تعاهدنا

بالشكل ده فن ادهم باشا اللي ابتسامته ماليه الدنيا

اللي حابب الحياه ده انا كنت باخد من ضحكتك الامل

في بكره حصل ايه ياباشا.

ادهم….مش عارف يا سلامه بس يظهر ان الدنيا مش

بتديك اللي انت عايزه او بتستخسر فيك الضحكه

سلامه…هي الدنيا ديما كده يا باشا يوم ليك ويوم

عليك. بس الشاطر اللي يتحمل عشان يعدي بسرعه

وميستسلمش وإلا الدنيا هتزود وجعه اكتر وحملها

هيبقي تقيل.

ادهم….الشاطر بقي يا سلامه في وجع تقدر تعديه

وفي وجع مستحيل تقدر عليه لو اتمكن من قلبك

سلامه….بعد الشر عليك من الوجع يا باشا انت اقوي

من اي حاجه سيب الوجع لناسه يا باشا حضرتك

لسه صغير بلاش تشيل الهم من الوقت

ادهم….سيبها علي ربنا يا سلامه

سلامه…ونعم بالله بس اركن هنا يا باشا المكان اهو

ركن ادهم ونزل جري سلامه خد الشنطه ودخلوا علي

البانسيون مع بعض.

سلامه….يا صباح السعاده علي اجدع ست في اسكندريه

تهاني…صباح النور يا سلامه اهلا بيك وبضيوفك

سلامه…ده ادهم باشا مش ضيف ولا حاجه ده صاحب

مكان ادهم باشا متعود يجي اسكندريه علي طول

وبينزل في احسن فنادق بس المرادي هو حابب يريح

دماغه ويبعد عن الدوشه ايه هنلاقي عندك مكان

يرتاح فيه ولا الف وارجع.

تهاني…ترجع ده ايه ده احنا هنشيله في رموش عنينا

ادهم…بابتسامه تسلمي ياست تهاني

تهاني…تسلم وتعيش يا باشا اطمن المكان هنا اه مش

قد المكان بس نضيف وحلو وكمان الناس اللي فيه

كل واحد في حاله يعني مش هتلاقي حد يضايقك

معايا هنا واد غلبان اسمو حمو شغال معايا اي وقت

تحتاج اي حاجه هيجيبهالك هوا انت بس تؤمر يا باشا

ادهم…الامر لله تسلمي ياست تهاني معلش انا هتعبكم

معايا

تهاني…تعبك راحه المهم اكتب هنا بيناتك وعرفني هتقعد

كام ليله.

ادهم…مش عارف في الحقيقه هقعد قد ايه لسه بس

انا قاعد معاكم شويه.

تهاني…تآنس وتنور ولو مشالتكش الارض تشيلك

عنينا.

مسك ادهم الورق يسجل بيناته.

سلامه…ست تهاني يا ادهم باشا ست بميت راجل

اجدع حد ممكن تقابله في اسكندريه وديما مكانها

مفتوح لكل الحبايب.

ساب ادهم القلم وبصله بأبتسامه الجواب بيبان من

عنوانه يا سلامه.

تهاني….ربنا يخليك يا باشا اتفضل ده المفتاح بتاع

الاوضه بتاعتك تاني دور علي اليمين اول اوضه تقابلك

رقم سبعه. الاوضه دي غاليه مبيقعدش فيها غير الغاليين