لقاء كارثي

ضحكوا ونزلوا من العربيه الثلاثه و سلموا عليهم.

ايمان…..طبعاً ومين يجيب بالزعابيب بتاعته غيرك و حشتيني

ليله….وانتي كمان بس مش اوي يعني انا لسه شيفاكي امبارح

ايمان…..طب غوري يلا تعالي انتي يا نودي

نادين…..ايه القمر ده

ايمان…..انتي اللي قمر يخربيت حلاوتك

سلمي…..فين السماعه بتاعتي يا نعيمه

نعيمه…..الله يخربيت السماعه بتاعتك علي بيت نعيمه يا بت قولتلك ميت مره متقوليش الاسم ده بكرهه

سلمي….بضحك طيب فين السماعه بتاعتي يا احلي نونو في الدنيا

نعيمه….بنظره غيظ اتفضلي

سلمي…..تعالي هاتي بوسه بقي

ليله…..صباح الفل علي احلي زوزو في الدنيا

ماريز…..صباح الجمال علي احلي بنات في الدنيا ايه يا بت الحلاوه دي منك ليها علي الصبح

ليله …وهي بتدور ايه رأيك

ماريز …..قمر طبعاً و دي عايزه كلام

نادين….مش ناوي تغير رأيك يا قمر وتيجي معانا

ماريز ….واسيب القمر بتاعي لمين

نادين….ايوه ياعم شكلك مبسوطه عشان هناخد منك ليله و يخلالك الجو

ماريز ….ليه نسيتي منه و محمود

نادين…..هما فين صحيح؟

ماريز….محمود نايم و منه كانت هنا تلاقيها جوه بتجيب حاجه

محمد….صباح الخير يا بنات

ليله….صباح الخير يا عمو واحشني اوي

محمد….انتي اكتر والله عاملين ايه يا بنات

نادين….بخير يا عمو والله حضرتك عامل ايه؟

محمد….انا في نعمه الحمد لله

نعيمه….بقولك ايه هناخد ليله منكم كام يوم خد بالك بقي من القمر بتاعتنا ودلعها

محمد….بابتسامه جميله مش كنتوا خدتوا اخواتها معاكم عشان اعرف ادلعها براحتي

ليله….اوباااااا الراجل اشتكي يا زوزو

نعيمه……احنا فيها نستناهم ويجوا معانا

امنيه…..انا براءه مش هقدر عندي شغل و بعدين انا واحده مخطوبه اسيب خطيبي لمين

ليله….انتي يا بت بتعايرينا الحقي يا ايمي

ايمان…..بضحك اهي اللي بتقولك كده دي هتموت وتيجي معانا و عينها هتطلع علي السفريه بس خايفه من سي عمرو

امنيه….بضحك طب والله أبداً قالي لو عايزه تروحي روحي و غيري جو انتي عارفه هو بيحبكم قد ايه بس والله عندي شغل و اكيد ميمنعش اني بصالكم في السفريه

نعيمه….انتي عارفه لو حصلنا حاجه هنفخك

امنيه….بضحك لا والله أبداً ربنا يرجعكم بالسلامه

ماريز…..بعد الشر عنكم انا نفسي اعرف انتوا ليه مصممين تسافروا الوقت مش كنتوا استنوا لما الصبح يطلع تمشوا في النهار

ايمان…..السفر بليل احسن و اروق والجو بيبقي هادي

ليله….صراحه يا زوزو السفر الوقت احسن كتير والجو حلو الصبح الشمس بتبقي طالعه و الجو رخم

ماريز…..ما الجو الصبح حلو بردوا بس انتوا ليكم دماغكم و بعدين بقالهم كذا يوم بيحذروا من الجو بكره و قالوا من بدايته هيبقي وحش و في كلام ان احتمال يأجلوا الدراسه

ليله….جو ايه اللي وحش يا زوزو و بعدين بداية اليوم عدت و الجو قمر اهو الساعه ثلاثه و اديكي شايفه الجو

ايمان….هو في حد يمشي وراء بتوع الأرصاد

سلمي….بضحك صراحه لا اليوم اللي مش بيقولوا فيه حاجه الجو بيقلب و اللي بيقول ا فيه أن الجو هيبقي وحش بيبقي حلو.

ايه….متخافيش يا زوزو و بعدين احسن أننا نسافر الوقت عشان لو قلب بكره نبقي وصلنا

ماريز ….اه وافضل انا قلقانه عليكم

ايه….لا متقلقيش لو الجو بقي وحش هنقضي اليوم في الڤيلا متخافيش

ماريز….ماشي يا ستي المهم تخلوا بالكم من بعض

محمد….وياريت تطمنونا عليكم ديماً

ايمان….اطمن يا حبيبي هملمكم كل شويه انتوا خلوا بالكم من بعض و لما يصحي محمود بوسوهولي و سلموا عليه

محمد….حاضر يا حبيبتي يوصل يلا امشوا بقي عشان متتأخروش و سوقي علي مهلك يا ايمان

ايمان….حاضر يا حبيبي

ماريز…. بقولكم ايه حطتلكم شويه فاكهه و كام زجاجه مايه سقعتهم و شويه اكل خفيف كده

نعيمه….بضحك مش قولتلكم زوزو متتوصاش

ماريز….بضحك ماهي رحله يعني اكل يا بت

سلمي….والله قولتلها بلاش ومعايا شويه حجات تكفينا في الطريق بس مرضيتش و قولت اسكت عشان افك الخناقه بينها وبين ايمي

ايمان….بضحك زوزو دي فظيعه مش بتسمع الكلام

ماريز….الحق عليا انا غلطانه و بعدين عشان لما تروحوا يبقي معاكم شويه اكل لحد ما تعرفوا تجيبوا

ليله….لا اطمني انا اتصلت بريس سالم و طلبت منه يجيبلنا حجات قد كده تقضينا الاسبوع و بعتلوا الفلوس كمان و زمانه اشتراهم عشان لما نوصل كل حاجه تبقي في الڤيلا

نادين….سيبك منهم يا زوزو انا هاكل كل الاكل انا أصلاً هموت من الجوع

ماريز…..كلي واشبعي بألف هنا

ليله….طب ايه مش يلا و كفايه رغي

ايه….انا هركب معاكم

ليله….امشي يا بت مع ايمي و سلمي هو حلو كل ثلاثه في عربيه

ايمان….عايزه تركيب معاهم طب روحي يا ست يويو

ليله….تروح فين يلا يا بت معاهم

ايه….طب والله لا ناخد الاكل كله معانا وروني بقي هتاكلوا ايه في الطريق

نادين ….انا ممكن أبدل معاكي عادي

ليله….اه يا طفسه يا واطيه

نادين….بضحك جعانه والله

سلمي……لا متخافيش هنديكي اكل اصلا احنا مقسمين الاكل شنطتين واحده ليكم وواحده لينا عشان منقفش في الطريق

ماريز….اه بلاش تنزلوا علي الطريق لوحدكم

ايمان…..زوزو عصبتيني خلاص هي اول مره نسافر يلا بقي هنتأخر

ماريز….ماشي يا ست ايمي خدوا بالكم من بعض

محمد…..علي مهلكم يا بنات

سلموا البنات عليهم و ركبوا و مشيوا.

محمد…..في حفظ وامان الله

ماريز…..بهدوء الرب يحفظكم

قفل محمد الباب وراهم و دخلوا علي جوه.

…………….

بدأت الرحله و من اول ما طلعوا و ليله عادت الاغنيه تاني و فضلوا يغنوا و يرقصوا معاها و ايمان وسلمي و ايه كانوا متفاعلين معاهم و مشغلين اغاني و مبسوطين .

الجو كان حلو اوي جو خريفي لا برد و لا حرد في نسمه هواء بارد و ده طبيعة الجو في نصف شهر نوفمبر .

الجو كان صافي لا في شبوره ولا في هواء شديد ولا في اي حاجه غريبه كان جو طبيعي جداً..

كلت نادين من الاكل اللي معاهم و طول الطريق بيرخموا علي بعض من داخل العربيتين.

ليله….ماشاء الله الجو حلو اوي

نعيمه….جداً و قال زوزو تقولك الأرصاد حذرت

نادين….ودول حد يصدقهم طب ياريت ديماً لما يحذروا يطلع الجو كده

نعيمه…..اهو علي الاقل الناس تقعد في بيوتها و نخرج احنا في هدوء

ليله…..طيب سيبكم بقي من الجو و الأرصاد و قوليلي يا نودي عملتي ايه مع
هادي ؟

نادين….عملت ايه في ايه؟

ليله….في موضوع السفر مش كنتي بتقولي مش عايزك تسافري

نادين….هو يقول اللي هو عايزه المهم انا اعمل ايه

ليله….يعني ايه زعلتوا من بعض

نادين…..بصت من الشباك علي الطريق المرادي مش باين انها زعل شكلها كده خلصت

ليله….بصتلها في المرايا خلصت !!

نعيمه…..أحسنننننن

ليله….ضربتها في كتفها اسكتي انتي

نعيمه……واسكت ليه و الله هي الكسبانه هادي ده بني ادم مريض و نرجسي و توكسيك و كل العبر فيه

ليله….يابت خليكي محضر خير انتي بتسخنيها اكتر

نعيمه….لا والله مش بسخنها بس نادين خساره فيه

نادين…..علي فكره هي عندها حق

ليله….لا يا شيخه الوقت بقي عندها حق امال راح فين الحب و طول الوقت قرفانا بسيرته هادي هادي هادي و اللي كان فينا بيجي ينصحك و يقولك حاجه تداري عليه

نادين…..بنظره حزن بسيطه كنت عبيطه او خليني اقول اني كنت بضحك عليكم

نعيمه…..لا مش فاهمه

نادين…..مش فاهمه ايه بالظبط

نعيمه…..بابتسامة فرحه انتي قفشتي عليه حاجه يا نودي قولي قولي

ليله….بضحك بابت مالك سوسه كده ليه وايه الفرحه اللي في عينك دي

نعيمه…..بنظره حب لنادين بحبها و شايفه انها تستحق حد احسن منه بكتير اوعي تزعلي مني

نادين…..وانا كمان بحبك و عمري ما ازعل لا منك ولا من اي واحده فيكم انا مليش في الدنيا دي غيركم

نعيمه….طيب قوليلي ايه سبب التغير المفاجئ ده

نادين……مش تغيير ولا حاجه بس انا بقالي فتره بفكر في موضوعنا و بصراحه كان معاكم حق في كل كلمه هادي مش الشخص اللي بدور عليه يا نونو انتوا عارفين اني كان ليا اكتر من علاقه كلهم علاقات فاشله و مؤذيه مش شبههي و لا شبه شخصيتي اللي خاين وبتاع بنات واللي بخيل و اللي معندوش طموح و اللي شايف نفسه عليكي و ديماً بيحتقرك و يحسسك انك أقل منه و اللي طمعان فيكي و مفكر أنه هيدخل حياتك ياخد و يجري و اللي توكسيك و نرجسي .

ليله….معاش ولا كان اللي يقلل منك او يحتقرك انتي مفيش حد زيك أبداً

نعيمه….وسي زفت هادي طلع ايه من كل ده ؟

نادين….بضحكة سخريه طلع ميكس يا نونو و نظرة كل واحده فيكم مخيبتش شخص توكسيك عنده طاقه سلبيه فظيعه علي طول عايز يحسسك انك غلط و كل تصرفاتك وكل قراراتك غلط وهو بس اللي صح و شخص نرجسي جداً بيحب نفسه بطريقه مبالغ فيها طول الوقت انا وانا وانا وكأن الكون كله مفيش حد عليه غيره

و اكتر من مره يرمي في وسط الكلام حجات توجع عن اهلي يعني مش بيجيبها بشكل مباشر بس انا فاهمه يقصد ايه طول الوقت انا امي كذا انا ابويا كذا انا اخواتي كذا و يسكت شويه ويقولي اسف انا مقصدش اتكلم عن عيلتي قدامك يعني بيخليكي تحسي انك لو بتسمعيه بنيه صافيه و هو بيحكي يغير رأيك و يخليكي تحسي أنه فعلاً يقصد يجرحك و كأني اخترت أن علاقتي ابويا وأمي تبقي مش حلوه و أن كل واحد فينا عايش بعيد عن التاني.

نعيمه…..ليه هو ابوكي وامك اول اتنين متجوزين ينفصلوا

نادين….لا بس انفصلوا و كل واحد اتجوز و عاش حياته و خلفوا كمان و سابوني لوحدي كلامه حسيني بنقصي

ليله….حتي لو !! مش من حقه يتدخل في حاجه زي دي و بعدين هو المفروض ميحسسكيش و لو فعلاً بيحبك يحاول هو يكمل النقص ده يا نادين

نعيمه….بت انتي فورتي دمي و هاين عليا ارجع و اروح اجيبه من زومارة رقبته

نادين….بضحك لا قلبك ابيض ميستاهلش

ليله….طيب انا بردوا مش فاهمه نهيتوها يعني

نادين…..بصي انا تعبت من اني انهي علاقه سامه انا فيها سببتها عايمه

نعيمه….عايمه ايه دي كان لازم في وقتها تقطعي عرق وتسيحي دم و تقوليله مش عيزاكي

نادين……لا ماهو هيفهم لوحده أصله يعني

ليليه…بصت في المرايا و رفعت حاجبها أصله اين قولي قولي عمل ايه سي زفت

نعيمه….ايه صدقتيني و أخيراً قلبتي عليه

ليله…..انا قالبه عليه علي طول انتي عارفه اني لا بطريقه ولا بطريق سيرته بس يعني محبش اني اكون واقفه بينهم كان باين انها بتحبه بس هي مش صغيره و عارفه مصلحتها

نعيمه…..لا يا اختي حتي لو عندها ميت سنه مراية الحب عايمه ولو هي سكينة الحب سرقاها نفوقها احنا و بعدين حب ايه انا واثقه أن ليله مكانتش يعني اللي هي واقعه في حبه ولا ايه يا نادين

نادين…..صراحه معاكي حق بصوا انا مش هنكر اني كنت معجبه بيه و مشدوده ليه اوي يعني هو زي ما فيه عيوب فيه مميزات

نعيمه….والله مافي ميزه واحده توحد ربنا انا قولت مراية الحب عايمه

نادين…..بصي هو عشان منظلموش لا في مميزات بس للاسف عيوبه اكتر بكتير مش هو ده الراجل اللي انا عايزاه في حياتي مش هنكر اني اتمسكت بيه اكتر من غيره لأن انا مبقتش صغيره يا بنات انا خلاص هتم 35 سنه مش عايزه اكبر و انا لوحدي ولا عايزه يجري بيا العمر و في الاخر ابقي مضطره اختار اي واحد وخلاص عشان هو ده اللي موجود و مناسب لسني

ليله….سن ايه يا جزمه انتي يا بت ليه محسساني انك كاسره الخمسين

نعيمه….ولو كاسره الخمسين خلاص ندفنها ده في ناس بتبدأ حياتها من ستين و سبعين سنه فيكي ايه انتي و هي و بعدين ما كلنا كسرنا الثلاثين و ايمي اهي قدامك 42 سنه و زي القمر تحل من علي حبل المشنقه و من يوم ما خلعت جوزها الرجاله بتترمي تحت رجلها وهي اللي رافضه.

نادين….انا فاهمه بس اللي أقصده انا نفسي يا نعيمه احب و اتحب نفسي يكون من سني أو اكبر بسنه أو اتنين مش عايزه حد اكبر من كده نفسي اعيش مع اللي بحبه اكبر وقت ممكن نفسي اقول ده مناسب و ده مش مناسب و ابقي حره في قراري مش حابه عشان انا كبرت ابقي مضطره اوافق علي حد معدي سني انتوا فاهمني

ليله….اكيد فاهمينيك بس انتي لسه صغيره يا نودي و اكيد سنك مناسب لرجاله كتير من سنك

نادين…..بيتهيألك يا ليله اغلب الرجاله اللي ممكن يعجبونا الوقت و سنهم مناسب لسننا يا متجوزين يا مطلقين و معاهم عيال

ليله….لا مش شرط علي فكره انتي بس اللي دماغك تعبانه و بتفكري غلط

نادين….يمكن و يمكن كمان بقي عندي عقده من امي و ابويا صراحه انا مش حابه أبداً اعيد تجربتهم و لا مستعده اني اتجوز واخلف وفجاه الاقي نفسي انا واللي هتجوزه مش متفقين و ننفصل و ابننا أو بنتنا يضيعوغ في الوسط بينا زي ما عملوا فيا انا عايزه الاقي راجل بجد انا مليش طلبات في اي راجل غير أنه يحبني بجد و احبه بجد

نعيمه……هتلاقي يا نادين انتي بس كل علاقاتك دي مكانش حد فيهم نصيبك انا واثقه أن ربنا شايلك حد احسن بكتير عشان انتي تستاهلي كل خير

ليله…..ايوه بس خلينا نرجع كلامنا سي هادي ده قالك ايه خلاكي قفلتي منه اوي كده

نادين….بضحكه جميله صراحه انا قافله منه بقالي كام شهر بس بقاوح بس المرادي قفلت معايا اكترااااا اممم صراحه بسببكم

ليله….بسببنا احنا ليه ؟

نادين…..لما لقاني مصممه اني اسافر معاكم قالي براحتك بس يا انا يا صحابك

نعيمه….يا ابن الجزمه

ليله…..والله ارجع انا اديلوا ميت جزمه علي وشه

نادين….بضحك خلاص خلوها عليكم بقي عموما هو عرف ردي خلاص و خلصت و اتقفلت صفحته

نعيمه….يلا المركب اللي تودي كملت بابتسامه طب قوليلي بقي يا ست نودي ايه مواصفات الراجل اللي نفسك ترتبطتي بيه

نادين….انا لا مش عارفه بس انا قولت يكون بيحبني و باين في عينه حبه ليا وأنا أحبه

ليله….ايوه ماهي دي حجات مفروغ منها اكيد احنا عايزين مواصفات شكليه طباع كده يعني

نادين….بصي يا ستي انتوا عارفين اني طول عمري نفسي ارتبط براجل اسمر و انا حظي مهبب كل اللي وقعت فيهم اللي ابيض واللي اشقر واللي عينه ملونه ميمنعش يعني انها مش بالشكل و مش شرط اللي انا بتمناه احبه

ليله…..اكيد ممكن يكون اسمر و فيه كل المواصفات اللي بتحبها و يبقي واطي

نعيمه….علي اساس البيض اللي وقعت فيهم كانوا مفيش زيهم

ليله…..لا طبعاً بس اقصد انها مش بالشكل اكيد بس ميمنعش نعرف البت نفسها الراجل اللي معاها يكون عامل ازاي

نادين…..طيب انا قولت اهو اسمر اطول مني اكيد أو قريب من طولي اكيد مش هحب واحد اقصر مني

نعيمه….اكيد ده انتي تبقي مسخره

ليله…وايه تاني ايه اكتر حاجه ممكن تلفتك في الراجل

نادين…..عينه يعني تكون جذابه نظراته تكون بتتكلم بتعبر فيها سحر كده يخطفك من اول نظره

نعيمه….يا سيدي و ايه كمااان

نادين….يبقي دمه خفيف و في نفس الوقت يكون تقيل يبقي عنده دقن مش تقيله اوي يعني خفيفه كده يكون حنين احس معاه بالامان و الاهم من كل ده يسمعني يبقي عنده لغه حوار مش هو بس اللي يتكلم و ميدنيش فرصه

عدلت نعيمه نفسها و سندت راسها علي الكرسي و بصت من الشباك و هي مبتسمه

نعيمه…..يكون راجل وقت اللزوم ويكون شديد و في نفس الوقت يكون في أشد درجات غضبه حنين بيحب الضحك و الهزار و معاه احس اني مش ببطل ضحك في عز انشغاله يكون في جزء بسيط جواه بيفكر فيا يحسسني ديماً اني اهم أولوياته

ليله…بابتسامه و هي باصه علي الطريق و ياسلام لما اغلط و اعمل حاجه مش عجباه علي قد خوفي منه علي قد ما هو يكون اماني اجري عليه و اخبي نفسي منه جوه حضنه احس معاه اني ست و احس معاه اني طفله و في اوقات تانيه يحسسني اني امانه و الحضن اللي بيجري عليه وقت ضعفه

نادين….لما اخاف وأحس بعدم الامان بسرعه اطمن لما ابص في عينه و لما اغلط مره ميقوليش دي الغلطه الأولي و الاخيره يفضل ديماً ينصحني و يتكلم معايا و يفهم أن أحياناً الست بتتعمد تغلط عشان تخلق وقت بينها وبين الراجل اللي بتحبه حتي لو كان الوقت ده غلط و مشاكل لأن احلي لحظه للست لما تغلط و اللي بتحبه يغضب بس بسرعه لما يحس أن دموعها بتنزل يقطع الكلام و ياخدها في حضنه.

ليله…..ميهونش عليه زعلي و ميقدرش ينام غير وهو مراضيني و واخدني في حضنه

نعيمه….يكون بيغير و في نفس الوقت مديني حريتي غيرته تبقي بس ظاهره في عينه مش في كلامه ولا عصبيته و تحكماته..

نادين…..بضحك قطعت أحلامهم الله الله كانت مواصافتي انا في الراجل اللي انا عايزاه سرحتوا مني ليه

ليله….بغضب داهيه تسد نفسك فوقتيني من احلامي

نعيمه…اركني و نزليها دي حلال فيها هادي

ضحكت نادين و فضلوا يضحكوا هما كمان مع بعض و كملوا كلامهم.

………….

نامت ايه و هي حاضنه الكلب بتاعها اللي مكانش مبطل يهوهو

ايمان…..بعصبيه الله يخربيتك انتي و سي ميلو بتاعك انتي يا ست زفته انتي يا ايه

ايه…..ايه ايه في ايه ؟ بتزعقي ليه

سلمي….بضحك والله سمعتي زعيقها و مش سامعه الهوهوه بتاعت ميلو دي كلها

ايه…..اعملوا ايه يعني بيهوهو بيعبر عن شخصيته

ايمان…..شخصية ايه يا اللي ربنا ينتقم منك انتي و هو كمان سي ميلو عنده شخصيه

ايه….اه طبعاً دي طريقته الوحيده اللي بيعبر بيها انتي لما بتحبي تتكلمي بتهوهوي و لا بتتكلمي

ايمان…..اهوهو !!

ايه…..بابتسامه مش قصدي بس اقصد يعني احنا بنتكلم والهوهوه عند الكلاب زي الكلام عند البني ادمين

سلمي….ايوه و سي ميلو بيقول ايه ؟ يعني الهوهوه دي يقصد بيها ايه

ايمان….يقصد أن بومه مش معدي معايا و شكلي كده هنزله هو وصاحبته بره العربيه

ليه….بضحك ونهون عليكي

ايمان…اه يا اختي تهونوا اوي كمان بقولك ايه انا دماغي دي متكلفه بصرف عليها كتير عشان اعرف اتعامل مع البشر مش ناقصين الكلاب كمان

ايه….اوباااااا متكلفه ازاي شربتي حشيش يا سعديه و لا لسه

ايمان….بضحك لا يا اختي لسه هي القهوه والسجاير و المهدئ .

ايه….يا جامد انت يا ابو دماغ متلكفه المهم سيبك من دماغك و احب اقولك اعتراف بسيط عن ميلو

ايمان….اتفضلي يا ستي ماله سي ميلو

ايه…..لما بيهوهو كتير كده هو واي كلب تعرفي أن في مصيبه هتحصل

سلمي….اعوذ بالله منك بوووومه

ايمان…..هي بومه بعقل و بتقوليها في وشي يا بت مصيبه ايه اللي هتحصل؟

ايه….وانا ايش عرفني بس يمكن يكون الجو بيقلب بجد و بتوع الأرصاد يطلع معاهم حق

ايمان….جو ايه اللي هيقلب السماء صافيه والجو حلو تبقي مصيبه لو كان عايز يعمل بيبي و انتي مش فاهمه و الله لو عمل في العربيه يبقي يومك ازرق انتي وهو

ايه…..بضحك لا متقلقيش اخر مره عمل لما كنت بظبط شعري في اوضتك

ايمان….نهاركم ازرق و بتقوليها كده عادي عمل في اوضتي بجد ؟

ايه….بضحك نضفت والله

ايمان…..انتي عارفه لو جيتي عندي تاني ومعاكي سي ميلو ده هعمل فيكي ايه

ايه…..ايه ؟

ايمان…..بغضب دي بتسأل

سلمي….بضحك معلش دي مستفزه

ايه….طب والله حنيني و بيحبك يا ايمي

ايمان….شكراً ليه يا ستي مش عايزه الحب ده و بعدين يا لومي انتي ابوكي عامل ايه مع الكلب ده

سلمي….بابا !! ده بيموت فيه و مو صينا عليه قد كده لدرجة أني حسيت أنه خايف عليه اكتر مننا

ايه…..طب والله كنت حاسه أنه زعلان اني هاخده اكتر من مره يقولي سيبيه عشان تتبسطوا

سلمي…..عشان نتبسط أه لا هو عشان هيوحشه

ايمان…..المجانين في نعيم والله

ايه…..علي فكره ميلو طيب والله معرفش انتي مش بتحبيه ليه

ايمان…لا والله بحبه بس بضايق من الهوهوه دي و البيبييييي بس مش هنكر يعني أنه طيب و حنين

ايه….ايوه كده ارجعي حني تاني

ايمان….احن !!!وانا هتجوزه

سلمي….بقولك ايه هو فاضل قد ايه علي الريست ؟

ايمان….لسه شويه ليه ؟

سلمي….عايزه اروح الحمام

ايمان….احييييه كملت الاقيها منك و لا من ميلو

سلمي….بضحك الله يقرفك

ايمان…..امسكي نفسك قدامنا حوالي ساعه إلا ربع كده علي أول ريست

ايه….بضحك ساعه الا ربع لا معاكي ربنا يا لومي انا لو مكانك اصرف نفسي في العربيه

ايمان….بضحك اوعي يا لومي انتي عارفه اني بحبك متسمعيش كلامها

سلمي….لا متخافيش همسك نفسي خلاص

رن موبايل ايمان فتحت الخط علي طول

ايمان….ايوه يا زوزو

ماريز….طمنيني عليكم يا ايمي

ايمان….احنا زي الفل يا ست الكل

ماريز…..الطريق كويس؟