لقاء كارثي

امينه….انا بخير الحمد لله تعالي اجعدي كيفك و كيف امك واخواتك

نسمه….كلنا بخير الحمد لله

امينه….انت هتفضل واجف اكده يلا اتكل علي الله

نسمه….بضحك لا ماهو انا همشي انا بس كنت بوصل الشغل و جيت اسلم علي حضرتك

امينه….تمشي فين انتي هتجعدي تتغدي معايا

نسمه….مش هينفع والله أسالي سليم

سليم…طب ليه مش هينفع خليكي كده كده انا لسه هروح اغسل العربيه و اظبطها اقعدي معاها هي لوحدها اتسلوا مع بعض و هبقي اجي اجيبك

بصتلوا و هي بتبرقلوا و بتضحك

سليم….بضحك شايفه يا امي البت بتبصلي ازاي

امينه….تبصلك براحتها يلا انت اتكل علي الله و سيبنا لحالنا بلاش صداع

سليم….بضحك بقي كده بقيت صداع يا امونه ماشي يا ستي
هخلص واجيلك يا نسمه والنبي يا امونه ابقي خلي فاطمه تعملها نسكافيه ملهاش نصيب تشرب اللي طلبته

امينه….خليك في حالك انت واتكل هتوصيني عليها

سليم…. بضحك شايفه المعامله كل ده بسببك

نسمه….بضحك معلش حقك عليا

سليم…..يلا لو احتاجتوا حاجه كلموني سلام عليكم

امينه …بالسلامه انت

نسمه….باحراج عليكم السلام

مشي سليم و نسمه كانت مكسوفه اوي بس امينه طبعا كانت عارفه تفكها ازاي..

امينه…..فاطمه فاطمه

فاطمه….ايوه يا ست امينه

امينه….اعملي كوبايه نسكافيه حلوه من يدك لعروستنا و اعملي الجهوه بتاعتي و خلصوا الغداء بسرعه

فاطمه….من عيني حالا

امينه…..بقولك ايه يا ست العرايس روحي غسلي وشك ويدك من تراب الشارع و تعالي يلا اجعدي

نسمه….بايتسامه طيب هو انا ممكن بس اصلي الضهر عشان ملحقتش اصليه

امينه….طبعا الله يرضي و فتح عليكي روحي اتوضي و انا بچهزلك الاسدال و سجادة الصلاه

نسمه….ماشي

………………..

عند نعيمه و نغم

نعيمه…..يعني هي متعرفش بيتك

نغم….لا متعرفش ولا بيتهيألي كانت عارفه بيت عمو احمد و لو عرفت مبقاش يفرق معايا هخاف من ايه كفايه خوف بقي انا قضيت ايام مرعوبه فيها بجد

نعيمه……بس قوليلي يا نغم هو انا ليه حاسه انك مش بتكرهي مريم يعني من كلامك واضح انك زعلانه جدا و موجوعه بس في جواكي حته بتحبها انا صح ولا غلط

نغم…..انا عمري ما عرفت اكرهه حد يا نعيمه اصل الكره ده احساسه وحش اوي مريم علي قد اللي عملتوا فيا حاولت اكرهها معرفتش بصي هي مريم مش حد وحش بس أذتني انا عمري ما كرهتها بالعكس كنت بحبها اوي و انغام اختي كانت بتحبها يمكن لما بقعد افكر مع نفسي بحس ان سبب انتحار انغام مش عشان جوزها ولا عشان اتجرحت منه هي عملت كده لانها مكانتش مصدقه ان اللي تعمل فيها كده مريم جايز اوي انغام مكانتش انتحرت لو هاني عرف عليها اي حد تاني لكن هي عقلها رفض ان مريم تكون الحد ده انغام كانت بتحب مريم حب ميتوصفش كانت بتشوفها كل حاجه حلوه كانت قدوتها رغم ان هي كانت بتخاف منها كتير لان مريم شخصيتها قويه اوي بس كانت بتحبها حب صادق كانت شايفه انها الامان و السند والعيله و الضهر و كل حاجه فا لما حصل كده هي حتي مقدرتش تواجه مريم مقدرتش تقف قدامها في الموقف ده من كتر حبها فيها اختارت انها تم*وت ولا انها تقف قدامها لانها كانت شايفه ان مريم حاجه كبيره اوي و الحقيقه مريم فعلا كانت حاجه كبيره بالنسبه لينا احنا مكانش لينا غيرها عارفه يا نعيمه احساس انك تتعري فجأه وسط الناس احساس انك تكوني سانده علي صخره قويه و فجاه تتسحب من وراء ضهرك اهو ده بالظبط اللي حسيت بيه انا وانغام