لقاء كارثي

اولا انا موضوع الجواز والارتباط كنت قافله خالص واظن انا حكيت قبل كده اسبابي و الحقيقه اني مكنتش عارف اني ممكن اقدر افتح قلبي من تاني او احب لحد ما قربت اكتر من ريهام يمكن السفريه الاخيره
كان ليها الفضل في القرب ده جايز محصلش بينا اي كلام او اي تلميح مني لريهام و كنا بنتعامل عادي جدا زي ما شوفتوا حتي لما رجعنا كانت الامور تمام و حتي لما نزلت الشغل برضوا الامور كانت تمام بس من وقت السفريه و من بعد كلامنا عن اسباب عدم ارتباطي ركزت بشكل او باخر مع ريهام يعني مؤدبه محترمه لفت نظري علاقتكم ببعض كا اخوات و علاقتها بوالدتها اللي فيها شبه كبير اوي من علاقتي انا واخواتي بامي وابويا الحقيقه كمان انتوا في كل تفاصيلكم تشبهونا جدا فا من هنا بدأت اهتم اركز لما نزلت الشغل بدأت اركز اكتر متجاوزتش حدودي ابداً معاها باي شكل من الاشكال و لا حتي حاولت اني ابين ليها كنت براقبها من بعيد لبعيد

لحد ما حسيت اني اتعلقت بيها بجد و اتكلمت وقتها مع ايمي قولتلها كل حاجه وهي اتبسطت و فرحت وقالتلي كمل ريهام بنت حلال يعني والكلام ده كله.

و اكيد مكانش ينفع اخد الخطوه اللي انا فيها الوقت حالا الا لو كنت عرفت راي ريهام و الحقيقه ان الفتره اللي اتعلقت بيها كنت بدات تحس ان ريهام حست بيا و كنت خايف انها تضايق مني او تضايق من اهتمامي و سؤالي عنها بس انا حسيت ان في قبول و ده اللي خلاني قررت اني اتكلم معاها.

طول ما هو بيحكي رشيد و عشري بيبصوا لبعض و يبتسموا بهدوء و يبصوا علي الشباب سلامه و ميدو كانوا بيسمعوا محمود ميدو عمال يسحب في مناديل و يمسح عرقه سلامه مرتبك و عمال يهز رجله و يجز علي فكه..

محمود….و يمكن لما قولت لريهام انا ممكن اكون توقعت اي رد فعل الا اللي هي عملتوا وده اللي خلاني اتاكدت اكتر ان اختياري ليها كان صح

بصولوا بتركيز

محمود….يعني بمجرد ما قولتلها ريهام سحبت ورقه كتبت فيها رقم و حطيتوا قدامي و لاقيتها بتقولي ده رقم ابويا و رقم اخواتي الثلاثه معاك من الاول و انت عارف عنوان بيتنا اتكلم معاهم

ابتسم سلامه بهدوء هو وميدو و عشري ضحك لرشيد

محمود….ااا احممم انا اتصدمت بس كمان كنت حابب برضوا اسمع رايها هي مكانتش مضايقه و وو يعني قالتلي انها موافقه بس هي مش بتاعت الجو ده عموما و فيما معناه انت لو جد فا انت عارف بيتي و عارف توصل لابويا واخواتي ازاي و الحقيقه انها كبرت في نظري اكتر بكتير مما كانت كبيره بص يا سلامه انت و ميدو من الاخر انا بحب ريهام و اتمني اكمل معاها و اتمني كمان ميبقاش عندكم مانع و قبل اي حاجه اعتبروني شخص غريب كانكم متعرفونيش يعني قولوا رايكم بصراحه بعيداً عن رشيد و ايمي و علاقتكم بينا عموما بس ده اللي عندي