ابن ليل

دره….بحزن لا مقدرش يا دارين اللي انا عملته اثر علي كرم بالسلب

دانه….طيب ليه يا مامي مقولتيش ليه كل حاجه ليه تفضلي حاسه بذنبه طول عمرك

دره….وقتها مفكرتش بالطريقه دي وفي نفس الوقت مكنتش اعرف ان جوازي من ابوكم وسفري لما كرم يعرفه هيكون ده رد فعله كرم طول عمره مجتهد و تحقيق حلمه اهم حاجه في حياته عمري ما تخيلت انه ممكن يسيب كل حاجه بالشكل ده كرم اللي كنت اعرفه او اللي كنت فاكره اني اعرفه ان الضربه مش بتكسره بالعكس بتقويه وكنت فاكره انه مش هيعمل حاجه غير انه يركز في مستقبله وينجح ويثبت للكل انه ثابت زي ما هو بس اللي حصل عكس كل توقعاتي

ديما….بس كمان يا مامي بيتهيالي حضرتك ملكيش ذنب في انه ميكملش تعليمه ويحقق حلمه

دارين….فعلاً يا مامي بطلي تحملي نفسك الذنب علي طول بالشكل ده

دره….مش هنكدب علي بعض يا دارين جزء كبير من اللي حصل لكرم انا كنت السبب فيه يعني لو كنت صارحته من البدايه و روحتله هو علي طول كان قدر يفهمني حتي لو كان بيحبني بجد وانا مكنتش حاسه بحبه بس متأكده انه كان هيزعل شويه وخلاص بس هيكمل تعليمه ويوصل لحلمه مكانش عبدالله يومها نزل وعمل مشكله وكرم اللي شالها بداله كان في حجات كتير اتغيرت

دانه….متزعليش مني يا مامي انا شايفه ان اكتر حد غلط في الوقت ده هي تيته يعني مش قادره اتخيل اني اجي اقولك اني بحب وحضرتك تجبريني علي شخص تاني حتي لو كان كويس لان في ناس كتير كويسه واكيد مش هتجوز اي حد كويس المفروض اني بختار اكمل مع مين واشارك حياتي. مع مين

دارين…..دانه معاها حق يا مامي تيته فكرت بطريقه غلط هي من وجهه نظرها ان سعادتك كانت هتبقي مع كرم وبس وده مش صح في النهايه هي بوظت حياتك وحياته من غير ما تقصد

دره…..الناس بتوع زمان ليهم عقليه مختلفه يا بنات الامهات مكانوش بيبصوا للحب والكلام ده كانوا بيشوفوا من وجهه نظرهم انهم يقدروا يختاروا العريس المناسب لبناتهم انا واثقه ان امي بتحبني وواثقه كمان انها مكانتس تقصد توجع كرم لانها طول عمرها بتحبه بجد من قلبها عشان كده بقولكم ان الغلط من البدايه كان عندي انا المفروض لما كنت اتكلم معاها وقدرت اوصل لتفكيرها مكنتش خدت عليه وكنت روحت لكرم علي طول بس للاسف حتي انا عقليتي وقتها كانت مختلفه اتحرجت اقف قدامه ومقدرتش اواجهه واقوله اني مش بحبه