لقاء كارثي
لقاء كارثي 48/49/50
لقاء كارثي
أميره أسامه
صاحبة البطل الواحد
.البارت الخمسين .
…………………….
كانت ليله صعبه علي الكل يمكن الشبا كانوا عاملين حسابها مع انهم مكانوش متخيلين ان هي تبقي قويه كده كانوا عارفين انها مش هتعدي بسهوله اكيد ووهيحصل فيها زعل لكن انها تنتهي النهايه دي لأ
لكن كانت أصعب علي البنات اللي اتصدموا لانهم مكانوش يعرفوا و صعبه في وجعهم علي ليله والحاله اللي كانت واصله ليها تقريباً محدش فيهم نام و اللي نام فيهم كان عقله شغال و نومه بايظ .
ايمي فضلت في مكانها رشيد نايم في حضنها و هي قاعده عماله تشرب في سجاير و تقلي في الموبايل يمكن الليله تعدي.
اتصلت علي عشري تطمن عليه و تشوفوا فين وايه اللي بيحصل معاه كان صعبان عليها اوي و كانت حاسه بوجعه بمجرد ما اتصلت فتح عشري الخط.
عشري….ايوه يا ايمي في اخبار عن ليله ولا ايه ؟
ايمي…..بملامح حزينه احممم لا يا عشري انا بتصل اطمن عليك واشوفك بقيت فين عديت اول ريست ولا لسه موصلتش
كانت الساعه سبعه الصبح و هو متحرك علي 4
عشري….اطمني يا ايمي بخير و اه عدتها انا تقريبا ساعه واكون هناك ساعه و نص بالكتير
ايمي….بتهرج يا عشري طريق سبع ساعات و لا ثمانيه واخده في اربع ساعات ونص ده اللي اتفقنا عليه يا عشري
عشري….مفيش قدامي وقت يا ايمي لازم اوصل بسرعه لازم ادور علي ليله عشان لو ملقتهاش هضطر اسافر علي دبي
ايمي….دبي ؟! ليه
عشري…..هي نعيمه مكلمتكيش
ايمي…..لا في حاجه حصلت
عشري…..الباسبور بتاع ليله مش موجود في الخزنه مفيش غير بتاع نعيمه لو ليله مسافرتش دهب طيران يبقي اكيد راحت دبي
ايمي…انت بتقول لا اكيد ليله مش هتعمل كده
عشري…ياريت متبقاش عملت كده لو علي دهب مقدور عليها يا ايمي انما دبي قطع كلامه بتنهيده
ايمي….ان شاء الله تلاقيها انت بس اهدأ وخليك واحده واحده كده عالطريق بلاش تقلقني عليك انت كمان و بعدين ليله واخده عربيتها
عشري…..ماهي ممكن تسيبها يا ايمي في اي مكان
ايمي…..والله انا اتوقع اي حاجه من ليله بس ان شاء الله متبقاش عملت كده
عشري…..يارب بقولك ايه روحي نامي و انا لنا اوصل هشوف الدنيا فيها ايه و هطمنك
ايمي…اجيب النوم منين يا عشري انا صاحيه معاك و اول بأول كلمني متسبنيس كده
عشري….حقك عليا يا ايمي ضيعت فرحتك انتي و عشري و بوظتلكم السفريه انا مش عارف اقولك ايه
ايمي….بطل هبل يا عشري فرحتي هتكمل بوجودكم و لو علي السفريه تتعوض و كويس ان ده حصل واحنا لسه هنا لان لو كان حصل وانا هناك بردوا كنت هرجع يعني بلاش كلامك ده المهم الوقت نلاقي ليله و الدنيا ترجع زي ما كانت هي اكيد عايزه تعرف غلاوتها عندك
عشري…..لا يا ايمي هي عارفه غلاوتها كويس بس صاحبتك بتنتقم مني بطريقتها و عرفت تنتقم يا ايمي عشان انا هموت من غيرها
ايمي….بحزن متقولش كده انت عارف ليله بتحبك قد ايه هي بس محتاجه تكون لوحدها
عشري…..وانا محتاجها معايا يا ايمي كل حاجه اتهدت فوق راسي كنت مستني انكم تسافروا والايام تعدي بسرعه عشان نبقي نع بعض و نتجوز
ايمي….عشري احمد ربنا ان كل ده حصل محدش عارف الخير فين اللي زي مريم دي مستعده تدمر الدنيا عشان مصلحتها اللي خلاها عملت كل ده عشان توصل لليله و توجعها و تخرب الدنيا بينكم من مجرد صور مش بعيد يا عشري لو كنتوا اتجوزتوا كان نفس الموضوع حصل و هي بتتهمك ان انت اللي عملت فيها كده و ان اللي في بطنها ده منك انت تخيل وقتها ليله كانت هتعمل ايه صدقني يا عشري لو ليله الوقت هتاخد وقت عشان تسامحك لو كان ده حصل بعد الجواز كانت مش بعيد تقتلك
عشري…..بهدوء الحمد لله انا الوقت مش فارق معايا اي حاجه غيرها هي عايز الاقيها باي شكل و عقلي رافض تماماً يكون في احتمال و لو بسيط اني مقدرش اوصلها
ايمي….وصلتلها يبقي خير موصلتش يبقي لازم تكون هادي لان في كل الاحوال هترجع
عشري….انا خايف عليها يا ايمي خايف من سواقتها خايف من وجعها يحصلها حاجه وهي لوحدها مش فارق معايا لما تشوفني تعمل ايه المهم الاقيها
ايمي…خير ان شاء الله اطمن و اتفائل خير يلا انا هسيبك تكمل طريقك و وحيات ليله عندك خفف السرعه شويه عشان لو حرالك حاجه ليله مش بعيد تخنقك
ابتسم عشري بوجع.
عشري…..حاضر يا ايمي يلا هكلمك تاني
ايمي….بأبتسامه تمام انا صاحيه معاك سلام يا عشري
عشري…..سلام يا ايمي.
……….
حطت ايمي ايدها علي خد عشري تاني كان متلج و كان منكمش علي نفسه كده من البرد
ايمي….بهدوء رشيييد رشيدددد
رشيد….همممم
ايمي….يلا قوم اطلع نام فوق جسمك تلج و الكنبه صغيره عليك هتتعب
رشيد….ااا انا نايم خلاص
ايمي…..نايم ايه انت نايم تحت يلا قوم معايا رشييييد قوم
فتح عينه وقام بهدوء و بصلها
رشيد…الساعه كام
ايمي….سبعه وربع
رشيد…في اخبار عن ليله
ايمي…..لا يا رشيد لسه عشري لسه في الطريق يلا اطلع
رشيد….طيب تعالي معايا
ايمي…..طيب يلا قوم
قام وقف بهدوء خدت ايمي موبايلها وراحت ققلت الدفايات و الاضاءه كلها و طلعت علي فوق معاه
قعد علي حرف السرير و هو ضامم ايده وسط رجله
ايمي….رشيد انت بردان
رشيد…ااا شويه
راحت جابتلوا السويت شيرت باقي القطعه بتاعت الترنج و قربت منه بهدوء
ايمي….البس يلا
حط ايده براحه ولبس قفلتلوا السوسته و عدلتلوا المخده
ايمي….يلا نام
رشيد….انتي مش هتنامي
ايمي….معنديش نوم يا رشيد نام انت
رشيد….طيب تعالي جنبي
ايمي….حاضر
قفلت النور و قفلت الستاره شويه وراحت نامت جنبه سحب دراعها ونام تاني في حضنها القدم بتاع رجله لمس رجلها كان متلج سحبت رجلها بسرعه
ايمي….رشيد حاسب لحظه
رشيد…رايحه فين
ايمي….رجلك متلجه يا رشيد هجيبلك شراب
سند تانب علي المخده و غمض عينه
راحت علي الدرسنج جابت شراب و رجعت مالت بجسمها بهدوء و لبستوا الشراب فتح عينه و بصلها بهدوء و ابتسم
طلعت جنبه وخدته تاني في حضنها
مسك كفها باسه بحب و ضم وسطها ليه.
رشيد….بحبك يا ايمي
ايمي….ابتسمت بهدوء و باست قورته بهدوء و انا كمان بحبك
ابتسم رشيد و خد نفس طويل كله راحه و رجع نام تاني .
…………….
اما عند عشري بعد ما قفل مع ايمي فتح الموبايل و سجل ڤديو للطريق كان النهار طالع و باين انه طريق دهب.
عشري…..لما جيت الطريق ده اخر مره يا ليله كنت جاي وانا تايهه بحاول الاقي نفسي مكنتش عارف اعمل ايه كنت جاي مع الشباب عشان افصل و اقدر اخد قرار كنت في حيره ما بين اني اكمل في الجوازه دي و اعمل اللي يقدرني عليه ربنا و اكمل ستر ربنا عليها و ما بين اني بسأل نفسي انا هقدر انا هعرف اعمل كده هتحملها علي نفسي و رجولتي كنت ضايع يا ليله
بس وسط كل ده مكنتش اعرف ان نصيبي جاي في الطريق ورايا و الست اللي حلمت اكمل معاها حياتي هقابلها و قابلتك يا ليله و من اول لحظه شوفتك فيها نسيت انا رايح ليه نسيت الحيره و الضياع و التفكير نسيت كل حاجه و مبقاش في غيرك و رجعت بيكي رجعت بحلمي رجعت بنصي التاني رجعت بروحي .
و انهارده يا ليله انا رايح نفس الطريق بشعور مختلف وجع و خوف و ضياع رايح ادور علي حلمي و نصي التاني و روحي اللي اتسحبت مني انا جاي يا ليله عشان الاقيكي و هلاقيكي يمكن جوايا احساس كبير اني مش هلاقيكي هناك عارف ان ده مكانك المفضل و عارف كمان انك قولتيلي لو زعلتني في يوم من الايام هتلاقيني في اي مكان كان ليه ذكري حلوه معاك فضل قالي احتمال كبير متلاقيهاش لانها المرادي زعلانه منك اوي و اكيد مش عيزاك تلاقيها و هو معاه حق انا رايح يا ليله و عارف اني هلف عليكي لحد ما يتقطع نفسي و مش هلاقيكي عارفه ليه لانك قولتيلي بردوا ان الاماكن دي غاليه عندك و ليها ذكري حلوه لو روحت ولاقيتك يا بنت عمري هعرف انك مستنياني عشان توجعيني و وقتها هعرف انك زعلانه اوي مني و بتبدلي الذكري الحلوه بوحشه و مش هتحبي المكان تاني بس لو ملقتكيش مش هزعل لاني هحس انك من جواكي محبتيس تبوظي الذكري دي و لسه في امل اني الاقي حاجه حلوه ليا جواكي .
خرجت من صدره تنهيده طويله وهو بيقول اسمها
ليله انا هموت من غيرك لو اذاكي ليا في بعدك عني يبقي انتي كده مش بتأذيني انتي بتموتيني يا ليله خلي اذاكي يكون وش لوش و انا هبقي راضي اعملي فيا اللي انتي عيزاه بس متبعديش انا برفع الرايه البيضا يا ليله و بقولك اني مش قد اذاكي و اني ضعيف من غيرك و محتاجك
و بحبك اوي اوي .
قفل التسجيل و مسك الموبايل بعت الفديو ليها الطريق متصور و هو طاير وصوته بس اللي ظاهر
………………..
الوقت كان بيمر بسرعه و الساعه دخلت علي تسعه و عشري وصل
كانت عينه قدام كل شاليه بيعدي من قدامه علي العربيات المركونه الشاليهات اللي باين عليها ان فيها ناس البلد كانت شبه فاضيه و الشاليهات اغلبها مقفول بابها من بره بقفل و اللي مفتوح فيهم قدامه عرببات مش بتاعتها رجله ودته لحد المكان اللي اتقابلوا فيه اول مره
و بمجرد ما شاف الشاليه حس ان قلبه واجعه بس هو كنان كان مقفول بالقفل و قف بالعربيه و نزل راح علي الباب مسكه و غمض عينه و هو بيفتكر كل لحظه مرت بينهم من اول ما جريت ليله تخبط علي الباب و هو الجو مقلوب لحد اخر لحظه و هما ماشيين مع بعض و بيخرجوا شنطهم.
مسك موبايله تاني بحزن و فتح ڤديو تاني و صورلها البيت من بره.
عشري…..بنبرة حزن تقتل..
من اول لحظه فتح فيها عسال الباب علي خبطك خطفتي قلبي يا بلطجيه مش قادر انسي شكلك و انتي خايفه علي نادين و كل همك تدخليها جوه
كنت واقف وراء و باصص عليكي كنتي عامله زي الجنيه اللي جايه تسرق روحي مني و معرفش اتحدفت عليا منين كل ثانيه قضتها معاكي في البيت ده يا ليله بتتعاد قدامي الوقت الفرق بس اني واقف لوحدي من غيرك اللحظه اللي خبطتي فيها يا ليله علي الباب ده هي اللحظه اللي انا اتولدت فيها هي اللحظه المحسوبه من عمري
انا عيشت معاكي هنا عمر بحاله مش اسبوع شريط الاسبوع ده مرت الوقت من قدام عيني لدرجة اني حاسس اني شايفك و انتي بتجري مني بعد ما بوظتي وشي بالروچ بتاعك و انتي في حضني و انتي قاعده معايا هناك قدام النار
و احنا واقفين هنا جنب الباب الحديد ده و نتخانق مع بعض و طفية السجاير وقعت في صدرك العلامه يا ليله علامة حبنا اللي بتثبت انك بتاعتي غصب عنك و عن الدنيا كلها هلاقيكي يا ليله و اوعدك اني اول ما الاقيكي مش هسيبك لحظه حتي لو كان غصب عنك اصل كل واحد فينا بيتولد و ليه قدر بيعيشه و انا قدرك اللي مش هتعرفي تخلصي منه يا ليله و زي ما وعدتك مش هسيبك غير وانا راجل عجوز و ميت في حضنك يعني مفيش هروب مني اهربي قد ما تهربي انتي ليا ليله و مش لغيري و حياة غلاوتك يا بنت عمري ما حد هيبقي في حياتك غيري انا بحبك يا ليله و هفضل احبك لاخر نفس فيا
قفل و بعتلها الڤديو و بعدين بدأ يتحرك علي طول الصف وهو بيدور بعينه عليها.
اتصلت عليه ايمي تطمن.
عشري….ايوه يا ايمي
ايمي…قولي وصلت لحاجه ملهاش اثر يا ايمي بس لسه بدري انا في البدايه ليله لو هنا مش هتبقي في نفس المكان اللي كنا فيه هتحاول تبعد عشان تطلع روحي معاها
ايمي….بابتسامه هتلاقيها ان شاء الله
عشري….ايمي انا لسه المشوار قدامي طويل روحي نامي شويه صوتك تعبان اوي
ايمي…متشغلش بالك بيا دور انت بس عليها و لو وصلت لاي حاجه كلمني
عشري….حاضر يلا سلام
ايمي….سلام.
كمل عشري تدوير و هو ماشي بهدوء يبص علي الشاليهات و الڤلل
فات ساعه تانيه و هو لسه بيدور رن موبايله و لمح اسم نادين رد بسرعه و فكر ان ليله راحت عندها
عشري….ايوه يا نادين
نادين….وصلت عشري
عشري….اه انا هنا من بدري
نادين….ملقتهاش
عشري….لسه بدور يا نادين هلاقيها اطمني
سمع صوت عياطها بهدوء.
عشري….نادين بطلي عياط عشان خاطري انا والله العظيم مش متحمل
نادين….بدموع انا هموت عليها يا عشري
عشري…بوجع عارف و الله عارف هترجع يا نادين بس عشان خاطري بطلي عياط و انا والله لو وصلت لاي حاجه هكلمك و انتي كمان لو وصلتي كلميني
نادين….حاضر يا عشري
عشري…..يلا باي يا نودي
نادين….باي.
الوقت بيجري و كل شويه حد يتصل عليه البنات كلهم صاحين الكل نفسياً زي الزفت حتي وليد و احمد و سامح المل بيسأل عنها و كل شويه عشري بيتوتر و يحس بضغط اكبر
الساعه بقت واحده الضهر وهو فصل وتعب و مش قادر يسوق ركن العربيه و وقف بيفكر يروح فين تاني او المفروض يشوفها فين راح اماكن كتير لدرجه انه حس ان ناسي يروح فين تاني
مسك الموبايل و سجلها ڤديو تاني بس المرادي كانت بصورته الحزن و الوجع اللي كانوا في عينه لو كانت ليله فتحت موباليها و شافت الڤديو ده تحديداً مكانتش قدرت تسيبه بالشكل ده مكانش هيهون عليها نبره صوته لوحدها كانت كفيله تشفعله عندها بس هي قافله موبايلها و مش بتفتحه.
عشري…..و حشتيني و تعبت اوي ياليله بص ناحيه الشباك و هو بيتكلم انا جيت دهب مرات معرفش عددها حافظها شبر شبر كأني مولود فيها بس اول مره ياليله احس اني تايهه فيها دورت عليكي في اكتر من مكان لدرجة اني واقف الوقت بفكر اروح فين طيب انا دورت فين و لسه مدورتش فين ناسي كل حاجه يا ليله ناسي الطرق و الاماكن مش عارف ارجع أبدأ منين.
بص للموبايل انا نفسي لسه طويل معاكي يا ليله بس انا تعبان اوي والله العظيم تعبان من غيرك كسرتيني يا ليله
فات 14 ساعه من وقت ما مشيتي من عند ايمي و حاسس اني بطلع في اخر نفس ليا بالنسبالي دول عمر يا ليله مش كام ساعه انا مش عارف لو انتي ناويه تفضلي بعيد اكتر انا هعمل ايه؟ طيب هبقي كويس و لسه بقاوح و لا هيطلع نفسي قصير و مش هتحمل طيب افتحي حتي موبايلك خليني اطمن و قلبي يرتاح .
ده انتي طلع زعلك و حش اوووووووي اوي يا ليله و انا بعترف اني مش قده ولا قد عقابك ده و طلع ان الراجل لما بيحب بيتبهدل كنت بسمع ديماً جملة ان الحب لعنه بس اول مره أجربها يا ليله ابتسم ابتسامه جميله كلها حب طلعتي اجمد مني يا بلطجيه كنت فاكر اني جامد و اني عرفت اوقعك في حبي واخطف قلبك مكنتش عارف اني متسوح جوه قلبك من غير ما أحس و انتي اللي وقعتيني و بهدلتيني البهدله دي كلها
ابتسم و خد نفس طويل من السيجاره و بصلها تاني و كمل بلهجته البدويه.
وطلع الحب كيف ما نحكي بلسان بدونا الهوا للرچاچيل مذله
واني انذليت في حبك و باعترف يا زينة البنات
بعتلها الڤديو و فضل ساكت و بعدين بص للبحر من بعيد الموج عالي و الهواء فظيع بس اللي جوه قلبه كان اقوي بكتير .
…………….
حال اميمه مكانش اقل من حال البنات و يمكن كانت اكتر لان ليله بالنسبه ليها بنتها مش اختها من بليل و هي بتتصل و بتبعت كل شويه رساله انتي فين ردي عليا طيب افتحي موبايلك طيب خلينا نتكلم طيب عشري كان وحكالنا بس هو بيحبك طيب بلاش تعملي كده و خلينا نتفاهم طيب ارجعي و اللي انتي عيزاه هيحصل.
كل دي كانت رسايل من غيرد ولا حتي استقبال لليله علي موبايلها المقفول.
اميمه عرفت من احمد ان عشري دايخ عليها و مش لاقيها و بدأت هنا تبدأ تفقد اعصابها و وجعها و خوفها يزيدوا مسكت موبايلها و بعتتلها تاني بس المرادي كانت رساله مؤثره.
اميمه…..يا ليله يا بنتي يا حبيبتي قلبي وجعني عليكي يا حبيتيي طمنيني يا ليله طيب انتي عارفه كويس اني مبتحملش عليكي الوجع وانتي جنبي و اعرف اطولك هونت عليكي يا ليله توجعي قلبي عليكي وانتي موجعه و بعيده عني و مش عارفه انتي فين.
طيب انتي مش طول عمرك بتقولي اميمه دي امي مش اختي هان عليكي قلب امك يا ليله يتحرق كده
مش شايفه بعيني من الضغط وقلبي هيموت عليكي افتحي تليفونك يا بنتي و طمنيني عنك قولي اي حاجه واقفلي ابعتي حتي رساله لو بالكلام خلي قلبي يرتاح ده انا عقلي عمال يجيب ويودي طب قوليلي ادور عليكي فين يمكن دي مش اول مره تعمليها بس كل مره بتبقي مخنوقه و بتسافري تغيري جو كنتي بتكلميني بردوا و تقفلي علي طول بس المرادي مسمعتنيش صوتك ضنايا و رحمة امك يا شيخه طمني قلبي ده انتي وصيه امي يا ليله عيزاها تغضب عليا و تفكرني مصونتش وصيتها وحافظت عليها
يارب ياخد من وجع قلبك يا بنت قلبي و يحط في قلبي انا بس اشوفك بخير و كويسه الكل هيتجنن عليكي يا ليله متقسيش قلبك علينا يا حبيبتي و بلاش الزعل و الوجع يطول قلبك يا ليله عشان هتتعبي اوي.
طيب قوليلي كلتي يا حبيبتي ولا مقضياها قهوه وسجاير لما قلبك اتحرق اكتر ما هو محروق عشان خاطر امك يا ليله و غلاوتها عندك طمني قلب اختك الغلبانه اللي محروق عليكي.
بعتتلها الرساله وهي بتمسح دموعها
…………..
بدأ البنات ينزلوا علي شغلهم و يحاولوا يلاقوا حاجه تشغلهم و خلاص و كل شويه يتصلوا ببعض و يسألوا عن ليله و يتصلوا بعشري
اول حد فيهم نزل كانت ايه راحت علي المحل بدري شويه علي غير العاده مكانتش قادره تقعد في البيت ولا كانت عارفه تروح فين تدور علي ليله.
حتي سلمي نزلت من بدري علي العياده قبل حتي البنات اللي بتستغل معاها كانت هي كمان محتاجه تبقي لوحدها .
اما نعيمه و نادين محدش فيهم نزل ولا كانوا قادرين اصلاً وكل واحده فيهم قاعده في البيت مستنيه اي حاجه تطمنها.
اما ايمي فا غصب عنها النوم سيطر عليها من اخر مكالمه بينها وبين عشري و يادوب نامت ساعه واحده او اقل صحي رشيد و كان فاكرها نايمه بقالها كتير .
قام بهدوء دخل الحمام غسل وشه و بعدين خرج خد موبايله و نزل علي تحت اتصل علي عشري.
عشري….الوووو
رشيد….ايوه يا عشري مفيش اخبار
عشري….مفيش يا رشيد
رشيد….انت نايم ولا عايز تنام
عشري….انا هلكان يا رشيد
رشيد…..بحزن طيب انت قاعد فين في فندق ولا ايه
عشري….في العربيه يا رشيد بلف و بقف ملهاش اثر يا صاحبي و انا بموت بالبطئ كل ثانيه
رشيد….متقلقنيش عليك يا عشري هتروح فين يعني انت عارف ليله هي اكيد عايزه تختفي و ترتاح شويه هتلاقيها والله
عشري…..فين طيب ده انا خلاص شويه كمان و هبقي قلبت البلد كلها
رشيد….خلاص شوف و لو ملقتهاش ارتاح في اي مكان لحد بكره و تعالي
عشري….اجي فين انا هقلب الدنيا لحد بكره يمكن انا مدورتش كويس
رشيد….دهب صغيره يا عشري يعني لو دورت زي ما بتقول لو موجوده كنت لقتها ما يمكن تكون مش هناك اصلاً
عشري….هتأكد تاني قبل ما اسيب البلد و امشي انا هفضل هنا لحد بعد الفجر وبعدين هتحرك عشان لازم اسافر
رشيد…انت مش هتتحرك الا لو نمت يا عشري و لازم تسمع الكلام انا عارف انك عايز توصل لليله و تطمن عليها و كلنا زيك بس كمان مترميش نفسك في النار يا عشري انت لا نايم و قلبك مرتاح يعني مينفعش ترجع الطريق ده كله بعد كل الارهاق ده هيجرالك حاجه هتنام في الطريق هتتعب
عشري….متقلقش يا رشيد انت عارف اني مش بنام علي طريق و متعود
رشيد….يا عشري عشان خاطري اسمع الكلام
عشري….والنبي سيبني يا رشيد انا بخير والله
رشيد…..طيب قولي عايزني اعملك اي حاجه اروح في اي مكان قولي اعمل ايه انا مش عارف
عشري….ولا انا يا رشيد عارف احنا دورنا عليها في كل مكان نعرفوا
رشيد….بيتهيألي لسه يا عشري لو فكرنا شويه اكيد في اماكن ممكن تكون فيها انا مش عارف ليه حاسس ان هي في القاهره
عشري….هتاخد الباسبور ليه لو هي في القاهره
رشيد….الباسبوررر انت ايه اللي عرفك
عشري….نعيمه هي اللي قالتلي امبارح لما رجعت ودورت لقت الباسبور مش موجود
رشيد….طيب كويس اوي
عشري….هو ايه اللي كويس
رشيد….أخو صاحب امير جوز اميره اختي شغال في المطار و ممكن لو طلبت منه يعرفلي منه اذا كانت ليله سافرت ولا لا اكيد هيفيدنا
عشري….ده بجد
رشيد…اه والله العظيم علي الاقل نعرف اذا كانت سافرت فعلاً دبي ولا لأ بدل ما تروح علي الفاضي و تلف نغس اللفه دي عليها و تتعب علي الفاضي
عشري….بس مش اي حد بقدر يستعلم يا رشيد دي بتبقي بيانات محظوره
رشيد….هو شغال جوه و يقدر يعرفلي متقلقش و بعدين لو مش هينفع مش هنخسر حاجه انا هقول لامير و امير يقول صاحبه و صاحبه يقول اخوه عرفوا انها حد يخصني متقلقش
عشري….طيب جرب يا رشيد كده و قولي هتعمل ايه.
رشيد….تمام هشوف كده و اقولك الدنيا فيها ايه شويه و هرجعلك
عشري…..ماشي يلا سلام عشان امي بتتصل
رشيد….ماشي سلام.
عشري…..ايوه يا امي
امينه…..طمني عليك يا ولدي
عشري….مش بخير يا امي
امينه….لسه ملجتهاش يا ولدي
عشري…..لا بدور بس ملهاش اثر ليله بعدت عني يا اما
امينه….هترچع يا ولدي ليله بتحبك
عشري….بس زعلانه اني كسرتها يا اما
امينه…..جولتلك يا ولدي الصدج بينچي جولتلك عرفها و هي هتسامحك
عشري….موجتوش العتاب يا اما اني هلكان مش متحمل
امينه….مجصديش ازود حملك بس انا جلبي واچعني علي وچعك و محروج عالبت اللي اللي جلبها محروج علي امها
عشري….بنبره وجع كانت موچوعه جوي يا اما لما چاتلك
امينه…..بتنهيده متفكرش كتير يا ولدي الوچع هيروح و كل حاچه هترچع زينه أچمد يا واااد ده انت ابن امينه وعشري معيزاش أشوفك اكده مكسور
عشري….عيزاني أكدب في دي كمان يااما ما ابنك مكسور صوح فاكره يا اما لما حكيتلك عن ليله و جولتيلي عشجتها يا محمد دلوك بجولك ان العشج طلع اهون من اللي چوايا و اللي ملاجيلوش اسم انا جلبي يتيم من غيرها يااما
امينه….بوجع و دموع حاولت تخبيها
سلامت جلبك من اليتم يا ولدي لو بتحبها صوح هتجدر ترچعها من تاني و اني عارفه انك هتجدر و اسمع مني يا ولدي علي كد زعل ليله منيك بس اتوكد انها متجدرش علي بعدك مهما زعلت و بعدت مسيرها ترچع ليك المره ياولدي لما بتنصاب بعشج راچل بيهون كل شئ علي جلبها الا الفراج اچمد يا ابن عشري و رچع ليله سبحان من زرع حبها في جلبي اني اعتبرتها بتي و جلبي حبها رچعها عشانك و عسان امك و عشان حبايبها.
عشري…..حاضر يا اما حاضر
امينه….خد بالك من روحك يا ولدي
عشري بنبره و جع و ضعف و صوت طفل بيحاول يتطمن منه امه
عشري….ليله هترچعلي يا اما؟
امينه…..هترچعلك ياضنايا هترچعلك
عشري….سلام يااما
امينه….سلام يا ولدي
…………
قفلت امينه معاه و هي قلبها بيتقطع عليه اول مره تشوف ابنها في كمية الضعف دي كلها اتصلت علي ليله لقت موبايلها مقفول
ملك….ايه يا ماما محمد مش لاقيها
امينه….لاه و تعبان جوي بجولك يا ملك اني مبفهمش يا بتي في التلافون ده كيف بتبعتوا رسايل
ملك….قصدك تبعتي لليله يعني
امينه….ايوه
ملك….انا اتصلت عليها مقفول
امينه….طيب ولو انفتح تشوفها
ملك….اه عادي تشوفها بصي من هنا قوليلي اكتبلها ايه ولا تسجلي احسن
امينه….لا اسجل
ملك….طيب هدوس هنا وانتي اتكلمي يلا
امينه…..ليله كيفك يا بتي طمنيني عنك بتصل عليكي كتير الخط مجفول محمد تعبان من غيرك يا ليله صدجيني يا بتي انا في عمري كله ماشوفت حد من ولادي مكسور و اول مره اشوف كسرة محمد هيتچن عليكي و كلنا جلجانين حجك عليا انا اني كمان غلطت كان لازم تعرفي لاته حجك بس صدجيني و غلاوة ولادي اللي مملكش غيرهم في الدنيا كلها ان محمد لا حب ولا بيحب غيرك محمد بيعشجك يا ليله عارفه انك واخده علي خاطرك منيه بس كمان متوكده ان جلبك مش هيطاوعك علي وچع محمد و اني بعترفلك يا ليله ان محمد مستاهلش غيرك انتي يا بتي لان اني ست وافهم زين مين بيحب و مين لاه و انتي بتعشجي محمد كيف ما بيعشجك واني مش هآمن علي ابني غير معاكي عشان انتي جدعه و عندينا في الصعيد بنجول مره سداده يعني مستعده تجفي بروحك في وش الريح عشان تفدي اللي بتحبيه چايز اللي هجوله بالنسبالك بسيط بس اني شوفت چدعنتك مع صحابك شوفت الكل بيعتمد عليكي كنك امهم حتي ابني ياليله عامل كيف العيل الصغير اللي تاه من امه محمد چاب حجك من مريم واهلها يا ليله و اوعاكي تزعلي
انه اتجالك انك تربية مره دي تشرفك يابتي متوچعكيش ياما في رچاله كيف جلتهم والمره هي اللي بتسد و امك ربت بت ميت شنب و اخواتك الله يسعدهم يشرفوا المره دي ربت عيال و كبرتهم و كانت واجفه بطولها جدام الدنيا و موجعتش اني مره وربيت سبع رچاله و ابوهم موچود و معاهم بس اني اللي كبرت و ربيت و علمت المره اللي بتربي يا ليله مش الاب و انتي اللي هتربي ولادك مش محمد
ملك….ليله يا قلبي اسمعي كلام ماما و ارجعي محمد بيحبك اوي يا ليله و الله العظيم هيموت عشانك اوعي تزعلي ابداً حقك علينا كلنا احنا حبناكي اوي يا ليله وحسينا انك واحده مننا صدقيني يا ليله و مش بقولك كلام وخلاص احنا طول عمرنا عايشين مع بعض في حب و حياتنا حلوه بس حلاوتها زادت لما انتي دخلتش فيها يمكن اتقابلنا ثلاث او اربع مرات بس والله العظيم يا ليله انتي دخلتي حياتنا من هنا وعملتي ليها روح تانيه من هنا اوعي تزعلي يا قلبي اسمعي كلامي و اعتبريني اختك الكبيره انتي ست البنات و تشرفي اي حد و الحقيره اللي زعلتك دي انتي متتقارنيش بيها ابداً يا متربيه يا جميله يا ام روح حلوه
امينه….أرچعي يا بتي او حتي طمنينا عليكي و صدجيني الوجت بينسي و اني متوكده ان محمد هينسيكي و كلنا هنسيكي اللي حوصل ربنا يحفظك و يحميكي و يهدي بالك وقلبك
قفلت ملك الڤويس و بعتته
ملك….صعبانه عليا اوي الحقيره دي وجعتها
امينه…..ولو اني مع ستر الولايه بس هي تستاهل كان في يدها تعيش عيشه نضيفه وهي اللي رفصتها برچلها و مش بس اكده كانت كيف الشيطان و بتخطط كيف تچر رچل ولدي
ملك….اهي راحت في داهيه المهم الوقت ليله ترجع
امينه….هترچع ان شاء الله هترچع
…………….
نزلت ايمي لقت رشيد صاحي وبيحضر فطار
ايمي….بهدوء صباح الخير
رشيد….صباح النور نمتي كويس
ايمي…..ساعه
رشيد…انتي منمتيش خالص
ايمي….اخر مره كلمت عشري كانت الساعه واحده تقريباً فضلت معاه عشان عارفه انه هو كمان مجنون و اكيد واخد الطريق طيران
رشيد….طب انتي ملحقتيس تنامي يا قلبي انا فكرتك نايمه بقالك شويه وقولت اجهز الفطار واصحيكي
ايمي….انا صحيت خلاص و مش جعانه مسكت السجاير حطت سيجاره في بوئها وقبل ما تولعها سحبها رشيد من بوئها
رشيد….الطفايه مليانه سجاير و في علبتين فاضين ارحمي نفسك مفيش لا سجاير ولا قهوه غير لما تفطري
ايمي….رشيد والنبي انا مش قادره اتكلم
رشيد…يبقي تسمعي الكلام عشان هتفطري
ايمي….معنديش نفس و مش جعانه
رشيد…مش مهم كلي غصب عنك يلا تعالي كده اقعدي هنا
خدها من ايدها قعدها علي السفره وراح يجيب في الفطار و بعدين قعد
رشيد….يلا افطري و كلي كويس
ايمي…حاضر
رشيد…علي فكره انا كنت بكلم عشري الةطوقت و قالي انه عرف من نعيمه ان ليله واخده الباسبور
ايمي….اه قالي الصبح
رشيد…طيب انا كلمت امير جوز اختي اخو صاحبه بيشتغل في المطار في الاستعلامات و طلبت منه يستعلم عن بيانات ليله و يعرف اذا كانت سافرت بره مصر ولا لا عشان عشري ميروحش دبي علي الفاضي و خدت بياناتها من نعيمه عشان انتي كنتي نايمه
ايمي….وده ينفع يعني بسهوله كده يخرجوا بيانات اي حد
رشيد…اكيد مش بسهوله بس هما يقدروا يتصرفوا امير قالي تمام كلم صاحبخ و بعدين رجع قالي هات البيانات و اديني مستني
ايمي….طيب كويس اوب يارب بس نعرف اي حاجه و يارب متبقاش سافرت و تصعبها علينا اكتر
رشيد…ان شاء الله خير
ايمي….انا فكرت في حاجه كمان هي اكيد مش هتعملها بس يمكن
رشيد….فكرتي في ايه
ايمي….يعني كنت بقول يمكن تكون في المطعم
رشيد….هتعمل ايه في المطعم
ايمي….انا عارفه يا رشيد بقي يعني بقول ممكن تكون راحت و باتت في المكتب فوق اهو علي الاقل نبقي مسبناش مكان
رشيد….طيب هي لو راحت مش المفروض التيم اللي هناك يعرفك
ايمي… لا التيم عارف ان كلنا شركاء و بنروح اي وقت و بعدين ليه هيقولوا انها هناك الا لو في حاجه غريبه
رشيد….طيب تمام لو تحبي نروح نشوفها ماشي نروح
ايمي…..اه ياريت
رشيد….طيب بقولك ايه انا كمان خطر في بالي حاجه مش بمكن تكون راحت اي شقه من شققكم اللي بتأجروها
ايمي….جات في بالي بس الشقق كلها ساكنه
رشيد….اممم طيب في اخر حاجه لفتت نظري و بصراحه مش قادر افهمها
ايمي….ايه
رشيد….يعني عندي شعور غريب ان اخوات ليله يعرفوا عنها حاجه و مخبين
ايمي….لا طبعاً انت مشوفتش قمر جات علي ملا وشها ازاي و عيالها نايمين في ايدها و وليد كمان نزل في وقت متأخر و شكلوا كان نايم مستحيل هيكدبوا ليه اصلاً
رشيد…يمكن هي اللي طلبت كده و بعدين انا محستش ان ليهم رد فعل يعني مزعلوش معاتبوش عشري رد فعلهم كان هادي اوي يعني علي الاقل اميمه و قمر يبان عليهم العصبيه ده انتي والبنات خدتوا رد فعل اقوي منهم فا بقول يمكن تكون ليله هناك و احنا طبعاً مش هنقولهم هنفتش او بمكن تكون في بيت والدتها و هما راحوا و عرفوا و متكلموش
ايمي…..مستحيل انا عرفاهم كويس اوي اولاً رد فعلهم مش هادي ولا حاجه كل الحكايه انهم مصدقين عشري اه هو غلط بس مش الغلط الكبير اللي يوصلهم لكده بس هما عشان حافظين ليله فا عارفين ان رد فعلهم غير رد فعلها في الكدب بالذات و عذروا عشري لانهم اتحطوا قبل كده في مواقف كتير زي دي و كان نفس رد فعل ليله و انت سمعت اميمه بنفسها قالت حتي لما بخبي حاجه عنها و ببقي نفسي اصارحها مبقدرش لانها عارفه انها مس هتقبل
رشيد….بس بجد رد فعلها صعب اوي اينعم انا عارف ان الكدب فعل مش حلو بس احياناً في كدب بنضطر نكدبه و مبيبقاش كارثه يعني الموضوع عند ليله صعب
ايمي….اكيد لان ليله عايشه بذنب صاحبتها لحد الوقت يا رشيد و الموضوع مسببلها عقده
رشيد….بس كانوا اطفال يا ايمي هي قالت في اولي اعدادي يعني 11 سنه مثلاً
ايمي….عقد الكبار اهون بكتير من الاطفال يا رشيد الطفل عنده ذاكره رهيبه بيفتكر الوحش والحلو الصعب والسهل و الموقف ده بالذات تقدر تقول حول حياة ليله و دفعت تمنه بعدها كتير البنت ماتت يا رشيد و ماتت موته صعبه و ابن عم الولد دمرها يومين قبل ما تموت في ايده
و في الوقت ده تخيل كله بيلوم طفله ويقولها انتي السبب في موتها لو كنتي قولتي الحقيقه كنا قدرنا نوصلها و بعد الحادثه دي ليله كملت شويه في مدرستها و بعدين امها اضطرت تنقلها بسبب معامله صحابها حتي المدرسين مكانس عندهم وعي انها طفله معاملتهم ليها زودت عقدتها طول الوقت صحابها بعيد عنها بيتهموها بقتل صاحبتهم بيقولولها ان اهاليهم مانعنهم يلعبوا او يقعدوا معاها قاعده لوحدها في اخر ديسك تدخل عليها الفصل فجأه وليه امر و تقول قدام الفصل كله للمدرسه انا مش عايزه بنتي تقعد جنب البنت دي و المدرسه متفكرش تقولها مش من حقك تتكلمي كده او دي طفله لا تنفذ امرها و تخلي شكل ليله قدام الكل صعب اكتر
حتي لما اتنقلت لمدرسه تانيه في دروسها كانوا البنات لما يشوفوها يقولوا لصاحبها الجداد سبب نقلها و اللي حصل فا هما كمان يبعدوا عنها بقت عنيفه بقي رد فعلها صعب
بقت اي حد يقرب منها او يقولها كلمه تضربه طبيعي يحصلها عقده يا رشيد علي فكره ليله مش بس الموضوع ده اللي اثر فيها في مواقف كتير لو حكيتها ليك هتعذر ليله علي رد فعلها هي تبان قويه و جامده و عامله فيها راجل بس هي طيبه و غلبانه اوي ليله بقت كده بسبب ظروف كتير ديماً بتتحدي نفسها تبقي اقوي تبقي احسن تقدر تطول اللي عيزاه تشتغل و تشقي و يطلع عينها عشان تجيب فلوس و بتعرف التجارب دي كلها قوتها عايزه اقولك ان وليد كان متعاطف مع عشري لانه اتقرص منها اكتر من مره
في مره ابوها كان عايزها و هي رافضه لان كان حاصل بينهم مشاكل كتير كانت في الوقت ده محتاجه فلوس كتير في ثانهه ثانوي و هي كانت بتشتغل بس كانت تعبانه اوي مش قادره تلاحق علي كل ده وابوها علي فكره كان حنين و بيحبها و كانت بتصعب عليه كان عايز يديها مبلغ بعته اكتر من مره مع وليد ورفضت وامها رفضت فا طلب من وليد يجيبها و هو يحاول بطربقته يديها و يقولها مترعفش امها وليد ضحك عليها وقالها تعالي هنروح مشوار نجيب حاجه و راحت معاه و اتفاجئت بأبوها عايزه اقولك ان الموقف ده خلاها قعدت سنتين مبتكلمش وليد خالص حتي اما ابوها تبع و مات وراحوا ليه مكانتش بتكلم وليد مصالحتهوش غير لما عمل حادثه و رجله اتكسرت و عمل عمليه وقتها بس اتصالحت معاه وخافت عليه يعني الموضوع مش بسيط
رشيد….يا نهار اسود يعني هي ممكن تبعد عن عشري و مترجعلوش الا لو حصله حاجه
ايمي….لا يا رشيد انا مقصدش كده انا اقصد ان عقدتها من الكدب خسرتها اخوها كمان بس انا عارفه ان ليله بتحب عشري و الوضع الوقت مختلف احنا معاها و مش هنسيبها لحد ما ترضي عنه و تنسي
رشيد….انا مكنتش اعرف موضوع صاحبتها صعب كده لما هي حكت قالت انها اتضربت من والدتها وبس فكرت الموضوع خلص بعلقه
ايمي… ياريت خلص بعلقه كانت مكررتهاش تاني و خافت بس الموضوع فضل ماسك فيها فتره طويله من صحاب و اولياء امور و مدرسين وبقت عقده
رشيد…اصعب حاجه في الدنيا لما تشيلي ذنب غلط غير مقصود و تفضلي تدفعي تمنه طول العمر
ايمي….وصدقني لو الذنب ده ملازمك من الطفوله بتكبر وانت بتحاول تمشي صح طول الوقت وانت كبير و بتفضل مع كل موقف تفتكر نفس الذنب انا قلبي واجعني عليها اوي حاسه ان في حاجه ضايعه مني
رشيد….ان شاء الله هترجع و كل حاجه هتبقي احسن
ايمي….بقولك ايه انا هطلع البس و هروح علي المطعم اشوفها كده و بعدين عايزه اروح اشوف نعيمه و نادين
رشيد…طيب كملي اكلك
ايمي….شبعت خلاص
رشيد…شبعتي ايه انتي مكلتيش و قاعده بتتكلمي
ايمي…مش قادره والله يا رشيد
رشيد…طيب انا هقوم البس انا كمان و هوصلك
ايمي….لا خليك انت
رشيد….هوصلم و هكلم الشباب اشوفهم كده ولما تخلصي كلميني
ايمي….طيب تمام
رشيد….ايمي
ايمي….نعم يا رشيد
رشيد….انتي لسه زعلانه مني
بصتلوا ايمي ثواني و بعدين رجعت قعدت
ايمي….اه يا رشيد و زعلانه منك اوي كمان
رشيد….طيب ليه يا ايمي
ايمي….نتكلم بصراحه
رشيد…اكيد
ايمي….لاني توقعت منك رد فعل غير ده خالص
رشيد….طيب قوليلي اعمل ايه ده صاحبي يا ايمي و طلب مني حاجه مقدرش اقوله لا او ابيعه و اروح انا اقول لليله بس انا اكيد اتكلمت معاه
ايمي….اتكلمت بس متكلمتش معاه الكلام اللي يجيب نتيجه يا رشيد مهما كان اللي قدامك متمسك برأيه لازم يكون ليك داخله تعرف تدخل منها و زعلي منك انك اما حاولت مع عشري و فشلت انت و الشباب مجتش قولتلي .
واللي مزعلني منك اكتر يا رشيد انك عرفت طبعي و المفروض انك واثق فيا و عارف ان اللي انت هتقولوا مش هيخرج بينا كان لازم اعرف يا رشيد كان لازم تقولي ده انا وانت اكبر اتنين فيهم يعني المفروض الاعقل و الانضج و اللي بجد هيقدروا يحلوا.
رشيد….طيب ولو كنت قولتلك و الكلام مش هيخرج بينا كنتي هتحلي ازاي
ايمي….عمري ما كنت هقول انك قولتلي اكيد كنت هعرف عشري بس و هعرفوا انك قولتلي عشان انا اللي هحل و زي ما قولتلك يا رشيد انت اتكلمت مع عشري بس كلامك مجابش نتيجه لانك ملاقتش الداخله اللي تدخل بيها علي عشري و تقنعه بس انا كنت هلاقي الطريقه دي مع ليله و وقتها الموضوع كان هيختلف خالص دي حاجه الحاجه التانيه كان لازم اعرف منك لان اللي بيني و بينك كبير احنا بنتكلم مع بعض في كل حاجه احنا صحاب قبل ما نكون متجوزين يا رشيد
انت عارفني و عارف طبعي انا مش نعيمه المتهوره ولا سلمي اللي بتسكت تسكت و تغضب مره واحده ولا ايه الصغيره اللي مش هتقدر تحل ولا نادين اللي ممكن تتحرج من عشري و تواجهه بغلطه او تحاول تمتص زعل ليله.
انت كمان كان قدامك فرصه يا رشيد تقولي لما اتكلمنا عن البنات قولتلك نعيمه بتهاجم و وصفتلك البنات كلهم بس انا غيرهم يا رشيد يمكن زعلانه من عشري مش عشان كدب زعلانه لانه مفكرش و وجع نفسه قبل ما يوجع ليله زعلانه عشان سمح لنفسه بوجع نفسه بأيده طول الفتره اللي فاتت و هو مخبي حاجه وجعاه و ضاغطه عليه و في الوقت نفسه بيحاول يضحك ويرضي ليله و يسعدها زعلانه عشان حط نفسه في الموقف ده و من خوفه لا يخسر ليله بقي يلف علي الكل واحد واحد يقولهم متعرفوش ليله انت و الشباب اخواته امه ابوه و ياعالم مين تاني غيركم حط نفسه في موقف بايخ و بين ضعفه قدام الكل حتي لو انتوا كلكم قريبين منه مكانش ينفع يعمل كده في نفسه
انت عارف يا رشيد عشري لو كان جالي و قالي انا كنت خلصت الموضوع بطريقه غير كده زعلي من عشري مش من كدبته قد ما زعلانه عشانه لاني مقدره خوفه من خساره ليله و ده يأكدلي ان عشري في الوقت البسيط ده فهم طبع ليله اوي و رد فعلها من الكدب و حبها بجد من قلبه وده اللي واجعني عليه و عليها.
كان لازم اعرف منك يا رشيد كان لازم انا وانت نقعد بعقل بما اننا الكبار و ناخد موقف حاسم ونحل قبل الموضوع ما يوسع مننا كده انا اكيد زعلانه منك عسان اللي قولته ده بس كمان هديك عذر بسيط ان زي ما قولت هو صاحبك والصحاب بيداروا علي بعض بس زعلي منك يا رشيد مش لدرجه اني اقسي عليك او احملك ذنب مش ذنبك معاؤا حق في اللي بقوله
رشيد….بهدوء هز راسه معاكي حق
ايمي….يعني زعلي منك في محله ولا انا جايه عليك
رشيد….بنظره حزن معاكي حق انا اسف حقك عليا
ايمي….اوعدني انها متتكررش تاني يا رشيد
رشيد…اوعدك والله ما هتتكرر بس عشان خاطري فكي شويه انا من امبارح مخنوق يا ايمي اوي
ايمي…..ماشي يا رشيد و خلاص الموضوع اتقفل هنا و انا مش زعلانه اعتبر ان ده كان عتاب بسيط كان لازم اقوله عشان ارتاح
رشيد….طيب ارتاحتي ولا في حاجه تاني مزعلاكي
ايمي….لا يا رشيد خلاص مفيش حاجه
رشيد….طيب ممكن بقي حضن صغير انا من امبارح بحضنك بالعافيه
ابتسمت ايمي بهدوء وقامت من مكانها قربت منه وضمت راسه بحب و هو قاعد لف ايده علي وسطها وضمها
رشيد….والله ما هتتكرر اسف و بحبك اوي يا احلي واجدع ست في الدنيا
ايمي….بابتسامه جميله و انا كمان بحبك اوي و يلا قوم خلينا نشوف هنعمل ايه
رشيد….بسعاده وراحه اخيراً حاضر
……………
نعيمه….هتجنن من امبارح مش عارفه افكر خايفه عليها اوي يا نادين
نادين….بدموع انا كمان خايفه عليها و مفتقداها اوي صوتها بيرن في ودني من امبارح و جعها و نبرة صوتها و هي بتعاتبه قتلني يا نعيمه
نعيمه…..غبي غبييييي ازاي عمل كده بجد ليه متكلمش كلنا حكينا انتي قولتي كنتي مرتبطه اكتر من مره و انا قولت كنت مخطوبه و سيبته عشان ابن امه ليله قالت انها كانت مخطوبه و ايه الصغيره قالت انها كانت متجوزه و فاضل يومين علي فرحها و سلمي قالت انها سابت خطيبها هي كمان و ايمي قالت انها اتجوزت وخلعت حسان و رشيد كنان قالوا و الباقي قال انهم ارتبطوا هو نفسه قال انه ارتبط ليه مقالش ليه صعبها علي نفسه و عليها كده
نادين….لانه كان خاطب يا نعيمه في وقتها انتي عارفه انه صعبان عليا هو كمان يمكن مضايقه منه لنفس الاسباب اللي قولتيها بس كمان عشري بيحب ليله واوي كمان
نعيمه…..انا الوقت مشكلتي مش في عشري ولا حتي ان فضل و الشباب كانوا عارفين انا الوقت همووووووت و اروح اجيب اللي اسمها مريم دي من شعرها والله العظيم اللي يحكمني عليها بس ما هخلي فيها حته سليمه و هخلبها تعرف ازاي تقدر تتجرأ علي ليله انا لو كنت اعرف او عندي شك واحد فيها مستحيل كنت اسيبها مع ليله لوحدها وانزل و ده اللي هيجنني اني سيبت ليله لوحدها
نادين….انتي كنتي هتعرفي منين بس كلنا اتفاجئنا حتب عشري اتفاجئ بحقيقتها و بجد صعبان عليا
المشكله ان لما ليله كانت بتحكي حسيت من كلامها انها مقدرتش ترد علي مريم جرحتها و وجعتها و كسرتها و ليله اتصدمت و ده صعب عليها لان ليله لو ايه حصل مبتسكتش عن حقها و يمكن لو كانت خدت حقها مكانتش وصلت لكده
نعيمه…..انتي عندك شك انا واثقه علي فكره ان ليله اه زعلت من عشري لانه كدب بس هي قالت قدامنا انا لازعلانه منك انك كدبت و لا حتي انك كنت معايا وهؤ لابسه دبلتك انا زعلانه علي انك رضيت عليا اهانتي وليله مخدتش حقها يا نادين و ده اللي واجعها عشان كده انا عايزه اجيب حقها و مش هرتاح غير لو ربيتها
نادين…بطلي هبل انتي كمان ما انتي سمعتي بنفسك من فضل اللي عملوا فيها و في اهلها و حكم عليهم كمان انهم يمشوا و من كلام فضل واضح ان عشري موجوع لان ده مش طبعه انه يمد ايده علي بنت او يفضحها اكيد مش حاجه شبه شخصيه عشري اللي نعرفها
نعيمه….بس جدع برد ناري اه مكنتش طيقاه بس استجدعته و اتاكدت من حبه لليله انا عارفه كويس ان ده مش طبعهم اصلاً بس يعني انها توصل لكده يبقي هو بيحب ليله بجد
نادين…..لما كلمتوا وانا بعيط صوته كان تعبان اوي و مخنوق صعب عليا بصراحه عامل زي الطفل اللي تايه احنا مش عايزين نضغط عليه يا نعيمه حرام هو بردوا مش ناقص و انتي خفي عليه شويه
نعيمه….طيب سيبك بقي من الكلام ده تفتكري ليله ممكن تسافر الامارات بجد
نادين….معرفش انا من وقت ما كلمتك و عرفت بفكر اسافر اشوفها
نعيمه….عشري قال لو ملقهاش في دهب هيسافرلها
نادين…وانا هروح معاه هو مش هيعرف يتصرف لوحده انا عارفه كل الاماكن اللي ليله بتحبها هناك و عارفه الناس اللي ليله لسه علي تواصل معاهم من ايام شغلنا يعني لو راحت اكيد هتكلم حد فيهم.
نعيمه….طيب و ميدو هتقوليلوا ايه
نادين…هقولوا اني هسافر
نعيمه….افرضي مرضيش
نادين…ليه مش هيرضي هو عارف ان كلنا هنتجنن علي ليله وهو كمان زعلان عشانها
نعيمه….بس انا رأيي يعني تعرفيه احسن لان من حقه يعرف ده جوزك
نادين….خير بقيتي عاقله فجأه
نعيمه….مش حكايه عاقله انا اه مش طابقه نفسي ولا طايقه حد بس انتي و ايمي و ضعكم مختلف عننا يا نادين انتوا الوقت متجوزين و بلاش يبقي في بينكم مشاكل
نادين….تمام اكيد هعرفوا الاول بس نعرف عشري هيوصل لايه
نعيمه….بقولم ايه صحيح احنا مدورناس عليها في المخزن مش يمكن راحت هناك
نادين….لا طبعاً اولاً هي مش معاها مفتاح ده معايا انا وانتي بس ولو فرضنا ان معاها هو المخزن ده يتقعد فيه ده علي بعضه
نعيمه…..طيب ايه انا تعبت من التفكير
نادين….وانا كمان تعبت اوي
رن جرس الباب
نعيمه….ليله
قامت جريت عشان تفتح لقت فضل و عسال سكتت
نعيمه…اااا تعالوا ادخلوا
فضل…..عامله ايه يا حبيبي
نعيمه….بخير ادخل نادين جوه
عسال….اخبارك ايه انهارده يا نوني
نعيمه….بخير يا ميدو ادخل واقف ليه
دخلوا جوه سلم فضل علي نادين و قرب ميدو بهدوء ضمها وباسها من خدها
عسال…..انتي كويسه
نادين…الحمد لله
نعيمه….تشربوا ايه
عسال….ولا حاجه اقعدي احنا جايين نطمن عليكم و شوؤه وهنمشي رشيد كلمني وقال انه في الطريق هو وايمي
نعيمه…..ايوه ايمي قالتلي هتشوفها في المطعم
نادين….حد فيكم كلم عشري انا مش عايزه كل شويه اكلموا
فضل…..لسه ملهاش اثر بيدور خير ان شاء الله هو قالي هيفضل هناك لحد بليل هيكمل تدوير و لو ملقهاش هيرجع و هيسافر علي دبي هو تقريباً لقي حجز بكره الصبح علي 11 كده يعني يكون رجع
نادين….اااا طيب بمناسبة بقي سفره لدبي ميدو انا هسافر مع عشري
عسال…..بصلها نعممم
نادين….ميدو عشري ميعرفش اي حاجه هناك انا عارفه كل الاماكن والناس اللي ممكن ليله تلجأ ليهم و ده هيسهل كتير علي عشري دبي مش صغيره زي دهب يا ميدو يعني محتاجه وقت طويل عشان يلاقيها
عسال…..وعشري مش صغير يا نادين لو عرفتيه انتي كل حاجه او لو حتي انتي اتواصلي مع الناس دي وخليتي عشري يتقابل بيهم الموضوع هيبقي سهل و مش هيحتاج انك تروحي
نادين….طيب ولو روحت بنفسي فين المشكله
عسال…..المشكله اني معرفش يا نادين انك بتفكري تعملي كده انا بتفاجئ بقرارك ده
فضل…..نادين عشري كفايه هو هيقدر يتصرف ميدو معاه حق
نادين….لحظه يا فضل ميدو انا بعرفك الوقت اهو انا مسافرتش من غير ما اقولك
عسال….انتي بتبلغيني قرار يا نادين مش بتاخدي رأيي
نادين….طيب هتفرق يا ميدو في النهايه احنا يهمنا نلاقي ليله
عسال…..حطي موضوع ليله علي جنب انا مس بتكلم فيه اصلا انا بتكلم بناء علي كلامك في موضوع السفر انتي بتقولي هسافر مش بتاخدي رأيي ولا انا المفروض اخر حد يعرف او تاخدي رأي
نادين….بتوتر اااا اكيد لا و تمام اعتبر ان خانني التعبير انا بقولك اهو وباخد رأيك انا بفكر اني اسافر مع عشري عشان الموضوع يكون اسهل واسرع ايه رأيك
عسال….مش موافق يا نادين عشان اولاً امبارح قولتلك انتي و نعيمه هتقعدوا وهترتاحوا و شغلة التدوير علي لياه دي بتاعتنا و بما اننا بقينا في نظركم كلكم متهمين في نفس الغلط يبقي احنا اللي هنصلح الغلط ده اولاً ثانياً المفروض قبل ما تفكري في اي حاجه و تاخدي فيها قرار لازم ابقي عارفه معنديش اي اعتراض انك تسافري بس رفضي لقرارك اني مش بحب الطريقه دي
فضل…..نودي ميدو معاه حق احنا اللي هندور علي ليله و علي فكره احنا لسه جايين من المقطم و قلبنا الدنيا علي باقي الكافيهات كلها مش بس اللي عشري قال عليه محدش فينا مقصر انتوا ارتاحوا واحنا هنتصرف
نادين….انا عارفع انكم مش مقصرين ولا هتقصروا اكيد بس انا بقولك اهو و باخد رأيك
عسال…..بهدوء تمام يا عمري وانا سمعتك و ببلغك برأيي اللي انتي بتاخديه وبقولك مش موافق بسيطه اهي
بصتلوا نادين بزعل و عتاب و بدأت تهز رجلها
نعيمه….بهدوء غير متوقع نادين اسمعي كلام ميدو حقه يقبل او يرفض انتي مراته و بعدين هو قال حل حلو تقدري تتكلمب مع الناس دي يمكن تعرفي منهم لو ليله مثلاً كلمت حد فيهم و ممكن تدي عشري رقمهم لما يروح يلاقي حد يساعده يعني الموضوع بسيط
فضل….بابتسامه ده ايه العقل والحكمه دي هي دي نوني اللي اعرفها
ابتسمت نعيمه غصب عنها
نعيمه….لا بس يعني هو صح
فضل…امممم يعني لو حضرتك عملتي كده ووقولتلك لا هتسافري غصب عني بما اننا مش متجوزين
ضحكت نعيمه
نعيمه….علي فكره انتوا كلكم واخدين عني فكره غلط انا مش رخمه يعني و لا عنيده بالمنظر ده بس انا مضايقه عشان ليله ودي كل الحكايه لا قصدت ارخم عليك و لا عسال ولا علي اي حد كملت بابتسامه مستفزه بس ميمنعش يعني اني ممكن اسافر واقولك انت مالك و ملكش حكم عليا
فضل….بضحك اللللللله بردوا طيب يا ستي جربي وشوفي.
ابتسمت نعيمه
عسال….بهدوء و نبرة باين عليها الغضب نعيمه الموضوع مش تحكم علي فكره و انا مقصدش خالص اتحكم في نادين عشان بقيت جوزها
انا عارف انها مضايقه الوقت مني بس هي ضايقتني .
الباب خبط قام فضل يفتح
فضل….لنعيمه خليكي انا هفتح
نادين….علي فكره انا مضايقتكش يا ميدو انا بقولك فكره جات في دماغي و بقترحها عليك يعني باخد رأيك
عسال….بنظره حاده و نبره أحد و جاده لا يا نادين انتي قولتيلي انا هسافر مع فضل
بصت نادين علي الباب لقتها ايمي و رشيد.
نادين…..بهدوء انا قولتلك التعبير خانني يعني عادي
بصلها وسكت و قام بهدوء يسلم عليهم
ايمي…..عاملين ايه و خير صوتكم طالع ليه.
عسال….بابتسامه جمياه ولا اي حاجه اخبارك يا ايمي ايه يا رشيد عامل ايه
رشيد…بخير انتوا اخباركم ايه عامله ايه يا نودي
نادين….الحمد لله يا رشيد تعالي اقعد هنا
نعيمه…ازيك يا رشيد
ابتسم رشيد ورفع حاجبه
رشيد…اهلاً بالمجنونه التانيه
ضحكت نعيمه
نعيمه…..تعالي اقعد ايمووو
ايمي….عامله ايه يا قلبي
نعيمه….الحمد لله اقعدي تعالي تشربوا ايه
رشيد….انا عايز اشرب مايه بس و عايز طفايه
نعيمه…..طيب هعملك قهوه
ايمي….اعمليلي انا وهو
نعيمه…..طيب عسال هعملك
عسال….ماشي يا نوني
فضل …وانا يا فضل
عسال…..تمام
رشيد…..ايه الاخبار
ايمي…..في ايه بقي خناقه تاني و لا صوتكم ده بتجربوا
عسال….لا يا ستي مفيش خناق ولا اي حاجه
ايمي…..امال مالك متعصب ليه ده انا اول مره اشوفك كده عملتي ايه
بصتلها نادين وسكتت
فضل…..مفيش حاجه خلاص بقي نقاش عادي
ايمي….امممم طيب شاركوني فيه اصل ميدو نادراً لما بشوفوا متعصب بصراحه فا عندي فضول اعرف ماله ايه يا نادين سر و لا ايه
نادين….ااا مش سر يا ايمي هو اللي متعصب
بصلها عسال بنظره قويه و سكت
ايمي….ابوه متعصب لانه بني ادم انت مش من بني البشر ولا ايه يا ميدو بصت لنادين عادي انه يتعصب بس اكيد في سبب هو مش مجنون يعني
نادين….نفيش فضل قال ان عشري لو ملقاش ليله لحد بليل هيرجع و هيسافر علي دبي علي طول وانه لقي طياره هتطلع بكره الساعه 11 الصبح فا انا قولت لميدو اني هسافر لان يا ايمي دبي كبيره مش صغيره يعني هو لو راح مش هيعرف يروح فين او يبدأ منين لكن انا بحكم اني كنت هناك و ليله كانت معايا فا عارفه هي بتحب تروح اماكن ايه بتحب فنادق ايه لو هتقعد في استديو هتكلم مين يأجرلها يعني معارفنا واحده وانا اعرفهم كويس فا قولت اسهل الموضوع علي عشري
رشيد…جميل
نادين….لا مش جميل هو ميدو اتعصب وبيقولي بتبلغيني و بتاخدي قرار من نفسك وانا مقصدتش كده
عسال….نادين انتي مكنتيش بتاخدي رأيي علي فكره انتي قولتي بالحرف انا هسافر مع عشري
نادين….خلاص هتفرق يعني المصطلح ضايقك
ايمي……طيب اولاً مفيش سفر لا ليكي ولا حتي لعشري عسان عرفنا الوقت ان ليله مخرجتش بره مصر
جات نعيمه من جوه بسرعه
نعيمه….عرفتي ازاي
رشيد…جوز تختي ليه واحد صاحبه تخوه بيشتغل جوه في المطار و ليه معارفه يعني لما اتصلت اخد منك بياناتها كانت عشان كده
نعيمه…..يعني بجد اكيد مسافرتش
رشيد….لا مخرجتش بره مصر وولا عتبت المطار اصلاً يعني ليله هنا في مصر جايز تكون ناويه تسافر او جايز تكون ناويه تروح مكان معين و مفيش لسه رحلات منعرفش بس لخد اللحظه دي هي هنا
نعيمه….طيب الحمد لله
ايمي….طيب خلينا بقي في نفس الموضوع تاني خلصنا من موضوع السفر انتي بقي غلطانه هو اللي صح
نادين….ايمي انا عايزه الاقي ليله واطمن عليها و بعدين انا بعرفه مسافرتش من وراه
ايمي….ده جوزك يا نادين يعني تستأذني تتناقشي تاخدي رأيه يعرف هو الاول وبعدين احنا نعرف قرارك او رايك في الموضوع لكن تقوليله الوقت انا مسافره مش صح
نادين….هو انتوا ليه مكبرين الموضوع كده هو انتي لو قولتي لرسيد انك هتسافري عشان تدوري علي ليله لانك خايفه عليها رشيد هيرفض
ايمي….مش هيرفض و مش بعيد يجي معايا بس انا مش هعملها يا نادين هاخد اذنه و هسأله إذا كان ينفع ولا لا لو وافق هعمل كده موافقش خلاص في كل الاحوال اناهستني موافقته لانه راجل وجوزي و من حقه يرفض او يقبل لو رفض هسكت وهقعد و مش هضايق فهمتي
ابتسم رشيد بهدوء و قلبه بقي يدق بعنف .
نادين….ايمي هو قال لا علي فكره و انا سكت
ايمي….ايوه سكتي لانك انتي عارفه انك مش هتعملي كده غير بموافقته بس كمان سكتي وانتي مضايقه وشايفه انه مأڤور وهو معاه حق
نادين….يعني انا اللي غلطانه الوقت
ايمي….اه غلطانه يا نادين
عسال…..ايمي خلاص حصل خير المهم الوقت ليله اكيد هنا
ايمي….اه مسافرتش زي ما رشيد بيقول جايز تبقي ناويه تسافر بس هي لسه منفذتش قامت نادين و دخلت علي البلكونه بصتلها ايمي بطرف عينها وهي بتتكلم و كملت كلام اااا المهم الوقت نحاول نوصلها قبل ما تنوي
فضل….بابتسامه مش عارف ليه حاسس ان هي خدت الباسبور عشان لو عشري عرف يفضل يلف حوالين نفسه و تنتقم منه
ايمي…انت بتقول فيها مش بعيد ده مش بعيد كمان تكون قريبه مننا و شيفانا بنلف حوالين نفسنا و بتتفرج مجنونه و تعملها و بعدين هي مستحلفه لعشري اكيد عيزاه يتجنن
فضل….والله لو ده هيرحها بس ترجع والامور تهدأ بينهم تعمل كده براحتها.
ايمي بصت لعسال و ابتسمت
ايمي….خير عماله انا اهدي فيهم من امبارح تتجنن انت يا عاقل
عسال….ايمي انا علي اخري بجد عندي الف شعور جوايا و متلغبط مش طايق عشري عشان كل اللي وصلنا ليه ده بسببه و في نفس الوقت هموت عليه لاني بردوا عارف ان اللي عملوا ده كان غصب عنه و عارف انه هيتجنن عشان ليله مش معاه. وقلقان و خايف علي ليله و في نفس الوقت مضايق من نفسي عتاب ليله ليا امبارح وجعني حسيت انها مكانتش متوقعه ده مني انا بالذات بس غصب عني
ايمي….معلش ليله بتحبك اوي عسان كده صعب عليها نفسها مش اكتر
عسال….عارف والله و مش زعلان انا زعلان عشانها حسيت من نبرتها انها اتخذلت فيا
رشيد…لما تهدأ اكيد هتعرف انه مان غصب عنك قوم يلا روح شوف مراتك متزعلهاش
قربت نعيمه بالقهوه
نعيمه…متتأخرش عشان قهوتك متبردش
دخل ميدو علي نادين البلكونه وقف جنبها كانت واقفه مضايقه
عسال…..و بعدين بقي قمصه العيال دي علي فكره انتي اللي مزعلاني
نادين….علي فكره انا مزعلتكش انت اللي فهمتني غلط و بعدين انا متوقعتش انك تزعل او حتي ترفض
عسال…..ليه عشان بوافقك علي اي حاجه تمام معاكي حق بس في حجات يا نادين لازم يكون ليا رأي فيها وانتي لغيتي رأيي
نادين….انا قولتلك و كنت باخد رأيك
عسال….لا يا نادين انتي قولتي مسافره يعني بتبلغيني قرارك اللي هو انا هعمل كده
نادين….طيب و حتي لو هو احنا المفروض يعني في بينا ان حد يرفض طلب حد
عسال……انا جوزك يا نادين و لا نسيتي اكيد لازم اعرف و اكيد لازم اوافق و اه المفروض يكون في بينا موافقه ورفض ده الطبيعي خصوصاً لو الموضوع امر واقع انا قاعد نع فضل و نعيمه بسمع منك قراريك زيي زيهم مع ان انتي عارفه كويس بنا اني مش برفض ليكي اي طلب لو كنتي اتكلمتي بيني وبينك و قولتيلي قرارك ده مكنتش هضايق وهوافق و لو عرفت اجي معاكم هاجي معرفتش هسيبك تروحي مع عشري بس انتي فاجئتيني و كمان مضايقه و طبيعي اتعصب حقي ولا لا
نادين….بس انا مقصدتش
عسال….طيب ردي حقي ولا لا
نادين….حقك بس انت اتعصبت عليا علي فكره و بعدين انا مش واخده عليك بتتعصب كده
عسال….عشان انتي اللي عصبتيني كنت بتكلم بهدوء و انفعالك هو اللي ضايقني
بصت نادين علي الشارع و هي مضايقه
ابتسم بهدوء و مسك كفها باسها
عسال…..حقك عليا
نادين….بابتسامه بسيطه خالص علي فكره كمان بتصلي بطريقه يعني خوفتني منك
عسال…بضحكه جميله مني انا انا مبخوفش خالص و بعدين مقدرش اخوف بنوتي القمر و روحي
نادين…..ميدو
عسال….عيون ميدو
نادين….بلمعه دموع ليله وحشتني اوي
ابتسم بهدوء
عسال….عارف و وحشتنا كلنا بس هترجع قريب و بطلي عياط زي الاطفال
نادين….طيب ممكن اطلب منك طلب
عسال….عيوني
نادين….ممكن لو عرفنا انها سافرت نروحلها
عسال….بضحكه جميله حاضر هنروحلها و اتمني بعد كده اي حاجه تخطر في بالك اعرفها و متفاجئش بيها زي زي اي حد تاني اتفقنا
نادين….حاضر
عسال….يلا تعالي الجو برد و اقفلي السوسته دي هتبردي
مسحت دموعها بضهر كفها
نادين…مش عارفه السوسته دخلت في القماش مش راضيه تطلع او تنزل
حطت السيجاره في بوئه و مد ايده مسك السوسته بقوه فتحها و بعدين رجع قفلها كويس
عسال…..يلا يا حبيبي
مسك كفها ودخل بيها علي جوه.
فضل…..صحيح هو حسان فين
رشيد…معرفش مكلمتوش انهارده
عسال….انا كلمته مردش
رشيد….يمكن سهر و نايم بس هو متصلش مختفي من امبارح
نعيمه…..هو عشري عرف ان ليله مسافرتش
رشيد…اه قال هيكمل تدوير عليها و يرجع لو ملقهاش .
……………..
الوقت كان بيجري بسرعه البرق و في نفس الوقت تقيل علي الكل واولهم عشري خلص اليوم و بدأ عشري رحلته في الرجوع بعد الفجر و بعد ما فقد الامل يلاقيها في دهب مكانش ليها اثر.
وصل علي الساعه عشره الصبح تاني يوم بس ولا راح البيت و لا كان عايز يرجع هناك غير لما يلاقي ليله و لما مريم تمشي هي و اهلها عشان غضبه كان اسوء من الاول بعد ما امله ضاع في انه يلاقيها في دهب كان عارف انه ممكن يرتكب مصيبه.
طلع علي المقطم و راح علي الكافيه اللي مانوا فيه مع بعض قعد و بقي عامل زي الاطفال بيظور بعينه في كل مكان و عينه علي باب الدخول كأنه مستنيها تدخل عليه في اي لحظه
فضل قاعد ساعه تجر ساعه عينه عامله زي الدم من قلة النوم و الاكل والارهاق يوم بحاله مره و جه تاني يوم وهي ملهاش اثر مبتفتحش الموبايل مش بتشوف رسايله محدش يعرف عنها حاجه الكل بيتصل بيه هو كأنه طوق نجاتهم و هما مش حاسين انه غرقان و مش عارف لا يريحهم ولا يريح نفسه .
مسك موبايله للمره اللي مش عارف بقت كام و سجلها ڤديو تاني لكن المرادي بصوت طالع بالعافيه من التعب.
عشري….تعبت يا ليله يومين مدوقتش فيهم النوم من التعب مبقتش حاسس بجسمي انا رجعت علي القاهره و جيت علي المقطم مش عارف بقالي كام ساعه قاعد كده بس الشمس قربت تروح و هندخل في اليوم التالت انتي قولتيلي يا ليله لما تزعلني هتلاقيني مستنياك في اي مكان كان ليه ذكري حلوه بينا ملقتكيش في دهب و لا لقيتك في المقطم و اتصلت بناس كتير في السخنه يحاولوا يعرفوا انتي في اي مكان هناك ولا لا و ملكيش اثر .
طب قوليلي بس انتي حصلك حاجه شيطاني مش راضي يبطل تفكير لما دمر عقلي قالي اكيد بسببك و بسبب وجعك ليها كانت سايقه بسرعه و حصلها حاجه ليله انا دورت عليكي في كل مكان جمعنا سوا و كل مكان اخواتك والبنات قالوا عليه و عرفت انك مخرجتيش بره مصر لو عيل صغير قالي ادور عليكي في مكان معين هسمع منه و هدور عليكي يمكن يكون معاه حق بس انا مبقاش قدامي غير اني اشوفك في المستشفيات و دي بالذات قلبي مش مطاوعني اعملها و لا قادر اخد الخطوه دي اوعي يا ليله يكون جرالك حاجه مش هعيش بعدك لحظه انا كده كده حياتي وقفت من الثانيه اللي خرجتي فيها بره بيت ايمي و رشيد يعني مش فارقه
مكانش لازم اسمع كلامهم واسيبك تهدي كان لازم اخرج وراكي كان لازم الحقك مش مهم تهدي المهم اني ابقي جنبك ليله انا بموت من غيرك طب انا و راجل وسخ و زباله و غلطت و كداب و خاين يا ستي .
طيب انتي قلبك مفيهوش رحمه عليا يا ليله حتي لو شويه ده ربنا بيغفر يا ليله و بيصعب عليه الناس ازاي قلبك طاوعك تدخلي علي اليوم التالت من غير ما تسمعي صوتي طيب افتحي الموبايل اشتميني زعقي سمعيني اوسخ كلام انا راضي بس اطمن اقولك قوليلي مش عيزاك و نفذي و انا هسيبك براحتك بس علي الاقل ابقي جنبك بشوفك بسمع صوتك عارف انتي فين بخير ولا لأ طيب هو احنا مش في الاصل كنا صحاب يا ليله صاحبك بيموت من غيرك فين حق الصحوبيه عليكي انتي مش جدعه يا ليله ولا بميت راجل و لا صاحبه صاحبها انتي طلعتي بوء يا ليله
و ديني يا ليله لا هطلع عليكي وجع قلبي ده كله لما اشوفك مش انتي قولتي اني بجح اه انا بجح غلطان و مش هرحمك عشان اللي انتي بتعمليه فيا الوقت اوسخ من اللي انا عملته انا جرحت قلبك يا ليله بس انتي مسكتي قلبي و عصرتيه قلقان عليكي و بموووووت يا غبيه اوعي يا ليله يكون جرالك حاجه و حيات ديني حتي لو موتي هطلعك من قبرك وهموتك تاني وتالت بأيدي
بعتلها الڤويس و هو خلاص بيموت حط ايده الاتنين علي راسه و هو مش قادر يسيطر علي الوجع والنغزه اللي في قلبه رجع مسك الموبايل تاني
عشري…..طيب انا عايز اسألك سؤال انتي حاسه يا ليله بنفس وجعي اصل انا حاسس اني بموت الوقت قلبي مش تمام يا ليله لو جرالي حاجه هتصدقي اني فعلاً كنت بموت
اوعي يا بلطجيه تكوني حاسه بنفس الوجع و بدل ما تكوني بتعاقبيني تبقي بتعاقبي نفسك معايا هتموتي مني و انا مش هسامحك بحبك يا ليله اوي اوي
بعتلها الڤويس و خانته دموعه لاول مره حاول يمسحها قبل ما اي حد يشوفه وهو متدمر بالشكل ده.
و فضل الوقت يعدي لحد ما بقت الساعه 12 لا هو رجع ولا لقاها و الكل كل ثانيه بيتصل عليه لحد ما انفجر في فضل.
فضل…..ايوه يا عشري فينك
عشري….بغضب فضللللللل انا مش عابز مخلوق يتصل عليا تاني سيبوني في حالي ارجوكم لو لقيتها هتصل متصلتش يبقي انا لسه ملقتهاش ارحمني يا فضل و عرفهم كلهم محدش يضغط عليا انا بموت يا فضل سامع بمووووت
قفل في وشه التليفون و فضل زي ما هو قاعد مستنيها تدخل في اي وقت يمكن تيجي .
اتصل فضل طبعاً علي الشات بتاعهم و عرفهم اللي حصل كان شايف عشري الكلام بيظهر قدامه و هو ساكت مش بيتكلم.
قام خرج من المكان و قعد في عربيته بس فضل قدام الكافيه
فتح تاني الشات بينه و بين ليله كان طول الوقت بيكلمها و بيبعتلها عايز يحس انها معاه.
عشري…..ليله مش عارف اروح فين حاسس اني محتاج انام و مش قادر اروح البيت طيب اعمل ايه قوليلي انا في الشارع قاعد في العربيه طيب ادور عليكي في المستشفيات من غير ما اعرفهم و اخوفهم عليكي طيب ما انا لو عملت كده مش هقدر ابقي لوحدي خلايا عقلي بتدمر يا ام قلب جاحد ارحمي امي يا ليله ربتيني خلاص اعملك ايه تاني كمل بغضب و صوت عالي جداً ردددددددددددي ردي عليا وصلتي لللي انتي عيزاااااااه ارجعي بقي بقولك ربتيني و اتذليت و اتوجعت عايزه ايه تاني ارجعي يا ليله يا ليله انا بوووووووت انا عشانك فضحت بنت يا ليله فضحتهااااا قدام الكل طلعت مره مش راجل يا ليله و دي حاجه عمري ما فكرت اعملها بس عشانك مستعد اعمل اي حاجه عايزه ايه تاني هااااااا اروح اقتلهاااا هو ده الاذي اللي حذرتيني منه يا ليله طب لو عرفتي اني مقبوض عليا هترتاحي نار قلبك هتهدأ هترجعي هعملها لو هترجعي ما انتي بتقولي عليا مسجل خطر خليها تبقي فعل كمان..
ضميري مموتني يا ليله عشان عملت كده و فؤ نفس الوقت النسخه الوسخه اللي جوايا و طلعت عشان ترد كرامتك فرحانه و بتقولي انت صححححح
سكت تاني شويه و كمل بهدوء.
انا مقولتهاش غير ليكي يا ليله والله
ممسكتش غير ايدك مسهرتش للصبح في التليفون غير معاكي مبوستش غيرك عملت معاكي انتي كل حاجه و معملتهاش مع غيرك
انا بحبك يا ليله انا اصلاً مش عارف انا ليه ببعتلك و بتخانق وبتعصب انتي اصلا مش فاتحه و رسايلي مش بتوصلك طب افتحي عشان خاطري انا واثق ان لو سمعتيني هصعب عليكي يا ليله والله هصعب عليكي و قلبك مش هيسمحلك تعملي فيا كده
بعتلها الڤويس و سند راسه علي الكرسي بوجع و غمض عنه من كتر التعب و كفه ماسك الموبايل بقوه.
وللحديث بقيه…
