لقاء كارثي

حماده وضعه كان مختلف عن الكل يعني كلهم موجودين عشان نعيمه الا هو كان موجود غصب عنه مش عشان هو مش عايز يجي لكن عشان شعوره تجاه نعيمه كان يوجع بجد

مكانش قادر يشوفها ولا قادر يشوف وجعها ولا عارف يبص في عينها كسرتها و حزنها وخوفها كانوا مخلين حماده حاسس بالعجز مش عارف يعملها ايه عشان يساعدها

نظرتها ليه كانها بتطلب منه يعمل حاجه مش في ايده كلامها وقت الحادثه وهي بتتحايل عيه يعمل حاجه خلاه حاسي انه متقيد و كان في حاجه في ايده يعملها وهو رافض

مكانش قادر يشوفها في الحاله دي حاسس انه خان صاحبه في انه مش عارف يهون وجع بنته

و زي ما قولنا موجوع بيطبطب علي موجوع نعيمه حست بحماده و بمشاعره بقت هي اللي عمال تطبطب عليه كل شويه و تبتسم في وشه لان منظر حماده من غير كلام او تعبير او حتي دموع كان يقلق اي حد و هي خافت عليه من الحزن يجرالوا حاجه هو كمان مكانش عندها قدره تسمع خبر تاني وحش علي اي حد فكانت بتحاول تحسسه انها بخير..

و يمكن منظر حماده ده رعب ايمي و وترها اكتر علاقتها بابوها وامها علاقه تجنن لدرجه انها فكرت لو هي في موقف نعيمه هيحصلها ايه اكيد هتموت لان مهما كان وجع نعيمه و تعبها هي كمان مكانتش قريبه منهم بقوه لكن ايمي حياتها كلها معاهم حتي لما اتجوزت اول مره انفصلت بعد شهور و مقدرتش تعيش بعيد عنهم و فضلت سنين كتير معاهم احد ما اتجوزت رشيد اينعم اتعودت علي بيتها الجديد لكن مشاعرها و احساسها و انتمائها ليهم هما متقدرش تعيش من غير حد فيهم ولا حتي تقدر تفكر الحياه من غير وجودهم هتبقي ازاي

فا كانت قاعده هتتجن عشانه و عينها مش بتنزل من عليه..

…………

الكل كان قاعد بيتكلم ويهزر و في مود حلو وهادي و هو ساكت وباصص للارض

نعيمه….بهدوء ايه يا حماده عامل ايه ؟

بصلها حماده بهدوء و ابتسم ابتسامه باهته

حماده…الحمد لله يا نعيمه انتي كويسه

نعيمه… بابتسامه حزينه انا زي الفل يا حماده بخير طول ما انت بخير

طبطب علي كفها وهو بيهز راسه و سكت معندوش حاجه يقولها..

………..

سلمي….يعني انتي هتنزلي بكره

نغم…اه باذن الله اول يوم تدريب

حسان…بابتسامه طيب ايه مستعده

نغم… بابتسامه هو انا متحمسه بس بصراحه مش مستعده

سلمي…طيب ليه انا عارفه ان ده خلمك يا نغم

نغم…اكيد بس خايفه اوي