لقاء كارثي

فجأه اللي كانت بالنسبه لينا كل حاجه مطلوب مننا نطلعها من حياتنا نبعد عنها ميبقاش لبنا ضهر او سند صدقيني كانت واقعه جامده جايز مريم تكون مش وحشه و جايز الوقت هي بتندم و فاقت بس للاسف بعد فوات الاوان

نعيمه…..بصراحه هي تركيبه غريبه اوي من كلام البنات و الشباب و كلامك تبان انها حد كويس بس انا عذراكي بصراحه يعني انا عارفه انه غصب عنك يمكن انا متلغبطه في الحكم علي شخصيتها بس المهم انك بخير و مرتاحه

نغم….هو انتي لو مكاني يا نعيمه موقفك هيبقي ازاي

نعيمه….انا لسه بقولك اني متلغبطه بصراحه معرفش يعني معرفش كنت هقدر اسامح و تصعب عليا حالتها ولا مش هقدر يعني لو فكرت اني احط نسمه في نفس وضع اختك لا قدر الله بيتهيالي اني ممكن اخرب الدنيا عشانها و مسامحش ابدا بس فكره الحب اللي جواكي ليها واللي انا بصراحه مش قادره اتخيلوا مش عارفه جايز اسامح

نغم…..علي فكره انا سامحتها يا نعيمه بس جوايا حته مش قادره تصفي مش قادره انسي لما بفتكرها او اشوفها او حتي اسمها يتذكر بحس اني بتخنق منبقاش طايقه اسمع اي حاجه عنها مستحيل اقدر اتعامل عادي زي الاول

نعيمه….بصي يا نغم محدش طلب منك ترجعي زي الاول لان اصلا لما بنتوجع غصب عننا مش بنعرف نرجع زي ما كنا انتي سامحتي ودي اهم حاجه بس كمان مش شرط ترجعي لان ده صعب بس خليكي جنبها يا نغم مش عشانها عشان لو لاقدر الله جرالها حاجه هتفضلي تأنبي نفسك و ضميرك انك قصرتي

حبها اللي جواكي غصب عنك هيظهر بقوه لو راحت منك و هيهاجمك صدقيني انتي بتقولي ملهاش حد واللي خواليها كلهم يتمنوا مو*تها ولو عرفوا مرضها اصلا هيفرحوا و مش هيرحموها اعملي اللي عليكي يا نغم مترجعيش زي الاول بس اقفي معاها في مرضها لان هي لسه هتتعب اكتر اوقات يا نغم حتي لو موجوعين من حد في وقت شدتهم مبنقدرش نتخلي عنهم في ناس بتبقي قدرنا في الحياه مبنعرفش نهرب منه يبقوا واجعينا و مقررين انتا نقاطعهم عشان نرتاح بس لما يقعوا في مصيبه و نفكر و نلاقي انهم ملهمش غيرنا العاطفه اللي جوانا بتحركنا يعني تخيلي كده لو جالك الوقت بعد الشر يعني تليفون من المستشفي بيقولك الحقي مريم هتعملي ايه

بصتلها نغم بوجع و عينها دمعت و بصت لبعيد و هي بتهز راسها

نغم……معرفش بس اكيد هجري عليها