لقاء كارثي

مصطفي…..الله سؤال مفهوم اهو ردي بقي

ليله….انت مالك فرحان ليه انت كمان

عشري…..بضحك انتي مش قادره عليه هتقدري عليا انا مالي هو اللي سألك

نعيمه……بتحبه يعني اكيد مش محتاجه ذكاء

مصطفي….يا ستي اسكتي انتي والله لا هزقك في سؤال الوقت يلا يا ليله جاوبي ملكيش دعوه بيها

ليله…..ااا بص يعني بعيداً اني بحبه و هو بيحبني و كل ده بس اشمعني عشري دي كبيره اوي في حياتك يا مصطفي هتقابل ناس كتير اوي

في منهم اللي معاك عشان مش للقي غيرك و في منهم اللي معاك لحد ما يلاقوا غيرك و في منهم اللي معاك عشان مش عايز غيرك و الاخيره دي تحديداً تنطبق عليا انا وعشري انا مش عايزه غيره وهو مش عايز غيري

مصطفي……اوباااااااااااااا

ايمي….بضحك لا جامده دي

رشيد….في الجون والله

ضحك عشري و ضمها وباس راسها

مصطفي…..طيب اشمعني ليله يا عشري

عشري…..بابتسامه و هو باصصلها قالتلك مش عايز غيرها توأمي و مرايتي و روحي و النفس اللي بتنفسه يعني اشمعني ليله عشان ملهاش بديل

نعيمه…..بضحك قلبيييييي

فضل…..لا معلش ابن خالي جاب جون هو كمان

ابتسمت ليله بحب و سعاده

مصطفي…..طيب هسألكم سؤال واحد الكل يرد عليه و بصراحه هنبدأ من عند رشيد مين قدوتك في الحياه يا رشيد

رشيد….اااا ابويا لانه تعب و شقي كتير في حياته و عمري ما شوفته بيستسلم او بيشتكي و ديماً يقابل اي صعب بابتسامه و عنده ثقه كده غريبه اللي هو ايه يعني هتعدي وايه يعني .

مصطفي…..حلو طيب وانتي يا ايمي

ايمي….ابويا و امي الاتنين بالنسبالي قدوه يعني اما حبوا بعض و اتجوزوا عاشوا تحت ضغط كبير قبل و في بدايه الجواز بسبب اختلاف الديانه وكده بس هما اتمسكوا ببعض جداً
و دور امي و احترامها لديانتنا كان قوي بجد بشكل مش اي حد يصدقه كانت عارفه كل حاجه عن امور ديننا وكانت بتهتم ازاي تعلمنا كل كبيره و صغيره و ابويا كان واثق فيها بشكل مش طبيعي في النقطه دي بالذات و لما كانت تعطل في اي حاجه كانت تروح تسأل ابويا و تاخد منه كتب و تقرأ و تعلمنا فا بصراحه هما قدوتي

مصطفي…..ربنا يخليهملك يارب طيب و انتي يا نوني

نعيمه….بص انا مفيش حد بعينه يعني انا كل حد في حياتي بخده قدوه في حاجه معينه فاهم قصدي

مصطفي….بضحك لا

نعيمه…..يعني هقولك ابويا و امي اكيد قدوتي بس بسبب مواقف معينه اتعلمتها منهم واصرت فيا مثلاً ليله وايمي و نادين في حجات في حياتهم بتبهرني طريقه تعاملهم معاهم فا باخدهم قدوه فيها زوزو وحماده في نفس النقط اللي قالتها ايمي فاهم

مصطفي….اه يعني طريقه تعامل كل واحد و تحمله مصلا لموقف صح

نعيمه…..بالظبط

مصطفي…..وانت يا فضل

فضل…..خالي عشري في حجات كتير اوي بس اهمهم انه ديماً اكتر حاجه مسيطره عليه انه يحتوي كل اللي قريبين منه ديماً عايزنا ايد واحده معندوش حتت ولادي و ولاد اختي و الكلام ده احنا كلنا عنده واحد كبيرنا من الاخر و ليه مواقف وحكايات كتير بعتبره قدوه ليا فيها بصراحه

مصطفي…..احلي تحيه لعم عشري الكبير

عشري….بضحك حبيبي

مصطفي….طيب وانت يا حسان

حسان….امي في وقت كده من حياتنا يعني من حوالي عشرين سنه ابويا مر بظرف صعب في شغلوا و وقع واقعه جامده اوي و خسر فلوس كتير و خسر ناس اكتر محدش وقف معاه حتي اقرب الناس بس امي وقفت معاه وقفه متتنسيش كنت بشوفها في الوقت ده راجل بمعني الكلمه وقفت ابويا تاني علي رجله كانت مصدر دعم ليه قوي محسستوش بضعفه و لا حسسته بانهياره كانت بتقويه و يمكن الفتره دي اللي خلتني انا واخويا نتحول من شباب لرجاله بجد و احنا كمان وقفنا علي رجلنا و ابويا رجع احسن من الاول طبعاً اللي خسرهم مدخلهمش حياته تاني و اتعلم درس قوي بس امي عنده بقت هي الحياه فا امي هي قدوتي بصراحه

مصطفي…..ربنا يحفظها يارب طب و انتي يا سلمي

حسان….اللهم امين

سلمي….بابتسامه بابا

مصطفي….بضحك بس كده مش هتقولي في حق الراجل ده كلمتين

ضحكوا كلهم و ضحكت سلمي

سلمي…..لا هو يستاهل كلام الدنيا الحلو كله بس يعني هو بعد وفاه ماما شال مسؤوليه مش اي راجل يقدر عليها تعب كتير اوي معانا احنا الثلاثه كان بيحاول يكون لينا اب و ام و عيله يعني بصراحه تعب اوي عشاننا و عدي بمواقف صعبه و مواقف بتحتاج ست مش راجل بس حاول و كان قدها الحمد لله.

مصطفي….ربنا يخليهولكم طيب ووانت يا ميدو

عسال…..امي طبعاً و مش محتاج اقول ليه بيتهيألي الكل يعرف و سلامه طبعاً

ابتسم سلامه بنظره تجنن لميدو

مصطفي…..اشمعني سلامه ليه مش مصطفي يعني

فضل….انت مش مرغوب فيك في الحياه خد بالك

نعيمه….ايوه و بتتعامل معامله مش قد كده

مصطفي…..حسيتوا صح

ليله…..بضحك متسمعلهمش الاتنين دول بوتجاز خمسه شعله

مصطفي…..مامعاهم حق يا ليله

عسال….بضحك انت حبيبي يا صاصا

مصطفي….ماهو باين قول ياعم سلامه قدوتك في ايه بقي

عسال…..سند ضهر جدع راجل ليه مواقف في حياتي مش هنساها توأمي مشوفتش ابويا ولا فاكر شكله هو وامي يمكن ربنا عوضني بأم تاج علي راسي بس مكنتش اعرف ان سلامه هيكون ليا اب و انا وهو الفرق بينا مش كبير سلامه اخويا و ابويا و صاحبي يعني

سلامه…..بحب طب ايه يا لاااااا

عسال…..بضحكه جميله ايه يا قلب اخوك

سلامه…..بحبك

عسال….عارف وانا بحبك

حنان….بحب ربنا يخليكم ديما سند لبعض يا حبايبي كلكم مش ولادي بس

ايمي….اللهم امين

مصطفي……مرات اخويا القمر مين قدوتك في الحياه

نادين….سرحت شويه و بعدين بصت لليله و ابتسمت ليله و يمكن مؤخراً بقت حنون

مصطفي….اوعي يا حنون يا قدوه

ضحكوا كلهم

حنان…..يا عمري انتي

مصطفي…..طب اشمعني الاتنين دول بالذات

نادين…..بص هو انا يمكن شويه زي نوني في اكتر من حد بعتبر تفكيرهم في مواقف معينه او ظروف مرت بحياتهم قدوه ليا وبتعلم منهم بس ليله بالنسبالي انا قولتها كتير كانت سند و دعم بتعرف تتصرف وجودها في حياتي قواني اكتر بسببها عرفت اثق في نفسي يمكن لياه قالت قبل كده ان بسببي حياتها اتغيرت بس في الحقيقه هو العكس يمكن انا قابلت ليله في ظروف قاسيه بالنسبه ليها كانت حاسه بالضعف و الاستسلام بس ده من وجهة نظرها لاني عمري ما شوفتها ضعيفه او مستسلمه بالعكس انا طول الوقت بشوفها قويه جداً و اثرت في حياتي من غير ما تحس و مؤخراً طبعاً حنون يعني شخصيتها وقصه حياتها و طريقه تعاملها مع كل اللي عدت بيه في حياتها تخلي اي حد يبقي مبسوط وهو بياخدها قدوه ليه و يمكن لما عرفت حجات كتير عنها حسيت ان اي حاجه مريت بيها كانت بسيطه بس

حنان……حبيبه قلبي انتي و نور عيني

ابتسمت نادين و حدفتلها بوسه.

مصطفي…..طيب و الاستاذه ريهام

ريهام…..امي مفيش كلام

مصطفي ….وانا يابت مش قدوتك في المطبخ

ضحكوا كلهم علي مصطفي

ريهام…..انت حبيبي يا مصطفي انت و سلامه و ميدو بس اسفه امي يعني

مصطفي….ماشي يا ختي و انت يا عم حوده

محمود…..زي ما ايمي قالت امي و ابويا و تقريباً لنفس الاسباب

مصطفي…..حلو و انتي يا امنيه نفس الاسباب

امنيه…..بضحك صراحه اه امي و ابويا بس ضيف عليهم ايمي

ايمي…..احييييييه انا قدوتك يابت

امنيه…..بضحك بصراحه اه ايمي طول عمري بشوفها قدوه ليا في حجلت كتير و بالاخص في طريقه تعاملها مع ماما و بابا ايمي مش بتعاملهم علي انهم ابوها وامها لا خالص ايمي بتعاملهم علي انهم ولادها يعني بتخاف علي بابا بطريقه مش ممكنه بتحب تريح ماما بشكل مش طبيعي بتحب تدلعهم و تاخد بالها منهم يعني بصراحه بحب اشوفها اوي و هي بتتعامل او بتتكلم معاهم و علي فكره يمكن هي اول مره تسمع الكلام ده

ايمي…..بابتسامه اه والله

محمود….ايمي فيها حنيه متتوصفش يعني اللي يشوف ايمي من غير ما يتعامل معاها يفكرها شديده فاهمين بس اللي يتعامل معاها يلاقي قلبها طفل خالص

ايمي….اتلم انت وهي و الله اعيط

مصطفي…..بضحك ما تسكت ياعم منك ليها خلاص سكتهم يا ايمي يا حنينه

ايمي…..بضحك ماشي يا رخم

مصطفي…..وانت يا عمرو

عمرو…..حسن اخويا ربنا يخليه ليا يارب هو اخويا الوحيد جدع و صاحب مواقف و ممكن يرمي نفسه في النار عشان اي حد قلبه جميل بيعمل حجات كتير حلوه فا هو بصراحه قدوتي

ايمي….حسن ده جميل ربنا يرجعه بالسلامه

عمرو…..اللهم امين

مصطفي……طيب و انت يا سليم

سليم……ابويا و امي زي ما قال فضل ابويا ليه دور كبير في علاقتنا ببعض العيله عنده حاجه مقدسه مش مهم بالنسباله ان حد فينا زعلان من التاني او حد زعلان مننا مع فضل واخواته يقولك ازعلوا و متكلموش بعض غير لما تصفوا براحتكم بس ايدكم في ايد بعض زعلكم بعيد عن وقفتكم جنب بعض

وامي كمان ست جدعه اوي وبس

مصطفي…..وانت يا عدي

عدي….امي طبعاً علاقتي بيها علي جنب بس لو هتكلم عن القدوه فا هما ثلاث اشخاص ابويا و عشري و محمود اخويا ابويا لنفس الاسباب اللي قالها سليم و فضل و عشري بالنسبالي عشان جدع اوي و عشان إصراره في اي حلم بيبقي عايز يحققه و محمود قدوتي في جزء كده اللي هو عايش بدماغه مجمود طيب بشكل غبي مبيزعلش حد مبيحبش المشاكل لو مضايق يسمعك للاخر ميدخلش نفسه في اي حاجه فا هو دماغ كده و بحبه اوي

مصطفي…..بضحك حودا ده في عالم موازي بحسه مش اخوكم اصلا هو وسليمان شويه

سليم….سليمان في شويه من محمود اه بس محمود اكتر

مصطفي……طيب و انتي يا نسمه

نسمه…..بابتسامه امممم بابا طيب اوي و بيحبنا بشكل مش طبيعي لدرجه انه وزع علينا فلوسه كلها و هو عايش و قال انه حابب يشوفنا بننجح قدام عينه ربنا يديه الصحه

مصطفي…..يارب اللهم امين طيب و انت يا نادر

نادر…..ابويا طبعاً لانه حنين اوي و طيب اوي يبان بردوا انه شديد من صوته ملامحه طريقته وقت النرفزه بس والله هو طيب اوي و بحبه و بحب اتكلم معاه و خصوصا و هو رايق بتعلم منه حجات كتير

مصطفي……و انتي يا تقي

تقي…..ليله طبعاً يمكن هي كمان اهم حد عندي في الدنيا دي كلها

ليله…..قلبي والله

تقي……ليله جدعه و ست قادره كده مش بتسيب حقها بس هي كنان طيبه اوي و فيها كميه حنيه متتوصفش و مش طبيعيه و اي حد قريب منها مستعده تعمل عشانه اي حاجه المهم يكون مبسوط

مصطفي…..بابتسامه غمز لليله ملاحظ ان معجبينك كتير يا ليله طلعتي مؤثره

ليله….بضحك انا لا مؤثره ولا نيله
هما اللي اوڤر

مصطفي….بضحك استني متقطعيش برزقك يمكن نلاقي حد تاني المنافسه بينك و بين حنون كبيره

ليله….بضحكه جنيله لا حنون تكسب
طبعاً

حنان…..انتي ست البنات

ليله….حبيبتي يا حنون