لقاء كارثي

ليله….يا ابن الكلب يا فرحات

وليد….خدي بالك هو بجد مرعوب و الفتره الجايه هتلاقيه بيحايل فينا

ليله….طب والناس اللي طلعت من البيت يا وليد محدش عرفهم

وليد….في اتنين بس اللي خدوا الفلوس وطلعوا الباقي مكانوش لسه سابوا البيت معرفش بقي هيوصلوا ليهم و لا هيحصل ايه المهم ان شقه امك يا ستي زي ماهي والفضل بصراحه لعشري و عمر اخوه

ليله….هو عمل كل ده امته عشري مسبناش الاربع ايام اللي فاتوا ده اول يوم انهارده يمشي شويه و رجع علي طول

وليد…..كان متابع كل حاجه بالموبايل و عمر بصراحه كان مهتم وانا انهارده طول اليوم كنت معاه لحد ما خلاص اطمنا عشري لما قالي من بعد وفاه نجلاء وعادل كان علي فكره وقت الدفن كان معاه مكالمه وقتها و خرج بره لو تفتكري بعدها نادي عليا وقالي ابعت رقم فرحات افتكرت بقي وقتها الحوار بصراحه هو كان مهتم يرجع البيت او يشوف حل و منسيش ابدا عشري بيحبك يا ليله

ليله…. بابتسامه وانا بحبه يا وليد اينعم هو قالي اطلعي من الحوار بس يمكن لو كان نسي كان هيبقي ليه عذره مكنتش هزعل بس انا بصراحه اتفاجئت انه فاكر انا نفسي نسيت غصب عني و مفكرتش اصلا في حوار الشقه ده انت اللي لسه مفكرني

وليد….عشري موبايله مكانش بيسكت حتي لما كنت بكلموا مشغول علي طول او ويتنج يقولي كنت بكلم مش عارف مين في الحي مش عارف بكلم رتبه ايه قريب مين من طرف ايه يعني مقصرش بصراحه

ليله…هو مش بيقصر اصلا طيب قولي متعرفش يعني في مصاريف او حاجه اتدفعت انا عارفه اني لو سالته سؤال زي ده هيطين عيشتي بس ابقي عارفه علي الاقل

وليد….والله يا ليله مش عارف لان عمر اللي كان بيتحرك بس انا سالت عمر انهارده قالي والله ما في اي مصاريف غير حجات بسيطه لتحركات الموظفين بتوع الحي اللي بيبعتوهم يعني كان بيراضيهم حاولت اعرف منه مرضيش ابدا قالي والله كلها حجات تافهه و الموضوع خلص مجاملات من معارفهم ليهم قالي محدش فيهم بيحتاجنا بنقصر فا هنا بيردوها لينا و احنا بنتعامل كده مع بعض بس لو عرفتي اي حاجه برضوا من عشري عرفيني

ليله….تمام هقولك بس هو يقول

وليد….اتبسطتي وارتاحتي يا ستي

ليله…الحمد لله انا كنت هتجنن يا وليد والله بيتهيالي لو كنت اتصدمت في موضوع الشقه في التوقيت ده كان هيجرالي حاجه مش وقته خالص