لقاء كارثي

ايمي….بتنهيده طيب خلينا لما يجي بكره نشوف هيحصل ايه

ليله…خير ان شاء الله بس اعملي حسابك بكره هتمشي

ايمي….احييييييه عليا بت عشري نام

بصت ليله علي عشري بسرعه و اتصدمت عشري كان مسلم تماما و نايم نوم مش طبيعي كانه هلكان وبقاله زمن مش نايم ايده علي اخر وسطها و التانيه علي رجله و نايم

ليله…..بصت لايمي بحزن عشري تعبان اوي

ايمي….شكله باين اصلا و عينه فظيعه و الشباب قالوا منمش حرام صحيه يا ليله ينام جوه

ليله….لو صحيته مش هيرضي ينام تاني و بصراحه اخاف يصمم يمشي و يسوق وهو كده

ايمي….لا طبعا يسوق ايه خليه هنا

ليله….مش هيرضي انا عارفه عشان محدش من الشباب موجود هيتحرج

ايمي….يتحرج ايه امال يسوق وهو عينه زي الدم كده بقولك ايه خليه نايم زي ماهو لحد ما الكل يمشي ابقي صحيه ينام جوه

ليله…اسيبه نايم قدامهم بالمنظر ده لا مش هقدر

ايمي….ما انتي بتقولي لو صحي هيمشي

ليله….معرفش بقي بس اكيد مش هسيبه تعبان بالمنظر ده

ايمي….طيب بقولك ايه صحيه براحه و قوليلوا تعالي عيزاك وادخلي جوه عالاوضه خديه في حضنك هو بالمنظر ده هيروح تاني و هو نومه تقيل لو نام سيبيه

ليله….اممم طيب و الشباب تفتكري حد يزعل

ايمي…. لا طبعا امال يسوق وهو بالمنظر ده و بعدين ماهو نايم بت متعصبنيش قومي خدي جوزك حرام شكله ضايع و اللي يزعل يا اختي ياخد مراته في دراعه

ليله…. بابتسامه ما انتي هتتاخدي في دراع رشيد انتي كمان

ايمي…بابتسامه لا انا جوزي فري مش بعيد يدخل ينام في حضن عشري

ليله….بابتسامه طب استني اما ادخلوا

ايمي….ماشي

بصت ابمي لبعيد و مرضيتش تبص لعشري عشان ميتحرجش لو حس ان حد شافه وهو نايم

ليله….بهمس عشري عشري حبيبي هزته براحه عشري عشري

فتح عينه بصعوبه و ققلها تاني هزته بسرعه

ليله…عشري حبيبي قوم

فتح عينه وبصلها بسرعه

عشري….ااا ايه مالك مالك

ليله….بابتسامه هاديه مفيش يا قلبي ممكن تقوم معايا في الاوضه شويه عيزاك

عشري…انا نمت صح نمت

ليله….ااا لا لا غمضت بس انا عيزاك جوه شويه

عشري…مالك في حاجه وجعاكي

ليله… انا زي الفل والله بس عيزاك شويه جوه

عشري…طيب طيب يلا قومي تعالي

قام عشري بهدوء و هي قامت وراه راحت فتحت باب اوضتها و هو دخل وراها و هو خلاص مش شايف بعينه و حاسس انه هيغم عليه من قله النوم.