حب و لسه ماثره عليك لو بتحب بنت و توفاها الله هنقول ماشي عايش غلي ذكراها لو بتحب بنت و اهلها جبروها تتجوز غيرك هنقول حقه كان بيحب

لكن دي واحده متعرفش عن مشاعرك حاجه ازاي تضيع كل السنين دي و لسه كمان من كلامك باين انك مستعد تضيع اكتر محمود احنا وقتنا بسيط اوي في الحياه دي خد بالك يعني نجيب منين عشر سنين نعيشهم تاني و مين فينا ضامن يعيش قدهم اصلا اوعي تفكر اني عشان محبتش او مكانش ليا علاقه فا انا بقلل من مشاعرك لا والله ابداً بس الحب موجود جوانا كلنا يمكن انا اكتر علاقه حب كنت اتمني تكون موجود بشكل اكبر من كده هي علاقتي بأبويا اينعم المشاعر مختلفه بس في حب في الموضوع و اكيد بحبه وبيحبني و حاليا علاقتي بيه جميله بس للاسف معشاش معاه مشاعر كتير اوي كنت اتمني اعيشها كنت اتمنب الزمن يرجع والحياه تكون مختلفه و علي فكره هو كمان ديما يقول ياريت و لو يرجع الزمن و ده اللي عايزه اقولوا

الزمن مش بيرجع و السنين اللي ضاعت مش هتتعوض بسهوله و مع ذلك انا عيشت من غيره مش عشان هو مش فارق معايا لا خالص بس زي ما ابويا وجوده حاجه حلوه في حجات كتير حلوه في حياتي لازم اركز فيها امي اخواتي اي حد قريب مني انت عارف يا محمود انا واثقه امك يوم ما تلاقي بنت و تقرر تعيش معاها و تحبها بجد من قلبك انت هتندم اوي اوي علي العشر سنين اللي ضيعتهم دول هتفتكرهم و هتقول انا ليه عملت كده في نفسي ليه ضيعت الوقت ده من غير ما احاول ادور علي حاجه حلوه في الحياه دي انت وقفت حياتك علي شخص و الشخص ده عاش حياته مش عشان هي محستش بيك لا
حتي لو كان في بينكم علاقه اكيد لو مكانش حصل نصيب كانت بردوا هتشوف حياتها و هتعيش و تتجوز و تخلف حياتها مكانتش هتقف عليك

محمود…..بابتسامن طيب تنصحيني بايه

ريهام….بضحك انا اللي انصجك ياراجل عيب عليك ده المفروض انت اللي تنصحني ياعم ده انت كان زمانك معاك عيال قربت تبقي طولك

محمود….بضحك مش لادرجادي انا معجزتش يعني

ريهام…..ما أنت لو كنت اتجوزت من ساعت ما اتخرجت او حتي من ساعت العشر سنين دول كان زمانك معاك عيال نصيحتي الوحيده ليك كفايه بقي استوب يا عم كفايه عشر سنين حلو اوي كده اقلب الصفحه بقي و فتش في الدنيا هتلاقي حجات كتير حلوه و مشاعر انت اتحرمت منها و عيال صغيره مستنياك تحن عليهم عشان تقولك يا بابا او ياحاج

محمود…..بضحك تقولي يا حاج

ريهام….بضحك اه والله عيش ياعم اخرج من القوقعه اللي اتحشرت فيها الحياه الوان خد بالك مش ابيض واسود

محمود…..بضحك انتي صح لازم اخرج من القوقعه دي

ريهام……بضحك و نصيحه اخيره لما تحب تاني اوعي تقول لحبيبتك عن العلاقه دي

محمود….اشمعني

ريهام…..عشان هتسود عيشتك ولا في مره شوفت نمله ماشيه و سرحت فيها هتقولك سرحان في حبيبتك خد بالك احنا عقلنا مفوت بردوا

محمود….بضحك طب ولو قالتلي متجوزتش كل ده ليه اقولها ايه

ريهام….قولها كنت بجيب طلبات للبيت ياعم قولها اي حاجه اسمع مني

محمود…..كويس انك معترفه ان عندكم ربع طاقق

ريهام…..ده هو ربت سليم و ماشي بالعافيه احنا التلت ارباع ضاربين

محمود…..بضحك يعني لو اتقدملك واحد زيي يا ريهام و كان بيحب و عاش نفس التجربه هتقرفي فيه

ريهام…..بضحك انا مش هقرف غيره اصلا اسمع مني لا ده هيجي عند واحده مجنونه اصلا

محمود…..بضحك الله يطمنك علي كده انا مش هلاقي حد يرضي بيا

ريهام….لا يا عم متقولش كده فينا جزء اهبل بردوا يعني هتلاقي الهبله اللي ترضي بيك و متقرفكش

محمود…..ادعيلي بقي و انتي بتصلي

ريهام…..بضحك لا بجد والله ربنا يسعدك و تلاقي اللي تقدر تنسيك و تندمك اصلا علي العشر سنين اللي ضيعتهم من عمرك و تقول ياريتني دورت عليها من زمان

محمود…..بابتسامه يارب اللهم امين.

بصوا علي مصطفي و ليله.

ليله….بضحك خد بالك انت وجعت دماغي وضح اللي بتقولوا انا مش فاهمه.

عشري…..خلقها ضيق خد بالك

مصطفي…..بضحك لا ما انا خدت بالي طب بصي يا ليله هغير السؤال خالص و هديكي واحده كده من الاخر واتبسط انت يا عم عشري بالسؤال ده

عشري….بضحك هات اللي عندك

نزلت سلمي في الوقت دن مره تانيه لمحت حسان قاعد في نفس مكانه باصص عليهم و مبتسم بس مش في المود اوي

قريت بهدوء و راحت قعدت في مكان فاضي من غير ما تبصلوا جنب نعيمه و فضل

فضل…..تعالي هنا يا سلمي جنب حسان روحي هناك يا نعيمه

قامت ورجعت قعدت جنبه بهدوء و كانت اهدا كتير

وسع حسان شويه و قعدها بس سكت متكلمش

فضل…..يلا يا عم اسأل

مصطفي….اشمعني عشري يا ليله

ليله…..بضحك انت عايز مني ايه