چاسمين
چاسمين
فريد…مستحيل انتي هتيجي بيت اخوكي و اختك كل اللي عايزك بس تفهميه اني عملت كده عشانك انتي قبل اي حد و كل اللي طالبه منك تجمدي يا ساره و تنشفي عضمك شويه مش عايزك تخافي من حد مش عايز كل ما الباب يخبط اشوف النظره دي في عينك بكره تتجوزي وانتي كمان يكون ليكي بيت وجوزك اغلب الوقت مش هيبقي معاكي و في شغله هتفضلي جبانه كده اكيد لا.
ساره….اعذرني يا فريد انت عارف السبب انا بقيت اخاف حتي من خيالي انت وبابا عمركم ما قصرتوا معايا ولا عمركم حسستوني بأي خوف بس عدم وجودكم بيخوفني
فريد….انسي يا ساره انسي اللي شوفناه في حياتنا يجمد قلب اي حد احنا كبرنا بطولنا و الدنيا اديتنا دروس بما فيه الكفايه و علمتنا حجات كتير.
ساره….بس اهم شخص كان المفروض يعلمنا يا فريد سابنا في اول الطريق المفروض كانت تفضل معانا و تحسسنا بالامان و تعلمنا كل حاجه سابتنا للدنيا
فريد…بالعكس يا عبيطه ده بسببها خدنا اول درس في الدنيا وهو مواجهه الحياه كبرنا و اتعلمنا من غيرها و مش محتاجين ليها في اي حاجه بسببها نشفت عضمي و بسببها المفروض انها علمتك ان مفيش حد دايم ولازم تعتمدي علي نفسك
ساره….بس انت وبابا كنتوا دايمين يا فريد
فريد….و عمرنا ما هنبعد عنك بس لازم تتعلمي متتعلقيش باي حد لازم تعرفي تواجهي لازم تتغلبي علي حد لازم متضمنيش وجود حد عايزك تكوني قويه يا ساره انتي فاهمه.
ساره…بحب فاهمه يا حبيبي ربنا يخليك ليا
فريد…طيب ادام فاهمه يلا خدي الباسكت وروحي لعامل النظافه
ساره….بضحك لا ده لا يمكن ابدا تصبح علي خير يا كبير.
فريد…بضحك خدي يا بت هنا
ساره…قولنا تصبح علي خير يا كبير.
فريد…ااه يا جبانه مفيش فايده امري لله.
باااااااااااك.
فاق فريد من شروده و بص لبيري اللي كانت بتتنفض من الرعب ودموعها نازله.
فريد….بهدوء نزل سلاحه و بصلها خليكي هنا انا هروح اشوف مين.
بيري…مسكت بيري ايده بسرعه عشان خاطري بلاش متفتحش اوعي تسلمني ليهم
فريد….بص علي ايدها اللي كانت زي التلج و رجع بصلها قولتلك متخافيش مش معني مده اني اديتك الامان وصدقتك بس انا همشي وراكي لحد ما اتاكد بس لو طلعتي بتكذبي انا بنفسي اللي هسلمك مش ليه للشرطه.
بيري….والله مش بكدب وانا موافقه لو اتاكدت سلمني للشرطه بس مش ليه هو
فريد…هز راسه بهدوء خليكي هنا مش هتأخر ومتعمليش صوت.
بيري….حاضر.
سابها فريد وطلع علي فوق وراح علي الباب طلعت هي وراه بهدوء عشان تشوف اللي بيحصل من بعيد.
فتح فريد الباب شاف استاذ عماد و الشابين معاه.
فريد….ايوه يا استاذ عماد.
عماد…اسف يا ابني علي الازعاج شكلك نمت.
فريد…لا لا كنت في الحمام اسف علي التأخير المهم في حاجه ولا ايه ؟
عماد…الراجل اللي واقف ده مصمم يخلي رجالته يدوروا في البيوت
فريد…ليه هي سايبه ولا ايه وبعدين فين الامن
عماد…واقفين بره مش راضيين عن اللي بيحصل طبعاً بس في النهايه هما غلابه والراجل ده شكله قوي و واصل واكيد مش هيعرفوا يروحوا ولا يجوا معاه.
مسك فريد تليفونه اتصل علي رقم وبص لعماد.
فريد….روح علي بيتك يا استاذ عماد و انت يا وليد خد نادر واطلعوا متقلقوش انا هتصرف البلد مش سايبه و فيها قانون
قرب منهم في اللحظه دي حمزه و كان خالد واقف وراه لكن من بعيد شويه.
حمزه….استاذ فريد انت ليه عامل مشكله احنا كل اللي عايزينه اننا ندور علي البنت و اكيد مش قاصدين ازعاج لاي حد يعني الموضوع عادي
نزل فريد الموبايل ورجع اتصل علي نفس الرقم تاني وبص لحمزه.
فريد….و الله انا ممكن اسمحلك تفتش بيت بيت و هساعدك في ده كمان لكن في حاله واحده لو التفتيش ده قانوني يعني تتصل بالشرطه و يكون في اذن نيابه و قتها بس هيكون مرحب بيكم لكن تدخلوا برجاله مسلحه في نص الليل علي بيوت مليانه ستات واطفال وكبار سن علي جثتي
خالد… من بعيد علي فكره انا مش بستأذنك انا هعمل كده انا لا داخل اسرق بيتك ولا بيت اي حد ولا عايز أذي اي حد فيكم انا بدور علي بنت سرقت اختي في ملايين و ده حقي مش يمكن في حد بيحاول يحميها
فريد….بصله ثواني بكبرياء اولاً انت عمرك ما هتدخلي بيتي او بيت اي حد غصب عني ثانياً انت ماتقدر تأذي اي حد خد بالك من كلامك واختار مصطلح علي قد امكانياتك و اوعي تفكر ان الرجاله اللي معاك والاسلحه دي ممكن يهز ا حد فينا و لو انت شايف بقي ان ممكن بكون في حد بيحمي البنت دي يبقي انا صح نتصل بالشرطه حالاً وهنا يجوا يتصرفوا علي الاقل يوم ما هيدخلوا اي بيت هيدخلوا بصفتهم رجال امن وبيشوفوا شغلهم مش شوية بلطجيه ماسكين سلاح.
خالد….خد بالك من كلامك لان شكلك مش واعي للي بتقوله متقولش كلام ممكن تندم عليه
فريد…متقلقش انا مبندمش علي الكلمه اللي لساني ينطقها وواعي جداً لكل اللي بقوله و عشان اكون ماشي معاك صح للنهايه هتعبر اني مسمعتش منك اي كلمه.
وقبل ما خالد يرد عليه رفع فريد كفه عشان يسكته ويرد علي التليفون وبعد شويه من قدام الباب واتكلم بهدوء
فريد….سيادة اللواء اسف يا باشا علي الاتصال المتأخر ده بس حضرتك عارف اني مش بتصل غير في الشديد القوي
خيري….عاش من سمع صوتك يا فريد و بعدين انت تتصل في اي وقت خير في حاجه
فريد…شكراً يا باشا انا بس محتاج هنا حمله محترمه في المكان لان في واحد كده جاي وساحب معاه كام راجل مسلح بيدورا علي بنت و بيقول انها سرقت من اخته دهب والماظ المشكله مش في كده المشكله انه عايز يدخل بيتي و بيوت الناس في المكان بالقوه عشان يدور عليها بنفسه و انا مش حابب اتدخل و بقول تمشي قانوني افضل لان حضرتك عارف اني لو اتدخلت هتبقي كارثه حضرتك عارفني كويس و عارف اني بعيد عن المشاكل من فتره كبيره بس كمان لو المشاكل جات لحد عندي و قتها مش هشوف قدامي.
خيري….فرررريد اهدأ و حافظ علي ثباتك و كويس اوي انك اتصلت بيا سيبلي انا الموضوع ده وانا هتصرف المهم مين هو تعرفه ؟
فريد…لا بس شكله عيل متدلع و ابن حد واصل يعني الدخله بتاعته مدخلتش عليا كمان واثق انه كداب وشكله بيدور علي البنت دي لغرض تاني ومفيش لا سرقه ولا حاجه.
خيري… وايه اللي عرفك مش يمكن صادق بيتهيألي مفيش واحد هتجيله الجرأة يعمل كده الا لو كان علي حق.
فريد…عيب يا باشا لما تقولي انا كده انا صحيح بعدت ومبقتش معاكم بس اوعي تنسي ان حضرتك اللي لقبتني بالفهد الافريقي و زي ما بقدر اشم اي ريحه و اميزها عن بعد اقدر كمان اشم ريحة الكذب الواد ده كداب و في حوار تاني غير السرقه
خيري…. بابتسامه تمام يا افريقي و انا مصدقك بس كمان اوعي تنسي اني اعرفك اكتر من نفسي انت مش عشرة يوم يا فريد انت ابني اللي مخلفتهوش قولي يا فريد انت لاقيت البنت مستخبيه عندك و حابب تحميها منه ؟
سكت فريد ثواني و بعدين رد بسرعه.
فريد…لا ملقيتهاش ولا شوفتها انا جيت من بره لاقيت الحوار ده داير بره بس معجبنيش الكلام فا قولت اكلمك بدل ما انا اتدخل و الاهم بما انك عارفني اكتر من نفسك وبتعتبرني ابنك اللي مخلفتهوش فا اكيد كمان عارف اني لو لاقيت البنت اه هحميها و مش هسلمها لشوية بلطجيه مسلحين
خيري….بابتسامه و صلني جوابك يا فريد عموما اطمن الحوار هيخلص حالاً ومن غير اي حمله كمان و انا هعرف مين ده وهتابع الموضوع بنفسي.
فريد…شكراً يا باشا و اسف مره تانيه علي الازعاج
خيري…. فريد
فريد…نعم.
خيري….محتاج اشوفك يا فريد عايز اقابلك واقعد معاك شويه
فريد…بتنهيده لو مقابله بين اب وابنه علي راسي وكلامك اوامر لكن لو مقابله بسبب رجوعي للجهاز اسف يا باشا.
خيري…مقابله اب لابنه يا فريد و هتيجي و هشوفك
فريد….اعتبره حصل يا باشا نخلص بس من الموضوع ده و هكلم حضرتك ونتفق علي معاد
خيري…. مستنيك يا فريد يلا سلام.
فريد….سلام.
قفل فريد الخط و راح تاني قرب من الباب
فريد….استاذ عماد يلا خدوا الشباب و اطلعوا انا بلغت خلاص والشرطه هتيجي تشوف شغلها و لو الاستاذ ليه حق هيرجعله.
حمزه….بتوتر لا وعلي ايه ندخل الشرطه ونتعب الرجاله شكراً يا استاذ فريد.
ابتسم فريد ابتسامه شيطانيه وسكت.
راح حمزه قرب من خالد بسرعه
حمزه….خالد باشا لازم نمشي حالاً اللي اسمه فريد ده بلغ الشرطه و في اي لحظه هنلاقيهم هنا
خالد…قولتلك مش ماشي غير وهي معايا
حمزه…لو مهيب باشا عرف اللي بيحصل ده انت عارف هيعمل ايه كويس واحنا مش عايزين الباشا الكبير يضايق ونشغله معانا في الكلام الفاضي ده خلينا نمشي احسن.
خالد…مش هسيبها يا حمزه.
حمزه….مين قال اننا هنسيبها خلينا نمشي بس و هنسيب رجالتنا هنا في كل مكان يراقبوا المنطقه من بعيد لبعيد ولو شافوها في اي مكان يبلغونا فوراً
المهم حضرتك تمشي قبل الشرطه ما توصل ولازم كمان الرجاله تختفي عن الانظار عشان مش عايزين قلق متنساش ان دخلتنا دي مش قانونيه و الباشا الكبير اللي هيبقي في وش المدفع مش عايزين نضره متنساش الانتخابات اللي هو بيحضر نفسه ليها يلا خلينا نمشي بهدوء و نفهم الرجاله يعملوا ايه.
خالد…بص لفريد من بعيد بغضب حتت البتاع ده هيمشي كلامه علينا.
حمزه…اديك قولت حتت البتاع يعني مش حاجه كبيره عشان نحطوا في دماغنا وبعدين هو عامل لنفسه قيمه كبيره و هو ملهوش لازمه سيبك منه
خالد….تعرفلي ايه حكاية اللي اسمه فريد ده وليه الناس بتعمله حساب كده انت عارف انا ليا حق عنده وحقي مش هسيبه.
حمزه…اوامرك يا باشا المهم خلينا نمشي الوقت و بس نلاقي بيري نبقي نفضي للي اسمه فريد ده ماشي وبعدين احنا نسينا حاجه مهمه اوي
بصله خالد من غير ما يتكلم.
حمزه…حضرتك ناسي الخاتم اللي جبته لبيري بيتهيألي هو اللي هيوصلنا ليها بكل سهوله
ابتسم خالد لحمزه بشر وبعدين بص لفريد بتحدي و راح علي عربيته و ركب و كل رجالته و اتحركوا من المكان.
عماد….بابتسامه شكلهم خافوا منك يا فريد يا ابني ربنا يحميك
وليد…طبعاً خافوا مش شايف الهيئه اللي ترعب يا استاذ عماد ولا ايه.
فريد…بابتسامه و لا خافوا ولا حاجه احنا بنتكلم في حق احنا دولة قانون مش بلطجه عموما حصل خير واعتبروا الموضوع انتهي يلا روحوا ارتاحوا الوقت اتأخر و بلغوا الامن يفتحوا عينهم
عماد…ماشي يا ابني تصبح علي الف خير.
نادر…تصبح علي هير يا كوتش.
فريد…وانتوا من اهل الخير
مشي الجميع ورجع الوضع زي ما كان قفل فريد بهدوء و بص وراه
لمح بيري بتقرب منه بهدوء وقدر يشوف ملامحها عن قرب و يشوف كم الجروح والبهدله اللي هي فيها.
بيري…. شكراً لحضرتك مش عارفه اقولك ايه علي اللي عملته معايا.
فريد…بهدوء وهو مش باصص عليها انا معملتش حاجه و زي ما قولتلك لسه هتاك.بنفسي اذا كنتي صادقه او كدابه
بيري…. وانا قولتلك صدقني انا مش كدابه.
فريد….بحده و انا اللي هحدد ده مش انتي
بصتله بيري بضيق من طريقته بس قررت تتحمل لانها محتجاه.
بيري….تمام عموماً يعني لو مش هزعجك هستني بس نص ساعه علي الاقل يكون الجو بره بقي اهدأ و همشي علي طول
فريد….تمشي فين ؟ الجو بره مش هيبقي اهدأ ولا حاجه هما مش هيسيبوكي و مش هيمشوا هما ممكن يبعدوا شويه لكن هيفضلوا قريبن من المكان يعني خروجك الوقت في خطر عليكي
بيري….ايوه بس هما مشيوا خلاص اللي اعرفه عن خالد انه لو عايز يفضل هيفضل مش هيعمل نفسي مشي ويستخبي.
فريد….بثقه يبقي متعرفيهوش لانه حتي لو مشي هيسيب رجالته حوالين المكان لحد ما يتأكد بنفسه انك مش هنا و لحد ما ده يحصل هتفضلي هنا و انا هقولك تمشي امته.
بيري…. بصدمه افضل هنا فين ؟
فريد…هنا في البيت هيكون فين يعني.
بيري….ايوه بس هفضل ازاي مع حضرتك اكيد مش هينفع
فريد…تمام الباب قدامك اتفضلي امشي بس انا مش مسؤول عن اي حاجه تحصل معاكي بمجرد ما تخرجي من الباب ده.
بيري…. يعني ايه ؟
فريد…زي ما سمعتي انا قولت اللي عندي حابه تعملي بيه تمام مش حابه شرفتي الحبه دول.
بيري…. بضيق هو حضرتك ليه بتتكلم معايا بالشكل ده علي فكره انا مش كدابه ولا حراميه و لحد ما تتأكد من كلامي مينفعش تتكلم معايا علي اني عامله مصيبه ولا ينفع احتياجي ليك يديلك الحق تكلمني بالاسلوب ده انا بس مش عايزه اعمل لحضرتك ازعاج اكتر من كده مش عايزه اسببلك احراج قدام مراتك او عيلتك.
فريد….اولاً انا بتكلم باسلوب مناسب لتنشيف دماغك انا قولتلك اللي عندي و عارف انك لو خرجتي الوقت هيلاقوكي بسهوله ثانياً لو علي الازعاج فاهو حصل خلاص اما بقي لو علي الاحراج من مراتي او عيلتي متقلقيش انا عايش لوحدي.
بيري….بصدمه كماااان.
فريد….بتقولي حاجه ؟
بيري….اااا لا بس يعني انا كمان مش عايزه بابا وماما واخواتي يقلقوا عليا و بعدين ممكن لما يلاقوني مرجعتش يبلغوا البوليس.
فريد….تقدري تكلميهم وتطمنيهم بنفسك عادي يعني مش قضيه.
بيري…. قولت لحضرتك ان الموبايل بتاعي وقع مني وانا بهرب منهم.
فريد…اممم تمام ممكن تاخدي موبايلي وتتصلي عليهم وتطمنيهم
بيري….بصتله و اتجمعت الدموع في عينها بس انا مش حافظه رقمهم
فريد….يعني ايه مش حافظه رقمهم في حد ميحفظش رقم اهله
بيري… انا مش بعرف احفظ ارقام حتي رقمي مش حفظاه.
فريد…باستغراب مش حافظه رقم اي حد خالص لا اهلك ولا صحابك ولا اي معارف ؟
بيري…لا مش حافظه خالص .
وقف فريد و هو بيفكر و مش عارف يعمل ايه
بيري… انا بجد اسفه دخلتك في مشكله حضرتك ملكش ذنب فيها و وجعتلك دماغك و مقدره انك مش حابب اني اخرج الوقت عشان محدش فيهم يشوفني بس زي ما قولتلك انا شويه وهمشي بسرعه لاني لازم اطمن اهلي عليا هحاول انهم ميشوفنيش و لو شافوني خلاص يبقي نصيبي كده.
فريد…ولما انتي مش فارق معاكي اوي كده انهم يلاقوكي و مصممه تطمني اهلك عليكي ليه محاولتيش وانتي بتجري منهم تروحي علي بيت اهلك علي الاقل هناك هتلاقي اللي يحميكي في النهايه دول اهلك وانتي بنتهم ولو عرفوا اللي عمله معاكي مش هيسكتوا و لا ايه مش شايفه يعني انها غريبه شويه .
بصتله بيري بوجع و نزلت دموعها قربت من كنبه صغيره وقعدت و هو فضل واقف قدامها
فضل باصصلها و حاسس انها صعبانه عليه مش عارف ليه يمكن خوفها و احتياجها ليه فكره بساره اخته و يمكن احساسه انهم يلاقوها و يخطفوها فكره بخطف ساره عشان كده كان حاسس انه متعاطف معاها وحابب يساعدها
بيري…. ماما بتحب خالد اوي و ديماً شايفه انه حد مناسب ليا عمرها ما حبت حمزه و ما صدقت ان حصل بينا مشاكل عشان ابقي مع خالد هي شايفه اني مش عارفه مصلحتي وبتدلع
كتير اوي اشتكيت منه يعني انه بيدخل في كل تفاصيل حياتي بيدي لنفسه الحق في كل حاجه وكأنه ضامن اني ليه فجأه بيطلع قدامي في كل مكان علي طول بلمح رجالته ورايا وبيراقبوني اتكلمت كتير في الموضوع ده وقولتلهم قد ايه اني بكرهه وبخاف منه اوقات بس هي لا مش حاسه بيا لو كنت روحت علي هناك مكانتش هتصدقني و كانت هتفكر اني اخترعت حكاية انه اتهجم عليا عشان اخلص منه و خلاص عشان كده خوفت يمكن اه هما عيلتي بس انا مش بحس بالامان معاهم خصوصاً في اي حاجه تخص خالد.
فريد…غريبه !! طيب و بباكي
بيري… بابا طيب اوي و بيحبني بس هو بيسمع كلام ماما و ميقدرش يقف قدامها لان بابا بيشتغل مع والد خالد و تقدر تقول انهم من زمان بيشتغلوا مع بعض و ليه افضال كتير علي بابا وبابا ميقدرش يزعله و ماما ديماً خايفه وحاسه ان الوقوف قدامهم او رفضي لخالد تحديداً ممكن يخسرنا كتير خصوصا ان خالد و حيد والده و وريثه الوحيد و مش بيحب يزعله و ماما شايفه ان جوازي من خالد هيحل كل مشاكلنا وهيخلينا في امان اكتر .
فريد…يعني تبيع بنتها عشان الفلوس بيتهيألي صعب مهما كان انتي بنتها.
بيري…بص ماما بتحبني انا عارفه و اكيد بتخاف عليا يمكن هي عمرها ما اظهرت ده يعني عمري ما حسيت بحبها ليا و لا خوفها عليا و معاملتها ليا عكس معاملتها لاخواتي بس انا عارفه انها بتعمل كده لاني مقدرش اقولها لا ولا ازعلها مني و عشان انا الكبيره بتيجي عليا ديماً بس هي بتحبني وانا اتعودت علي طبعها بس صدقني في اي حاجه تخص خالد هي بتتحول شايفه انها كده بتحميني و بتأمني و بتختار ليا الراجل الصح.
فريد….اممم طيب وايه العمل الوقت تفتكري يعني لو انتي. حتي فاكره اي رقم وعرفت مكانك هتسيبك و هتحميكي و لا هتعرف توصلك او مش بعيد تقول للي اسمه خالد ده مكانك ويجي ياخدك بنفسه
بيري…. اكيد هتعمل الاختيار التاني هتوصلي او تقول لخالد مكاني انا اكيد مش هعرفها مكاني كل الحكايه اني عايزه اطمنها عليا لاني معرفش هما عرفوا حاجه ولا لأ ولا عارفه اخواتي واصحابي مشيوا وهما عارفين اللي حصل ولا ميعرفوش حاجه انا حاسه ان اكيد حصل مشكله لانهم مش هيمشوا من غيري وعارفين اني مش همشي من غيرهم عشان كده حابه اطمنهم و اطمن عليهم.
فريد…طيب في حل
بيري…ايه هو ؟
فريد…قوليلي اسم والدك بالكامل او اسم اخوكي و انا هجيبلك رقمهم ليا واحد صاحبي يقدر يخدمني بسهوله و بعدها تقدري تكلميهم
بيري….طيب تمام بابا اسمه سعيد مرزوق ابراهيم الصاوي واخويا مازن سعيد مرزوق ابراهيم الصاوي
خالد…اممم تمام خليكي معايا لحظه.
هزت بيري راسها وفضلت بصاله وهو بيعمل مكالمته مع صاحبه قفل الخط و استني حوالي عشر دقايق هو ساكت وهي قاعده قدامه ساكته بدأت تحس بوجع في كل جسمها والجروح بدأت تألمها و كانت حاسه ببرد شديد فستانها قصير ومكشوف والجو برد جداً
رن موبايل فريد فا رد بسرعه و هو ماسك ورقه وقلم
فريد…حبيبي يا كريم تعبتك معايا تسلم
كريم…تعبك راحه يا باشا انت تؤمر يلا هسيبك انا الوقت.
فريد…مع السلامه .
بصلها فريد و كتب الرقم علي موبايله ومدلها ايده بالموبايل.
فريد…ده رقم والدك اتصلي طمنيه واحكيله اللي حصل
بيري….طيب ممكن أسأل حضرتك سؤال ؟
فريد….خير
بيري….هو مش ممكن لو خالد عرف اني كلمت بابا و ماما و ياخد الرقم ويقدر يوصل لمكاني عن طريقه خالد مش سهل و يقدر علي اي حاجه.
فريد….متقلقيش ده برايڤت نمبر و اكيد مش هخليكي تتصلي من رقم عادي اتصلي يلا ومتقلقيش لو ابن مين في البلد مش هيقدر يوصل.
مسكت منه بيري الموبايل و اتصلت علي رقم والدها قامت بهدوء مشيت كام خطوه بعيد عنه و هي بتمشي بصعوبه ومش قادره تدوس علي رجلها.
فريد…لحظه
بصتله بيري من غير ما تتكلم.
فريد…افتحي الاسبيكر
بيري….الاسبيكر ؟
فريد….اه من حقي اصدق كل اللي انتي قولتيه ده ولا ايه ؟
بيري….بنظرة حزن اكيد
فتحت الاسبيكر و رد عليها والدها في نفس اللحظه.
سعيد….بصوت باين عليه التوتر الو
بيري…بدموع بابا انا بيري.
سعيد بلهفه بيري انتي فين يا بيري.
سمعت صوت والدتها من بعيد
فاتن..بغضب دي بيري اديهالي بسرعه
سعيد…لحظه يا فاتن اطمن عليها
انتي فين يا بيري انتي كويسه يا بنتي ؟
بيري…اهدأ يا بابا انا بخير يا حبيبي اطمن.
فاتن…افتح الاسبيكر ده انتي ايه اللي عملتيه ده انتي عايزه تجلطيني بعمايلك.
سعيد…استني يا فاتن نفهم بيري يا حبيبتي صحيح اللي خالد قاله انتي اتهجمتي عليه فعلاً
بيري….ايوه يا بابا انا عملت كده
سعيد….ليه بس يا بنتي كده ليه
فاتن…انت لسه هتطبطب عليها في الكلام عملتي كده ليا انطقي
بيري..ببكاء يا ماما طب اديني فرصه اتكلم
فاتن…فرصه ؟ انتي اللي زيك ضيع كل الفرص من ايده و عشان نصلح القرف اللي عملتيه ده ترجعي حالاً و اعملي حسابك هتتجوزي خالد ورجلك فوق رقبتك و ادعي ربنا انه يوافق بعد اللي عملتيه معاه الراجل علي اخره واحمدي ربنا كنان انه احد الوقت صابر عليكي وعلي عمايلك و عشان لاخر لحظه شاريكي مبلغش ابوه باللي عملتيه.
بيري…. انا مش هتجوزه لو هموت لازم تعرفي ده كويس.
فاتن….ده مش بمزاجك انتي ملكيش اي حق ترفضي او تقبلي اللي بقوله هيتعمل انتي فين
بيري… اكيد مش هقولك و مش هرجع يا ماما الا لو خرجتي خالد من حياتي خالص ده انتي حتي مسالتنيش ايه السبب اللي خلاني اعمل فيه كده.
سعيد…بيري يا حبيتي اسمعيني انتي عارفه ان عملتك دي هتسببلنا اضرار كتير احنا في غني عنها عرفيني عملتي كده ليه يا بيري وانا هحاول الحق الموضوع من اوله الراجل لسه ماشي حالاً من هنا و شايط علي الاخر و اخواتك انا مش فاهم منهم اي حاجه شكلهم شاربين
بيري….طيب هو قال انا ليه عملت كده ؟
فاتن…بغضب اه قال انك شوفتي حمزه مقدرتيش تمسكي نفسك و شكلك حنيتي ليه بعد كل اللي عمله فيكي و لما خالد اتكلم معاكي وحسسك انه غيران وانه بيحبك و ميرضاش علي نفسه كده اعترضتي هو اعترف انه اتعصب شويه و صوته عليي شويه و انتي طبعاً لانك مش طيقاه و بتتلككي اتعصبتي و وصلت معاكي انك ضربتيه علي دماغه و قولتيله انك هتفضحيه و تقوليلنا انه اتهجم عليكي
بيري….ببكاء وانفعال كدااااب محصلش هو فعلاً اتهجم عليا الحقير و الزباله التاني اللي بيقولك اني اتجننت لما شوفته وحنيت هو سبب كل ده وقف معايا و كلمني و خلاني اتعصبت بهدلته وسيبته وكنت همشي لولا ظهور خالد قدامي كلام حمزه خلي الدنيا تلف بيا و خالد دخلني المكتب قالي ارتاحي معرفش ايه اللي حصل فيا قالي انه هيكلم مازن يروحني و فجأه وانا مغمضه عيني وسانده راسي اتهجم عليا وقالي لو مش هتبقي ليا بمزاجك هتبقي ليا غصب عنك محستش بنفسي غير وانا بضربه و جريت لقيت حمزه في وشي كان واقف بيحرص ليه المكان الواطي فكرته جاي ينقذني منه ضربته هو كمان و تقدري تشوفي الجرح اللي في راسه هو كمان اللي بيقولك اني حنيت ليه و بعدها هربت منهم.
سعيد…طيب مجتيش علي هنا ليه يا بنتي.
بيري… عشان خوفت يا بابا لما شوفت خالد وحمزه سايحين في دمهم و عشان عارفه ان ده اول مكان خالد هيدور عليا فيه و عارفه كمان ان ماما مش هتصدقني بس صدقني يا بابا صدقيني يا ماما هو ده اللي حصل والله.
فاتن…مش مصدقاكي و عمري ما هصدقك يا بيري عارفه ليه عشان عارفه ان دي حركاتك و طول الوقت بتحاولي تطلعي في خالد كل عيوب الدنيا الراجل بيتمنالك الرضا ترضي بس انتي ديماً بتجري علي اللي بيدوس عليكي بتجري علي الرخيص وتشتريه و تبيعي الغالي مبتفكريش غير في نفسك ومصلحتك وبس ومش مهم انا وابوكي واخواتك انتي عارفه ان عملتك دي هتخسرنا كتير ومع ذلك عملتي اللي في راسك و بتتبلي علي الراجل.
بيري… انا يا ماما بتبل عليه طب ليه؟
فاتن…ايوه انتي و لو فرضنا يعني ان اللي بتقوليه صح وهصدقك مخدتيش بالك من كلامه لو ده حقيقي يعني الراجل
بيقولك هتبقي ليا حتي لو غصب عنك يعني شاريكي و راضي بيكي و احد غيره كان اتهجم عليكي وخد اللي هو عايزه و انتقم لكرامته و رجولته وسابك زي الكلبه انما خالد عايزك في كل الاحوال واحمدي ربنا لو واحد زي حمزه بتاعك كان زمانه اتهجم عليكي وخد اللي عايزه وسابك
بيري….بصدمه انتي بتقولي ايه يعني عادي انه يتهجم عليا وابقي ليه بالغصب يعني نش فارق معاكي انه يتهجم عليا المهم انه قال اني ابقي ليه
فاتن…اه مش فارق معايا و اسمعيني كويس انا هقفل معاكي و مش هستني كتير ساعة زمن او اقل واشوفك قدامي عشان نصلح القرف اللي انتي عملتيه و صدقيني يا بيري لو اتأخرتي حسابك هيكون معايا انا مفهوووم
بيري…بتحدي مسحت دموعها لا مش مفهوم ومش هرجع يا ماما و لازم تعرفي اني مش هرجع الا لو خالد خرج من حياتي تماماً مش هرجع غير لما احس انك بتصدقيني و بتثقي فيا مش بتيجي عليا عشانه
فاتن…بيرررري
قفات بيري الخط في وشها و فضلت تعيط بوجع وهي منهاره
فريد كان واقف بيسمع كلام امها و سلبية ابوها ومش مصدق ان في اهل ممكن يعمل ا كده في بنتهم . صدقها وعرف انها مش بتكدب عليه في اي حرف تعاطفه معاها زاد لكن محاولش يبين ده لكن قرر انه يحميها لغايه ما هي تقرر تمشي.
بعد حوالي خمس دقايق كان فريد سايبها براحتها خالص تعيط وتنهار وتخرج كل اللي جواها
مسحت بيري دموعها و لفت وشها ليه و قربت منه وهي بتمشي بالعافيه علي رجلها ومدتله ايدها بالموبايل.
بيري… شكراً لحضرتك.
هز فريد راسه من غير ولا كلمه وخد منها الموبايل.
بيري… صدقتني الوقت ولا لسه شايف اني بكدب ؟
فريد…اااا انتي ناويه علي ايه الوقت ؟
بيري… بدموع وضعف بصتله مش عارفه مفيش اي حاجه في دماغي حاسه ان دماغي واقفه بس الاكيد اني مش هرجع الوقت هحاول اوصل لحد من صحابي و هشوف لو ينفع يتصرفولي في مكان اقعد فيه مؤقتاً لاني لو روحت في بيت حد فيهم هيقدر يوصلي بسهوله.
فريد…. تقدري تفضلي هنا زي ما انتي عايزه زي ما قولتلك انا عايش لوحدي كمان طول اليوم انا مش ببقي موجود برجع بليل يعني طول اليوم هتبقي براحتك و من هنا لحد ما الامور تهدأ وتقدري تفكري و تعرفي هتعملي ايه اعتبري البيت بيتك.
بيري…ايوه بس يعني.
فريد….مفيش بس يعني انا شايف ان ده حل مناسب ليكي لو هتقدري تثقي فيا خليكي مش هتقدري علي الاقل تفضلي هنا يوم او اتنين لحد ما توصلي لصحابك وتظبطي امورك.
بيري…انا مش عارفه اقول ايه لحضرتك علي كل اللي عملته معايا و مش عارفه اعتذرلك ازاي علي القلق اللي سببتهولك واقتحام بيتك من غير اذن و اكيد يعني لو عالثقه بيتهيألي انت عملت معايا اللي اهلي معملهوش كل الحكايه اني مش حابه ازعجك.
فريد…مفيش ازعاج و لا في اي حاجه حصلت كل حاجه عدت خلاص المهم الوقت زي ما قولتلك اعتبري البيت بيتك و متفكريش في اي حاجه الوقت انتي هنا في امان.
بيري… شكراً لحضرتك
هز فريد راسه بهدوء وسابها وراح علي الاوضه بتاعت ساره اخته وقف قدام الدولاب بتاعها شويه الاوضه بتاعتها زي. ما هي من يوم ما سابتها مترتبه و ديماً بلال بينضفها و بيعمل كل اللي فريد يطلبه منه علي امل انها هترجع في يوم من الايام
فتح الدولاب بهدوء وخد ترنج شتوي و غيار داخلي و تنهد تنهيده طويله.
فريد… بحزن اسف يا حبيبتي مضطر .
فضلت بيري تعيط و تسحب من المناديل تمسح دموعها و تحدف المناديل علي التربيزه
رجع فريد بعد دقايق و هو ماسك في ايده اللبس وشنطه صغيره فيها ادوات طبيه بص علي التربيزه بأشمئزاز لان هو شخص منظم جداً و عنده وسواس قهري في النظافه و بيحب يشوف كل حاجه مترتبه وفي مكانها وبيري عكسه تماماً
شخصيه عشوائيه ودي كانت اول نقطه فاصله بينهم.
فريد….اتفضلي تقدري تدخلي تاخدي دش و تلبسي اللبس ده بس متلبسيش الچاكيت بتاع الترنج غير لما اغيرلك علي الجرح اللي في دراعك من وراء ده لان واضح انك اتجرحتي في حاجه حاده ولازم الجرح يتطهر عشان ممكن تعملك تلوث او تسمم.
بيري… هو حضرتك عرفت ازاي اني اتجرحت في حاجه حديد ؟
فريد…يعني واضحه مش محتاجه ذكاء و بعدين ممكن تكون كان فيها صدأ فا لازم تطهريها كمان واضح انك كنتي بتجري وانتي حافيه و رجلك كلها دم.
بيري… خدت منه اللبس وبصتله هو حضرتك متأكد انك عايش لوحدك ؟
فريد….تقصدي عشان اللبس ده بتاع اختي و هي اوضتها فوق و هتنامي فيها هي فوق علي اليمين اول اوضه هتقابلك و الحمام فيها تقدري تستخدمي اي حاجه .
بيري…ايوه بس هي مش هتضايق لو رجعت وشافتني نايمه في اوضتها ولابسه لبسها؟
فريد…لا مش هتضايق هي مسافره حالياً و مش هترجع الوقت خالص و حتي لو رجعت مش هتضايق يلا اطلعي.
بيري….حاضر بعد اذنك
مشيت بيري وهي بتعرج علي رجلها ومش قادره تمشي طلعت علي الاوضه بصت علي الاوضه كانت جميله ومترتبه لمحت صورتها علي الكومدينو هي و فريد و والدهم بيضحكوا و باين انهم مبسوطين ابتسمت بيري بهدوء و بعدين سابت الهدوم علي السرير ودخلت علي الحمام تاخد دش دافئ.
في الوقت ده فريد كان واقف قدام التربيزه باصصلها بقرف خد نفس طويل ومسك منديل شال بيه المناديل المرميه علي التربيزه و رماهم في الباسكت
وراح مسك الجزمه بتاعتها باطراف صوابعه و حطها في الجزامه و راح جاب فوطة تنظيف و ديتول مسح الترابيزه
ولمح في الارض اثار دماء بسبب جرح رجلها فا راح جاب ادوات التنضيف و فضل ينضف في المكان بهدوء و هو مش طايق نفسه لحد ما خلص كل حاجه ورجع البيت زي ما كان.
دخل علي المطبخ طلع حجات من التلاجه عشان يعملها اكل
اكيد بعد اليوم المتعب ده جعانه.
في الوقت ده كانت بيري خلصت حمامها و خرجت اتسرحت فكت شعرها ونزل لبعد ظهرها بكتير كان طويل اوي مكانش باين لان الكوافير كان رافعه و باين انه ملموم خلصت تسريح و بصت علي رجلها الارض كانت متلجه و هو نسي يديها حاجه تلبسها
فتحت الباب ونزلت بهدوء وهي حافيه ومش قادره تدوس علي رجلها نزلت تحت مكانش فريد موجود قدامها بس شمت ريحة اكل و حست انها جعانه اوي من وقت الفطار الصبح وهي مكلتش اي حاجه غير الشوكولاته اللي خالد ادهالها افتكرت ان شنطتها وراحت عليها فتحتها و خرجت كل اللي فيها عشان تطلع علبة الشوكولانه خدت واحده منها كلتها عشان تضيع الهبوط اللي حاسه بيه و سابت كل حاجه خارجه من الشنطه زي ما هي.
وفضلت تبص علي البيت كانت حاسه براحه ودفئ غير طبيعيين البيت مريح بشكل مش طبيعي قامت وقفت مره تانيه و راحت علي الشباك تبص براحه عشان تتأكد في حد ولا لأ بس الوضع بره كان هادئ خالص.
خرج فريد في الوقت ده لمحها واقفه شعرها نازل مغطي ظهرها سرح شويه و هو شايف الترنج بتاع اخته وافتكرها لما كانت خايفه وواقفه تبص من الشباك خرج من شروده
فريد….مش قولتلك متلبسيش الچاكت عشان اغيرلك علي الجرح.
خرجت شهقه من بيري و بصتله وهي مرعوبه.
بيري…اسفه اتخضيت من صوتك
فريد…مفيش حاجه و بطلي تقربي من الشباك عشان محدش يلمحك
بيري… حاضر
فريد….انا حضرتلك عشاء خفيف اكيد جعانه بعد اليوم الطويل ده
بيري… انا ااااا لا لا خالص انا شبعانه شكراً
فريد…يلا اقلعي الچاكت وتعالي اقعدي عشان اشوف الجرح اللي في كتفك ده وبعد كده تروحي تاكلي وتنامي شكلك مرهق.
بيري…صدقني انا مش جعانه و كمان خليني انا اغير علي الجرح لان في جروح كتير في رجلي متتعبش نفسك
فريد…مش هتعرفي الجرح كبير و واصل لحرف ظهرك مش هتطوليه لازم يتطهر كويس عشان ميعملش التهاب و تسخني يلا اقعدي.
بصتله بيري باحراج و بعدين هزت راسها بطاعه فتحت سوسته الچاكت كانت لابسه قطعه تانيه كت تبع الترنج و راحت قعدت علي الكنبه و ادتله ظهرها
فتح فريد الشنطة و خرج منها ادويه وكريمات ومطهر و ادوات طبيه
فريد…باحراج وتوتر ااا بصي امسكي الچاكت اربطيه و ارفعيه لفوق شويه عشان ترفعي التيشرت اللي تحت ده باقي الجرح مش باين اللي ظاهر اللي في كتفك بس
بيري….باحراج حاضر
